RSS Notas de Prensa - Concello de Ourense
O alcalde de Ourense recibe o rexedor de Labgar (Senegal), quen lle expresou o desexo de establecer vías de colaboración entre as dúas cidades

O alcalde de Ourense, Gonzalo Pérez Jácome, e o concelleiro Armando Ojea, recibiron esta mañá no Concello a Idrissa Diop, alcalde do municipio de Labgar (Senegal) que durante estes días visita a cidade para manter contacto directo coa ampla comunidade senegalesa que vive en Ourense.

O rexedor senegalés trasladoulle ao rexedor ourensán a súa vontade de fomentar unha “cooperación dinámica e frutífera” entre os dous municipios, en diferentes áreas como as do desenvolvemento sostible, a educación ambiental, a planificación urbana e o fomento das capacidades administrativas.

Idrissa Diop estima que o municipio de Labgar “emprazado nunha zona en rápida expansión, podería beneficiarse das prácticas e innovacións xa implementadas en Ourense, unha cidade recoñecida polo seu compromiso coa sostibilidade e a calidade de vida”, polo que avoga por promover unha colaboración fluída encamiñada a obxectivos como "compartir experiencias e boas prácticas en xestión urbana e ambiental, apoio ao desenvolvemento de proxectos comunitarios enfocados na educación, infraestrutura e acceso a servizos esenciais, a organización de intercambios culturais e económicos para fortalecer os vínculos entre os dous municipios e promover a solidariedade internacional mobilizando recursos e coñecementos entre as dúas comunidades”.
➖ Sent by @TheFeedReaderBot ➖

RSS Notas de Prensa - Concello de Ourense
O Concello retoma esta fin de semana a programación infantil do Parque de Montealegre, con obradoiros de murais e manualidades

O Concello de Ourense retoma esta fin de semana a programación de actividades do Parque de Montealegre. Será cun obradoiro titulado Mural de outono, que terá lugar o sábado, 12 de outubro, ás 16.00 h, e outro de Manualidades con cortiza, o domingo, 13, á mesma hora, ambos os dous dirixidos ao público infantil (de 5 a 12 anos)

A programación de actividades medioambientais do Parque continuará con diferentes propostas, sempre ás 16.00 horas durante as fins de semana. O sábado, 19 de outubro, haberá un obradoiro de Animais de cartolina, o domingo 20, outro de Figuras con follas, o sábado 26, o título será Decoración de Samaín, o domingo, 27 levarase a cabo un Percorrido polo botánico. No mes de novembro, concretamente o sábado 2 será  a actividade Cultivar sementes e o domingo, 3, Artesanía con arxila. Todas as propostas están dirixidas ao público infantil, agás o percorrido polo botánico, que está dirixido a todos o públicos.

As persoas interesadas poden obter máis información ou inscribirse a través do correo electrónico [email protected].
➖ Sent by @TheFeedReaderBot ➖

RSS Notas de Prensa - Concello de Ourense
O mercado de antigüidades pasa para o domingo 13 de outubro

O mercado de antigüidades que organiza o departamento de Comercio do Concello de Ourense terá lugar este mes de outubro o domingo dia 13. Este cambio débese a que pasado mañá, domingo 6, desenvolverase a carreira da Garda Civil, con saída e chegada na Praza Maior e paso polas rúas da súa contorna.
O mercado de antigüidades realízase habitualmente os primeiros domingos de cada mes na Praza Maior e na rúa Doutor Marañón, e está formado por uns vinte postos de venda destes produtos.

RSS Notas de Prensa - Concello de Ourense
A concelleira de Asuntos Sociais asistiu ao inicio da actividade “Facendo Camiño”, na que deceas de persoas con diabete percorren desde Ourense a Vía da Prata

A concelleira de Asuntos Sociais, Tamara Silva, asistiu esta mañá ao inicio da actividade “Facendo Camiño”, que organizan a  Federación Española de Diabete (FEDE) e a Fundación Salud Novo Nordisk España (FSNN). Varias deceas de persoas participan neste proxecto, co que percorrerán a Vía da Prata con saída desde a cidade de Ourense.

Esta é unha iniciativa que ten como obxectivo fomentar o empoderamento das persoas con diabete, brindándolles as ferramentas necesarias para asumir o control da súa saúde e participar en proxectos significativos, como neste caso, o desafío do Camiño de Santiago.

A concelleira asistiu á saída primeira etapa, que partiu a primeira hora da mañá da Ponte Vella. A actividade continuará con sucesivas etapas até rematar o 25 de setembro coa chegada á Praza do Obradoiro en Santiago de Compostela

RSS Notas de Prensa - Concello de Ourense
O alcalde convocará unha nova comisión de pleno a semana próxima para sacar adiante as 10 modificacións de crédito

O alcalde de Ourense, Gonzalo Jácome, convocará unha nova sesión extraordinaria da Comisión de Pleno do Concello o vindeiro mércores, 25 de setembro, para sacar adiante as 10 propostas de modificación de créditos, por un importe de 22 millóns de euros, elaboradas polo goberno municipal para reforzar diferentes áreas do Concello.

