رديت ..واثنينه نشبع قهر
… من سولفتله للكمر

صار النشد بخيامي… والسولفت آلامي

انه متت يم النهر

/////////////

تجرح اسوالف خيم محروكه

الليل جن ونومه ابد منضوكه

شلون بالشام واطب ابسوكه

متعوبه… اتعثر جيتك متعوبه

مصيوبه… .وبسهم اعيونك مصيوبه

مرعوبه… .فريت ابهيمه ومرعوبه

حافيه وشوگ وجمر خيل وصهيل

وأرد اسولفلك يبن حامي الدخيل

يبو فاضل اسمع اوني ثچيل

ماعندك اجفوف… ماتكدر تشبكها الزينب

ياوسفه متشوف… .وعالغبره وبالدم مخضب

ونيت… .ونتك اونتي اتكابلن

كل الهظم بيهن حچن

…… ونيت

لا لا تِون كدامي… ..والسولفت آلامي

انه متت يم النهر

/////////////

آنه زينب يبو سوالف دافيه

خاف ألچمك من اجيتك حافيه

كون عيني ابدال عينك طافيه

وچفوفي ..وعيوني انطيهن وچفوفي

وبخوفي… .كاصدتك اركض وبخوفي

وحروفي… تتلعثم بلساني حروفي

شرد اسولف تاذي وتزيد الجروح

كون عميه ولا شفت دمك يفوح

راح اروح وغصب عنك راح اروح

من امشي للشام… وبرمحك لاچن اتصدلي

واشكيلك آلام… ياريتك تنزل وتردلي

حنيت… من چنت آنه امدلله

بجالك يبن عقد الوله

… حنيت

عن زينب انت تحامي… .والسولفت آلامي

انه متت يم النهر

////////////////

ارجع امن النهر ماعرفوني

شيبت غيرلي حالي ولوني

عن كفيلي بالخيم نشدوني

وبخدي… .وتجاوب دمعاتي ابخدي

ماعندي… وسوالف خلصن ماعندي

كل ردي… صفنات وبالون كل ردي

صافنه وفكد وقهر بيّه تطوف

عفته عالمشرعه مرمي ابلا جفوف

الفكد والغربه وسبي عيني تشوف

من بعده ننضام… من دونه الشام يودونه

ياجمرة الشام… .بالسوك خلافه يفرونه

اتچويت… نار الفكد نار الخيم

… .من ودعت راعي العلم

… ..اتچويت

والهم يغطي هامي… .والسولفت الامي

انه متت يم النهر

//////////////////

ادري ماتقبل اعوف الخيمه

احتركن وماتدري صرنه ابهيمه

گلبي جمره وارد افرغ ظيمه

بدليلك… .ونارين الصارن بدليلك

واشچيلك… امعلمني امن انضام اشجيلك

هد حيلك… ياخويه الشام الهد حيلك

ماشيه وهِزَل وعرجه النوك هاي

وامشي وحدي ومن هلي محد وياي

والاطفال اتكلي عمه نريد ماي

والعدها اطفال… .وبغربه ومحد يبرالي

وحده الضعن شال… ودعته ونايم كفالي

ناديت… .رحنه يبن حيدر علي

… ..للسبي واحنه ابلا ولي

… ..ناديت

والگلب يسعر ظامي… والسولفت آلامي

آنه متت يم النهر

//////////////

نسئلكم الدعاء

احمد الطيب الحلي

هذا الدرب ميدوسه ابد جدمي

لن بيه شفت مسطور خد امي

وزينب تِكِلي يالحسن

حته الدرب يبچي وحزن

لن بيه شفت مسطور خد امي

/////////////

امي طلعت بالدرب وامشي وراها

وشفت قنفذ يركض وبالسوط اجاها

وحده من اعيونها بسطره عماها

وطاحت امي بالدرب والون علاها

تكلي الحسن يايمه تجيلي

كومني ما اكدر برد حيلي

وضلوعي يايمه انحنن

حته الدرب يبچي وحزن

لن بيه شفت مسطور خد امي

////////////////

ها يزينب كون لا شفتي الي شفته

كون هذا الدرب لا شفته وعرفته

بقه يلچمني بخيالي ورغم عفته

ويرجع إلصاطرها لامي ترد وكفته

وبكعب رمحه يظرب ابأُمي

وتكلي ريته والدك يمي

يايمه حظرلي الچفن

حته الدرب يبچي وحزن

لن بيه شفت مسطور خد امي

////////////////

اخ يازينب عله الزهره الحنينه

وحكه گلبي مابُطل نوحه اوِّنينه

شفت امي عاشت وماتت حزينه

عله افراش الموت وَنَّتها علينه..

