https://youtu.be/AAaP_BpZnCo?si=i75pdHePbTnDFBN7

يا عطر انفاسي .. انت يا عباسي
ــــــــــــــــــــــــــــــــ
اسمك نقشته بالقلب .. يعباس
انسه غرامك شي صعب .. يعباس
وابحضرتك لمّن اطب .. يعباس
كلي مشاعر انكلب .. يعباس
عزوتي ونوماسي .. انت يا عباسي
ــــــــــــــــــــــــــــــــ
فرحان كلبي ابمولدك .. يعباس
صوت الموالي ردّدك .. يعباس
يالما تخالف موعدك .. يعباس
شاغل افكاري الوحّدك .. يعباس
بيك رافع راسي .. انت ياعباسي
ــــــــــــــــــــــــــــــــــــ
ياكمر واحلى من الكمر .. يعباس
من ليلك ايغار السهر .. يعباس
ودّي اشمّك بالنحر .. يعباس
خادم الك وبكل فخر .. يعباس
يالملكت احساسي .. انت ياعباسي
ــــــــــــــــــــــــــــــــــــ
من حقها زينب تبتشر .. يعباس
ميلادك اشكد تنتظر .. يعباس
كافلها انت وتفتخر .. يعباس
بس انت حمّاي الخدر .. يعباس
للوعد ماناسي .. انت يا عباسي
ــــــــــــــــــــــــــــــــــــــــ
كالتلك انت كافلي .. يعباس
ياخويه ياشيمة علي .. يعباس
همّي ابوجودك ينجلي .. يعباس
انت السند والعون الي .. يعباس
بيك ازامط ناسي .. انت يا عباسي
ــــــــــــــــــــــــــــ
احمد العكيلي

للزهراء                  احمد العكيلي

يمه مشتاگتلج هواي
شگد الج ما حاجيه اوياي
دنيه وحشه وضاگت الروح
عمري صحره وشوفتح ماي
ــــــــــــــــــــــــــــ
يمه ما متعوده انام الليل وحدي
يمه ترضين الدمع يجري اعله خدي
كون يم لحدج ابوي ايحفره لحدي
منين اسولفلج محنْتي وبيمن ابدي

خايفه يمه من الايام
شضامتلي بعدج ألام
اليفگد امه يبقه مجروح
عمري صحره وشوفتج ماي
ــــــــــــــــــــــــــــ
تعودت كل فرض آنه اوياج اصليه
وراسي وكت النوم بحضانج اخليه
يجرح احساسي مكانج من اصد ليه
نوحي ما بطلته والتايه يدليه

والصخر من ونّتي ايذوب
اسمج بنص گلبي مكتوب
لو گلت يا فاطمه ينوح
عمري صحره وشوفتج ماي
ــــــــــــــــــــــــــــ
الله يرحمني بغيابج يالحبيبه
انتي ترتاحين وانه اصبح غريبه
واليعوضج يالحنينه منين اجيبه
تنتظرني جم رزيه وجم مصيبه

بعدج آنه اتعذب اهواي
ما يظل كل غالي ويّاي
چم عزيز بدنيتي يروح
عمري صحره وشوفتج ناي
ــــــــــــــــــــــــــــ
يا شمعتي الما ردتها تنطفي بساع
صرتي جوّه الكاع يمه وشدعي عالگاع
شما افكر بيها بعدج صعبه الاوضاع
عمري بس غمضتي عينج انه احس ضاع

زينب بلا فاطمه اتحير
يمه لو تدرين شيصير
من اشوف حسين مذبوح
عمري صحره وشوفتج ماي
ــــــــــــــــــــــــــــ
يمه من دونج اعيش ايام صعبه
دنيتي ابديها بيتم وانهيها غربه
ما مجربه افراگج ومو سهله اجربه
والضرب وجهج يرد متني يضربه

اترد عليه نفس الوجوه
والخدر مني يسلبوه
وجرح ضلعج بين الجروح
عمري صحره وشوفتج ماي
ــــــــــــــــــــــــــــ
طلب واحد عندي يمج يالزجيه
ابشدتي اتحضريني برض الغاضريه
امشي ويه اليذبح اخواني سبيه
اليسوه والمايسوه يتباوع عليه

