رحمة الله وبركاته على أخينا نيّر الوجه صادق السريرة مصطفى، نسأل الله أن يكرمه بصحبة الحبيب المصطفى عليه أفضل الصلاة والتسليم

في مثل هذه الأيام من السنة الماضية، كان أخي مصطفى رحمه الله بيننا في المساجد والمشفى والجامعة.. يُطلُّ علينا كلَّ حينٍ بأنسه وروحه المرحة المليئة بالهمّة وحبِّ الخير.. في تلك الأيام من شهر تشرين الأول، تمَّ فتح باب التسجيل في دورة الحديث النبوي التي تقام…

في مثل هذه الأيام من السنة الماضية،
كان أخي مصطفى رحمه الله بيننا في المساجد والمشفى والجامعة..
يُطلُّ علينا كلَّ حينٍ بأنسه وروحه المرحة المليئة بالهمّة وحبِّ الخير..

في تلك الأيام من شهر تشرين الأول،
تمَّ فتح باب التسجيل في دورة الحديث النبوي التي تقام في بعض مساجد دمشق "دورة فاتبعوني".

لم يكن في بالي أبداً التسجيل في الدورة نظراً لما ظننته وقتها مشاغلَ والتزاماتٍ أولى بوقتي منها (وكان هذا من سوء تقديري عفا الله عني).

أذكر أني التقيت بأخي مصطفى مع بعض أصدقائنا عند باب المسجد يوم الاثنين بعد انتهاء درس فضيلة الدكتور محمد خير الشعال وأنا أهمُّ بالعودة إلى المنزل،
فاستوقفني أخي مصطفى، وقال لي:
"ما حتسجل بدورة الحديث؟"
فأجبته مُتردداً مُحتجَّاً ببعض الأعذار والمشاغل..
فأمسك بيدي وسحبني مازحاً وأخذ بي إلى سدّة المسجد حيث التسجيل ولم يترك لي فرصةً لاختلاق الأعذار والانسحاب،
وكل ذلك كان بلطفٍ وطيبةٍ وابتسامةٍ جميلة لا تغادر وجهه، فلم أجد نفسي إلا وأنا أمشي معه وأنصاع لنصيحته وتشجيعه لي بلا احتساب أو تفكير زائد يحرم صاحبه الخير احياناً..
فكان الأمر كما نقول بالعامية "أخدني بالعبطة"..
وسجلنا بالدورة.
وأقسم لكم أني لم أندم ولو لمرة، وأني وجدت خيرها وأثرها وبركتها في حياتي في مواقف وتجارب عديدة لا مجال لذكرها هنا فهي تحتاج رسالة منفصلة،
لكن سأذكر لكم آخر ما لامسته من بركة هذه الدورة ونفعها الذي عاد عليّ وعلى أخي مصطفى.
وذلك أن الأستاذ المشرف علينا في الدورة، لمحبته لمصطفى وتأثره بوفاته، أحبَّ أن يجعل آخر جلسة لنا في الدورة مع والد مصطفى رحمه الله،
فكانت تلك الجلسة عن روحه وعلى نيته وهبةً منا إليه، دعونا له فيها ونويناها عن روحه، وآنسنا والده ودعونا له بالثبات والعوض...

واليوم وبعد سنة، افتتح باب التسجيل في الدورة من جديد،
فلا تحرم نفسك من هذا الخير، فأحدنا لا يدري متى يفجأه الأجل..
نسأل الله أن يبارك لنا ولكم بأعمارنا وأعمالنا 🤲🏼

📌 طريقة التسجيل:
🔹 للمسجلين مسبقاً في الدورة عبر هذا الاستبيان:
https://docs.google.com/forms/d/e/1FAIpQLSf-liqKuPHcXGOE9G5EhDpiaTTyZXf6V8GajzV0yB4Dw0LhAA/viewform?usp=sf_link
🔹 أما المستجدين في الدورة فالتسجيل في جامع الحسن بأبو رمانة بعد درس التفسير في السدة، أو في جامع أنس بن مالك بعد الخطبة وصلاة الجمعة في السدة.

