سانکی کدر منیم یوخ،
من کدرینکی ایدیم.
نئچه گوندوز ائدیردی،
باغریمی دیدیم-دیدیم.

اوره‌ییم سؤیله‌دی کی:
«صاحیبی اول بونون سن!
آخی بیرجه سنه یوخ،
دوستلارا دا توخونور.
اونلارین شاد گونونو،
بیردن یاسا دؤندریر.
گؤزلره یاغیش سپیر،
بوغازلارا تیخانیر.»

گله‌جه‌یی، کئچمیشی،
ایراده‌نی، اومیدی،
دوشمنین نیفرتینی،
ییغدیم بیر قوشون ائتدیم.
من اونو قلپه-قلپه،
هر گون چاپدیم، آزالتدیم.
من اونو نفَسیمله،
گیله-گیله اریتدیم.

او تسلیم اولماییردی،
سون ذرّه‌سینه قدر.
سون ذرّه‌سی ده قلبه،
سانجیلدی ایینه کیمی.

آلدیم اونون الیندن
حیاتیمی، دوستلاری،
بیر ده بو گون یازدیغیم
همین یئنی شعریمی.

#علی_کریم
#شعر_اوجاغی
https://t.me/SANSIZDUNYAM

سنسیزلیک‌...

نئچه پاییز کئچیر اوْ آیریلیقدان
یوبانما، قار یاغار خاطیره‌میزه
یئنه قارانقوش‌لار گَل‌ها‌گَلده‌دیر
باغچادا خزل‌لر یئتیشیب دیزه

چینار آغاجی‌نین سوْن یاپراق‌لاری
وحشی یئل‌لریله عؤمۆر سۆره‌جک
سنله اکدیییمیز آلما آغاجی
یاریسی دیشلنمیش آلما وئره‌جک

کۆچه‌میزده‌کی اوْ کوولان آغاجی
ایندی‌ده اؤزۆنۆ اؤوسه‌ییر سنسیز
اۆرک پنجره‌مین سوْن باخیشیسان
ایندی‌ده آستانام گؤینه‌ییر سنسیز...

#ارشد_نظری
https://t.me/SANSIZDUNYAM

اوره‌ییمده بیتن سئوگی ماهنیسی،
پاییز بوداغیندا یازیلی قالدی.
سسین یاییلمادی دار کوچه‌میزدن،
آدین دوداغیمدان آسیلی قالدی.

گئدیردین، گیزلیجه گؤزوندن ایراق،
اوخشادیم آغلادیم سنه بیر اتَک.
اَلیندن یاپیشیب آپاریردیلار،
یایلیغا بۆکولن بایرام پایی تک.

گئدیردین یول‌لاردا باهار سولوردو
بولود گؤزلریمده یاشا دولوردو
شافاق قان قوسوردو چیچک‌لر گۆلوش
بنؤوشه ساچلارین، سازاق یولوردو.

قلبیمده بیر آرزی آه چکیر منیم،
سن‌سیز اوزاقلاردا بیته‌جه‌یم من
داها یوواسیندان کوسن قوش کیمی
تانرینین گؤزوندن ایته‌جه‌یم من.

الوداع هر گئجه یازدیغیم شعر!
سنی بالتالاییب مندن آلدیلار.
من ائله پاییزدا تورپاغا دوشدوم،
کفن‌لنمه‌ییمی قیشا سالدیلار.

#دومان_سفراوغلو

https://t.me/SANSIZDUNYAM

بو گون چوخ ایشیم وار:
آنیلاری کؤکدن اؤلدورمک گرک؛
یاشاییشی یئنیدن اؤیرنمک.
داشدان بیر اورک دوزلتمه لی یم.

آنجاق یوخ...
ایندی یئنی بیر مؤوسوم پنجره نین دالیندا چاخناشیر.
بو گونو نئچه واخت اؤنجه دن
حیسس ائدیرم،
سسسیز ائویمده...