تدري بعلي طايح ابمحرابه

وتدري بدليلي وتعرف اصوابه

وتدريچن ابلايه وطن

حته الدرب يبچي وحزن

لن بيه شفت مسطور خد امي

////////////

يختي زينب كون هذا مو دربنه

وَلّا دَرْب الشام من إصوابه طِبنه

حافيه وتمشين لتكولي تعبنه

بالسبي ودرب الالم هالوكت ذبنه

وهالحطب يصبح نار بالخيمه**

وركظتها امي انتي بالهيمه

وثنينهن يتشابهن

حته الدرب يبچي وحزن

لن بيه شفت مسطور خد امي

////////////////

انه ما انسه ابد ازرك جفنها

وامي من طاحت رحت نمت ابحظنها

صعبه ام من تنسطر كدام ابنها

وهو مايكدر يصد صطرتها عنها

*ومنها وابد مابطلت نوحي

سطرت جفنها طاحت بروحي
*
وگلبي ركض لامي حظن

حته الدرب يبچي وحزن

لن بيه شفت مسطور خد امي

//////////////

نسالكم الدعاء
احمد الطيب الحلي

الجمعه 22/11/2024
السعه 1:52 فجرا

نزال

شوف عكبك يارسول الله اشجره

اول مصاب الضلوع امكسره

///////

بعده مطروح الجسد لفه الچفن

إولا تِغَسل لا تِشيّع واندفن

وكاعده اتلوع اعله ابوها ام الحسن

الفاكد الله ايساعده

نبي واب هم فاكده

بويه صاحت زمره هجمت كافره

///////////////

انت تعلم حالها ابطك الضلع

ادري بالملحود گلبك منفجع

عله ام حسين دم يجري الدمع

البضعه حركوا دارها

اعداك شبت نارها

ومهجتك ظلت يطه اموجره

////////////////

من بعد سمك يبو الزهره ابغدر

اضلوع من فاطمه اطك وتنكسر

ابحايط وباب اشثكلها تنعصر

تِوِن من بسمارها

نبت بين اكتارها

ومحسن ابدمه الزچيه تنظره

//////////////////

وكسر كلبك يالنبي ماينجبر

وبعد عينك علي ايصلي ويالفجر

يسجد ابمحرابه حيدر ينطبر

ودم يخضب الهامه

علي ابلايه اعمامه

وهامته ابغدره يويلي امطبره

/////////////////

ومثل ما چبدك يطه ينمرد

منظرك نفسه يبو الزهره يرد

والحسن ابنك يِسِموله الچبد

وچبدته مردوها

وسمتك ردوها

ومثل ماسموك صاير منظره

/////////////

وبدليلك يارسول الله جرح

اتشمه بالمنحر كبل لاينذبح

تدري راس حسين يبقه عالرمح

وزينب اخته اكباله

محاوطه ابخياله

وزينب الچانت اميره اميسره

/////////////////

أعز مخلوق اعله گلبگ ينسلب

عل ثره عريان وتچفنه الترب

حسين ضامي وعله وجهه ينكلب

منل كفه يذبحونه

لخته صد بعيونه

ايكلها نوك اليسر وسفه امحظره

/////////////

مثل يوم حسين ابد مامثله يوم

غربه وبطف كربله فيض الدموم

يِهد حيله الطفل مايكدر يكوم

