Uca Allah Hud surəsinin 15-16-cı ayələrində buyurur:
مَنْ كَانَ يُرِيدُ الْحَيَاةَ الدُّنْيَا وَزِينَتَهَا نُوَفِّ إِلَيْهِمْ أَعْمَالَهُمْ فِيهَا وَهُمْ فِيهَا لَا يُبْخَسُونَ

"Kim (axirətdən vaz keçib) dünyanı və onun bərbəzəyini istəyirsə, Biz ona əməllərinin əvəzini elə orada (dünyada) verərik. Onların dünyadakı mükafatları əsla azaldılmaz."

Dünyada yaxşı işlər görüb etiqadı olmayan şəxsə axirətdə dünyəvi əməlləri heç bir fayda verməz. Çünki Allah ona dünyadakı yaxşı əməllərinin əvəzini elə dünyanın özündə verər.

أُولَٰئِكَ الَّذِينَ لَيْسَ لَهُمْ فِي الْآخِرَةِ إِلَّا النَّارُ ۖ وَحَبِطَ مَا صَنَعُوا فِيهَا وَبَاطِلٌ مَا كَانُوا يَعْمَلُونَ

"Belələrinin axirətdə atəşdən (cəhənnəm odundan) başqa heç bir payı yoxdur. Onların dünyada gördükləri işlər puç olar və bütün əməlləri boşa çıxar!"

✅ Düz yol tutun!

Uca Allah Fussılət surəsinin 30-cu ayəsində buyurur:

إِنَّ الَّذِينَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَيْهِمُ الْمَلَائِكَةُ أَلَّا تَخَافُوا وَلَا تَحْزَنُوا وَأَبْشِرُوا بِالْجَنَّةِ الَّتِي كُنْتُمْ تُوعَدُونَ

Həqiqətən də: “Rəbbimiz Allahdır!”– deyib sonra düz yol tutan kəslərə mələklər nazil olub (deyirlər:) “Qorxmayın və kə­­dərlənməyin! Sizə vəd olunan Cənnətlə sevinin!"

Abdullah ibn Abbas (radiyAllahu anhumə) bu ayə barədə demişdir: "Düz yol tutan kəslər Allahın vacib buyurduğu əməlləri edən kəslərdir". (Cəmiu-l-bəyən, 24/115)

Bu ayə açıq-aydın göstərir ki, təkcə "Rəbbim Allahdır" demək kifayət deyil, Cənnətə aparan düz yolu (Quran və Sünnəni) öyrənib, Allahın əmrlərini yerinə yetirmək və qadağalarından çəkinmək mütləq lazımdır.

✅ Ata nəsihəti❗️

Sə'd ibn Əbu Vaqqas (radiyAllahu anhu) ölüm döşəyində olarkən oğluna bunları nəsihət etdi:

"Ey oğul! Sənə bundan sonra məndən daha yaxşı öyüd-nəsihət verəni çətin tapasan.
❕Namaz qılmaq istədikdə gözəl bir şəkildə dəstəmaz al və sanki son namazını qılırmış kimi, bir daha namaz qıla bilməyəcəyini düşünərək namaz qıl!
❕Tamahkarlıqdan uzaq ol! Çünki, tamahkarlıq açıq-aydın bir kasıblıqdır.
❕Qənaətkar ol! Çünki, qənaət zənginlikdir.
❕İşində və sözündə diqqətli ol!
❕Sonradan üzür istəməyə məcbur olacağın hər bir şeydən uzaq ol!
❕Xeyirli olduğuna inandığın əməlləri et!"
📚 Tabərani, "Mu'cəmu-l-kəbir", (1/142)

✅ Hamımız himayəmizdə olanlara məsuliyyət daşıyırıq!

Məhəmməd Peyğəmbər ﷺ buyurur:
“Sizin hər biriniz himayəçidir. Sizin hər biriniz öz himayəsində olanlardan məsuldur”. (Sahih əl-Buxari, 893)

Himayədarlıq, məsuliyyət hesab olunur. İnsanların dini və dünyəvi məsələlərdə ehtiyacını qarşılayan kəs himayəçi olaraq məsuliyyət daşıyır. İnsanları dinə dəvət etmək, onlara İslamı çatdırmaq da bir məsuliyyətdir. Hər iki məsələ - himayəsində olan insanların həyati ehtiyaclarını qarşılamaq və dini insanlara çatdırmaq məsuliyyəti - Allah yolunda ibadətdir.
Lakin özünü aldadaraq malına və ailəsinə daha çox vaxt ayırıb, insanlara dini çatdırmağa az vaxt ayırması müsəlmana yaraşmaz. Dünyəvi məsələlərlə daha çox məşğul olduqda, bu halı şeytan, onun üçün bəzəyər.
Uca Allah Fəth surəsinin 11-ci ayəsində buyurur:
شَغَلَتْنَا أَمْوَالُنَا وَأَهْلُونَا
“Mallarımız və ailələrimiz bizi yayındırdı”.