#آنا_آخماتوا
https://t.me/SANSIZDUNYAM

بیر فینجان چای، سنینله ایچمک
بیر فینجان چای ایچمک سنینله،
بوتون خبرلری تلویزیوندان سؤندورر
سیاستین آدینی سوسدورار
بیر فینجان چای،
ساواشی بیتیرَر.
آنالار، بالالاری مزاریندا آغلاماز
کوچه‌لردن آوارا اوشاق‌لار ائوینه دؤنر
هئچ بیر ایتی ده خیاواندا ماشین وورماز
داها هئچ قورشون اینسانلارین قلبینه سیخیلماز
گل یاخینا، ساچ‌لارینی قوخلاییم!
سن باریت یوخ
ازلدن باریش قوخوسو وئریرسن...

#اومید_نجاری
https://t.me/SANSIZDUNYAM

ائلناره عبدواللایئوا

دونیا سننن سنه شیکایتیم وار
https://t.me/SANSIZDUNYAM

سن گئتدین، ائله‌بیل دونیا بوشالدی،
یاز دا کؤچوب گئتدی، یئری بوش قالدی.
باهار اوره‌ییمی، سنسیز قیش آلدی.
من یازا وورغونام، قیشی نئیله‌رم؟

عشقیمی آپاریب سن گئتدین دئمک.
عشق‌سیز بیر کؤنول نه‌ییمه گرک؟
سویوق داشا دؤندو او گوندن اورک.
سینه‌مدن آسیلان داشی نئیله‌رم؟

همیشه آیریییق؛ گئجه-گوندوزوک.
بیریمیز تپه‌ییک، بیریمیز دوزوک.
اوستونون قاشی‌یلا تانینار اوزوک،
اگر اوزوک یوخسا، قاشی نئیله‌رم؟

نییه یاشاییرام من، نییه سنسیز؟
نه یئره باخمارام، نه گؤیه سنسیز‌.
من کی کور اولموشام هر شئیه سنسیز،
کور گؤزون اوستونده قاشی نئیله‌رم...؟

#بختیار_واهابزاده

https://t.me/SANSIZDUNYAM

سکوتا بۆرونوب یوللارلا، آنلار،
گؤیلر ده ساللاییب قاشین - قاباغین.
گئتمک ایسته‌ییرسن، آددیمین گلمیر
گؤزومه باغلی‌دیر سنین آیاغین.

اوخلانیب گؤزومه، گؤزلرین سنین
باخیشین جالاییر کؤنلومه سازاق.
آیریلیق ناغیلین اوخویورام من،
هر کیپریک چالاندا دؤنور بیر واراق.

جومورام کؤنلونه آی دنیز گؤزلوم!
کؤنلون دالغالانیب چاغلاییر منی.
آدیمی سیلیرسن بوگۆن بختیندن
گؤزلر داملا ـ داملا آغلاییر منی.

بوگۆن سن گئدیرسن کدرلی‌یم من
دونوب‌دور آغزیمدا فریادیم-سؤزوم.
یوخ-یوخ آغلاماییر دالینجا سنین،
«اوغور اولسون» دئیه سو سپیر گؤزوم.

نه واختسیز کؤچورسن سونقور باخیشلیم
هاچان یازدا کؤچور گؤللرین قازی؟!
آی ایپک قانادلیم سن کی بیر داها،
قاییتمایاجاقسان، نئینیرم یازی؟!

داشلار دا آغلاییر وداع مارشینا
یوللار دا دۆشونوب سون نییتینی.
آیاقلا آرزیمی، خوش گۆنه قوووش
ایسته‌رم دنیادا سعادتینی.

دئمیشدیم آنانا : "سئودیییم گؤزل،
سیزین قیزینیزدیر، منیم اولاجاق"
بیلمزدیم ساچین تک باختیم قارادی،
آرزی چیچک‌لریم بیر گۆن سولاجاق.

