چيمو بيبنانهه أو لامن فزع
غوشت وبعينهه شحيح الدمع

*_

غوشت و*الشوف بالدم اندثر
هوت والبسمار فج ضلع وعبر
عثرت اولاباب فك طوله وستر
موش خيط وينعگد كسر الضلع

كسر عود انكسر ضلع ام الحسن
موش حنطه الضلع جاليش نطحن
بوب ساده عيونهه اولا سلهمن
كثر طيح دمومها الحايط يشع

يشع دمهه وحوشه عليهه هفت
مثل جفي الطوس بالباب انجفت
زمرة بليس عله باب الله لفت
استسبع البطيف ماصاير سبع

صار موت وچيل دم ومستحه
وعنبر المحسن خليفه تفلحه
غيم ضلع الزهره ماساعه صحه
وليل خوف وغفله ريج الينبلع

ريج يابس وبنفس نار انجوى
المطر كبل الكاع يبس بالهوى
رماد تنور الحكم كلبه حوى
اولا خليفه العكب حيدر ينجرع

اولا خليفه يكوم من يعثر جدم
بطون عفنه وكشخت بفي الهدم
ينجوي اليسكت اليوكف ينثلم
ناس موته الحشم اولاينسمع

ينسمع حس البخت لجن عطش
الصدك ميت والجذب صاير نعش
الماكتل محسن وكف بره دغش
وكلبه يضحك لون باب اليندفع

يندفع حتى الهوى بطگ الطفل
نفس دين بريح باذر ينچتل
والمجسب شيخ والبرحي يذل
الليل صاحي ويزحف بطوله الشمع

صاحي صدر الگصب والبيرغ نزف
الغيم يجري ومدمع الزهره نشف
والگصيل بعتبة المنجل رجف
وبوصيه الگاع ضمت كل نبع

ضمت الاخ وتلوت ونتچت
تلچم من تبچي ريت اولابچت
حجه دم لطفل فاطم ماحجت
ريت نحر الكتل فاطم ينگطع

صفاء ثابت الغزالي

علويه الساده سبوهه

لا امها يمه أو لا ابوهه

ع الهزل مچتوفه خذوهه

گدما خيم محترگه يمر حار

وكت خله العبد بالطف يمر حار

طحت والرمل بعيوني يمر حار

الوچن والسحگ ماخله بيه

صفاء ثابت الغزالي

يزينب شيلي عبدالله طفل عين

امه اوخاف ياذيچن طف لعين.

سهم شگ صدره والثاني طفه العين

انچفه دمه وي روحه بين اديه

صفاء ثابت الغزالي

اميل ودي سهم العين خافيت

تچلب عينه چان البچي خافيت

اغطيه بيش حتى الخيم خافيت

بشمس يحترگ واني امشي سبيه

صفاء ثابت الغزالي

عدكم زلمه يحميكم لكم بيت

شمرامه السبي كاتله لكم بيت

ابوكم ع الرمح هذا لكم بات

واخوكم ذاك المگيد خطيه

صفاء ثابت الغزالي

يوليدي كاروكك عطش وبنحرك يلولي السهم
يلزم يوليدي الجرح مايلزم يبني الالم
دمك طايح كبل دموعك حراااااااااام
بس لا خيل دوس ضلوعك حراااااااااام
يمدلل يالولد
يمدلل يالولد
___________
أنه الخفت من العطش. وي العطش صار الذبح
دمك يچوويي بمنحرك. وشبرده مايك يالصبح
يابعد زمزم حيل عطشان
يل تنفكد يل جنك اذان
ثاري السهم مايدري بالاخ
وجهك ييمه هواي ذبلان
شيهود رياگ العطش والمطر بالطف مايصح

يل حارگ كلوب الزلم عبدالله يمتعب الدمع
ضلمه وبعدماضل ضوه دمك عله ثيابك يشع
كسرة خاطر فوگ عيونك عجيب
ماتگعد لو گلت شلونك عجيب
يمدلل يالولد
يمدلل يالولد
___________
كاروكك بدمعي نترس والاخ ترست كل صدر
صوت الهوى الجاس الخيم عبالي صوتك من يمر
عبدالله مالايگلك تموت
كون الك يبني الورد تابوت
فكدك ييمه يكسر الضلوع
بسكوت روحي ذوب بسكوت
لمن متت مات الجدم لو ترجع ازحف ع الجمر