يمه اخبرج تالي السنين
اكعد بنص الدواوين
والعتب ساعتها مسموح
عمري صحره وشوفتج ماي
ــــــــــــــــــــــــــــ

الحسن                 احمد العكيلي

كل مره ادفع ثمن   لهل الغدر يازمن
هالمره من شاهدت  مسموم جبد الحسن
ــــــــــــــــــــــــــــــــــــــــــــــ
دنيانه هم واذيه .. واوضاعها شكد عجيبه
بأول مصيبه بعدني .. تدخل عليه بمصيبه
انه ادري تاليته عمري .. ابقه وحيده وغريبه
جم غالي راح من اديه .. واشجم حبيب وحبيبه

ضلع امي من انكسر   لو والدي من انطبر
لو هسه لمن شفت    مسموم جبد الحسن
ـــــــــــــــــــــــــــــــــــــــــــــــ
مظلوم اخوي بحياته .. من غطرسة ال اميه
للصلح مد الهم ايده .. ورادوله هُمّه الاذيه
مو ضعف لمّن يصالح . بس عنده جانت قضيه
يمشي بنهج جده طه .. ويحفظ دماء الرعيه

للحكمه رافع علم    جازوه جروح والم
من حالته اتألمت    مسموم جبد الحسن
ــــــــــــــــــــــــــــــــــــــــــــــــ
عادة اليرحل يوصّي .. عن اهله واولاده ادري
والحسن قبل المنيه  .. جانت وصيته اعله خدري
ايگلي جاسم يزينب .. بالطف اريدنه ذخري
للحرب لمن تجهزه .. ايگلهه يا يمه ابشري

ابني ويسد خلّتي    من يعرف بحالتي
ايگول اعوضه ردت  مسموم جبد الحسن
ـــــــــــــــــــــــــــــــــــــــــــ
بعيون الحسين اشوفه .. منظر يهيّج جروحي
كتله دليلي لجمني .. مقبوضه شو جنهه روحي
الحسن شنهي الجراله .. لتكلي ياخويه روحي
راويني حالة جبدته .. عالحسن خل يعله نوحي

ودّع اخونه العمر   والجبده صارت جمر
مر فركته اتجرعت   مسموم جبد الحسن
ـــــــــــــــــــــــــــــــــــــــــــــــــ
نعش الحسن هالنواصب  بسهامهم يضْربونه
عباس راعي الشهامه .. يجدح شرار اِبعيونه
صاح الا اهجم عليهم .. كل اخْوته ايصبرونه
ضم صولتك يابو فاضل .. بالغاضريه يجونه

يا الكافل بكربله    علمّهم المرجله
ويلاه اصيحن كمت   مسموم جبد الحسن
ــــــــــــــــــــــــــــــــــــــــــــــ
كطعت وصال الاخوّه .. ريت الله لا ينطي جعده
جازت كرمنه بخيانه .. والحسن سمتله جبده
تستمر احقاد أميه .. وعن كبر جده تبعده
مظلوم حتى بوفاته  .. لا كبر لا حضره عنده

كون الكبر ينبني    ويازاير التعتني
نادي ابألم لو زرت   مسموم جبد الحسن

ــــــــــــــــــــــــــــــــــــــــــــــــ

نزله للامام الحسن     احمد العكيلي

ما يحتاج اخبرك  وبزينب اذكرك
انه ادري يكافل .. ما تنسه الامانه
………….….……… ..
………..…………… ..
انه الحسن واحجيها الك گبل المنيه
ماريد اذكرك وانت گد هاي القضيه
انه الجنت شاهد عيان اعله الوصيه
زينب امانه ابذمّتك بالغاضريه

حيدر وصّه بيهه  وحط ايدك بديهه
وگلّك يابو فاضل .. ما تنسه الامانه
……………………… ..
……………………… ..
يا كربله اتألمني من احجي عليهه
ظلت تحز بنفسي ما موجود بيهه
والمشرعه انه اعتني مو انت ليهه
من تحمي زينب ابد ما يحصل سبيهه