ينذبح بحظانه

راوه طفله السانه

حته چبدي ومو اشفافي امفطره

//////////////////////

يالنبي ولدك ذبح لو سم كضوا

اتغربوا وبراحه ابدا ماحضوا

لجل دينك دمهم يوهبوه رضوا

حته يرضه الباري

ابنك ايضل عاري

وجسم ابو اليمه الخيول اتطشره

////////////////////

نسالكم الدعاء

احمد الطيب الحلي

دار الحسن… ماحط بوب

خله المضيف ابلا بوب ..حته اليجي ميدكها

///////////

وي الفقره ابو محمد يجسم زاده

ويفكدهم ويمهم يحب مكعاده

ايفل جيسه ويفرك چريم الساده

ابضحكه ولطف… هوه ايعرف

ومعزب ويقره اكلوب… .من كبل ماينشدها

//////////////

هي الشجاعه اشما بذل مايهتم

ابن الاجواد المن هله يتعلم

والده اتصدق من يِصلي ابخاتم

لمن ركع ..سائل سمع

مدله ايده حيدر وانطاه… وچف الحسن قلدها

//////////////

المعتاز ابد يم الحسن ميكله

يدري اليچهبه عنده مالات الله

ينطيه جبل لو طلب واحد تله

چف الكرم… لا ماحرم

اي واحد وكلشي يريد،… يصرله الصرر ويشدها

///////////////

ماياكل اله ايكوم يفكد جاره

وديوانه عامر تارِسَه خطاره

ضل موكده ماتطفه ابدا ناره

مو بالدسم… .وجها ابتسم

والحسن يتلكه الضيف… .وكل الهله يرددها

///////////////

ويالزاد ياميت هله ابماعونه

وماصدت المحتاج يوم عيونه

المديون ينطيه اكثر امن اديونه

لا مايعد… .عنده اشيجد

ينطي الحسن دون احساب … .شكد ينطي ابد ميعدها

//////////////////

دار الحسن منه تعلمنه الجود

كلشي انوجد بس باب لا ما موجود

ابوجه اليجهبه الباب ميضل مسدود

يطب مايدك… يدري صدك

والحسن كاضي الحاجات ..وكل طلبه ابد ميردها

//////////////////

لو چانت الحاجه اشكثر مصعبها

عل كاع طالب حاجته يكتبها

يقره الحسن يكظيها اله ويشطبها

والي انكتب ..كله انشطب

يترس جفوفه وينطيه… چفوفه كبل ميمدها

///////////////

نسالكم الدعاء

احمد الطيب الحلي

الاثنين 7 صفر 1446
12/8/2024

بعيوني… نار وخيمنه تشتعل

بعيوني… .شام وسبي وبيدي الحبل

وطول الدرب مخنوكه بالعبره

ماعندي والي وگلبي شيصبره

بعيوني

///////////////////

غريبه إوحدي ونار وركض بالبر

هيمه وليل وحشه وبوسط عسكر

وعله باب الخيم عالجمره اتنطر

صحت حيهم هلي بلچن هلي تحظر

ولياني… اهل المروه والشيم

ولياني… خانكنه دخان الخيم

ونوگ السبي يخواني متحظره

ماعندي والي وگلبي شيصبره ؟؟!!

بعيوني… .

