Ая, вужудимни босади титроқ.
Сизникини тупроқ.
Уйқуга кетаман.
Уйғанаман жим.
Жавдираб қарайман ҳаммага, бироқ-
-Қўрқинчли туш кўрдинг, демайди ҳеч ким.
Кўксим ҳувиллайди ҳовлидан баттар,
Ёшлар ичикади кўзимдан нари.
Кутмаслигингизни билсайдим, агар...
Кетмасдим ҳали.
Менинг кўзларимга мангу инар мунг...
Сўзларим дўнади сукутга охир.
Киприкларим оғир...
Юрагим оғир.
Оғрир...
Диққатимда сукутлар оғрир!
Ичимда баьзи бир ҳудудлар оғрир...
Ўтинмоқ бўламан ерга, ҳавога.
Узала тушаман тупроққа илкис.
Қичқирмоқ бўлади бутун дунёга
Шивирлашга кучи етмаётган қиз...
Мен таслим бўлайми?
Кўтарайми қўл?
Ташлаб кетаймикин сизлар каби жим.
Энди буерларга тушиш учун йўл
Кутиш учун энди кимим қолди, ким?
Уфқлар тинишга киришар секин,
Қўшнилар уйига киришар секин,
Тупроққа жонимни тўшаб ётаман
Ер ютмайди лекин...
Сазо бўлмасайди умр деган шам,
Махшар дийдор учун аталган ҳакам.
Тушундим.
Охирим қадар тўкилмас
Менинг илигимга тўлдирилган ғам.
Мана иккимиз ҳам қолдик У билан.
Энди сизга аён, менга ҳамон сир.
Менинг мажруҳ дилим силайди сабр,
Сизникини қабр.

Дурдона Бобомуродова

@Durdona_Bobomurodova

Oxirgi paytlarda yozolmadim.
Deyarli.
Inson òziga aytadiganlari qanchalik kòp bòlmasin, boshqalarga aytadiganlarini elakdan òtqazishi tabiiy.
Tabiatan yovvoyi va yashirin insonligim insonlar orasida doimiy muloqotda bòlish imkoniyatidan mahrum qilishiga qabullanganman. Tilaganlarim va demoqchi bòlganlarimni aynan yetqaza olish qobiliyatim yòq balki. Odatda kôrinishlarim soni kam, aralashuv doiram juda tor. Ammo meni tanigan va tanimagan kuzatuvchilarim, mushtariylarim uchun aytadigan sòzlarim hali kòpligiga ruhan, ma'nan ishonchim komil!
Ba'zan meni òqiyotganlar ruhiga tushkunlik olib keluvchi bòlib qolishdan qòrquv his qilaman. Tòxtatdim deyman.
Ammo...
Ammo, kimlarningdir ichida baxt va beğubor hislar uyğata oladigan kalimalar taqdim qilish niyatim hamisha tirik ekanligini izhor qilishga bugun kuch va ilhom topa oldim.
Kanalimda meni olti yildan buyon kuzatib keladigan mushtariylar bor ekan...
Xohlardimki, yana olti yil ótib, "-kanalimda meni 12 yildan buyon kuzatib keladigan mushtariylarim bor ekan...", degan post qoldirish nasib qilsin!

Hurmat bilan
Durdona Bobomurodova

O'ZIMGA XITOB

Bilaman bir kuni hech narsa qolmas
karvon izlarini ko‘mar samumlar
Meni ham na do‘st na dushman topolmas
g‘alvirdan don emas to‘kilar qumlar...

Devorlar cho‘kadi tevadek holsiz
poydevor toshini ko‘mar to‘zonlar
Ayollar erkaksiz erkak ayolsiz
chumoli baayni kezar insonlar

Oqibat qiyomat maydoni aro
saf tortar Odamning eng so‘nggi xayli
Barchaga barobar yog‘ilar jazo
barobar kuydirar oftob mash‘ali

O‘shanda haqlarning haqqi olinar
halqumlar qa‘rida bo‘lsa-da taqir
Dengizlar tubida bo‘lsin topilar
gunohsiz tashlangan sag‘ir-u kabir...

Mazlumlar jismini ko‘mgan toshlarni
ko‘tarib chiqadi kaftida zamin
chopilgan yuzlarga singan yoshlarni
yomg‘irdek yog‘dirar Robbal Olamiyn...

Sening-da manziling ayon unutma
odamzot aybining maddohi Asqar...
Yaqosi yirtiqning etagin yirtma
boshida Xudo bor
oldida Mahshar...