وتتگطع اديه  ولا تمشي سبيه
لو ويّاك اقاتل .. ما تنسه الامانه
……………..……… ..
…………..………… ..
ياريت اخوي حسين ما ينگطع نحره
والخيل تسحگ صدري ما تسحگ بصدره
هذا العزيز وكون من عمري اعله عمره
لو ربي ينطيني عمر واگدر انصره

واعرف ما تقصر    لحسين انت تنصر
يا اشجع مقاتل .. ما تنسه الامانه
……………………… ..
……………………… ..
يا خويه تدري بالولد عند امه غالي
والقاسم ابني باجر ايحارب بدالي
باجر تشوفه بكربله لا ما يبالي
وينادي انه ابن الحسن وبصوت عالي

من هسه ذخرته .. و لعمه نذرته
لو ظل دمه سايل  .. ما تنسه الامانه
……………………… ..
……………………… ..
ماكو اعتراض اعله الاجل والقدر محتوم
والموت حق اعله البشر ما واحد يدوم
لا يوم مثله البي يطيح حسين مظلوم
اتمنيت هم مثله انذبح ماموت مسموم

بس اكبر مصيبه  زينب يا غريبه
وگبال الاراذل  .. ما تنسه الامانه
……………………… ..
احمد العكيلي

رقيه                 احمد العكيلي

اخذ باقي اسنيني .. بويه بس حاجيني
كون ويّاك انذبح  فدوه اروح لكل جرح
بويه بس جاجيني
ــــــــــــــــــــــــــــــــــــ
آنه عزيزة گلبك .. لذة حياتي بگربك
تدري بغلاتك عندي
مشتاگه اگول شلونك .. مشتاگه ابوس عيونك
  وخدك يلامس خدي
بعدك سبتني الحيره  من ديره امشي لديره
وصارت دمعتي بگدي
اذكرني لو بطيوفك  اتعب اذا ماشوفك 
وجرح انتظارك يبدي

نوّموها العيله  ….  بالخرابه الليله
منتظرتك للصبح .. فدوه اروح لكل جرح
بويه بس حاجيني
ــــــــــــــــــــــــــــــــــــ
عوف الدمه ومتوني .. مو مهم انه شلوني
انت المهم يالغالي
خلي الغرب تسبيني .. واسياطهم تاذيني
لا تنشغل بحوالي
سولفلي عن جروحك .. من فدوه اروح لروحك
يالما تفارگ بالي
متغيره ليش ارسومك .. غطّت الشيب ادمومك
مو ذاكه انت الوالي

ياهو ذابح نحرك .. ياهو بايگ عمرك
بيك شمسوي الرمح .. فدوه اروح لكل جرح
بويه بس حاجيني
ــــــــــــــــــــــــــــــــــــ
من سلْبو الترچيه .. كل حيل ما ظل بيه
من شوفتك خجلانه
جانت هديه منك .. وشلون اضمها عنك
هذا الهضمني آنه
بالثوب اغطّي اجدامي .. عن لا تشوف آلامي
وحرگ الجمر ولْوانه
خل الجمر يحرگني .. والشمر حيل ايطگني
يا بويه ما زعلانه

بس المْزعلني .. خوفي لا تسألني
ليش دم اذنج يسح .. فدوه اروح لكل جرح
بويه بس حاجيني
ــــــــــــــــــــــــــــــــــــ
بنتك رقيه وتدري .. ماريده بعدك عمري
ماعيشه بعدك لحظه
گلبي اختنگ باهاته .. بسمك تدگ نبضاته
لو رحت يوگف نبضه
عمري اعله مودك عشته .. روحي بغرامك ميته
عشگ الابو شيعوضه
عايش اعيشن لجلك .. ميّت اموتن مثلك
اي حل وسط ما ارضه

