لسيدي علي الاكبر بلسان امه ليلى عليهما السلام ....
____&___
عجيبه الوكت من يجرح شرط باليوجعن روحي
واذا يلجم يدور وين المخزنات بجروحي
يبعد العافيه شبساع
عفتني واشتهيت الكاع
يفرحة دنيتي شسويت حته تصير كل نوحي
___
زرعتك واسكي بيك سنين من دمعي وعرك حيلي
واليزرع ثمار يريد وانه بس حزن تحصيلي
السهر لجلك حلو وياريت يطول بالسهر ليلي
دعائي يحفظك الله وجان الك منذور تهليلي
اشوف الامل بيك يذوب
يحنطه والقدر حالوب
ابد مايرحم الطوفان وانه الضيعت نوحي
___
شانسه واني اخلص اليوم كله بالم وبحيره
واشوف بكل كتر تذكار الك وبكل حدث سيره
يباب الغانمه والجود يابيرغ على الديرة
فكدك على الناس تشوف بين حيل تغييرة
فرح عد ملة الشيطان
حزن عد ملة الرحمن
يشيال الطرح بعدك منو اليتكفل طروحي
____
الزلم بشباط مو بالصيف جنها تكول بين ايده
من يبرز يجفلهم صكر وموجر لصيده
مثل صوت الرعد لو صاح يرهب والحرب عيده
وبالقران اذا رتل بلبل واحله تغريده
ورغم كل الشراسه البيك
بواجي اطفالنه تاذيك
وصحت ياريحة الاجال من سيوفهم فوحي
__
يجنك حيدر وجاي عله حصن إيهود ويهده
يصرصر عاتيه وخنياب ماترهم بعد سده
يالاخنس يبن ليث الغاب اليجيك يزامط شحده
اليجيك يبارزك يرجع ولاكن راس ماعده
يالبوكت الزماط الحار
تشب غيض وتجوي النار
وبجالك يشك الغيم احس بنيانها صروحي
___
يالاكبر ياسند دنياي يوم التعكس ايامي
تكبر وانه اشوفن بيك ابوك حسين جدامي
اشوفن ولد ولدك عود هجي الجانت احلامي
يهاي المامحسبتها ترد عالفرس دامي
وصل جسمك غدت طشار
شبيه المصطفى المختار
نسخ طبق الاصل ياناس مو اي شخص مذبوحي
____

لمناسبة وفاة افضل الخلق اجمعين محمد طه الامين صلى الله عليه واله وسلم
........
سافر حبيبك ياعلي
.. همك بعد ماينجلي١
طه الحبيب الفاركك
.. ياسمه عله الكاع تنزلي
------''----
غاب الحبيب ومارجع غاب
ماينحمل هذا الوجع غاب
من مثلك البيه انفجع غاب
وانته الربيت من الزغر
بحضانه ولوكت الكبر
اب واخو وعون الرحل
.. ياسمه عله الكاع انزلي
------''------
اليوم وين ووين امس اااااخ
عگبك الرحل هسه شتحس ااااخ
دنياك هسه بلا شمس ااااخ
والوحشه ترست منبره
الله يعينك حيدره
والسان حالك هل صرخ
.. ياسمه عله الكاع انزلي
-------''-----
ثار النفاق إعله العلن ثار
من بعدما طه اندفن ثار
وبركان من حقد وفتن ثار
مايكفي وشما اصب دمع
من اذكر الباب وضلع
بضعت محمد تنضرب
.. ياسمه عله الكاع انزلي
-------------
راح الغدير وخطبته راح
احبال السقيفه الربطته راح
نكثت البيعه وشطبته راح
ظلت قليله التنحسب
حجي النبي كله انسلب
ياوسفه خانو صحبته
.. ياسمه عله الكاع انزلي
---------
الحقد من احد وبدر نار
وباجر خيم بي تستعر نار
مافكرو يوم الحشر نار
بعدك علي راسه انطبر
والزهره ماتت بالقهر
والعتره ماسلمت ابد
.. ياسمه عله الكاع انزلي
____
الشاعر
عقيل العنكوشي .....

