- ماعندي ثقة بنفسي

جملة نسمها كُلش هواي بين الناس وتكثر عند الشباب أو البنات بهاي الحالة يكون بيها الأنسان مواثق من مظهره الخارجي .

يحس أنو اكو عيوب بشكله أو بجسمه أو بملابسه شوفو خل نجي نوضح الموضوع ونتخلص من هاي المشكلة .

ماكو أنسان اجمل من أنسان وماكو أنسان كامل احمد ربك دائماً على النعمة الي انتَ بيها خلي عندك ثقة بنفسك ، انتو بكل حالاتكم حلوين رب العالمين فضل الانسان على كل المخلوقات الموجودة بهذا الكون .

الأنسان لازم يكون شكور ، الجمال مو كلشي بالحياة يكفي انو انتَ گلبك ابيض هاي تغنيك عن كل الجمال الي موجود بالكرة الارضية .

الانسان يكون جميل بتصرفاته ، مو بشكله وكشخته وفلوسه خليك مقتنع بالي انتَ بي دائماً خليك بالك شي واحد " الانسان حلو بكل اشكاله "

- المشاعر

المشاعر مقياس او شي يدلك على الي جاي يصير بحياتك من اشياء مثلاً نگول هذا الشخص سوا عمل حلو أكيد راح تكون مشاعره حلوة راح يكون فرحان بالي سوا

شنو نقصد بهذا الكلام ؟

بالبداية المشاعر تنقسم الى قسمين ( مشاعر سلبية ، و مشاعر إيجابية ) ننطي امثلة عليهن حتى يوضح الموضوع اكثر المشاعر السلبية : ( الحزن ، الغضب ، التوتر ، الخوف ) المشاعر الإيجابية : ( السعادة ، الطمئنينه ، السكينة ، الحب )
دائماً الانسان يحب انو المشاعر السعيدة تبقى ويا اكثر فترة ممكنة لاكن هذا شي مو الانسان يحدده

وإنما يكون شي أجباري داخل النفس مستحيل شخص يسمع حجاية تكسر ويبقى فرحان اكيد لا ، راح يكون مهموم ومشاعره سلبية وممكن تاثر على صحته وعلى حياته اليومية التخلص منها سهل كُلش كل الي على الانسان يغير الروتين الي هو بي يطلع يزور اصدقاء يتصل على اشخاص يحبهم

بهاي الحالة ممكن يغير تغير حلو بمشاعره وتصير احسن بهواي مراحل ولاتنسون خلوكم دائماً إيجابيين بكلشي حتى تكون حياتكم سلسة وحلوة ، حاولو دائماً تغيرون الروتين اليومي لان هو سبب اساسي بالمشاعر السلبية .

- الطموح

لـ كل شخص عنده طموح و أحلام ومخططات للـ مستقبل . . .

لحد يتحجج بالظروف الي يريد يگدر لحد يتحجج بالإمكانية لحد يتحجج بالأوضاع هاي أحلامكم مخططاتكم بهذا فشلكم و أفكاركم إلي (ما أكدر ما عندي أمكانية أوضاعي مو زينة ..الخ )

هاي حجج للفاشلين إلي معدهم طموح ! ليش ما أكول وراي عمر كامل أخلص دراستي و احقق أحلامي !

براتبي احقق خطط إلي بعقلي ! و الأهم ما أهتم بالعقول السلبية إلي أشوفها بحياتي ما أهتم للكلام السلبي إلي يجيني اباوع على خططي وبس ألي يگلي ما تحقق هالشي أكسر خشمة و أحققه غصبًا عليه !

ألي يگلي انتَ وين و هو وين أبين له منو اني ! ابينلة منو اني الي يستهزأ بي ! و لا تخلون أي شخص يخرب واهسكم بأي مجال عاجبكم ، ألي يعجبكم وتخططولة سوو لا تهتمون بهذولة الناس الفاشلين .

ألي يگولون ( صعب متگدر ، مو حلو ، انتَ مو گدها ، غيرها من الاراء السلبية ) لا تخلوها تأثر ع احلامكم هذولة مگدرو يحققون شي وديأثرون على عقولكم.

اكمل دراستي وحقق احلامي ليش أضل فاشل و گاعد بس أگول ماگدر ؟

كافي تنطون طاقة سلبية لـ أنفسكم انتو تگدرون كلشي تحققون خلو عدكم عزيمة وإصرار و أرادة و أنو تتحدون انفسكم وتتحدون الناس و يكون عدكم طموح قوي .

