ظلمه الطاموره والكيد هواي

وسجّانك  حاقد  آه يامولاي

آه يامولاي  ... آه يامولاي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ياصاحب  السجده يسيد الرافضين

يالغريب الكضّه  كل  عمره سجين

هذا صوت الرافضه الينعى وحزين 

لكيدك  وزندك   وجبدك  يالرهين

ومن كثر اكيودك ماتكدر دوم

ترفع جفينك  وتدعي القيوم

ومحناتك هاي ... آه يامولاي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وياابن   جعفر  سمعنه   بقصتك

وكالو   اتذوب   الصخر  ياونتك

واعليك كطعو ياامامي اعبادتك

وبيد أبن شاهك  الدنيه  خلتك

شمس الله ونوره بعيونك جان

السندي وهارونه امكيّد القرأن

وبدمعة عيناي ... آه يامولاي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

سيدي  ونصراني  حن كلبه عليك

كشف عن جثمانك وراحات ايديك

كال لبن اسويد  عن  الصار  بيك

وكله مسموم وطلب اهلك تجيك

وين اهله وكومه النصراني يكول

خل تاخذ  ثاره  بالسم  مجتول

وتهظم ياهاي ... آه يامولاي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ثلث  تيام  كالو عالجسر ضليت

يادمعة حزن ياراهب أهل البيت

لاجن سيدي من الكفه منذبحيت

وصوت امخدره مذعوره ماسمعيت

ويالكاظم ذني يهدن كل حيل

والأصعب كلش سحكات الخيل

الماضاك الماي ... آه يامولاي

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وآه يحسين النذكره ابمصايبكم

يقيناً سيدي معروفه عد كلكم

لمصاب حسين ذبيتو عمايمكم

ولزينب يشيب الراس عمتكم

وين ام العفه اوين الديوان

زينب يازينب يم الاحزان

الحارت بالراي ... آه يامولاي

الشاعر الحسيني: عباس محمد الحميداوي

١٤٤٦.٢٠٢٥ شهادة الامام موسى ابن جعفر عليه السلام

(قصيده لشهادة الامام الكاظم عليه السلام ١٤٤٥)       

اللا رشيد وسجنك وسجانك

ياابن  جعفر مامحو عنوانك

انت السجين المنتصر ... مهما صاحو عالجسر

ياابن جعفر مامحو عنوانك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

شنو هارون يم شخصيتك واسمك

نعم مسجون بس مامنسجن علمك

سجين انت   ورعبته  وقرر يسمك 

صدك  كالو على كل سلسله دمك 💔

صدك  يامولاي رضن ساكك

وآه يوم اسود ييوم افراكك

وانت سلطان العصر ... مهما صاحو عالجسر

ياابن جعفر مامحو عنوانك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يويلي اشعيشك  السندي  وأعوانه

ولحد  هسه  ابهظم  نشعر  يمولانه

هظيمه   اجنازتك  شالتها  سجّانه 

كلها   تكول  كون  السم  اليه  انه

كون  النه السم تنادي احبابك

الليله هذا الكون ينعى مصابك

انت ابن سيد البشر ... مهما صاحو عالجسر

ياابن جعفر مامحو عنوانك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

سجين انت وعليك السنلسه دارت

شمس انت بطاموره وسف صارت

للذالك بيك أهل المعرفه  احتارت

عليك الدنيه جارت سيدي جارت

كلشي   هذا  الدهر  شوّف  عينك

ليش وسط السجن تكضي اسنينك

امصيبتك تحني الظهر ... مهما صاحو عالجسر

ياابن جعفر مامحو عنوانك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يغص حلك المنيه الرايد ارحيلك

يمن  ماتعرف  انهارك  لون  ليلك 

العليك امن السلاسل بيّدن حيلك 

وجف  الموت  من ابعيد يوميلك

يبن  جعفر  والاشد  من  موتك

عالجسر   مطروح  ضل  تابوتك

نعشك الضل منأسر  ... مهما صاحو عالجسر

ياابن جعفر مامحو عنوانك

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

لجن  ياسيدي  وكل  العظيم الصار

لاذبحوك    لا  اخذو    هلك   كفار

وماشبت  عبايه  لبنتك   امن  النار

بس حسين خيل وعسكر اعليه دار

جدك حسين أعلى الرمل منامه

واعلى  الهزايل رجبوها ايتامه

اعليكم الكلب انكسر ... مهما صاحو عالجسر

ياابن جعفر مامحو عنوانك

الشاعر عباس محمد الحميداوي

١٤٤٥.٢٠٢٤ شهادة الامام موسى ابن جعفر عليه السلام

[نزله لمشاية الامام موسى ابن جعفر الكاظم ١٤٤٤]     