خلي احضن راسك .. وحيل اشم انفاسك
وكل نفس بيه يشح .. فدوه اروح لكل جرح
بويه بس حاجيني
ــــــــــــــــــــــــــــــــــــ
بالطشت راسك شفته .. لاخر نفس ما عفته
واعله الصدر ضميته
گد ما الك مشتاگه .. ووجهك ذبحني افراگه
شمة عطر شميته
شمحله الاجل لو جاني .. وراسك يظل بحضاني
هالموقف اتمنيته
شنهي العمر وسنيني .. لو ما وجود احسيني
يدنه الاجل يا ريته

كون اغمْض عيوني .. ويمك ايدفنوني
وانت مثلك ما يصح .. فدوه اروح لكل جرح
بويه بس حاجيني
ــــــــــــــــــــــــــــــــــــ

رقية مقدمة احمد العكيلي

يتمتنـي من الزغر بعدك المن انتظر
لله سلمت الامر بويه يحسين
ـــــــــــــــــــــــــــــــــــــــــــــــــــ
من تمـر ابالي ذيج الذكريات
مدللّــه بجالك جنت وبراحه ابات
شنهو ذنبـي بلا ابو اكظي الحياة
بزغري اعيش اليتم من دون البـنات

وياك جنت مدللّــه عمري بعـدك لاحله بدونك شيسوه العمر بويه يحسين
ـــــــــــــــــــــــــــــــــــــــــــــــــــ

ليش تتركني يبويه بلا وداع
بين لوعه وضيم واهات وضياع
انه من دونك حلم ايامي ضاع
وبسفينة عمري مكسور الشراع

لو رحت ياهو الي بالمصايب ابتـلـي
مالي حيل اعله الصبر بويه يحسين
ــــــــــــــــــــــــــــــــــــــــــ
صحت بويه ومحد يرد الجواب
وياك من ترجع تره يطول العتاب
شرعت كدامي بيبان العـذاب
تنفتح عشره اذا سديت باب

ما أجه ابالي ابد ما اشوفنك بعد
حالي بعدك ما يسر بويه يحسين
ــــــــــــــــــــــــــــــــــــــــــــــــ
لسان حالي يكلي المن تشتكين
يا رقيه ويكتل فراك الحسين
امشي خل انودعه ونزيد الونين
فوك صدره انّام ويشدنه الحنين

جيتك انه بلـهفتي اشكي حزني ولوعتي
بلهفه ضمني اعله الصدر بويه يحسين
ــــــــــــــــــــــــــــــــــــــــــــــــــــ

رقية احمد العكيلي

ياحلم غافي بالعين عن رقيه رحت وين
اسأل ومحد يكول يمته ترجعلي يحسين
ــــــــــــــــــــــــــــــــــــــــــــــــــــــــــــــــ
بويه من طول الدرب يتلاشه حيلي
بنتظاري لشوفتك كظيته ليلي
كلبي بعدك اشتكيله ويشتكيلي
بطيفك اجروح شكثر من يعتنيلي

يالعفت حسره بالروح يمته ترتاح الجروح
هنه لا وحده واثنين يمته ترجعلي يحسين
ـــــــــــــــــــــــــــــــــــــــــــــــــــــــــــ

ويه نسمات الهوا ابعث تحيه
من حبيبة كلبك ابنيتك رقيه
كون ماتلمحني برض الغاضريه
كول معناهه مشت بنتك سبيه

هدم اركاني الفراك لشوفتك كلبي يشتاك
يسأل دروبك منين يمته ترجعلي يحسين
ـــــــــــــــــــــــــــــــــــــــــــــــــــــــــــــــــــ
ليش اسأل عمتي عنك ماتجاوب
وينك انت اوّينهم باقي الحبايب
طفله انه اوّيني ووين المصايب
امدللتكم نامت بنص الخرايب

يادلالي المشه اوياك الدنيه ذلتني بجفاك
اتذكرت ذيج السنين يمته ترجعلي يحسين
ــــــــــــــــــــــــــــــــــــــــــــــــــــــــــــــــــــ
ضامي كلبي لشوفتك كل ماي ماريد
وزاد ماضوكن ابد مادامك ابعيد
والله يحرك كلبي من ايسبك ايزيد
كلهه فرحانه الشماته وجنهم بـــ عيد