- خلي دائماً عقابك هو إنسحابك .…

- انتِ حلوه بكُل حالاتج …

- أنقذ نفسك

فشلك الاول هوه نجاحك الاول وطريق النجاح صعب وبيه عقبات وروحك راح تتعب وتمر بمشاعر عميقة ماراح تطلع منها اله بسعيك وطموحك

كلنا راح نحارب وماراح نستسلم تجنباً للفشل والندم
انقذ نفسك انت هسه تكدر تغير وتبني وترسم طريقك كعدتك وبقائك بنفس المكان ماراح يغير شي
التغيير هوه الحزن والبكاء والتعب وبعدها الانتصار وبعدها النجاحات
الفشل الاول يخلق الف نجاح
لاتستسلم حتى لو تحاول اكثر من ٧ مرات ، كمل مثل مابديت وكل يوم هوه يوم جديد للتغيير
صح الطريق صعب وبيه تعب بس بقائك بمكانك راح ياذيك اكثر
انقذ نفسك وتحدى الكل

كلنا شفنه مشاكل وتعب وحزن بس تخطيناه وصار مجرد كلام
رحلة التغيير صعبة بيها تناقضات واستسلام وضغط نفسي وحزن وكل المشاعر الصعبة راح تصادفك
بهيج رحلة محاولاتك مو سريعة ماراح توصل بيوم واحد ، صير لنفسك الطبيب المعالج والمستمع والمشاهد

شوف مشاكلك واسمعها وعالجها وتقبل اخطائك ، التقبل هيه اول مراحل التغيير ، اي انسان يعيش بالتقبل هوه انسان قوي محد يكدر يوكف بوجهة ، كل العظماء في العالم تقبلو منهم الي تقبل هوه يتيم ومنهم الي تقبل هوه ضعيف وتقبل اخطاء وتقبلو كل شي ، لازم نتقبل اولا كلنا نغلط منها غلط مقصود او لا هاي مو مشكله لازم نتقبل ونبدي برحلة جديده كلنا حاولنا وسعينة ووصلنا ، كلنا عدنا جانب مانحبة بس هذه يتغير بلمحاوله مو بلتذمر صح راح تواجة صعوبة بس بلاخير يتغير ، راح تشوف بداخلك شخص يريد ينجح وشخص يريد يستسلم وشخص يريد يعيش وشخص يريد يموت ، قاوم حتى اذا وصلت ممزق لان لذة الوصول راح تشفي كل شي بداخلك ، واجه لاتهرب .

- الأنفصال

بطبيعة الانفصال أنو الآنسان راح يمر بفترة صعبة كُلش بحياته وراح يعاني من هذا الشي سواء كان بنت أو ولد فا ثنينهم راح يعانون ويمرون بأزمات ومشاكل نفسية
راح تأثر عليهم صحياً ونفسياً وممكن جسدياً خل نعدد مراحل الي يمر بيها الانسان بعد الانفصال ونشوف شنو هية :

المرحلة الاولى
راح تنكر الواقع الي انتَ بي وتگول ، لا أحس حيرجع كلشي وراح ترجع علاقتنا وحترجع سوالفنا ، وكلشي يرجع مستحيل ينتهي كلشي ويروح بلمح البصر وبهل سهولة .

المرحلة الثانية
راح يمر الأنسان بفترة عصبية وفترة صعبة كُلش راح يتحسس من كُلشي من أصدقائه أهله ناسه وأقاربه حرفياً من كُلشي وراح يگضيها متنرفز وضايج ومراح يتقبل اي كلام يجي من إي شخص .

المرحلة الثالثة
راح تمر بفترة تگعد وية نفسك راح تحلل كُلشي صار وتتمنى يرجع بيك الزمن حتى تاخذ قررات أحسن وتختلف تاخذ قررات غير ممكن تحسن من واقعك .

المرحلة الرابعة
أهنا راح تحس بالمواقع وراح تبدي تشوف صعوبة ألي جاي يصير وياك من أزمات نفسية وصحية ، وصعوبة هذا الموقف لكن راح يقل عندك الأمل .