//////////////////

يالعندك الماي وبيدك إومتضوك

ابدرب الشام امشي والگلب محروك

اضل مستحيه اكلك من اطب للسوك

ياعباس صحتك بچت حته النوك

مچتوفه… ودلالي خويه منجرح

مچتوفه… وراسك اصد فوك الرمح

چنه ابنظرته يسولف ابحسره

ماعندي والي وگلبي شيصبره

بعيوني…

//////////////

اباوع بالدرب بلچن يمر والي

اذاني الحبل مَحد فَل احبالي

دورت اشكثر بس شامت اكبالي

والضحكه سهم تنبت ابدلالي

ايباوعلي… يضحك وأنه ابگلبي سهم

ايباوعلي ..من نظرته حيلي انهدم

بت الدلال شلون متيسره

ماعندي والي وگلبي شيصبره

بعيوني

//////////////////

وكف راس الحسين الحادي بيه ايعت

چنه ابنص صخر حده الرمح ينبت

دورنه ولكينه النه ضاعت بِت

راسه مامشه وعالرمح ضل يثبت

مشونه… وردت الطفله للضعن

مشونه… راسه ابرمح وِإلنه وطن

ابرمحه ويسولف عطف بالنظره

ماعندي والي وگلبي شيصبره

بعيوني

///////////////////

جروحي هواي واصعبهن جروح الشام

اركض حافيه ويچويني جمر اخيام

وارضه امتوني زركه واجمع الايتام

وكلهن انچوي وانظلم لو انظام

لاچني… .بديوان زينب من تطب

*لاچني… ميته آنه بديار الغرب

بس نفس جسمي نايم ابكبره

ماعندي والي وگلبي شيصبره

بعيوني

//////////////////

نسالكم الدعاء

احمد الطيب الحلي

الجمعه 4 صفر 1446

9 /8/2024

اليكود الضعن مو عباس يومن ؟

إوغيابك لاهو يوم وموش يومن

خواتك ماحچن بالإيد يومن

من كد الركض وسياط اميه

دك النبض… حسين

حبه انفرض… حسين

من انعرض ..حسين

والعشك صارت كربله

حسين… حسين ..يا ابا عبد الله

///////////////////

حسين اربعينك ننتظر… ويامحلاها الخدمه

جمال… ..دلال ..يا ابا عبد الله

بلكت تِضَل طول العمر ..والله يديم النعمه

نشوف… .ضيوف… يا ابا عبد الله ..يا ابا عبد الله

من الفجر حد الفجر… .متحزمين ابهمه

شعور… .سرور… يا ابا عبد الله ..يا ابا عبد الله

والماشي لحسينه… متفضل اعلينه

ايشرفنه ونخدمه… لمن يمر بينه…

عزه وفخر… حسين

طول الدهر… حسين

تاج البشر… حسين

والعشك صارت كربله

حسين… حسين ..يا ابا عبد الله

////////////////

قبلة عشك يا كربله… كل عاشك يكصدها

تِذوب… قلوب ..يا ابا عبد الله

عشاكه شوك امحمله… .ودمعة حب ابخدها

غرام… هيام… يا ابا عبد الله

ومسافره وي القافله… وي زينب موعدها

جروح… تنوح ..يا ابا عبد الله

بالاربعينيه… ترجع المسبيه

تمشيلك ابلهفه… ومحمله حنيه

وي الضعن… حسين

أرواح اجن… حسين

ليك اكصدن… حسين

والعشك صارت كربله ..

حسين… حسين ..يا ابا عبد الله

//////////////

ماسدها بابه وتنقفل… بوجوه المشايه

كريم… رحيم ..يا ابا عبد الله

يحسيني ما ميت عدل… اتحيي ضيوفك هايه

كلام… سلام ..يا ابا عبد الله

للكاصده ايسلم وَصُل… ايكله اتضل بحمايه

حبيب ..طبيب ..يا ابا عبد الله

وزيارته حجه ..من العسر منجه

نمشيلك وندعي… ابكل خطوه نترجه

مانفترك… حسين

درب العشك… حسين

نبضي يدك… حسين

والعشك صارت كربله…

حسين… حسين… يا ابا عبد الله

/////////////////

والدرب لو يصبح جمر… نكصدلك وبلهفه

دوام… غرام… يا ابا عبد الله

من غيرك شيسوه العمر… وغيرك لا منعرفه

رئيس… .ونيس… يا ابا عبد الله

ونطيعك وتامر امر… الخادم انت اتشرفه ..