عايف هله وبيته ... ومثل اربعينته

الزاير اجه ونيته ... يزور موسى الكاظم

يزور موسى الكاظم

_

ناحيه  ناحيه  طلعت  وبلد  حشمله بلد

ومثل  زوار  أربعين احسين نتمنى العدد

باقيه  حرورت  الشيعه  ولاكلب بيهم برد

اتحزمو براية الكافل وفاطمه تنطي المدد

رايته أعلى امتونه ... الزاير يشوفونه

وبل الهلا يحيونه ... يزور موسى الكاظم

يزور موسى الكاظم

__

نفس ذيج الفزعه هايه ونفس يوم الأربعين

والفرق كربله  ذيجه  وذوله  زوار  السجين

والصوت  لبيك يموسى وثاني لبيك حسين

وشاهدي  موكب  لبنها  فتحت  ام  البنين

موكب لبو فاضل  ... نصبته ومتجامل

وعباس هل نازل ... يزور موسى الكاظم

يزور موسى الكاظم

__

ابكل  سنه تكول الشماته مو كرم بل فائض

صاح  تبذير  اليكرهك  وضل عنيد ورافض

ارد   اكله  نبقى  نمشي  تعارض  ومتعارض

انت منهو ؟ ورايك أعلى الخدم جنك فارض

خدامه من تكرم ... انه اعتقد واجزم

تفتخر من تخدم ... يزور موسى الكاظم

يزور موسى الكاظم

__

العايف  اهله ونسه الدنيه ومايمنعه كلشي

ماتهمه  كل  مسافه  وراحته   اكثر  يمشي

جنه  يسمع  صوت  أمامه  يله شيلو نعشي

ويهتف الشيعي مصيبة سيدي اكلت هرشي

وهرش الكلب ينطر ... والدمع يتفجر

لمصاب ابن جعفر ... يزور موسى الكاظم

يزور موسى الكاظم

____

وهايه   انصاره  ابو طلبه خلهم  يشوفونها

منهو  كبته  ذهب  تلمع  موسى لو هارونها

وتبقى دم تنزف  دمعها  شيعته من اعيونها

وكل سنه أعلى العهد هاي مصيبته يحيونها

والعهد وي فاطم ... امصيبة الكاظم

تنحيي ويه القائم ... يزور موسى الكاظم

يزور موسى الكاظم

خادم الكاظمين : عباس محمد الحميداوي

١٤٤٤.٢٠٢٣ شهادة الامام موسى الكاظم

١٣/٢/٢٠٢٣ اراشيف العام الماضي

#١٤٤٦ محرم الزهراء

[لسان حال زينب الحوارء بعد شهادة امها ١٤٤٦]

ابحالي اشصار؟ ... ويلي ييمه

وكلما  اصد نار ... انلجم لجمه

وزينب يتيمه ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

انه زينب يأام زينب شسولفلج حرت حيره

يايمه  بعدنه ازغار  وفركتج جانت اجبيره

مو بس النه أم جنتي انتي احنينت الديره

فراكج مو حجي ينكال يبيّن بينه تفسيره

ابكل المعاني ... مرسوم المصاب

فكدج عماني ... يم ضلع ماطاب

هاي الهضيمه ... زينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

وسواد  اتبدل بعيني كلشي مو فقط هدمي

علي  يشبع  بجي ونياح ابكل مره كعد يمي

كتله امي خدها احمر الرمل يلجم بخد امي

انه من شد الجفن حيدر يم الضلع كل همي

ينلجم هم خاف ... وتنزل دموعج

ميته وعلي شاف ... كسرة ضلوعج

قصتج آليمه  ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بتابوت وطلع  بليل علي  بس  مااخذني  وياه