ВАСИЯТ

Мен кўзимда ёш билан келганман етиб Унга,
Ва дунёга илк бора чинқириб келдинг,  болам.
Яноқларингни менмас, томчилар ўпган кундан-
Бу беш кунлик дунёда энг бахтли бўлдинг болам.
Кўз ёш  -  бу инояту эҳсондан элчи байроқ,
Қароғингдан овози чиқиб турган изҳор ишқ.
Воҳей!
Жонни жон демай тўкиб ташлар бу титроқ
Титроғингни тангадай тўкиб бошлар йиғлашлик...
Тунни қилиб турган тун- қароликка тасаддуқ,
Эгиб турса бошингни ғамнинг юзларидан ўп.
Тупроқдин азми бунёд- Юсуфни қучган қудуқ,
Қудуқдай ғамлиғ, намлиғ кўзларда яшайди У!
Шодлигинга айланиб қолмасин ўтар дунё...
Ўтару-кетар бўлган ғуссалар деб сиқма жон.
Нигоҳингда нур бўлсин бўлар кунда рўбаро,
Чинқириб кирган каби,  чинқиртириб чиқар жон.
Ўшанда ҳам кўзларинг йиғлаб тургай болажон...
Айттирса Унинг исмин бошинга кўтар ғамни,
Илло  элтсайди Унга ичингдаги ҳузунинг.
Бахтлиларнинг кўзлари аввалу охир намлиғ,
Фақатгина бахтсизлар йиғламайди,  Маҳзуним...
Фақатгина бахтсизлар йиғламайди, Маҳзуним!

Дурдона Бобомурадова

@Durdona_Bobomurodova

Kasal payting, sendan boshqa hamma soğlomdek kòrinadi.
Baxtsiz payting, sendan boshqa hamma baxtlidek kòrinadi.
Zulm kòrgan payting, sendan boshqa hamma zolim bòlib kòrinadi.
Faqat òlim degan bir haqiqat borki, òlgan payting sendan boshqa hamma aslida òlik ekanligi kòrinadi...

ХОТИРА

Мени ҳозир қизиқтиради
Нада совуқ...
Нада ёмғир...
Йўл...
Сочларимни тўзғитиб ташлаб, сўнг ичида изғийди шамол.
Шаҳар -- ҳатто соябонга хам пули етмай кетаётган, ҳўл,
Одам каби кўриниб кетар...
Кўзларимга келади малол...
Дарахтларнинг тинкаси қуруқ. Ҳўл ва ҳолсиз чирпирайди барг,
Зиналарнинг қаватларига бошин уриб увлайди шамол.
Кўп қаватли бинодан ўзин отаётган одамдай карахт --
Томчи ўзин ташлаб юборар...оёғимдан қочади мадор.
Уйга кетгим келяпти, дейди -- ичимдаги ожиза бир онг,
Ҳаа, қўйсангчи! Сени шахардан бошқа киминг ёки ниманг бор?
Шу шахарга қўл силкиб бирор ердан қўним топганмидинг ё..?
Қўй. Йиғлама. Иссиқ ёшингдан ана бошлаб юборяпти қор.
Шом қўйилиб келяпти қара, уйга кириш вақтидир балки,
Бошин пана қилган ҳуув одам, бошпанасиз бекатларга боқ.
Ўзгаряпти йўл чироқларнинг қизил, сариқ ва яшил ранги
Юр. Автолар қичқириғисиз тезроқ ўтиб қолган яхшироқ.
Ҳотирининг аччиқлигидан фарқи йўқдай --ёмғир, захарнинг...
(Раҳми келди бизга шекилли) Авто келиб тўхтайди.
--Такси?
Уст боши ҳўл қиздай нозанин, елкалари титроқ шахарнинг
Тегиб кетар шахсиятига -- ёмғирларинг хашаки рақси...
Мен жимгина кетаман, ортдан -- сўз деёлмай мужмаяр олам,
Айни дамда ҳавасим келар шу қадар хам манов ҳолимга.
Манзилидан адашган каби аҳйон-аҳйон кўринар одам,
Бунча ҳайрон қарайди мен ва очилмаган соябонимга?
Юрагимнинг оғирлигидан қадамларим оғринар ўксиб,
Мана калит. Сенинг ўрнингга қучоқ очар худди шу хона.
Худди шундай йиғлаган осмон, худди шундай йиғлаган кўксим,
Худди шундай шалоббо қабринг кўз олдимдан кетмаган, она.

Дурдона Бобомуродова

@Durdona_Bobomurodova

Бир бойнинг уйида меҳмон бўлган йигит хаёл суриб ўтирар экан дўстига шундай деди:
«Шу мол-давлатлар бандалар орасида тақсим қилинаётганида биз қаерда эдик-а?!»

Буни эшитган дўсти уни касалхонага етаклаб борди ва беморларни кўрсатиб:
«Мана бу касалликлар тақсимланаётганда-чи?!» - деди.

Шукур учун етарлимасми?

@Durdona_Bobomurodova