يصير… امير

والرفعه تاليته… .الانته هوه ريته

يا اغله من روحه ..وحته امن اهل بيته

كاصد الك… حسين

كلبي انملك… حسين

ليك وهلك ..حسين

والعشك صارت كربله

حسين… حسين

يا ابا عبد الله… يا ابا عبد الله

///////////////

نسالكم الدعاء

احمد الطيب الحلي

الاثنين 5 / 8/2024
29 محرم 1446 ه

تمنعونه… .لان دمعتنه ماتنشف عله المظلوم

ومن الماي ضل محروم…

عدنه اسلاحنه الدمعه

ودعاء حسينه ايسمعه

عله امصابك لان نلطم

عزائك رايد يمنعه

عزاء الدمعه والحركه ولوعه ودم نهل دموع

ونضج ونصرخ ونلطم وكلبنه منكسر مفجوع

عزائك ياشرع هذا من اهل الشرع ممنوع

نكله احظر وتالي احكم

تشوف اتفرع وتلطم

يا ابا عبد الله… يا ابا عبد الله

///////////////

تعرفونه… .نلطم شور عل ضل عالترب عطشان

وغريب إومنسلب عريان

مو بس نلطم انضج كون

وطول العمر بكاؤون

المصيبه اعظم مصيبه تصير

ومثلها ماتمر بالكون

حسين منل قفا مذبوح كون العين دم تجري_

والچانت اميره تصيح يحسين انسلب خدري

اشرلي يبعد اختك ابدلالي اشتعل جمري

ادري النفس بالكوه

ونايم خدك امچوه

يا ابا عبد الله… با ابا عبد الله

/////////////////

تذمونه… لان فقره وابد ماعدنه غير حسين

ودم تجري تراهي العين

عله حسين الكلب تنور

نِذِكره ابكربله منحور

سليب وجمره دلاله

ولان ياذينه نلطم شور

نتهدل ندك عالروس وتضل فاتحته منصوبه

اعز من والدي وامي وصبح لكليبي محبوبه

احجچوا اشما حچيتوا انضل ابد مانترك دروبه

درب الجنه درب حسين

ومثل دربه نحصل وين

يا ابا عبد الله… يا ابا عبد الله

///////////////////

تِتِهمونه… .واحنه حسين عدنه منل نفس اغله

ودنيه ابغيره ماتحله

مثل حسين مانلكه

ابو الحنيه والملكه

نجي وبس ابمضيف حسين

ندك اصدورنه ابحركه

يستاهل ابو السجاد لمنه ابعطف حنيته

نچهبه ومن ندك بابه ولا فد يوم سد بيته

وخلانه ابفخر خدام وربينه ونعم تربيته

يضل منهجنه ابو السجاد

وغيره انرفضه ماينراد

يا ابا عبد الله… يا ابا عبد الله

//////////////

خادم الحسين
احمد الطيب الحلي
السبت 27 محرم 1446 ه
3/8/2024

سولفلي… .من رحت عمه للدفن ..

سولفلي… عفت النحر يبجي ويِوِن ..

انكث عَلَيَّه تراب من كبره ..

تراب العَلَه  هدومك اشم عطره ..

سولفلي…

/////////////

الله يساعدك عمه البكَه براسك ..

راجع منكسر چن حافر الداسك…

دفنته ياعلي السجاد باحساسك ..

لأن ماكاملك لا شبكَه لا باسك…

يلجمني… اتكلي يزينب اشبكَه ..

يلجمني… مكطع وذر مِنَه إشْبِكَه…

وحسين ابوي ابكل كِتر وذره…

تراب العله هدومك اشم عطره ..

سولفلي ..

/////////////////

بيدك جست كَلبه اشكالك زينب ..

وبيدك من دفنته اشهيست يلهب ..

تره العباس راسه إعلَه الرمح شيب

يِكِلَك ضعن زينب لليسر غرب ..

يباريني… ماچنه راسه عالرمح..

يباريني.. عباس ماچن منذبح..

عالرمح ويصدلي إبأحن نظره…

تراب العله هدومك اشم عطره ..

سولفلي ..

/////////////////

اجت هاي الرباب اتكلك وليدي ..

ماراضع ثلث تيام إله إوْحِيدي ..

فرغن  حظني والكاروك اهز بيدي ..

يمكطوع النحر لو نازف وريدي ..

عبد الله… من العطش كلبه التهب..

عبد الله… تاليها من دمه شرب..

من شاله ابوه رايد ولو كطره..

تراب العله اهدومك اشم عطره..

سولفلي…

/////////////

رمله هل اجت تنشد عن القاسم…

عرس لو فاتحه نصبت بني هاشم ..

شو عريس صاحت عالرمل نايم ..

عله خده ورد رب العرش راسم..

من شفته… بجفوفه حنه لو دمه ..

من شفته… بهيده الجرح لاتلجمه ..