قصائد محرم الحرام

قصيدة خاصه بزيارة الاربعين المقدسه
....
ياحبيب بنور سجل هايه
بسجل زينب فَزعة المشايه
نشوف موت ومانرد .. نزود بالحرد والبرد
اربعين حسين اعظم ايه
____
تشوف .. عجايب بالزياره الوادم تشوف
تعوف .. كل غالي وعزيز بدارها تعوف
ملهوف .. واحدهم يجيك بشوگه ملهوف
تروف .. الوحيده زيارتك بجروحنه تروف
نزور مانحچي حچي .... همنه يطلع بالبچي
يمك نحط كل وسيله وغايه
اربعين حسين صارت ايه
____
اكبار ... تلغيها المناصب كله الكبار
زوار ... نتشرف بمنصب خدم زوار
نحتار ... شنقدم نحس مانوفي نحتار
النار .... چن بگلوبنه مو بالخيم نار
نصرخ حسين ونوّن .. لشوفت الگبه نحن
گبل عام محضرين الرايه
اربعين حسين صارت ايه
___
ماي ... يالعطشان الك طول الدرب ماي
هاي .. سبيل لچبدته اليبست عطش هاي
الراي ... اليعوفك كل حياته متيه الراي
مشاي ...حلمي كل سنه لحسين مشاي
بيا حسين وياعلي ... اهدي خطوات لهلي
بهالامر عندي اكثر من اروايه
اربعين حسين صارت ايه
___
الجوع .. مدينه السفر چي مسك الجوع
اضلوع .. بلطم كسرنه چي كسرولك اضلوع
مگطوع ... گطعنه انفاسنه لخنصره المگطوع
الدموع ... سگينه الگاع الك من فيض الدموع
ولجلك اطبر هامتي ... عليه تشهد قامتي
والشعائر بينه دگت ثايه
اربعين حسين اعظم ايه
__
ليل ... مواكبنه خدامه انهار وي ليل
حيل . .. لأيام اربعينك نذخر الحيل
إنشيل.. نعوف بيوتنه وبالموكب نشيل
إنسيل .. چن طوفان كلنه لگبرك نسيل
أنهار شوگ محمله ... تصب كلها بكربله
وجفوفنه للقاسم محنايه
اربعين حسين اعظم ايه
___
ال آآه... على الراحت غصب مانترك ال آه
نقراه .. دعاء الفرج طول الدرب نقراه
وياه .. عسه بثار الحسين نطالب وياه
الگاه .. واباوع بالطريق اتأمل الگاه
بهاي متيقن انه ... ويانه يمشي بكل سنه
ويدعي يارب تحفظ المشايه
اربعين حسين اعظم ايه
___

للامام القاسم عليه السلام عن لسان السيدة رمله سلام الله عليها ......
هنيالي هنيالي ... راسي انرفع عالي
اطيت كلشي بدنيتي وظحيت بالغالي
........_
اني الي ملّخ جبتدي ... البين
وراواني موت احلامي .. بالعين
مرت الحسن راعي ....العناوين
رمله اني الانطت كلشي .. لحسين
كل ونتي ونوحي ... وانطي نفس روحي
لو اموت بدروب العشك يامحله كتالي
اطيت كلشي بدنيتي وظحيت بالغالي
__
من مثلي ودت للحرب ... شاب
باول شبابه وعقل .... شياب
ماتحله دونه لمت .. الاحباب
عريس لسه لمرته .. ماطاب
مايرضه يتهنه ... ومالامس الحنه
سوني شمعات وضوه لحسين مابالي
اطيت كلشي بدنيتي وظحيت بالغالي
___
ناسي العرس حته بحجي ... الطيف
من ال اميه ارد اطلع ... الحيف
ماريد بدله ولالي ....... بالكيف
لبسيني يأم القاسم ... السيف
لبسيني لبسيني ... ولعمي وديني
ماريد اصل بدر العمر خليني بهلالي
اطيت كلشي بدنيتي وظحيت بالغالي
__
هاذي الوصيه من الحسن ... كال
ضميتك وردتك ...... للاثكال
سويها هندس ضيع ... الهلال
خيال يردم خله .... خيال
خليها خليها ... يتراعد البيها
اشفي غليلي من العده وريعلي دلالي
اطيت كلشي بدنيتي وظحيت بالغالي
____
طوفان كلما تزعل .. تزيد
ياليث وارث جدك ... الحيد
ياافه ومخوفه ال .. عرابيد
ياصرصر الماتقبل ... تهيد
فر بيها فر بيها ... بالك تصفيها
جيبلنه هامات العده وبالك ترد خالي
اطيت كلشي بدنيتي وظحيت بالغالي
___
الشاب البعمرك كلشي .. ماشاف
يالزفتك حنه ودمه ... انداف
خلها المصايب توصل .. إرداف
مادامني بضعن الله ... ماخاف
حادينه حادينه ... زينب ترد بينه
مادام شديت العزم مافكر بحالي
اطيت كلشي بدنيتي ظحيت بالغالي
____

للامام العباس عليه السلام ....
شيچفون عزمه لا يچفين
الوراه مالحگ يدفن لا يچفين
سمعته صرخ صرخه لايچفين
بعد ماخلص احساب ال اميه

السيدة زينب عليها السلام اثناء حرق الخيام تكول ....
عطش والنار محد طفله بيها
وحرم وعيال شافت طفله بيها
اركظن خيمه وجت طفله بيها
علما وخر الجمر عن جف رقيه
...
عقيل العنكوشي

لسان حال احدى النياق التي حملت السبايا تقول
.....
بضواهم چنه نمشي واشتملهم
عطر ماتمل منه واشتملهم
الكتلني الشمر كلسا واشتملهم
اهلهم والدموع تخر عليه
......
عقيل العنكوشي

لسان حال السجاد عليه السلام يكول ..
.....
الوكت ظم إلنه غربه والگطع ضام
ويموت استنگي بينه والگط إعضام
عله الفانوس أدور والگط عضام
ابوي الطشت عله الغاضريه
....
عقيل العنكوشي

السيدة ام البنين سالت النساء بعد الرجوع من السبي هم قصر العباس وياجن فجاوبنها ..

سفينة نوح چنه راسلينه
وفرح چي للمنيه راسلينه
عله طول الدرب داير راسه لينه
عدل ميت يباري عيال اخيه

عقيل العنكوشي ...