Тосыннан жеткен бақытты сәт – ғаламның өлшемінде тіпті де тосын емес. Оның есесін сен өмір жолыңда жолыққан жандарға көрсеткен адамгершілігіңмен, мейіріміңмен, адалдығыңмен, әділдігіңмен төлеп қойғансың. Кейде жалғыздықта төккен көз жасыңмен де төлеп тастайсың. Басыңа бақытты күн туғанда сен жай ғана қуан.

Сүйемін мына шынайылықты.

Шынайы жүре алатын батылдықты, еркіндікті, жеңіл өмірді🫂🤍

Біршама уақыт бұрын көңілім суып қалған құрбы қызбен жақында татуластық. Әңгіменің бәрі жай ғана екеуміздің болмысымыз бен бұған дейінгі сүрген өміріміздің кереғарлығы әсерінен көзқарасымыз келіспей қалуынан туған еді. Мен де өз қателігімді мойындап ашық әңгімеге тартып едім, ол да эгосын басып жұмсақ жүрегін сөйлетті.

Адамның күні адаммен деген рас қой.
Сол құрбым кешелі-бүгін аяқ асты бір мәселемді шешуге көмектесе салды. Жай ғана мен қазір хабарласа алмай отырған елде танысы бар болып шықты.

Қызық.
Алла өзінің сабағын осындай түрлі жайттармен жеткізеді екен.

“Сол кезде көкірекке салып кекіреймей адамдығыңа жеңдіргеніңнің сыйы осы. Сабағы да да осы, қабыл ал”,-дегендей болды.

Солай қабылдадым.

Кейде адамдармен арада біраз түсінбестіктер болса да эгоны басып, ортақ мәмілеге келіп, соңында түсінісіп, татуласуға тырысамын. Ренішсіз, жеңіл көңілмен жайлы сүрген өмірге жетпейді.

Ұстазбен жақын араласудың бір ғана минусы:

Көп адамнан сол кісідегі ішкі мәдениетті күтіп қала бересің.
Солай басқа жақын-ау деген адамдарыңнан жауапсыз, түсініксіздеу қатынас көргенде ұстазбен салыстырып қаласың, басқасына деген таза көңіліңді де кірлетіп аласың.

Әрине, кімнен нені күтіп қалғаныңа өзің ғана кінәлісің, соңында өз көңіліңнің алдында өзің жауап беріп отырғаның.

/// Кейде өзің сыйлайтын көп адаммен жұмыс барысында кездеспеген абзал-ау.

“Алые сердца”-ның OST-ы “For you”-ға кавер:)

18:10.

Тамақ істеп ас үйде жүрмін. Терезеде даладағы құйып тұрған жаңбыр. Көңілдің бар қыртысы жазылып, кеудемде бір тонна таза ауа кіргендей жеңілдік. Еркелеп кетіп, оралған пердені жоғарыға ысыра бергенде әуен қосып қойған ноутымнан оюдағы Садраддиннің “Айға қарабы” басталды.

Қосылып айтып, көйлегімнің етегін ойната билей салғанда миыма бір жыл бұрынғы дәл осы кезден флешбек оралды.

Садраддин сол әнді енді шығарған уақыт.
Ұзату, үйлену, бәрі өткен соң ата-енемнің үйінде тамақ дайындап жатып дәл осы әнге еркелеп, билеп жүрдім.

Бір жыл өтіпті.
Отбасылы болып, қаласам тамақ істеп, қаламасам істемей апталап жүре беретін ас үйімнің иесіне айналғаныма, сағат сайын келіп сүйіп-құшақтап, еркелетіп кететін күйеуімнің әйелі болғаныма, бірігіп үй болудың қамын әңгімелей бастағанымызға да.

Ал мен жаңа дәл сол алғашқы отбасылы күнімдей еркелеп, алаңсыз бұралып билеп тұрдым.

Соңғы 3-4 айдағы күшті жаңалық, әдемі саяхаттар, жақсы мүмкіндіктер… іштей өзім аңсайтын aesthetic үйге көшу…

Билеп тұрып осының бәрі миыма ағылып келіп жатқанда танауымды қыздырып көзіме жас келді де, “құдай-ау, осынша бақытты бола ма адам” деп жылап қалдым.

Тап бір көрші үйді көрсетпей тұмандап жауып, нөсерлеп құйған жаңбыр дыбысынан менің даусымды ешкім естімейтіні жасымды одан әрі қолдап-қолпаштап тұрғандай еңкілдеп жыладым.
Рақаттанып,
билеп тұрып,
жы-ла-дым.☔️

Соңғы уақытта жетпей жүргені, керек болып, бірақ шыға алмай жүргені де - осы жас, осы сәт, осы бір соус-сезім еді.

Енді бір баяулап, өз темпімді ұстағанда ғана өткен 3-4 айдағы бар сезімнің әрін келтіріп, толыққанды бақытты сезіндіре қойған осы сәт, осы жас.

Ыстық, әдемі жас.??

17.07.2024

“10 минут 38 секунд в этом странном мире”.

Басқа амал қалдырмай жатырыңнан шыққан тұңғышыңды тартып алғаннан соң жұртқа есалаң көрінбегенде қайтесің…

Ол шындық сенің ғана иллюзияң боп көріне бастағанда тіптен…

Сюзанның көзін ағызып жібергім келді. ??‍?

“Айтқанымда емес, айтпағымда ғой әңгіме…”

Жігіт даяшы қыз даяшыны қағып өтті де, қыздың қолындағы тарелкелер быт-шыт болды. Қыз жыларман. Жігіт жанына отыра қалып: “өзім төлеймін, уайымдама” деп жинастырып жатыр. Мимими.