https://t.me/afnan_jhad

https://t.me/afnan_jhad

اربا اربا يا ابن امي
امگطع وع الغبرة مرمي
ماكو الك عوان يفزع
وحيل مالك تدنه يمي
من على التل واصيحن
عفت خيماتك يطيحن
امن الخدر طلعن بناتك
وا غريباً وا ذبيحاً
دارت الدنيا علينا وفگدك يبوگ العوافي
خيام ما عدنا وطلبنا يلمنه منك حضن دافي
تالي شل الحيل منظر نورك اعلى الغبرة طافي

-محمد منير

ع الهزلة بلا هودچ امشي
وراسك يحسين يفييلي
تريحني من عيونك نظرة
كل ما اتعب ويهد حيلي

من فوق شاهقة القنا ،،، راسك يفيي على الضعن
ما تهنه وانتَ ويانه
وبمشيه لو يعثر طفل ،،، چلمات الأسم الله انحچن
من نبرة الك تعبانه
راسك يلالي اعلى الرمح يقرا الكهف صار
بالظلمة ويشع چن شمس واصحابك اقمار
يالميت و گلبه احترگ گبل الخيم نار
نزلوا الرمح گلبي مچانه
هذا اللي جامعنه بحنانه
راسك يوميلي ودمعاته
كل ما تنزل يگرب ليلي
تريحني من عيونك نظرة
كل ما اتعب ويهد حيلي

فوگ السنان يحن علي ،،، راسك يبو اليمة عجب
يبچي وينوح لحالي
ويگلي ذمة برگبتچ ،،، يا زينب و دمعه انسچب
تشيلين حمل عيالي
عجبني راسك من وگف عاين للضعون
حيران تعبان و قلق مثل اليضيعون
ما ادري شنهي اللي حصل يا ماي العيون
ثاريه راسك يحچي لينه
ضاعت رقية من ادينه
ما ناسي عيالك و اطفالك
تومي الهم ساعة وتوميلي
تريحني من عيونك نظرة
كل ما اتعب ويهد حيلي

ما يشفى گلبي المحترگ ،،، فوگ الترب گلبي وگع
بالسوط لاحوا راسك
شوية الگلتهن ع الگلب ،،، و الخله كون الله انفجع
التقوير لمن جاسك
راسك يبن خير العمل بالكوفة مصلوب
يرمونه بحجار و عصي و كلساعة مگلوب
من العطش للخيزرانة بشفته مصيوب
من الراس كلشي اخذ حيفه
والشمر يچوي النار سيفه
كون بدالك شالوا راسي
وموش انا ابچيلك تبچيلي
تريحني من عيونك نظرة
كل ما اتعب ويهد حيلي

درب السبي يكبر العمر ،،، معذبني يا درب السبي
مثل الغصن يكسرني
وسياطهم تاهت واجت ،،، و مضيعة وتدور عبي
واستوطنت نص متني
من السياط اعلى الظهر تلچمني يحسين
راسك اشوفه اعلى الرمح يشبحلي بالعين
عذريني چنه يگلي انا مضيعلي چفين
يصبح غريب ابين هالناس
الضيع وطن يتسمى عباس
گتلي هواي اسف يا زينب
وتفت گلبي شما تشكيلي
تريحني من عيونك نظرة
كل ما اتعب ويهد حيلي

الشاعر محمد منير المنصوري

يالمنطيني عبدالله وعلي الاكبر
قليل بحقك انتَ الروس تطبر

قليل بحقك اطبر هامتي وانعاك
يالمنطيني منحر دمي ما جازاك
لخاطر عيشتي السيوف تتعناك
ومثل كبش الفدى يحسين تتوذر

تتوذر وطولك ينعدم يالزين
وبعد فَيّ لبناتك ما تشوف العين
حوافر خيلهم مثل الجمر يحسين
وجسمك حرمل بكل صوب يطشر

يطشر لخاطر بي تلم الاسلام
وحتى يقوم دين الله تطَيح خيام
يالقدمت كل شي شوية طبرة هام
اطبر روحي ألك يحسين ومقصر

مقصر لو أظل أنعاك صبح وليل
السمة دم مطرت لدمك الظل يسيل
دمك قربة لله انقبل چن هابيل
وصعد عرج السمة ومعراجها تفجر

تفجر يبچي لجلك يا عظيم الشان
وناحتلك الحور وبچت انس وجان
حرارة مقتلك ما تنطفي ونيشان
خلت بالگلوب بكل وكت تُذكر

خلت بالگلوب مصيبتك لوعات
وحزنك ما يفارگنا انحفر بالذات
يخامس گمر وموذرينه بالفلوات
بچاك الصخر ، ما حن گلب للعسكر؟

ما حن گلب ليك وكلشي فوگك طاح
حجارة وعصي وسيوف وسهم ورماح
مهو حيلك هدم من شفت اخيك راح
ومثل جامة أعلى أخيك ظهرك تكسر

مثل عود الورد ظهرك يچنك عود
انحنى والكون كله انحنى وطاح الجود
انهشم گلبك بساعة راسه بالعامود
تهشم ، ياحسين وحيلك اتبخر

طايح والجمع فوگك أخذ بالحيف
وتتلگى السيوف شلون ملگى الظيف
وزينب نادتك ياريت موتك طيف
وافز من حلمي وبفَيّ ظلك اتستر

♦محمد منير♦

مثل رفعة البيرغ رفعة إيمينه
بْولاية علي الباري اكتمل دينه

بولاية علي يصفى العمر ويطيب
انشراح الصدر بيها وللنفس تهذيب
نزلت آية بالقران عنها تصيب
بلغ يا محمد خبر يا زينه

بلغ خلي صوتك يقرع الاسماع
علي بعدي امير و للسفينة شراع
اذا ما بلغت يا طه دينك ضاع
وضباع السقيفة تگوم تغزينه

ذاك الوكت خم اتشرفت بشمسين
ابو الزهراء و عگاله ابو الحسنين
بوكتها بغيضهم چا ماتوا الجبتين
الخبر چن شوكة ترمي الحاقد بعينه

الله بوكت گالاها النبي المختار
احلى من الشعر وشكثر بيها اسرار
ربي الواله حيدر كون ما يحتار
برغد وبثوب سندس تصبح الزينة

و العاداه يارب خلده بنيران
واليركب جمل ويحشم الصبيان
بس لعلي تلوگ من الانس والجان
بولاية حيدر نذل اليعادينه

الدنيا معيده وفرحانه وتغني
وگلبي أعلى النجف بالشوگ متعني
وبعيد الغدير الكون متهني
فرحانه الجنان بعيد والينه

حبك يا علي دين ونهج مفروض
واسمك فوگ عرش الله عرض معروض
يم الله اليبغضك يا علي مبغوض
خل يراجع اصله واصل تكوينه

يا كفؤ الزچية و محد يضاهيك
من آدم لطه انت المعاجز بيك
الدنيا بشاربك والكون طوع إيديك
امير المؤمنين من الله تعيينه

الشاعر : محمد منير

https://t.me/liwa_alhmd