الخوف جل عله الخيم وستاحشيت بسكتتك
بيمن احشم يالولد. كلشي نتهه بدم رگبتك.
عبدالله عيونك وعيوني تموت
هاي الروح بطگ متوني تموت
يمدلل يالولد
يمدلل يالولد
___________
اوكف وطيحا مستحه جا بلكت عيونك تصد
والهيس بعمره خلص بيام عمره أو لايعد
شضنه گلبي بموتك يهيد
يهلال اضمك ردت للعيد
يافتشة عيون المچاتيل
لفراك وجهك ردت تعويد
شالفايده بكلبي بعد مامش خبر منك يرد

فلو گماطك للذبح يوليدي چتفني الحزن
تمنيت روحي أولانفس حدر الحوافر تنطحن
يفتر الموت عله خيامي ي ويل
شلون اصبر راسك كدامي ي ويل
يمدلل يالولد
يمدلل يالولد
___________
بالمسح مايگضي الدمع لاتستچن روحي بحرگ
والفحط عيون النسه. بنحرك سهم ماتنشبگ
ياغصه بگلوب النسواين
گلب السهم مايقبل يلين
ياحسرة الماتگدر تصيح
مذبوح يل ماعندك معين
من روحي اسويلك نهر. لو ادري بالطف نفترگ

ضل يحفر بكلبي الندم. مثل السهم لمن حفر
اتمنى أشد راسك عدل. لا يوكع بدرب السفر
ضليت اتوسل بطيوفك غريب
عيني تريد الليله تشوفك غريب

يمدلل يالولد
يمدلل يالولد

__________
طاحت جفوف المستحه يبست الجربه عله النهر
ليل اهدعش خل يبتشر. طايح يبعد امك گمر
جا خل يفك حلكه السهم شيضمه بالطف النحر
والسهم گوه بنحرك يعيل
روحي ويميلة نحرك تميل
عباس گلبه عله الجرف طاح
وحسين ينباع بمراسيل
بين عله حسين التعب من هيس بنحرك دمه
خاف عله دمك ينسلب. صعد بدمك للسمه
بحز المنحر ياهو اليحمي دخيل
دم بشريان يصيح اسمي دخيل
يمدلل يالولد
يمدلل يالولد

صفاء ثابت الغزالي

السلام على قمر بني هاشم ورحمه الله وبركاته

يابعد اختك. سهام بعينك موش خيامي
يابعد اختك تزگي عيالك وضل ضامي

فشله الناس شوف خيالي
دموع اختك ترضاهه تلالي
اول تالي
اول تالي
___
تجري علومك والشط واكف
تفدي الدين بروحك حالف
تنضح غيره وريجك ناشف

گمر ماتبخل بضيك طحت كلك فده لحسين
كمت عن لاسهم يخطيك طولك وگف بالطف عين

ياغيرتنه روحك تنزف كبل جروحك
ياغيرتنه تراب الطف ماردته يلوحك
ع الباطل جدمك مايمشي
ردتك ماي لجمرة رمشي
اول تالي اول تالي
___
اخ لروحي وعفيه ل گلبك
تركض غيره بعثرة دربك
ساگي وتعطش ياهو يشربك

سلبو شوفك وروحك لجن محد سلب دينك
لا جربه التچلب بيك. لا جفك يجي يعينك

كلك غيره جروحك عن حسين ضمهن
كلك غيره جدامك عن خياله تردهن

جفك بلسم فوگ جروحي
عگبك وحشه الدنيا بروحي
اول تالي
اول تالي
__
راس الماي بجفك ينگص
خالص من وكفات الترخص
لجن من ذبحك ماتخلص

اسمعنك تكل ل حسين يسر محد عرف گدرك
بضهرك آية التطهير ورجال عاهدو بصدرك

گلبي يريدك جنت شوف كلوب الوادم
كلبي يريدك بيدك شايل فزعة هاشم
عباس بروحك خليني
فگدك للشام موديني
اول تالي
اول تالي