وموقف   شيلت   التابوت  من  الدار  ماانساه

وياهي التنعى ليه اعليج وصيح وياها واويلاه

وانتي   الحتى  ماعندج  كبر  يازهره واتعناه

عفتي مجانج ... يم ضلع مكسور

ونظرة حنانج ...  دفتنها   الكبور

ابكلبي وضيمه ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

نحيله  شكد  نحيله انتي وعلي مايكدر يشيلج

وتتعافين من  ضلعج  علي  شكد  جان يدعيلج

امر الله ويريد يصير ومن هضمي اردن اشكيلج

ييمه  البيت   يخنكني  وكلشي  بداري  يبجيلج

ولا ماننامه  ... بدونج الليل

ولدمج علامه ... بالباب ياويل

امصيبه عظيمه ... وزينب يتيمه

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بعد ويه الضلوع  اهناك بالطف هم الي لوعه

كلتيلي يطيح حسين وخيل التسحك ضلوعه

ومو بس   خيل يايمه اخيي  كلف  موضوعه

يلم اوصاله السجاد مجموعه أعلى مجموعه

وخنصره والراس ... ينكطعن ادري

وماعندي عباس ... واحتار بأامري

وماعندي خيمه ... وزينب يتيمه

الشاعر الحسيني: عباس محمد الحميداوي

١٤٤٦.٢٠٢٤ شهادة الزهراء عليها السلام الروايه الثالثه

(كروب خاص بالقرأن كذلك يوجد قناة خاصة بتعليم القرأن الكريم)
https://t.me/ayaaa2585

(لشهادة الزهراء ١٤٤٦)

مالحكنه نودع طولج ... ... ايتامج هيج يكلولج

غمضتي العين يازهره بساع

ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

عادات اليريد يموت ... يوصي تحضر احبابه

يتوادع وداع افراك  ...  ابحسره وناره لهابه

ومحد ودعج للموت ... والمثلج يوجع امصابه

شنسه العين لوضلعج ... وحيدر عّذبه بابه

والباب الباب اذاني ... وابجي هواي خلاني

ويازهره اعليج هنيال الكاع

ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

المن عيوني ضميتيه ... الخد  وعينج  الحمره

لمن غلست جسمج ... شفت الضلع والسطره

حكج الموت بيه راحه ... الج من لوعة الكسره

ورحتلي منكسر ضلعج ...  وحيدر منكسر ظهره

الهضمتني اهواي وبجتني ... زينب عنج من نشدتني

ودمع الأيتام ايزيد الاوجاع

ومحد  منج  شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

جنتي بسمتي ابهل الدار ... يزهره وراحت البسمه

والدنيه  بيج  صابتني   ... وخلت  بالكلب  لجمه

كلشي  يريدج ترجعين  ...  كلشي  اشتكاك  لليمه 

وبله   بيا وكت  حيدر  ...   بيته  محّزن  وظلمه

وانه بيا حال واتعوفيني ... أظلم داري وظلمه سنيني

من ضيعتج هم عمري الضاع

محد    منج   شبعان  وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ادير بوجهي ماكو انتي  ... وي ميل الصبر افتر

ادنك راسي كمت بساع ... اشوف حسين مااكدر

الحسن ماينوصف حاله ... عينه امن الدمع تمطر

وبزينب  فركتج صعبه  ... العذاب بزينبج يكبر

عيون بنيتي تسولف حزني ... ذني امصايب فكدج ذني

وهالمره اجروح ايتامي اوساع

محد    منج    شبعان   وداع

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

بعد ماضل الي بدنياي ... عكبج  راحه  نفسيه

ردت باخر نفس يمج  ... وتموتين  أعلى  ايديه

يتيمج مدري ابو ايتامج .. رجعي وشوفي البيه

ترس راسي الشيب بساع ... وحيلي مايرد ليه

مو حيدر هذا يكلولي ... اوكف واولادي يتجولي

اجدامي تعثر كامت كلساع

محد  منج  شبعان  وداع

خادم وشاعر أهل البيت : عباس محمد الحميداوي

١٤٤٦.٢٠٢٤ شهادة الزهراء عليها السلام

(تجليبه للشهادة الصديقه الكبرى فاطمه عليها السلام1443 )

