نقيضان التقن هالليله بيه
دمع حسره نزل واصفگ بديه
يمهدي اليوم بلكي تمر عليه

وبچفك تلزم چفيني

بحواسي الخمسه كلها رايد انخاك
بشاره انطيني يمته نلتقي وياك
بيوم اصيارك انه ابچي اعله فرگاك

چا يمته نشوفك ويانه

لــ صاحب الزمان

وسادة نومي گامت تنشد اعليك
منو هذا التكتبه فوگي عاده

گد ما كتبت اسمك فوگ الفراش
وساده تغار ضلت من وساده

وذا يشغلني شاغل يوم مولاي
اذكرك كل صلاة وكل عباده

حرز اسمك بعدني عن الاذنوب
على گلبي البست حبك گلاده

ومن ساعتها صار اعليك محسود
على باقي الجسد ماخذ سياده

ولساني اتعود ايناديك كل يوم
يحس بقيمته لو بيك ناده

حس لمن يلفظك ابيض ايصير
الچان امن الگلب ماخذ سواده

وعقلي الما مشى براي الگلب يوم
هلمره مشى وغير عناده

مو بس ولي شافك شافك انسان
للماعنده اراده اتصير اراده

للضيع طريقه بوصله اتصير
وخط رجعه صرت للذنبه گاده

يـ اول حب جمع العقول وگلوب
يـ اول بشر كلشي البيه راده

موش اليندبك تگضيله حاجات
اليفكر بيك بس تنطي مراده

الينخاك اعلى گطره انطيته شلال
تنطي الراده وچماله وزياده

وحگها اوسادتي لو نشدت اعليك
منو هذا التكتبه فوگي عاده

اترف من گطنها تحس بالاحروف
لذلك بيك محسوده الوساده

اللهم عجل لوليك الفرج

ولادة علي الاكبر ع

فرحه فرحه فرحه الاكبر اجه بهالليله
جنحه جنحه جنحه وگلب الحسين وحيله

اجه الاكبر ضوه الديره
هلا بفرحتنه الاچبيره
***يافرحت گلبنه .. ويابلسم جرحنه
بصيارك اجينه.. ويه اهلك فرحنه

فرحان بجمالك .. الحسين واجالك
بالبسمى تعنى ... وبچفينه شالك

ليل عدكم مالگينه
النجم يمك طفت عينه
صبح طشيت بصيارك
منوره بيك المدينه

بسمه بسمه بسمه هالليله ترست دارك
نعمه نعمه نعمه لحسين اجت بصيارك

اليشوفنك بقى بحيره
هلا بفرحتنه الاچبيره
*مولانه يالاكبر ... من كلشي انت اكبر
انت روح الحسين.. بيك الساده تفخر

وجهك يا حلاته ..واسمك ياغلاته
وحيدر جدك انت .. ماخذ كل صفاته

حسين من شافك تباها
الراحه بعيونك لگاها
احتار شيناديك الاحسين
علي مره ومره طه

جده جده جده انت صرت من تالي
عنده عنده عنده انت العزيز الغالي

وتباها بيك ابو الغيره
هلا بفرحتنه الاچبيره
**متروس انت شيمه.. للفرحه انت خيمه
وبكل السماوات.. وجهك احله غيمه

بمهدك من يجونك .. چن ماي انت لونك
اهلك حارو بهاي ...بيش ايگمطونك

نهر چنك ماي يجري
حسين گلك لون تدري
يا وليدي انت روحي
وانت چبدي وانت عمري

يمه يمه يمه ماتبعد اعلى احسينك
همه همه همه ينزاح لو صد عينك

اليصعب انت تفسيره
هلا بفرحتنه الاچبيره **ياصوت البلابل ...ياطول السنابل
السنبل انت الاول .. تسجدله المناجل

بدارك فرحه نازل.. وعمتك بالهلاهل
تتبارك اجتك .. وياها ابو فاضل

الحسن متعني بدلاله
يم ابوك اتباركـــاله
بردت الگهوه بصفنته
وصاح الله يا جماله

گهوه گهوه گهوه راح المرار البيها
فدوه فدوه فدوه يم عينه الا اچفيها

وشوفه ما رضه ايديره
هلا بفرحتنه الاچبيره

العقيله ع

لاتجوني خايفه اعليكم تموتون
لاتجوني ماكو امان ولا تگصدون
لا تجوني تعوَدت عالغربه ام عون

تعودت ابقى وحيده
الشام رد و رد يزيده
ميته هم يسبوني رادو
والشمر رد سوطه بيده

لا تجوني وين اگعدكم يزوار
لا تجوني بمرقدي فرهودهم صار
لا تجوني روحو گصدو حامي الجار

