اعظم الله لنا ولكم الأجر

هاي زينب ياعلي مسلبينها
وعله طك المتن ياهو يعينها

ياهو يفزع والأهل كلها گضت
والكفيل عيونه بالدم غمضت
خيل تسحگ صدر ابو اليمه رضت
والأعادي بكربله مجتفينها

جتفوها وخذو بت حيدر زجر
عگب كافلها مشت فوگ الجمر
من البواجي عيونها اندارت حمر
دكوم تنطگ كاعدها مشتمينها

شتموها الضلت بلايه ولي
وين ذاك البسمه كل هم ينجلي
ع الهزل تنكاد بتك ياعلي
بالصحاري زينب مضيعينها

ضيعو جدمينها بدرب السبي
من خجلها تراب لايذ بالعبي
بالخرابه مودعه وجدها نبي
وعله قصر الكافر ميسرينها

يسروها بشام مابيها عرف
ذاك يضحك ع السطح ذاك يدف
ناس تحرگ. ناس بحجاره تهف
للرمح زينب تحشم حسينها

حسين جاوبها لجن جاوب دمه
منين اجيب الحيل يابت فاطمه
عين الج ضلت وعين عله السمه
هاي روحج ع البجي مجدمينها

جدمت روح العقيله عله الأجل
نزل ملج الموت وعليها حمل
بعيد ماتت لا كرابه أو لا أهل
ليش زينب بالغرب ناسينها

تنسه وتنعاف والفزعه تشح
متون هاشم للنعش ماضن تصح
اه ياجرح الشام هذا اكلف جرح
من تكول الناس زينب وينها

صفاء ثابت الغزالي

بالنعش وتنطر خبرهم
للشام محد وصل منهم

شفت يم الباب موتي ماشفت فزعه من اخوتي
وين المعطشين روحي شلون عافوني وي موتي
العاف زينب تبچي غربه لحضه ماعفته بقنوتي
لا عيون عليه تعمه. لاهلي يسمعون صوتي
مثل حال النبي يونس حالي بس الشام حوتي

وين اروح الشام كلها تريد كتلي وين اروح
ياجروح. اوساع ماغطاهه جفي ياجروح
بلايه روح. عكب اخوتي عمري جثه بلايه روح
كون انوح من اشوفن نعشي وحده كون انوح

بالنعش وتنطر خبركم
للشام محد وصل منكم

--------------------------------------------------------------------------
كلها راحت من اديه. بس أثر حبل ال اميه
الشام ماخذ حيلي كله وماأخذ جلمة سبيه
ماكو غير الحزن عندي. مابقت غير الاذيه
چنت اخاف ماتجوني. ماخفت من المنيه
ضعف گالو حتى ضلج. يامه كالولي خطيه

من يصيح ع الجنازه بلايه أهلها من يصيح
خاف اطيح ياهو يفزعلي بغربتي خاف اطيح
هذا ريح بالنعش مترهي يدفع. هذا ريح
يستريح. كلها تمشي اليبجي يمي. يستريح

بالنعش وتنطر خبركم
للشام محد وصل منكم

----------------------------------------------------------------------------

گلب المفارگ ونيده والبچي يخلص وزيده
شلون اخيط جروح گلبي. ملك وتكتله عبيده
حتى لو كافل يجيني. نعشي ماينشال بيده
طاحن جفوفه الاحبهن راح كل حلمي الاريده
والزلم ماتت سويه. والاخت تمشي بعيده
لا ياشام جتفت روحي عله نارك لا ياشام
مو حرام عيوني يبست بالبواجي مو حرام
بلا سلام ع النعش مرت الناس بلا سلام
كلبي ضام. ذبح عبدالله وركضنه گلبي ضام

بالنعش وتنطر خبركم
للشام محد وصل منكم

-----------------------------------------------------------------------------
دمع البعيني مسحته. بس زراگ متوني عفته
والهوى البيه طاري اخوتي وين مايعبر شبگته
هلا صيحن للبواجي النوم من عيني طردته
ردت كافل يسد عيني حسين يم النعش ردته
كون اخوتي طيح يمي مونعش ينشال سكته

