ТУРОН**, қачонгача орзу бўларсан?
Амалга кўчмаган мавзу бўларсан?

Токай диққатдасан оҳларинг билан,
Қўлидан иш келмас шоҳларинг билан…

Қайтарми хув ўша буюк онларинг?
Қуруқшаб қолмасми иссиқ қонларинг?

Сергак тортармикан жаҳдингдан жаҳон?
Юксак кўтарилар туғларинг қачон?

Тупроққа қоришиқ то қай он шонинг,
Ўгай боласидай худди дунёнинг...

Жўмардларинг йўқми ё шунчалик оз?
Эслаяпти сени шоирлар, холос.

Жонибек АЛИЖОНОВ,
августь, 2024@Jonibek_Alijonov

ДОСТОНОНА

Тоғлардан оқиб тушган
шароралар кимники?
Тафти товон куйдирган
ҳароралар кимники?
Лаби ёрилган манов
бечоралар кимники?
Қақратмагин томоқни,
сув бер, тўрам, ичайин.

Кўрпачангнинг тагида
уюм-уюм хазина.
Неча алдаркўсалар
кеча-кундуз таъзимда.
Ҳаводан бошқа не бор
бу миллати азимда?!
Йиртма ўзи ямоқни,
эп бер, тўрам, яшайин.

Самарқандда Самарқанд
Бухорода шариф йўқ.
Элатимнинг ақлида
на ҳарф, на алиф йўқ.
Таълими йўқ толибга
Талаб ҳам йўқ, таклиф йўқ.
Ундов қилгин сўроқни,
йўл бер, тўрам, борайин.

Туркий қунжида мамнун
ахир Турон ўзингсан.
Миллионлардан танланган
якка инсон ўзингсан.
Тўқсон икки ўзбекка
соҳибқирон ўзингсан.
Охиримиз ўйлаган
аввали шон ўзингсан.
Юксалтмоққа ватанни
зўр бер, тўрам, кўрайин.

Курашамиз, бу кураш
дод ўрнини шод қилса.
Қонларда қотиб ётган
юрт ишқини ёд қилса.
Жонфидолик агарда
бу элни обод қилса,
Тутай қурол-яроқни,
сўз бер, тўрам, ўлайин.

Жонибек АЛИЖОНОВ,
июль, 2024@Jonibek_Alijonov

Тушар нур эниб
кўкдан ергача.
Курак чиқарар
юрак шеъргача.

Жисмим тобора
эврилади жим.
Танда томирмас,
худди узун сим.

Тилим тил эмас,
қалампир - аччиқ.
Қоним ўрнида
бир челак балчиқ.

Уйқуга тўйгач,
туйғусирайман.
Ҳар кун Худодан
кун ўғирлайман.

Зеб-у забарим
гўё ибодат.
Тўйиб йиғлолсанг,
масми саодат?

Умрим узаяр
қадамлар билан.
Оёғи осмон
одамлар билан:

Бадани хушбўй,
юз-кўзи суқсур.
Яқинроқ борсанг,
нафси буруқсур.

Тайини йўқ на
илм-у иймонда.
Тонгда хўмрайиб,
тиржаяр шомда.

Ғорга кирсамми,
кетсамми тоққа...
Бутун дунёни
бошқарар соққа.

Ҳарсанг ичидан
ўсиб чиқмас гул.
Ҳатто шоирга
пул керак,
пул,
пул!

Ҳар саъжки шундоқ
сожидаси бор.
Ернинг ушмундоқ
қоидаси бор.

Айбинг: туғилдинг
озгина кечроқ -
Бозор – иқтисод
замони ичра.

Жонибек АЛИЖОНОВ,
июль, 2024@Jonibek_Alijonov

Ҳисорнинг бошларига
Булутлардан қор тушкай.
Этакдаги боғларга
Шудринг-у шарор тушкай.
Чанқаган илдизларга
Сув тушкай – мадор тушкай.
“Бўлинглар, очиламиз” –
Гулларга барор тушкай.
Айланиб, ўргиламан,
Кезаман, ўтираман:
Безовта юрагимга
Бир яхлит қарор тушмас.

Эгарга сув илдириб,
Болалар эниб келар.
Чўққилар орқасидан
Шамсинур ёниб келар.
Адирлар терламоққа
Бир бошдан кўниб келар.
Чўпонлар бехавотир
Таёғин йўниб келар:
Қарайман, хушланаман,
Лек дарров ушланаман –
Нега менинг боғимга
Гул тушмас, баҳор тушмас.

Қанча дуркун орзулар,
Ушалмай армон бўлди.
Баъзи-баъзи дардларга
Бошқа дард дармон бўлди.
"Нега?" деган саволлар
Йиғилиб, хирмон бўлди.
Онамиз ситам ютди,
Ота паришон бўлди.
Жимгина юравердим -
Жимгина туравердим.
Қотиб кетган бетимга
На дўл, на бўрон тушмас.

Жонибек АЛИЖОНОВ,
июль, 2024@Jonibek_Alijonov

“Янги Ўзбекистон”нинг ёшлар кунига бағишланган (махсус) сонида мен ҳам чиқибман ?

Буни қанчалик бахт эканини билган билади!

Хуллас, байрам мен учун олдинроқ бошланди!

@Jonibek_Alijonov

НИМАСИ

Бахтли бўлгинг келар шунчаки,
Ота-она, оиланг билан.
Ҳаёт эса лаҳзаларингга
Ташвишлар сепгани нимаси?!

Рашк қилинар айрим орзулар,
Лек хаёлни бошқариб бўлмас.
Сен интизор ўша кунларни
Бошқалар кутгани нимаси?!