مني وصلوله سلامي
خل يجي ويحمي مقامي
ردوا بگبري سلبهم
إلگبل سلبو خيامي

لا تجوني وادري مشتاگين الي هواي
لاتجوني من بعيد ابچولي بهداي
لا تجوني بس رقيه ضلت وياي

كل سنه تحسب بديها
تنتظر موكب يجيها
تحسب احساب لوفاتي
واليجيني يروح ليها

لاتجوني. كلمه صعبه وتجرح احساس
لاتجوني. گوه عني احچيها يا ناس
لا تجوني. روحو سألو عني عباس

السبي الهسه جراحه
ميته بس ما مستراحه
بس شهر باقي الوفاتي
بصحني ما اسمع مناحه

يمته يمته. واسمع الوادم يصيحون
يمته يمته. المنتظر متعنّي لام عون
يمته يمته. هم تجون اوياه تزورون

ادعي تعجيل الظهوره
يمته وايشع بينه نوره
والصحن يرجع حمامه
من يجي المهدي يزوره

ام البنين ع

گرب يوم المنيه بروحي حسيت
مقصره شلون بفراشي انه ضليت
گبل لتجبّلوني بصوت ناديت
اخذوني ارد اموت بصحره مو بيت

ما تدفنوني تلث ايام اريدن

بموتي كون اواسي ابني الحسين
وانه اشناطيه بس اربع ابنين
صدگ ربيتهم بس ضل علي دين
مو انا النطيت چفوفي والعين

بروحي اوفّيله بلكي يرضى عني *ماريد اندفن يم اهلي ماريد
لـتخلونه گبري يم الاجاويد
ببلاد الغرب دفنوني وابعيد
گبري ريت كون ابديرة ايّزيد

لزينب اخذوني ارد احرس گبرها *يا حفار گبري ويالتدفنون
اهواي تراب فوگي لا تخلون
گبور اهل النبي اليمي يصيرون
اعله مني اريدنهم يبينون

من عمت عيني ماعدهم مراقد
**ماريدن عزاء اعليه تقرون
البچي اعلى حسين موش اعليه تبچون
اوصيه ارد اوصي يالتعزون
لغير احسين لاتبچي الكم اعيون

وحسره بعيوني ماشبعت بواچي **

بالدنيا طحت وضيعت
بصحره وشمس امشي وتهت
مو عيني گلبي الي انعمه
بلون الذنوب اتلونت
ضامي آنه وشفتك نهر
بحمولي يمك خيمت
راح الضمه وشفتك بعد
عن الشمس غيمه صرت

بذنوبي جيتك يمك يغالي
حبك طهاره وثوبك حلاَلي
خليتك ابكل فكري وخيالي
وحالي تغير مو نفسه حالي

***منين اوصُفك يابو الحزن
من الفگد لو من عطش
ودعته الاكبر من مشى
وبضهره مو ماي الترش
من كلبگ اچفوفك خذت
دم وعلى اجدامه تطش
وگبل اختك ابموت الولَد
عشت الجرى بليل اهدعش

بس الله يدري شصار بوكتها
يم ابنك انت روحك عفتها
بس فززتك زينب شفتها
امن الخيمه طلعت وانت الحگتها

**يالخوَتك تنشد علگ
رمز الوفى بچف الدهر
عشت الفگد صاحب وابو
وگلبك خلَص من القهر
صحبانك احزام اهمه الك
راحو لچن عندك ضهر
وبلا ضهر تركض رحت
من طاح اخوك اعله النهر

جرح ابو فاضل اصعب جروحك
وحدك بقيت شضل الها روحك
سهم المنيه ردته يلوحك
شفت الشماته يسمعونه نوحك

**من اسمعت بيك شجرى
شويه الك شفته الدمع
عشت الجروح العد هلك
وتضاعف اعليك الوجع
حيدر صدك راسه نطبر
وطبراتك انت تنسمع
امك ضلع عدها انكسر
بس انت مدري شجم ضلع

بچبد الحسن سم بس انت عندك
سهم المُثلث صاباها چبدك
فوگ المصايب هاي انت وحدك
طايح غريب وماكو اليوسدك
**حبيتك انه حب بچي
وبيك اختَلف معنى الفرح
اليبچي يسعد فاطمه
المايبجي كلشي ماربح
بروحك يمن عشت القهر
بس الله يعلم چم جرح
صبراً متت موتك صعب
غير السحگ غير الذبح

ع التربه طايح وتصد أمامك
العسكر تشوفه يحرگ خيامك
والغيره گامت تاكل عظّامك
كل ماتگوم تطيحك سهامك

ابلايه راس اعله الترب**
بس عذبك ذبح الولِــد
عبدالله نحره چن ورد
شجاب الخناجر للورد
جوه التراب وما خلص
رجعو يذبحونه بعد
زغيره رگبته وبالذبح
الخنجر يروح وما يرد