İnsanın mal-dövləti və əhli-əyalı onu məşğul edərək Allahın dinindən yayındırarsa, bu hal onun üçün təhlükəli və həlakedicidir. Allah qorusun. İnsanı nə mal-dövləti, nə də digər məsələlər dindən yayındırıb uzaq salmamalıdır.

☑️ Riakarlıq barədə
Ria odur ki, insan öz yaxşı əməlini göstərsin və insanlar bunu gördükdə onun xoşuna gəlsin.

Sum`ə isə odur ki, bir adam bir iş görür və insanlar bundan xəbər tutaraq başqa insanlar arasında yayırlar ki, o, bu əməli edib və bu, həmin adamın xoşuna gəlir.

Bunların hər ikisi 2 növ olur:

1) aydın növ (insana aydındır ki, o, riakarlıq edir). Bu o zamandır ki, insan hər hansı bir yaxşı əməli insanlar arasında təriflənmək üçün edir. Bunun savabı yoxdur, bu günahdır və buna görə əzab var. Məhz belələri barədə hədisdə deyilib ki, Cəhənnəmə atılan ilk kəslər cihad edən, Quran oxuyan və sədəqə verən olacaq.

2) gizli növ (ən təhlükəlisi də elə budur). Bunu aşkar etmək çox çətindir, yalnız bu barədə daim narahat olan adam bunu özündə aşkar edə bilir. Bundan uzaq olmaq istəyən adam həmişə ixlas (yadımızda olduğu halda) və istiğfar, tövbə (unutduğumuz halda) arasında olmalıdır.

Nəfsə qarşı daim mübarizə aparsaq, riakarlıq yaxşı əməllərə zərər verməz.

Əgər əməli Allah üçün başlasaq, sonra unutsaq və niyyətimizə riakarlıq gəlsə, xatırlayıb istiğfar etməliyik. Bunu etməsək, əməl batil olacaq. Beləliklə, əgər əməl Allah üçün başladı və Allah üçün bitdisə, belə əməl qəbul olunacaq. Əgər əməl Allah üçün başladı, sonra riakarlıq oldu və bununla da bitdisə, belə əməl qəbul olunmayacaq.

Məsələn, kimsə Allah üçün nafilə namazı qılmağa başlayır. Sonra onu kimsə görür və o fikirləşir ki, kimsə onun yaxşı insan olduğu barədə indi düşünür. Belə halda namaz qəbul olunmur. Əgər o, namazı bitirəndən sonra (əməli Allah üçün başlayıb Allah üçün bitiribsə) onu kimsə gördüsə, belə halda namaz batil deyil, in-şəə-Allah.

Daim yadda saxlamalıyıq ki, yalnız Allah bizim yaxşı əməllərimizə layiqdir. O, onları unutmaz və bizim üçün qoruyub saxlayar. İnsanlar isə nankordurlar, onlara edilən yaxşılığı unudurlar. [yəni, yaxşı əməlləri yalnız Allah üçün etmək lazımdır, insanlar üçün yox]

*? Qaul əl-mufid*, 4-cü fəsil.

✅ Namazdan sonra bu zikri deyin❕

Məhəmməd Peyğəmbər ﷺ hər namazdan sonra bu zikri deyərdi:

لاَ إِلَهَ إِلاَّ اللهُ وَحْدَهُ لاَ شَرِيكَ لَهُ لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَىْءٍ قَدِيرٌ لاَ حَوْلَ وَلاَ قُوَّةَ إِلاَّ بِاللهِ لاَ إِلَهَ إِلاَّ اللهُ وَلاَ نَعْبُدُ إِلاَّ إِيَّاهُ لَهُ النِّعْمَةُ وَلَهُ الْفَضْلُ وَلَهُ الثَّنَاءُ الْحَسَنُ لاَ إِلَهَ إِلاَّ اللهُ مُخْلِصِينَ لَهُ الدِّينَ وَلَوْ كَرِهَ الْكَافِرُونَ

Ləə iləəhə illəllaah uəhdəhu ləə şəriikə ləh. Ləhu-l-mulku uə ləhu-l-həmdu uə huvə alə kulli şeyin qadir. Ləə həulə uə lə quvvətə illə billəəh. Ləə iləəhə illəllaah, uə ləə nə'budu illə iyyəəh. Ləhu-n-ni'mətu uə ləhu-l-fədlu və ləhu-s-sənəu-l-həsən. Ləə iləəhə illəllaahu muxlisıınə ləhu-d-diinə uə ləu kərihə-l-kəəfiruun.

Allahdan başqa (ibadətə layiq) məbud yoxdur, O təkdir, Onun şəriki yoxdur. Mülk Onundur və həmd Onadır! O hər şeyə Qadirdir! Qüdrət və güc yalnız Allahdadır! Allahdan başqa (ibadətə layiq) məbud yoxdur. Biz yalnız Ona ibadət edirik. Nemət Onundur, lütf Onundur və gözəl tərif Onadır. Allahdan başqa (ibadətə layiq) məbud yoxdur. Kafirlərə xoş gəlməsə də, biz dini yalnız Ona məxsus edirik!

? Sahih Muslim, 594.