شمر من شاف الدموع سوطه بمتوني مطبوع
خله بيهن نياشين يمته ترجعلي يحسين
ـــــــــــــــــــــــــــــــــــــــــــــــــــــ
بويه من عندي خذو حتى التراجي
ما اشوف بعيني من كثر البواجي
المن اشرح شكوتي والمن احاجي
وراح عني والدي حلو المحاجي

اتعودت يمك ارتاح صوتي راح من الاصياح
والوضع بويه مو زين يمته ترجعلي يحسين
ـــــــــــــــــــــــــــــــــــــــــــــــــــــــــــــــــ
بويه اخبرك عمتّي عدهم اسيره
وهسه حيرتنه ابد مامنهه حيره
كلت اريدك بلكي واحد عنده غيره
كون اشوفك وانه بنفاسي الاخيره

ويلي من جابو الراس حالتي فجعت الناس
ما رحم بنتك البين يمته ترجعلي يحسين

ـــــــــــــــــــــــــــــــــــــــــــــــــــــــ

للباقر ع                    احمد العكيلي

حياتي .. چنهه ليل إبلا شمع
حياتي .. كِلها مأساة إو دمع
…………………………………
بيمَن أبدي إو بيمَن أنهي لو شَرَحْت أحزاني
وآنه ادري جروحي واحد اكبر من الثاني
بكربله صارت غربْتي ودمْعتي عنواني
حتّى لو أنسه حزنْها هوّ ما ينساني

طبعْها .. بالحزن أحسن طبع
حياتي .. كلها مأساة ودمع
…………………………………
أرْبع سنين آنه عمري إو عاشرت آلامي
تبدي بِدْموع و هضيمه شلون تگظي أيّامي
آنه شفْت إعزاز گلبي إتْذبّحو گدّامي
إوْ ظلت بنار المخيّم تحترگ أحلامي

مُصايب .. بيها كِلْ يوم انفجع
حياتي .. كلها مأساة ودمع
…………………………………
گمْت الوذ بعمْتي زينب لمّن إيْضرْبوني
عالرماد اركض واطيحن والعدا إيْدفْعوني
ما اشوف الدرب بيهن والجمر بِعْيوني
والِدي إلسجّاد بيده إيْشاگف إعله مْتوني

ضَرُبْهُم ..  عالمَتِن ما ينجرع
حياتي .  كلها مأساة ودمع
…………………………………
باقر آنه إو عيني شافت جدّي گطْعو نحره
خيل وِشْما عدْها قوّه كِلها داست صدره
مِنگطِع خُنْصر يَمينه إو دمّه خضّب شعره
إضلوعه مكسوره شِفتهن وَحگْ ضِلْع الزهره

عَلينا .. همْ رجَع كسْر الضلع
حياتي .. كلها مأساة ودمع
…………………………………
فوگ نيران المخيّم وِالعِطَش كاتِلنه
عالنهر ناده المنادي مِنْذبح كافِلنه
وِالشمر لمّن سِبانه إبْكِل حِقِد عامَلنه
لا كفيل إو لا مُناصِر ياهو يفْزَع إلنه

سِبونه .. إبيا ذنب وِ بْيا شرع
حياتي .. كلها مأساة ودمع
…………………………………
شرْد أسولف عنْ رُقيه طِفله ويْضرْبوها
مِنْ تِصيح حسين بويه أكثر إيعذْبوهه
سلّبو مِنها التراچي إو عالجمر مشّوها
إو راس أبوهه إبلايه رحْمه شافِتَه خلّوهه

نِفَسْها .. يَمّه رادو ينْگطع
حياتي .. كلها مأساة ودمع
…………………………………
باقر إعلوم السماء المصطفى إمسمّيني
رَغُم كلْ حقْد آل أُميّه ما أزِل عن ديني
لو ذَهَب خلّه إبيساري والمُلِك بيْميني
لا هشام ولا ألف واحد گِدر يغريني

إبْحكُمْهم .. صوتي عالي إو ينسمع
حياتي .. كلها مأساة ودمع
…………………………………
ونسألكم الدعاء