📌 كما يوجد نسخة الكترونية من الدورة لمن يتعذر عليه الحضور في المسجد أو للمغتربين، طريقة التسجيل في هذا المنشور:
https://www.facebook.com/share/p/rjoJ52gFYsNCUN4V/

لا تنسوا الدعاء لمصطفى رحمه الله في هذه الأوقات الفضيلة

اللهم كما جمعتنا به في هذا الدنيا اجمعنا به في الفردوس الأعلى من الجنة إخواناً على سرر متقابلين مع حبيبك محمد صلى الله عليه وسلم ومع النبيين والصديقين والشهداء والصالحين وحسن أولئك رفيقاً

اللهم اجزه عنا خير الجزاء وارفع مقامه وتقبله من الشهداء يا أرحم الراحمين

{كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُولُو الْأَلْبَابِ}
[سورة ص : 29]

سبق وذكرنا أنو مصطفى الله يرحمه كان مشارك بدورة يشفعان لإتقان تلاوة القرآن والحمد لله أنهى الدورة بكامل مستوياتها
وقرأ ختمة عن حاضر بالتجويد الكامل..

ولكنه ما اكتفى فقط بالقراءة وضبط أحكام التجويد (رغم الخير الكبير يلي فيها بلا شك)
وإنما أيضاً كان في غروب مشترك بينه وبين مجموعة أصدقاء ليتدارسوا القرآن سوا ويتدبروا معانيه وينبهوا بعض عالآيات اللي فيها معاني مركزية ومهمة بحياتنا، أو الآيات اللي ممكن تنفهم بشكل خاطئ..

وهالتدبر هاد هو سنة معروفة عن سيدنا محمد ﷺ وكان يشجع عليها، ورد بالحديث:
عَنْ أَبي هُرَيْرَةَ رضي الله عنه قَالَ:
قَالَ رَسُول اللَّهِ ﷺ: "ومَا اجْتَمَعَ قَوْمٌ فِي بَيْتٍ مِنْ بُيوتِ اللَّهِ يتلون كتاب الله ويتَدَارسُونَه بيْنَهُم، إِلاَّ نَزَلتْ علَيهم السَّكِينَة، وغَشِيَتْهُمْ الرَّحْمَة، وَحَفَّتْهُم الملائِكَةُ، وذَكَرهُمْ اللَّه فيِمنْ عِنده"
رواه مسلم

فإذا قدرنا نحيي هالسنة مع أصدقاءنا المقربين بنفس الأسلوب عن طريق غروب تلغرام أو واتس كل كم شخص سوا، ولو كل واحد بعت فيه آية وحدة بالأسبوع نبّه فيها على معنى مميز فهاد باب خير عظيم وخطوة باتجاه إحياء القرآن بحياتنا لنعيش الآيات يلي عم نقرأها بشكل عملي.

كتير منقول هالعبارات وقت حدوث الوفاة:
إنّا لله وإنّا إليه راجعون
إنّ لله ما أخذ وله ما أعطى

والحقيقة هالجمل لازم تكون حقائق حاضرة بأذهاننا دائمًا ومستحضرة بكل وقت..
ليش؟؟
لمّا يدعونا سيدنا محمد لنكرر كل صباح وكل مساء "وبك نحيا وبك نموت" فهاد يعني أنو الأمر مركزي ولازم يضل حاضر في الأذهان..
ويقلنا أكثروا ذكر هادم اللذات..
وورد كمان عن سيدنا ابن عمر قول إذا أصبحت فلا تنتظر المساء وإذا أمسيت فلا تنتظر الصباح..
لما يتكرر الحديث عن موضوع معين بالكتاب والسنة معناها هالموضوع مركزي ومهم
وتعدد الأحاديث عن الموت بتنبّه الواحد انو هالموضوع لازم يكون حاضر دائمًا بذهننا عكس الشائع عند الناس "لا تجيبوا سيرة الموت"
حضوره الدائم لازم يترافق مع فكرة تانية وهي أنو نتوقعه يجي بأيا شكل وياخد معه أيا شخص لأنو هاد قدر من رب العالمين..