Урилади бир бош минг тошга,
Йиқилишлар улғайтиради.
Лек вақт ўтиб бу хатоларни
Боланг ҳам қилгани нимаси?!

Кўп ўйлайсан – қандай яшаш шарт?
Тополмайсан бир умр аммо.
Лекин уни бир кеча яшаб,
Капалак билгани нимаси?!

Жонибек АЛИЖОНОВ,
июнь, 2024

@Jonibek_Alijonov

Алп Эр Тўнға қиличини
Ишлатмасак, уволи бор.
Лаҳзаларда Култигиннинг
Ўлмайдиган ҳаёли бор.
Не қиларсан, шундай қолсанг
Авлодларнинг САВОЛИ бор.
Мудроқ туркий элим менинг,
Қачон қонинг қайнар сенинг?!

Уят энди, уйғон дея
Айтилмаган сўз қолмади.
Ўша шонли тарихлардан
Бугун ҳатто из қолмади.
Ачинмоқлик хисси билан
Қарамаган кўз қолмади.
Тарқоқ туркий элим менинг,
Қачон қонинг қайнар сенинг?!

Қара улар, ҳар сония
Кўкка довур ўсмоқдалар.
Сен от чопган сўқмоқларни
Навбат-навбат тўсмоқдалар.
Уйинг майли, тўйинг майли,
Тарихингни бузмоқдалар.
Қўрқоқ туркий элим менинг,
Қачон қонинг қайнар сенинг?!

Уйғур уввос тортар унда,
Ҳол сўргали кимим бор деб.
Жой бермайсан қардошингга,
Кўрпачам кир, уйим тор деб.
Гапларингга кулгу келар,
Мақтанасан тағин ор деб
Қуроқ туркий элим менинг,
Қачон қонинг қайнар сенинг?!

Борган сари умидларим
Илдиз каби пастга ўсар.
Аллақачон ётлашганинг
Гоҳ-гоҳида ростга ўхшар.
Баландпарвоз шиорларинг
Мастликдаги тосга ўхшар.
Сароб туркий элим менинг,
Қачон қонинг қайнар сенинг?!

Бирлашмасанг, яшайвергин
Кийиб нусха шаклларни.
Давом этгин, текин сотиб
Ўзинг туққан ақлларни.
Бирикмасанг, мажлис йиғиб,
Сарсон қилма вакилларни.
**Хароб туркий элим менинг,
Қонинг борми ўзи сенинг?!

Жонибек АЛИЖОНОВ,**май, 2024@Jonibek_Alijonov

Бўйним чарчаб кетди, дада.
Келинг, озроқ буриламиз.
Келинг, менга уй ўрнига
Турон деган юрт қурамиз.

Руҳимга сиз ҳамдам бўлинг,
Катта йўлдан қайтмай, дада.
Сиз алданган эртакларни
Мен боламга айтмай, дада.

Иликдаги ўтроқ шамол
Тана узра қирон солсин.
Айтгуликмас қолганлари -
Қолса биздан Турон қолсин.

Тўпланажак туркийларим,
Шулар бизга ошна турар.
Узангига тўпиқ жойлаб,
Бирлашишга ташна турар.

Битта нафас керак бизга! –
Мудроқларни уйғонтирган,
Бўриларнинг терисига
Қўрқоқ танни ўрантирган.

Урумчида чалинган тор
То эзмасин юрагимни.
Олтойидан Ҳиндга довур
Ел олмасин курагимни.

Ҳаёлини, аёлини
Қўрийдиган юрт қурамиз.
Истагандан саволини
Сўрайдиган юрт қурамиз.

Бирлашажак туркийларим,
Бирлашажак бовурларим!
Бирлашмаса икки дунё
Босилмасин ҳовурларим.

Тўхтамасин томирларим
То кутилган кунга қадар.
Ахир фақат эгавериб
Бўйним чарчаб кетди, дада.

Жонибек АЛИЖОНОВ,2024@Jonibek_Alijonov

Бўлди, энди қўй, ақл
юракни азоблашни.
У ахир бир замонлар
шоир бўлмоқчи эди.

Кўп эди орзулари -
кўз юммасдан тунлари
ўз умрини ижодга
мойил қилмоқчи эди.

Ишла, дединг,
пул, дединг.
Пул дардида ўл, дединг.
Катта шоир бўлгунча,
катта одам бўл, дединг.

Қийин эмас эди-ку
юракнинг истаклари -
У шунчаки
аямни
қойил қилмоқчи эди.

Жонибек АЛИЖОНОВ,
май, 2024@Jonibek_Alijonov

Қанийди, менга ҳам ақл кирсайди.
Қанийди, ўзимни англасам эдим.
Менга боғлиқ экан онамнинг сочи,
Мен эса “ҳар кимга ўз умри” дедим.

Саболар қариди остоналарда,
Боғлар нафас учун, холос, дебман мен.
Отам едирибди сутдай тоза ризқ,
Мен-чи…
қўшиб унинг умрин ебман мен.

Қолса, шеър қолади -
ўйлар эдим кўп.
Лек ёвқур яшашсиз бу ҳам йўқ экан.
Машрабдай потила эмиш чин шоир,
Кимки нўноқ куйлар -
қорни тўқ экан.

Қаранг,
қоралабман 24 ни –
Ҳеч не орттирмабман вазнимдан бошқа.
Шунча йил муштимни пахтага уриб,
Шунча йил дардимни айтибман тошга.

Тинмай тирналайди минг савол, минг ғам,
Қош-у қабоққача ҳаёлга чўмур:
Бутунлай бошқача яшарди одам
Балки, бошланганда қабрдан умр.

Жонибек АЛИЖОНОВ,
апрель, 2024@Jonibek_Alijonov