__
صار لراسك رمح وساده
دور عليك گلوب الساده
شلون يعطش الماي أسياده

مامش ماي بالجربه لجن ضلت وفه تجري
نشدت عليك ماي الشط جاوبني سحگ صدري

مايك عوفه بطولك كحل عين الخيمه
مايك عوفه. بنادم بسمك يمسح ضيمه

مابللت ثيابك بالشط
شفت اطفالك رادت تفحط
اول تالي
اول تالي
__
يبست فوگ الگاع ايتامك
ماشايلهم شلت سهامك
چانت بس زينب بحلامك

ونين المحترگ كلبي ودمعي مايلزمه الريح
الوگف ع المشرعه بدمه ع المسبيه گلبه يطيح
راحت كلهه. ذبحو بالطف نحر الغيره
راحت كلهه. والنسوان ضل بحيره

ميت وعيونك ع الخدر
ضل همك ماضل المنحر
اول تالي
اول تالي

صفاء ثابت الغزالي
___

السلام على مولاتي زينب ورحمة الله وبركاته

والله حيره برمله مذبوحه العشيره
والله حيره لياهو منهم شوفي اديره
ضلوع الهواشم تنسحگ
كل خيمه بالطف تحترگ
والله حيره
والله حيره
___________

شفت العطش كبل الشمر ذابح حسين من النحر
شفت الدمه بكد السمه. بالرمله جم ضلع ندثر
وعيون شفت عله السهم والحافر بمنحر عبر
والعينه متروسه وفه. يترس الجربه بجم نهر
بالگاع جاغير الحرب ليش السهم لايح گمر
ياحريمه تبدت دموع اليتيمه
ياحريمه نگالت علينه الهضيمه
ريت الموذر ينشبگ
كل خيمه بالطف تحترگ
والله حيره
والله حيره
___________

گلوب الهواشم تنطحن والروس فوگ معلمه
شفت البواچي بكل كتر شفت النهر شفت الضمه
والحافر بدمهم لمع والسيف حاد أو لاعمه
ماي بخيم ماضل بعد بيهن شرف عابر سمه
عين اليشع منهه الضوه تارسهه بالطف الدمه
كلشي رايح مايرد المات صايح
كلشي رايح واللفت بس النوايح
چا والدمع مايلحگ
كل خيمه بالطف تحترگ
والله حيره
والله حيره
___________
__________

والروح طاحت بالخيم لاجن ولا طاحت عبي
اسرع من الموت الفرح. ممشه الحزن بالطف دبي
ما انجتف مثل الشمس. ماصغر بدرب السبي
وبليس حاكم ع الخلگ. بالحافر رويحة نبي
عين الضبع ماتنترس. لو جانت الدنيا ضبي
ياوسافه حيره متروس المسافه
ياوسافه ماتت ازلام الكلافه
ونسحگت صدور الصدگ
كل خيمه بالطف تحترگ
والله حيره
والله حيره
___________
___________

للجثث ماواصل ضوه صارت غطه خيول العده
ماضل دمع حدر الجفن. جاشنهي بالطف ماسده
من تنحز ركاب الشرف تتسلط جفوف الرده
گلوب الفواطم تختنگ. والفرج بوبه مسدده
هذا عله المخيم دمه شي وكعه بالطف الندى
ياهواشم كون جرف الماي نادم
ياهواشم بعد ماضل كلشي سالم
من گطعو جفوف التطگ
كل خيمه بالطف تحترگ
والله حيره
والله حيره
___________
___________

والمحترگ من ينطفي. گلب أمه باقي مشتعل
والعده زلت بالحجي. . لجن سهمهم مايزل
اخ شكثر بالطف بچي جمره بحلگ ماينحمل
يچويني كل طاري السبي لو ثلج جان عله الهزل
والغالي غيره شما عثر مايرخص بگاع النذل
يالنواضر سحكت أحلامي العساكر
يالنواظر فراكم كاسر خاطر
والنخوه باجر تفترگ
كل خيمه بالطف تحترگ
والله حيره
والله حيره

صفاء ثابت الغزالي
__________

بعت دمك علي وماچنت مطلوب

الشاعر صفاء ثابت الغزالي