فاطمه ايتيمه العدو يدرونها

وهل  اليتيمه تعمدو ياذونها

___

ابياشريعه ويازعامه وياحكم

وياخلافه الصدرت هذا الجرم

ينكسر  ضلع  اليتيمه  وتلطم

فوك كسر الضلع سطر عيونها

___

الجرم اصبح  لهل  الخلافه   اتباع

زمره قادت  مجتمع  نحو الضياع

النبي بنعشه وهمه عدهم اجتماع

ولحد   هسه   ناسنه   يمجدونها

__

اصبحو من بعد طه اهل القرار

وحتى  دمع العين خلوله مسار

لو   تون  بليل  لو  بس   النهار

شوف حتى ادموعها يمنعونها

__

بالمايعقله  حدث  العاقل فأن

عقلَ  لا   عقل  يملك   لاذهن

اليود  طه  ينطق  بكلمة و أن

اذن  بس  بغضائم  يخفونها

___

بجفها   اثر  للنار  ولسوط  العده

وعلى فراش الموت ويلي مدده

ومن  تكوم اعلى الجدار مسنده

وكالخيال انحلت  وانحل  لونها

_

تشهك  ابكل  نفس ياعظم الامر

وجان حتى الحجي يلجم بلكسر

شافت  انواع  الالم  بهذا   العمر

جا لون  كبرت  شنو  يشوفونها

____

تنظر    لحيدر   وتعاين  دمعته

مجتف  بأمر  النبي  وبوصيته

لون صد  لها  بجه  ولو  شافته

هم تصب دموع حسره شلونها

____

وهاي دولة جرم المنشئ مو بعيد

ومهّدت    بفعالها    لدولة    يزيد

حتى زينب من تطب سوك العبيد

مو   جريمه   بشامهم  يحدونها

""""""""""
الخادم ؛ عباس محمد الحميداوي

شهادة الزهراء عليها السلام

'''''''''''''''''''''''''''

(نزله ... على لحن قصيده كل عشيره وعدها بيرغ مالها )

هايه ليالي الزهراء ياشيعه خل نحييها

___

الثقل    الاكبر  لا  بل  كل   الثقل

يوكع اعلى اجتافكم يهلل الفضل

وكلتو  نحيها  ونعم  كول  وفعل

ارواحكم للزهره  شمعه  وتنشعل

ونيران باب الزهراء بدموعكم نطفيها

____

بدون  ماتحكمه  روح  العاطفه

خلي   الشيعي  يوضح  موقفه

خل  دمعته  للكسر تصبح شفه

وكون  كل  دمعه  ب  آه  ملفله

لجروح فاطم ياريت اعمارنه نفديها

____

ننتظر    ايامها   ابشوك  وفخر

و بل العزاء انعزي ابنها المنتظر

هاي  امه وامنه مكسورة ظهر

صلى الله عليها ولعن الله عمر

اكثر   من  الانفاس  اهاتها  ندريها

____

ريتنه  نواسيها   فاطم   ريتها

المنسطره  خدها يويلي ابيتها

ابدمعتك   اتواسيها  لو  هليتها

فاطمه  تستاهل  اشما انطيتها

من النار للجنه اهناك ايديك تاخذ بيها

____

هيه محنيه وضلوع الها انطون

وكّور  اهمومه عليها هل الزمن

انفاسها مشكاة  نور أم الحسن

الماجرن  لحزانها  ريت  انعمن

الماصبت اعلى ام حسين بلطم كون اعميها

''''''''''''''''''''''''

الخادم ؛ عباس محمد الحميداوي

محرم الزهراء ولياليها .

'''''''''''''''''''''''

(لسان حال الزهراء قبل وفاتها مع الحوراء زينب ١٤٤٥)