المرحلة الخامسة
واخيراً راح تبدي تتقبل الي صار تحس بالتغيير وهنا راح تكون راضي أكثر وراح تكون مطمئن اكثر وراح تتحسن نفسيتك تدريجياً .

فبعد كل هاي المراحل وبعد كل الي صار من مشاكل وعوائق و أضرار صحية ونفسية ، راح ترجع نفسك انتَ طبيعي لكن وياك شي إضافي إلي هيَ " التجربة " وهاي التجربة حتخليك أوعى وأذكى لأن انتَ هنانة تعلمت درس بعمرك مراح تنسى ، فا ياريت تستفاد من هذا درسك وتتعلم من أخطائك .

- ألخوف

شنو هو الخوف ؟
وليش يعني نخاف ؟
وليش نحس بهذا الشعور ؟
شعور الخوف كل انسان يمر بي ومو بس الانسان حتى الحيوانات ، الخوف شي غير ملموس ، يعني نكدر نحس بي بس ما نكدر نلمسة واحياناً الخوف يكون شي فطري بداخل الانسان ، بطبيعة الانسان لو شكد ما جان قوي راح يمر بالخوف وهواي اشياء يخاف منها مثل الظلام او الخوف من الفقدان او الخوف من حيوان معين او من كلام ، الزبدة من كل هلكلام هذا خلي اعرفلكم الخوف شنو ( الخوف هو حالة ضعف يفقد بيها الانسان السيطرة على قوتة وتوازنه ومشاعرة )

خلي نقسم الخوف الى عده اقسام
- الخوف (من شي موجود) مثلاً الخوف من الحيوانات او حيوان معين مثل القطط او الكلاب

- الخوف (من شي مجهول) يعني الخوف من شي ما موجود اساساً مثل الخوف من الفقدان كل انسان بينا يخاف يفقد شخص يحبة ، وكذلك الخوف من المرتفعات هواي ناس تخاف من الاماكن المرتفعة والسؤال هو ليش نخاف من المرتفعات؟
شوفو هي الفكرة مو بالمكان نفسه لان هو المكان موجود حالة حال اي مكان ثاني ، لكن الشخص من يكون بمكان مرتفع يفكر انو احتمال يطيح ويموت او يطيح وينكسر فـ هنا الخوف اساساً هو مو من المكان نفسة وانما من الموت ، وعدنا كذلك الخوف من الظلام عدنا هواي ناس تخاف من المكان المظلم وهنا الفكرة الاساسية هي مو الخوف من الظلام وأنما الشخص من يفقد البصر بالأشياء الفعلية راح يضل يشوف اشياء خيالية واول فكره تخطر بباله هو وجود الجن بغرفة النوم مثلاً

- الخوف ( النابع من الذات ) بهواي اوقات الشخص يخاف من نفسه ، يخاف ما يطلع بالشكل الي يريدة او يخاف ما يكون بالأمكانية المطلوبة او يخاف ما يوصل الفكرة الي بداخلة ، وهاي الحالة تصير اكثر شي ويا الناس الي عندهم رهاب اجتماعي لما يأدون اول تجربة يكون عندهم خوف مو طبيعي ، وكذلك الطلاب وهاي كلنا مارين بيها من يكون عنده امتحان صعب وندرس بكل طاقتنا ونعرف نفسنا متمكنين من المادة بس نبقة قلقين من الاسئلة نخاف تجي صعبة وما نجاوب وهذا كله سببه هو الخوف النابع من ذاتنا الخوف يخلي الشخص يفقد كل مواهبة وسيطرتة ويكون انسان ضعيف

شنو الي نحتاجة لحتى نتخلص من الخوف بشكل نهائي ؟
اكو قاعدة امشي عليها اني ( الشي الي تخاف منه أبدي بي ) يعني الشي الي تخاف منه واجهة اذا تبقة تتهرب من المواجهة راح تبقة خايف ، اعتبرها معركة بينك وبين مخاوفك وخلي ببالك انت الي راح تنتصر بهاي المعركة ، يعني اذا كعدت بـ مكان مظلم لا تتهرب اوكف وواجه خوفك لا تستسلم سيطر ع عقلك واقرة اذكار لحد ما تهدأ ويروح منك شعور الخوف ، التجارب تقتل المخاوف ، يعني الفكرة كلش بسيطة بمجرد ما تقنع عقلك وتقنع نفسك راح تبطل تخاف .