لو ادري اروح اتمدد ابكتره…

تراب العله هدومك اشم عطره ..

سولفلي…

///////////////

لِيلَه تِنشِدَك عن دَفنَت الاكبر ..

دفنته وحَّدَك من تمشي تتعثر !!؟؟

ماتنطيك روحك ادري ماتكدر ..

صحت واحد يعينك ضلعك امكسر ..

عينوني… . حظروا عشيرة بِنْ اسد ..

عينوني… وَسدولي الاكبر باللحد ..

اليدفن اخو جوه الضلع جمره…

تراب العله هدومك اشم عطره ..

سولفلي ..

///////////

تكلي عمه زينب كلبي هَم متروس..

واثر حافر ابصدره بقه من الدوس..

جسم حسين طعنه لو جرح متروس..

كلهم والرضيع اندفنوا ابلا روس..

هد حيلي ..حته الطفل راسه انكطع ..

هد حيلي ..من ثدي امه ماشبع ..

وتفطمه نبلة حرمله بنحره ..

تراب العله هدومك اشم عطره ..

سولفلي..

/////////////

نسالكم الدعاء

احمد الطيب الحلي

اول محرم لو سمع بقرايه…

مهدينه بالموكب يشم الرايه..

يارايه طحتي إعلَه النهر..

ياظهر من طحتي انكسر..

حسين… حسين

///////////

نار المخيم تستعر ..بروحه جمر ..المهدي انجوه..

عماته بسياط وزجر ..شامت يمر ..طاح اللوه ..

الهوه حركها وذكر… جف الكمر

شافها وكلبه انكسر… راية فخر..

إباله كل الطف حظر… بجه الحجر

صبح ومسيه المهدي دم دموعه

ونار الخيام انجوت بيها ضلوعه…

… ودم يبجي لن جده انغدر….

ياظهر من طحتي انكسر ..

حسين… حسين

////////////////

العماته مهدينه يحن… ليله يجن.. شاف الذبح

كاعد عله تل الحزن ..روحه تون ..فوك الرمح..

شافها تسحك جمر… لمن تفر ..

تصيح ابو فاضل يمر… بس مايمر ..

ريت اخيتك بالكبر.. مو باليسر…

اتكله يخويه الشام لو ودوني..

بالسوك ميته اصبحبت لو فروني…

لا واحد من اهلي حظر..

ياظهر من طحتي انكسر ..

حسين.. ..حسين

//////////

إبكَلبه الف ناعي نعه… عن مصرعه… طاح الكمر…

وجفوفه يَمْه امكطعه… عالمشرعه… يم النهر…

حسين من رد للخيم… حيله انهدم ..

حسين جا وين العلم… كلبه انهظم ..

حسين نشدنه الحرم… جرحه انلجم…

يكلهن اخوجن مايِرِد للخيمه ..

والليله تِمسَن ياخواتي بهيمه…

إعليجَن يِهِد حيلي القهر…

وياظهر من طحتي انكسر

حسين.. حسين

//////////////

المهدي ونه ينسمع ..مو بس دمع ..يبجي دمه

عَلَه النَحر المِنكِطِع… ضل مِنفِجع… ويألِمه…

حسين جبده من يبس… رمح انغرس

حلكه بالرمل انترس… ماضل نفس

بكربله ذاري لبس… داسه الفرس..

والخيل تمشي اعليه تِكَسر ضلوعه..

بهل حاله عل خيمه تهل ادموعه…

عالخيم دلاله انطبر…

ياظهر من طحتي انكسر ..

حسين…. حسين

////////////////

بكل محرم من يهل… رد الحبل… بجف عمته..

عل رمح راس الطفل… ومن عالهزل.. .ما شمته..

اتكله مهدك خله…. وونيني عله..

وكلشي بعدك ماحله.. وضاك الفله…

راح اضل امعلعله…. ابهذا البله….

عبد الله يبني اتكله يكثر نوحي..

وشكد غميجه وتون تبقه جروحي…..

عاداني بوليدي الدهر…

ياظهر من. طحتي. انكسر

حسين… حسين

///////////

احمد الطيب الحلي
نسئلكم الدعاء