ها يعين. مامش معزيات يمج ها يعين
ياحسين شعطل متون الهواشم ياحسين
اهلي وين وين اخوتي وين ولدي اهلي وين
گلبه شين المايرف كلبه عله زينب كلبه شين

بالنعش وتنطر خبركم
للشام محد وصل منكم

----------------------------------------------------------------------------
بالمغيسل كلشي وحشه حتى صب الماي وحشه
حتى حيطانه تكلي. الماله والي يطيح نعشه
المحترگ وبعيده ناسه. بعد مايلحگله مممشه
والمجانه سيوف صاير شلون كلبه عليه يفرشه
المالگه اعزاز وي موته. ينطبگ بالاخ رمشه

رمشي نار. يجوي بعيوني من اطبكه رمشي نار
من الحجار. من السبي يوجعني متني. من الحجار
گبري صار بعيد عن گبور اخوتي گبري صار
حامي جار الشام ما بيها من احشم حامي جار

بالنعش وتنطر خبركم
للشام محد وصل منكم
----------------------------------------------------------------------------
بگبري تلچمني الترابه. ذكرتني بالخرابه
عدله محد يمي يگعد. گبري من يوصل لبابه
تحملت چويات روحي مذبحه وخوف وعصابه
وغربة الشام وشتمها. والسبي وطگه وعذابه
والچفن ذكر عيوني للبقه عاري بترابه
بالطفوف. سهم شال عيون اخوتي بالطفوف
ع الجفوف شكد حوافر تمشي ضلت ع الجفوف
ماتشوف الخيل سحلت گلب اخوتي ماتشوف
بالدفوف عدله ميته الناس فزعت. بالدفوف

بالنعش وتنطر خبركم
للشام محد وصل منكم

صفاء ثابت الغزالي
----------------------------------------------------------------------

چيمو بيبنانهه أو لامن فزع
غوشت وبعينهه شحيح الدمع

*_

غوشت و*الشوف بالدم اندثر
هوت والبسمار فج ضلع وعبر
عثرت اولاباب فك طوله وستر
موش خيط وينعگد كسر الضلع

كسر عود انكسر ضلع ام الحسن
موش حنطه الضلع جاليش نطحن
بوب ساده عيونهه اولا سلهمن
كثر طيح دمومها الحايط يشع

يشع دمهه وحوشه عليهه هفت
مثل جفي الطوس بالباب انجفت
زمرة بليس عله باب الله لفت
استسبع البطيف ماصاير سبع

صار موت وچيل دم ومستحه
وعنبر المحسن خليفه تفلحه
غيم ضلع الزهره ماساعه صحه
وليل خوف وغفله ريج الينبلع

ريج يابس وبنفس نار انجوى
المطر كبل الكاع يبس بالهوى
رماد تنور الحكم كلبه حوى
اولا خليفه العكب حيدر ينجرع

اولا خليفه يكوم من يعثر جدم
بطون عفنه وكشخت بفي الهدم
ينجوي اليسكت اليوكف ينثلم
ناس موته الحشم اولاينسمع

ينسمع حس البخت لجن عطش
الصدك ميت والجذب صاير نعش
الماكتل محسن وكف بره دغش
وكلبه يضحك لون باب اليندفع

يندفع حتى الهوى بطگ الطفل
نفس دين بريح باذر ينچتل
والمجسب شيخ والبرحي يذل
الليل صاحي ويزحف بطوله الشمع

صاحي صدر الگصب والبيرغ نزف
الغيم يجري ومدمع الزهره نشف
والگصيل بعتبة المنجل رجف
وبوصيه الگاع ضمت كل نبع

ضمت الاخ وتلوت ونتچت
تلچم من تبچي ريت اولابچت
حجه دم لطفل فاطم ماحجت
ريت نحر الكتل فاطم ينگطع

صفاء ثابت الغزالي

علويه الساده سبوهه

لا امها يمه أو لا ابوهه

ع الهزل مچتوفه خذوهه

گدما خيم محترگه يمر حار

وكت خله العبد بالطف يمر حار

طحت والرمل بعيوني يمر حار

الوچن والسحگ ماخله بيه

صفاء ثابت الغزالي

يزينب شيلي عبدالله طفل عين

امه اوخاف ياذيچن طف لعين.