يمي اكعدي ارد اشوفج ... زينب عليه ليش خوفج

تروحين غاد والي تردين

مااخفي عنج حالي موزين

يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

قلقانه ماعندج آمل من علتي اكومن وابره

تنرسم  بعيونج صور امن اديرن ليه النظره 

زينب  تره   ذني   اليجن  اخر  ايام  الزهره

خوفي على ذخرج علي موتتي زياده لكسره

زينب المده مو طويله ... افراك النبي عذّب دليله

شيسمّيه عام الماخذ اثنين ؟

مااخفي  عنج  حالي موزين

يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

زينب يباب لجم  آلم زينب  لفظ بيه غصه

من كسرة  ضلوعي تره منانه  تبدي القصه

زينب بعد طاري الفرح مااله بعمرج فرصه

زينب  بعد عندج عمر بضيم ياهو يخلصه

زينب الموت اعليه عينه ... لو كلت زينه شلون زينه؟   

كافي  يزينب   لا تنوحين

مااخفي عنج حالي موزين

يازينب  ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

تدرين  بيه   كل  نفس  يلجم  كسر  ضلعيني

وتدرين   يبنيتي   انه  بالكوه   افكن   عيني

اثمنطعش عمري وذوبلن شبساع كل اسنيني

وماجني  ياذيني   ضلع  لمن علي يحاجيني

مثل الخيال الجسم ناحل ... مابيه شي كدامه اماثل

خايفه يناظر سطرة العين

مااخفي عنج حالي موزين

يازينب  ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يمدللت   منزل   علي   زينب   يبسمة  داري

من يامصيبه ابدي الج يم  عون يله  اختاري

اعلى الهامه لو من الجبد لو من ذبيح وعاري

كلنه  نعوفج بالهضم  ودمعج  بخدج  جاري 

ام الرازيا رايح يسمونج ... اتموت الاحبه اكبال شوف اعيونج

من المحسن واخرها الحسين

مااخفي  عنج  حالي موزين

يازينب ... يازينب

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

مشتاكه اشبكج للصدر مشتاكه اشم انفاسج

تدرين  ياذيني  الكسر  ريت  الكسر لاجاسج

ادني  يبنيتي الي  جن  بده  الشيب  براسج 

جا شيصير زينب لو وكع احسينج وعباسج

يمه العمر كدامج ولخوانج هموم ... واحد يشيلونه برمح والثاني مسموم

بين  الزلم  رايح تركضين

مااخفي عنج حالي موزين

يازينب  ... يازينب

الشاعر؛ عباس محمد الحميداوي

١٤٤٥.٢٠٢٣ شهادة الزهراء عليها السلام

( ثكيل ... كتبت القصيده على لحن القصيده التراثيه .. رحنه بضعينه )

ضايع كبرها ... ... تدري بخبرها

جم نفس شح بريتك ... ... وتبني كبرها امنيتك

يامنتظرها ... ... تدري بخبرها

____

تشيد هل الكبر اعلى جيتك مرهون

من  تثئر   لفاطم  يسرها   المكنون

ويلمهدي كون الكلب يحجيلك كون

امك  وره الباب العده الكل يدرون

الظالم دفعها ... ... وهشّم ضلعها

بعيونها الدمعه تروج ... ... بين الالم لاجت لوج

وجف من سطرها ... ... تدري بخبرها

__

اجتمعو  عليها  اجموعهم وتتألف

من  الكسرها  والذي  طك  بجف

وجه الورد بسياطهم ضل  ينزف

وكل  هذا   ويردون  ونتها تخف

عاشت ضليمه ... ... هايه اليتيمه

حتى لدمعها مخلين ... ... تبجي بوكت مو وكتين

ويالم كسرها ... ... تدري بخبرها

__

شضام الدهر لامك ياغايبها شضام

وين   الصحابه  اليدعون  الاسلام

كوم  الخلافه  اطلعو  اول  ضلام

مرتاحت  الزهره  بفعلهم  ومتنام

مهضومه راحت ... ... ولا مستراحت

ومن الكسر نسمع صوت ... ... ام الحسن ليش تموت

بزهرة عمرها ... ... تدري بخبرها

___

البضعه النقيه ل طه عاشت بضعه

من    الايام   واذبلت   جن  شمعه

وهو  شيعيش   الكسروله   ضلعه

وصت   بعلها  الكبر  كون  تضيعه

فعل السقيفه ... ... وشور الخليفه

وشوط البجي والحسره ... ... كصّر عمرها الزهره

ابذمة العصرها ... ... تدري خبرها

___

ضلت  بحسرتها  الصعب  تشكيها

وي روحها هل المحنه ماتحجيها

ضمت  دمعها  عن  نظر  حاميها

وآه    الضلع   جانت  تردد  بيها

ابرمشة جفنها ... ... دم نزف منها

وسطرة الخد تخفيها ... ... خافن علي يصد ليها

باقي اثرها ... ... تدري بخبرها

•°°°°•
الخادم - عباس محمد الحميداوي

شهادة الزهراء عليها السلام