منیمسه بختیمدن بئله گلیبدیر،
هئچ آلوو بئله‌جه منی یاخمادی.
اوچدو آرزیلاردان تیکدیگیم بنا،
ییخیلمیش تاواندان توز دا قالخمادی.

گئتدین بخت ائوینه، یولون اوغورلو
ظن ائتمه اؤز الیم ـ اؤز باشیم اولدو.
گئتدین‌می، حیاتین اوغوللو ـ قیزلی
منیمسه سیرداشیم گؤز یاشیم اولدو.

گؤز یاشیم جواهر، گؤز یاشیم اینجی
دایان، گئتمه دایان دردینی آلیم
آغارمیش ساچیمین ساپینا دۆزوب،
بو سون یادگاری بوینونا سالیم.

آتالار دئییبلر : "حیاتین یولو،
یاری قسمت اولسا، یاری همت‌دیر"
اولدوقجا چالیشدیم، چاتمادیم سنه
خوشبخت اول گؤزه‌لیم بودا قسمت‌دیر.

«الوداع» دئییرم تیترک دوداقلا
لاکن آرزیم - عشقیم دومانا دؤنور.
سؤزلریم آسانجا قوپور دیلیمدن
آنجاق گؤروشوموز گومانا دؤنور.

کؤکسومده قیزیلدان بیر سارای سالدیم
یاشارسان عمرلوک دیله‌ییمده سن.
گؤزومدن گئتسن ده، اوزاق دییلسن
رویالاریمداسان، اۆره‌ییمده‌سن.

#حسن_اومود_اوغلو

https://t.me/SANSIZDUNYAM

اینانیم‌می یانی بیتیر آیریلیق؟!
جار دوشوب آی صاباح گؤرونه‌جکدیر
من اٶز اوره‌ییمین قایغیسیندایام
دونیاسا گؤزلری سئوینه‌جکدیر

بوشلوغون نه قدر بئنجیل اولسادا
سنی یادداشیمدان آلماییبدیر هئچ
توم قورخوم بودور کی دئسین‌لر جانیم:
"او سنین قایدیندا قالماییبدیر هئچ"

توم قورخوم بودور کی، قورخام آ..خ یئنه
یالنیزجا بیر گؤروش قیسمتیم اولسون
توم قورخوم بودور کی گؤروشمه‌میشدن
اؤزگه‌لــــر توپلومـــو یانینــــا دولســـون

گئدیشین اؤیردیب قورخام صاباحدان
بونا دا او قدر ایسینمه‌ییم من
باشیما نه قدر دونیا اویون وار
گتیرسین یئنه‌ده هئچ دینمه‌ییم من

چکینمه؛ یاخینلاش؛ من هامان منم
سن ده می قورخورسان؟! اوزاقدا دورما!!
من کی یوخلوغونون وورولموشویام
نــه اولار بیــر داهــا کؤنلومــه وورمــا..

اَیــَر من منم‌سه، سن ایسه سن‌سن،
داها غرورونو ائندیرجک‌سن
الیمین بیر ذره دوزو قالیبسا
گرک کی "سن" "منی" دیندیرجک‌سن!!

#سیــــرداش

https://t.me/SANSIZDUNYAM

او عسگرين تايي اولمايين
او قدر سئوگيسينه مكتوب گؤندردي
سونوندا سئوگيليسي پوستچي‌يه وورولدو

هر زادين بير حدي ايله اندازه‌سي وار!

#سوسيال_قونو
https://t.me/SANSIZDUNYAM‎‌‌‌‎‌‎‌‌‎‌‌‌‌‌‌‎‌‌‎‌‌‍‌‍‌‍‎‌‌‎‌‌‍‌‍‌‍‌‎‌‌‎‌‌‍‌‍‌‌‌‎‌‌‌‎‌‎‌‌‎‌‌‌‌‌‌‎‌‌‎‌‌‍‌‍‌‍‎