سهم شگ صدره والثاني طفه العين

انچفه دمه وي روحه بين اديه

صفاء ثابت الغزالي

اميل ودي سهم العين خافيت

تچلب عينه چان البچي خافيت

اغطيه بيش حتى الخيم خافيت

بشمس يحترگ واني امشي سبيه

صفاء ثابت الغزالي

عدكم زلمه يحميكم لكم بيت

شمرامه السبي كاتله لكم بيت

ابوكم ع الرمح هذا لكم بات

واخوكم ذاك المگيد خطيه

صفاء ثابت الغزالي

يوليدي كاروكك عطش وبنحرك يلولي السهم
يلزم يوليدي الجرح مايلزم يبني الالم
دمك طايح كبل دموعك حراااااااااام
بس لا خيل دوس ضلوعك حراااااااااام
يمدلل يالولد
يمدلل يالولد
___________
أنه الخفت من العطش. وي العطش صار الذبح
دمك يچوويي بمنحرك. وشبرده مايك يالصبح
يابعد زمزم حيل عطشان
يل تنفكد يل جنك اذان
ثاري السهم مايدري بالاخ
وجهك ييمه هواي ذبلان
شيهود رياگ العطش والمطر بالطف مايصح

يل حارگ كلوب الزلم عبدالله يمتعب الدمع
ضلمه وبعدماضل ضوه دمك عله ثيابك يشع
كسرة خاطر فوگ عيونك عجيب
ماتگعد لو گلت شلونك عجيب
يمدلل يالولد
يمدلل يالولد
___________
كاروكك بدمعي نترس والاخ ترست كل صدر
صوت الهوى الجاس الخيم عبالي صوتك من يمر
عبدالله مالايگلك تموت
كون الك يبني الورد تابوت
فكدك ييمه يكسر الضلوع
بسكوت روحي ذوب بسكوت
لمن متت مات الجدم لو ترجع ازحف ع الجمر

الخوف جل عله الخيم وستاحشيت بسكتتك
بيمن احشم يالولد. كلشي نتهه بدم رگبتك.
عبدالله عيونك وعيوني تموت
هاي الروح بطگ متوني تموت
يمدلل يالولد
يمدلل يالولد
___________
اوكف وطيحا مستحه جا بلكت عيونك تصد
والهيس بعمره خلص بيام عمره أو لايعد
شضنه گلبي بموتك يهيد
يهلال اضمك ردت للعيد
يافتشة عيون المچاتيل
لفراك وجهك ردت تعويد
شالفايده بكلبي بعد مامش خبر منك يرد

فلو گماطك للذبح يوليدي چتفني الحزن
تمنيت روحي أولانفس حدر الحوافر تنطحن
يفتر الموت عله خيامي ي ويل
شلون اصبر راسك كدامي ي ويل
يمدلل يالولد
يمدلل يالولد
___________
بالمسح مايگضي الدمع لاتستچن روحي بحرگ
والفحط عيون النسه. بنحرك سهم ماتنشبگ
ياغصه بگلوب النسواين
گلب السهم مايقبل يلين
ياحسرة الماتگدر تصيح
مذبوح يل ماعندك معين
من روحي اسويلك نهر. لو ادري بالطف نفترگ

ضل يحفر بكلبي الندم. مثل السهم لمن حفر
اتمنى أشد راسك عدل. لا يوكع بدرب السفر
ضليت اتوسل بطيوفك غريب
عيني تريد الليله تشوفك غريب

يمدلل يالولد
يمدلل يالولد

__________
طاحت جفوف المستحه يبست الجربه عله النهر
ليل اهدعش خل يبتشر. طايح يبعد امك گمر
جا خل يفك حلكه السهم شيضمه بالطف النحر
والسهم گوه بنحرك يعيل
روحي ويميلة نحرك تميل
عباس گلبه عله الجرف طاح
وحسين ينباع بمراسيل
بين عله حسين التعب من هيس بنحرك دمه
خاف عله دمك ينسلب. صعد بدمك للسمه
بحز المنحر ياهو اليحمي دخيل
دم بشريان يصيح اسمي دخيل
يمدلل يالولد
يمدلل يالولد

صفاء ثابت الغزالي