"وَعُيُونَ إمَامِي عنْ بُعدٍ تَرعَانِي."

أتمنىٰ تحسون بشعورها من تقروها،
يا ريت تستشعروها بكلّ لحظة تعب وضعف وخوف وقلق تتسلل لروحكم، إنو أكو شخص من بعيد يباوع لخطواتك، وشاهد علىٰ مسيرك وعثراتك، ويعرف حچي عيونك، وواثق منك ومتأمل بيك خير، يراقبك وهوَ فخور باللي تسويه ويرعاك وأنت بأكثر الأوقات مضرر،
"إنّا يُحيطُ عِلمُنا بأنبائِكُم، ولا يعزُبُ عنّا شيءٌ من أخبارِكُم"
"إنّا غَيرُ مُهمِلِينَ لِمُرَاعَاتِكُم وَلَا نَاسِينَ لِذِكرِكُم"
تتخيل من بعد ما تقرا حچي صاحب الزمان .. الإمام عايفك؟ ما يعرف شنو بيك؟ ناسيك؟ ما يريد يساعدك؟ حاشاه.

علىٰ أمل إنو هالحروف الّي أصبر بيها نفسي علمود أكمل هالطريق تصبركم وياي وتخلينا نعدي هالفترة وإحنا راضين عن سعينا وفخورين بمحاولاتنا، ورب العالمين و١٤ معصوم راضين عنا ومباركين خطواتنا.

أنطيني أمل دائِمي .. أمل ملموس أگدر أحِسّ بيه حتّىٰ لو طول ميخالف أصبر عليه، بس لا تخليني أعيش بأمل يكون وهم .. أمل بتخدير مؤقت .. أمل مو حقيقي وأكتشف أنّه كذبة!، لا تخليني بهيچ موقف وي نفسي وتحرج نفسك وتصغر بعيني، الحقيقة مهما چانت توجع أفضل من كذبة ما تسوا أدمر الّي بينا بدل ما تصلحه.

مرات بدل الخطوة نمشي خطوات،
مرة علمود دولة إمام زمانا،
ومرة لأن نعرف شگد روحنا تعبت بهالطريق وتستاهل نهاية حلوة،
ومرة لخاطر أهلنا وجهدهم ونظرتهم وصبرهم الّي مرتقب وصولنا،
ومرة علمود اللحظات الصعبة الّي خلتنا نوگف ونشوف نفسنا مو گدها،
والحمدلله إنو رب العالمين مطلع علىٰ هالخطوات وشاهد علىٰ الّي نبذل بيه.

أعرف شگد المرضىٰ يعانون ويتألمون وحقهم من يكونون تعبانين ومالهم خلگ للأسئلة والفحص كلّش منطيتهم الحق لأن أعرف شگد الواحد يتعب من يتمرض، بس يبقون المرضىٰ ومرافقيهم الّي ملگاهم حلو ودعواتهم علىٰ طول وگفتنا وياهم ومساعدتهم ومحاولتهم إنو يفيدونا كلهن بگلبي.

بنهاية كلّ يوم ومهما صار وشنو عشت بيه، خليك مُمتن لله ولنفسك أنّك وصلت لنهايته وأنت مُحاول وياه گد ما تگدر يكون تمام، بداية اليوم وصعوبة أوّل خطوة بيه من تگوم من الفراش حتّىٰ تبديه ومحاولتك وي سعيك وتحملك تعبه، وأبتسامتك ومعاملتك الطيبة وي الّي حواليك، وجهدك…

يا ربّ
الشعور الّي يهدّ حيلنا ويخلينا نجر النفس بصعوبة ونغص بالكلمة، لا تخلينا نعيشه لوقت قوانا بيه تنهار وتخلص، خليه علىٰ قدر سعتنا وصبرنا عليه، أملنا بلطفك أنه يهون علينا كلّ فترة تكون بيها أقصىٰ غايتنا إنو أنام وإحنا مرتاحين ما خايفين وماكلنا القلق.

هاي مو أوّل عثرة،
وهم مو أوّل ولا أخر محاولة،
بعد گدامنا طريق بحاله،
بعد الفرصة موجودة ما أنتهت،
والّي يريد صدگني يگدر كلشي يسوي علمود يوصل للي يستاهله،
بس لا ننسىٰ الوقت من يروح ما يرجع،
فَ خلينا نستغل هالوقت الباقي،
وتذكر ﴿وَأَنَّ سَعْيَهُ سَوْفَ يُرىٰ﴾.

الأمر الّي ما واثق منه أنه يكمل للنهاية،
ولا بيه ضمان أنه يستمر،
أو أنت ما متأكد من نفسك بيه،
فَ ما مجبور صراحة تمشي بيه وتخطيه وتورط بيه شخص ثاني وياك،
أكو أمور بحياتنا تحتاج شجاعة ووضوح وصراحة،
تحتاج صوت عالي،
وتكون مكشوفة للعلن،
بلا خوف،
بلا أحتمالات،
بلا تردد،
إذا أنت ما تگدر توفرهن،
وبالطريقة الّي ترضي رب العالمين،
فَ بلاها لا تسعىٰ بيها،
لا تبديها أساسًا إذا ما عندك خطة واضحة ألها، لأن بكلّ بساطة وصراحة هوَّ مو واجب ولازم تسويه حتّىٰ لو ما جاهز أله، كلمة أنت مو گد تنطيها لا تحچيها، لا تفكر تخطي خطوة وحدة وأنت ما مستعد، رب العالمين مخلي النه عقل ومنطق نفكر ونقرر بيهن، حتّىٰ لو القرار صعب ويأذي، ميخالف نضوچ ونبچي ونتعب يوم يومين بالكثير كم شهر بس أفضل بهواي من دوامة تخلي بيها نفسك وتضيعها وتضيع بيها غيرك.

من تشوف شخص ضايچ ويحچيلك السبب وتحسه أنّه أوڤر ومسويها دراما ما يحقلك تستصغر شعوره وتحقره،
إذا السبب من تعرفه تشوفه تافه بعينك، وما يحتاج كلّ هالخبصة وأنّه مكبر الموضوع وشدعوة عليك عيني حساس زيادة، لا تبرز عضلاتك علىٰ المقابل وتبينله شگد أنت مهتم بيه وتريد تساعده!
وأنت تنظر لسببه بهالطريقة!
محد موكلنا بمهمة الزامية إنو نسمع ونطبطب علىٰ المقابل إذا إحنا ما مقتنعين ونحچي عليه بداخلنا!
إنو تبقىٰ ساكت أفضل بهواي من تنافق علىٰ حساب مشاعره وحساب تناقضك بس علمود فضولك يرضىٰ!
الّي صغير بعينك هوَّ چبير بعين غيرك،
والّي ما يسوه هوَّ يسوه ونص عند غيرك،
مالنا حق نحجم مشاعر النّاس ونقدرها بكيفنا ونشوفها تستاهل واحد يضوچ لو لا!
لا نظرتك مثل نظرته ولا وضعه مثل وضعك،
خليها أبالك!.