عبدالله بعده باذنك عويله
من يبچي الك جابته العقيله
ماكافي نبله وگفت دليله
نفس الرمح ليشيلك يشيله

الزهراء ع

ويه اخواني اسمع صيحه بالدار
دخنه ونار بس مانعرف الصار
كلنه بركضه وحده اركضنه عالباب
ضاعت أمنه بالدخان والنار

وين نلگاها صحت يخواني أمنه
****ماضل حيل بيها وتمشي الاجدام
علي يابو علي وامشينه جدام
شفنه على الجدار الباب مطبوگ
فوگ الباب اثر ومدافع ازلام

الباب محروگه چا وين الزجيه

يم الباب صرنه وما مأمنين
وينچ يمُه صحنه فاطمه وين
عاينت وشفت من عتبت الباب
دم يمشي ووصل يم جدم الحسين

الدم شغل بالي چن دم الحبيبه

بعين احسين شفته لاح المصاب
من شاف الدمه من عتبت الباب
عاين وامي شافاها على الگاع
وحده من أديها كاضه احجاب

وأيد مفتوحه بيها دم ابنها

گوه اتچر نفسها الزهره بأهات
وتلولي بأبنها والولد مات
التمينه على امي ونسمع الصوت
تعبانه وتردد يمنه چلمات

من الدمه اگماطه هذا اول طفل

استشهاد الزهراء ع

گومي اگبالي زينب إمشي فدوه
خل انظر مشيتچ خطوه خطوه

وحدچ كون تمشيين
وانتي ابلايه الحسين

خل انظر مشيتچ خطوه خطوه ***امشي يمه گبال عيني فدوه اروح المشيِتِچ
لا تنشديني اعله دمعي لو نزل وي وگفتچ
ليش خجلانه يزينب رجفه اشوف بشيلتچ
ابيتچ انتي ومن گلتلج امشي ثگلت خطوتچ

هايه مشيتّچ مشيت اميره
بيچ اشلون من تمشين اسيره

ويمچ روس ميتين
وانتي بلايه الحسين
**ليش من گلتيلي امشي وحدي وآنه مدلله
ياهي ليمشوها اسيره وشنهي بيها كربله
احسين گلتيله على وجهك نام عندچ مسأله
تالي صحتيلي يزينب ذاك اخوچ وركضي اله

ليش اركض لأخوي وهوه يمي
مامتعوده تركض يمه جدمي

واسمعچ من تونيين
وانتي بلايه الحسين **لا تنشديني يزينب والله ياذيني النشد
شرد اجاوب وبمشيتچ منمرد يُمه الچبد
بالله زينب ذاك اخوچ وجربي صيحي من بُعد
ارد اشوفچ من يسمعه صوتچ اعليه مايرد

تله ابيتي ماكو حته اشوفچ
تصعديها وتاشرين ابجفوفچ

ترا باچر تركضين
وانتي بلايه الحسين *يمه لاتبچين هذا بس حچي وبعده الفعل
شلون لو باچر نظرتي حسين يمچ ينچتل
زينب اتحمليني يمه بس بقه طاري الهزل
بشيلتي خ انشد چفوفچ باجر يچتفج حبل

امشي وخل اشوف بعيني الحال
امن تعثرين وانتي مچتفه بحبال

صعبه من تعثرين
وانتي بلايه الحسين
**يمه گولي ابموت اخوتي مصيبه يحملها الگلب
بس عزيزة گلبچ آنه اشلون امشي ويه الغرب
ما اطب ديوان اهلي من الزغر عندي صعب
شلون ديوان الشماته امچتفه بنصهم اطب

اهلي واخجل امشي بنص نزلهم
يمه اشلون اطب مجلس قصرهم

مو ليه الدواوين
وانتي بلايه الحسين *كون لو هاي السوالف باچر ايصيرن صدگ
گلبي گبل اخيامه يمه من كلامچ محترگ
شلون. راح احملها انه عن الاحسين افترگ
ليش مو من هسه اموت وياچ لا گلبي يدگ

موتي ارحم اشوف الدنيه صعبه
لا تالي اندفــن ببــلاد غــربه

اموتن من تموتين
وانتي بلايه الحسين

وصية الزهراء ع

يـ ام كلثوم انه .. الچ عندي اوصيه
من اموتن باچر.. لو لفت الـ امنيه
خلي بالچ يمُه .. على زينب هيه
ما تحمله فراگي.. تموت بنتي اعليه

ابنيتي وادريها حنينه
لون غاد اتفارگيــنه
تنكسر وتموت سكته.. اعلى المصيبه

تبچي حد ماتغفه فوگاي
وتنتظرها امصــايب هواي
عگبي تگضيها بواچي .. تضل غريبه

يمه اريدچ تصبرين عليها
عگبي زينب ترا يبدي بچيها
چم مصيبه تمر ابنيتي باچر
تبدي لمــن تفَارگ وليها