لما يستشعر الواحد انو بأي لحظة ممكن الله يتوفى أعز الناس على قلبه فهالشي بيترتب عليه امور كتيرة
منها عدم الفزع الشديد وعدم السخط عالأقدار عند موت شخص عزيز
أكيد حيصير حزن وحزن كبير كلما زادت مكانة الشخص بالقلب وهالشي ما بيتنافى مع الإيمان..
بس هالحزن ما حيكون بنفس الشدة عند شخص مهيئ نفسه لاستقبال قدر الله كيفما جاء
وأكيد المؤمن الله بيلهمه التسليم والرضا بقضاء الله
بس هالرضا ما حيكون نفسه عند شخص مستشعر حقيقة الموت ومجهز حاله الها..
باختصار:
التجهز لقدر الله باحتمالية موت أي شخص بأي وقت وبأي طريقة = بيخفف وطأة الأسى وبزيد من الصبر والرضا عند حدوثه

في شي أهم من الكلام السابق
هو أنو ننظر للموضوع عالمستوى الشخصي..
يعني يجهز المرء نفسه لهالاحتمال..
منضل منحس الموت بعيد عنا طالما ما اخد شخص قريب منا
حتى يشاء الله ويتوفى قريب أو عزيز علينا
ربما يتعزز الايمان بهالحقيقة لما يجي قدر الله مخالف للمعتاد
الله يرحمك يا مصطفى..
لهيك دائما استشعار انو الموت ممكن يجي بأي لحظة ويطالنا نحنا فهالشي بخلينا نحضّر حالنا ونتجهز للقاء الله بأي وقت
فبكون دافع النا ما نستمر بالمعصية على أمل نتوب بكرا لانو يمكن ما يكون في بكرا
ودافع النا لنبادر بالطاعة وما نأجلها لبعدين لانو يمكن ما يكون في بعدين

طيب كيف بتضل هالحقيقة مستحضرة ببالنا؟
اكتر شي لاحظته هو اذكار الصباح والمساء
تكرار وبك نحيا وبك نموت بتدبر يعني انت عم تذكر نفسك انو الموت والحياة بيد الله وهي قدر يقدره متى شاء وكيف شاء..
حضور مجالس العزاء بين فترة والتانية حتى لو ما كان المتوفى قريب بذكّر المرء بهالحقيقة..
تدبر آيات القرآن وتعلم أحاديث الرسول وسيلة أساسية وبسببها انكتب هالبوست أصلاً..

نسأل الله حسن الخاتمة والوفاة على الإيمان

مصطفى كان فيه شي كتييير حلو، انو بيعرف يمدح، وبيمدح بوقتو مو كيف ما كان، بتذكر مرة كتيير اثر فيني، كنا راجعين الساعة ١٢ من المكتبة وكان عنا امتحانات، قلي انا بحس عندك قدرات حرام تضيع كيف ما كان، هالجملة هي فعلا دفشتني كتيير لقدام وشجعتني اشتغل اكتر واكتر، كان عم يشجعني وقتها بلش معو بدراسة الستيب وهاد اللي صار فعلا ❤️

الكلمة الطيبة الها كتيير أثر على اللي بيتلقاها، ولازم نعرف كيف نحكي الكلمة الطيبة بطريقة تنفع اللي قدامنا وتدفعو لعمل محدد فيه خير ديني ودنيوي، مو مجرد حكي عشوائي كيف ما كان

الله يرحمه أكتر من مرة نكون قاعدين عم ندرس فأجي لارتاح وحاكيه انو قوم نتمشي شوي يقلي ما بدو بعدين فورا يرضى
كان يحس انو ممكن اتدايق اذا طلعت لحالي فما كان يهون عليه..
مع انو آخر فترة اكتشفت اديش كان منظم بخصوص الدراسة بس مع هيك ما كان يرد حدا
والموقف متكرر معي ومع غيري
الله يرحمه كان قلبه رقيق ما كان يكسر بخاطر حدا

خلونا نتذكر يا جماعة انو نوازن بين دراستنا وعلاقتنا مع رفقاتنا وما نخلي دراستنا أو أشغالنا تأثر على علاقتنا بالمقربين منا وتنسينا ياهن لأنو كل شي بروح وبتبقى المواقف بالبال