على الطف اوصيـتي.. عاليصــير اباچر
اصعب من افراگــي.. اعليها يــوم العاشر
اخوانها يموتون يمها.. تشوف شي ماصاير
بنص خيمها وتسمع.. صوت سحگ الحافر

تكــثر اعليـها الجوارح
من تشوف احسين طايح
امن الخيم للتله تركض ..والچبيره

تصعد اعلى التله گوه
بكل جدم بتراب تهوه
تصيحله وماينهضلها.. شلون حيره

تنادي خويه انهض الحگ خواتك
حـــياً ان كنــُت ادرك بنـــاتــك
لو متت يعني اضلــن وحيــده
لولــيت الجـيش تضل مدللاتك

تخلص من العاشر .. والسبي ايتانيها
على افراگ اخوتها.. بدمعتچ واسيها
احنينه ادري بزينب.. والحچي يأذيها
چلــمة المســبيه .. حاولي تبعديها

هاي بت حيدر اميره
باچر ايمشوها اسيره
مخدره وبحبال صعبه ..يچتفوها

مدللت والدها هيه
باچـــر تـــمر برزيه
تحدي بيها ازلام غربه.. يعذبوها

غــطي صــوت اختـچ انتي بعبايه
مستحى اتموت اذا تحچي احچايه
زينب الـ ما ضوه شايف مشــيها
من تــمر ديره صاحــو هيه هايه

بعد عندي احچايه.. بالخــرابه وليــلها
بــلا سگف وترابه.. وكلشي يهضم بيها
جرح سوط الحادي.. مــن تچن يأذيـها
يـ ام كلثــوم انــتي .. گعــدي وتچيلها

بلكــي تغفى اعليچ زينب
من السهر حيل اهيه تتعب
تكضــي ليلــتها حــراســه ..اعلى اليتامه

تحــاذر وما ترضـى تغفه
لان يمــها اعيــون صلفه
تگضي ليــل اليــسر كله ..مــا تنـامــه

بس بچـــي تگضي ذيچ الليالي
ويمــها برمـاح تشوف الغوالي
وانه اجي ابچي لحسين وعليها
مــن تناديــني يمــه تعـــالي

المحسن ع

يابزر دمعتنه يوليدي
مالحگت اويانه تگعد
يا جرحنه الاول ابيتي
مني اول روح تبعد

وين رايــح يمــه عني
خــذت اول روح مني
حضني چان ايتاني طولك
وهسه باقي بوحشه حضني

ازغير موتك مابرالك
بعده ماكامل جمالك
مدلل يسموك اخوتك
متت ماضايگ دلالك

چنت اخاف اعليك من دگت الگلب
تالي يبني اتموت بسياط الغرب
متت بيه ولازم انه اعليك اموت
كسري هين چان فرگاك الصعب

يا محسن يا يمه
*حيل من بالباب دفعوني
انكسر ضلعي وبالي يمك
دم بأديه شافته اعيوني
دمي هذا مدري دمك

طاح دمــك ويه دمي
شلون احضنك صار همي
خوفي من ضلوعي نزفك
وشفتك انه وزاد هضمي

من ســطر عيني ييــمه
بعيني احس الدنيا ظلمه
طــاح دمــك منـي وانه
دنگــت بيديــني الـمه

خلص حيلي اعليك وبدمك الم
گوه اجر انفاسي من گد الالم
دمه طولك يا گبر يرهم عليك
ادفنتك ابعيني مثل دفنت حلم

يامحسن يا يمه
**يازغير اخوانك بعمرك
بس جبيره احزان موتك
سفرتك من گلبي لگبرك
مالحگت تشوف اخوتك

يبني ياجرح العشيره
انته فاتحتي الچبيره
مالحگت اتشوف اختك
هايه لنسميها اميره

جنت احسبك كافل الها
اتصير اخوها انته واهلها
بس كفلت اجروحها انته
بموتتك يبدي حزنها

يمه من هسه بدت اختك تون
انت من اخوتها جنت اول حزن
گوم باجر تبقه معتازه لاخو
من يموت احسين ويموت الحسن

يامحسن يا يمه ***انه بيدي مخيطه ثيابك
اسهرت جم ليله عليهن
تالي صارن چفن بمصابك
الخاطه اسمك يمه بيهن

امــك اتانــيك جــانت
چنت اگل الروحي هانت
رحت تالي وعفت حضني
چــم دللــو بـيه ماتت

جنت ارسمك وانت تكبر
تمشي يمي تگوم تكدر
چنت احلم يمه اعلمك
شلون يم احسين تزغر

جنت اريدك تكفل اخته وكل هله
وجنت اريدك تحمي ضهره بكربله
وكون من الخيــل تتراكض عليه
اتصير فوگه وتنسحگ فدوه اله

يامحسن يايمه