Así llelo comunicou esta mañá aos grupos políticos nunha xunta de voceiros celebrada na Alcaldía logo de que, por acordo de PP, PSdeG-PSOE e BNG, estes expedientes foran retirados, para mellor estudo, da orde do día da comisión de pleno que se celebrou a primeira hora da mañá de hoxe.

O alcalde defendeu a importancia destas propostas, que suporán unha inxección económica de 22 millóns de euros para reforzar a dotación orzamentaria de diferentes áreas municipais (para pago a provedores, arranxos de parques e zonas verdes, obras nos barrios, gastos da área social…) e avanzou que negociará individualmente o apoio a estas modificacións con cada un dos grupos políticos.

O alcalde explica que convocou a xunta de portavoces dada “a situación tremendamente grave que se producía”, logo de que outros grupos políticos “manifestasen que non ían tratar ningunha modificación de crédito até que non se solucionase o tema da Policía Local e a estabilización de emprego que, no meu criterio, é un sistema para facer fixos os que meteron enchufados”.

Este escenario supoñía, explica, un “secuestro do Concello”, ao impedir realizar as achegas económicas que necesitan diferentes áreas municipais. Ante a  gravidade desta situación, di o rexedor, accedeu a convocar unha xunta de portavoces. No seu transcurso, o alcalde apreciou un “cambio de criterio”, por parte dos grupos de PP e PSdeG-PSOE: “queren falar, coñecer cousas sobre estes expedientes, polo que se negociará individualmente con cada grupo político”, advertindo que as modificacións de créditos irán a pleno “si ou si”.

RSS Notas de Prensa - Concello de Ourense
O Memorial Manolo Carrera reunirá en Velle máis de 700 futbolistas de 28 equipos de categoría benxamín e alevín

O campo de fútbol Monte da Aira reunirá máis de 700 futbolistas das categorías infantil e alevín na edición número 12 do Memorial Manolo Carrera, que se disputará durante as dúas próximas fins de semana en Velle. O salón de plenos do Concello acolleu esta mañá a presentación deste tradicional torneo, na que participaron o presidente do Club Deportivo Velle, Paco Sotelo, o concelleiro de Deportes Aníbal Pereira, o deputado provincial Jorge Pumar e o coordinador de deporte escolar do Servizo de Deportes da Xunta en Ourense, Carlos Bericat

O memorial comezará este sábado, 21 de setembro, coa súa fase previa, na que competirán 28 equipos de categoría benxamín (con futbolistas de 8 e 9 anos) e alevín (de 10 e 11), e continuará a seguinte fin de semana coa fase final, que se desenvolverá o sábado, 28, na categoría benxamín, e o domingo, 29 na categoría alevín.

O certame, ao que foron convidados todos os equipos da provincia, pretende ser “unha grande festa do fútbol 8 en Ourense”, segundo manifestou o presidente do Velle, Paco Sotelo, quen significou que para o seu equipo é “un orgullo moi grande contar coa participación de máis de 700 rapaces” neste memorial.

Pola súa banda, os representantes de Concello, Deputación e Xunta expresaron o seu apoio a este torneo e á promoción do deporte base en Ourense. “Estamos aquí para fomentar este tipo de cousas”, manifestou o concelleiro Aníbal Pereira, “é onde temos que poner as institucións recursos” subliñando que o deporte base “é unha forma de socializar e unha forma de vender valores, e temos que ser conscientes de que esta é a mellor ferramenta que temos a calquera nivel para mellorar a sociedade “. Aníbal Pereira agradeceu o labor que tanto o Velle como os demais equipos da cidade realizan para que promocionar o deporte base en Ourense.

RSS Notas de Prensa - Concello de Ourense
O Concello colaborará coa Sociedade Galega de Xerontoloxía e Xeriatría, que realiza un estudo de lonxevidade e organizará o seu congreso de 2025 na cidade de Ourense

O alcalde de Ourense, Gonzalo Pérez Jácome recibiu esta mañá no Concello o presidente, José María Faílde, e a secretaria, María Dapía, da Sociedade Galega de Xerontoloxía e Xeriatría, e avanzoulles a vontade do Concello de colaborar en dous proxectos que está a desenvolver esta entidade. Por unha banda, o estudo sobre lonxevidade, que están a realizar actualmente, no que a poboación de Ourense ten un peso moi importante e, por outro, na organización do congreso anual da sociedade, que se desenvolverá en 2025 en Ourense, cuxo eixo central será o avellentamento, a saúde e a calidade de vida.

O presidente da sociedade, José María Faílde, valorou moi positivamente o apoio do Concello nestes dous proxectos. O estudo sobre a lonxevidade, explicou, “é un proxecto importante tendo en conta a alta esperanza de vida que hai neste concello e nesta provincia, e tamén a alta prevalencia que hai de persoas centenarias. Estamos moi satisfeitos porque o Concello de Ourense nos amosou a súa colaboración neste estudo, que non só é importante para a Sociedade Galega de Xeriatría e Xerontoloxía, senón tamén para esta cidade, para esta provincia e para Galicia. Coido que é moi importante o que nos teñen que achegar as persoas centenarias porque son portadoras dun patrimonio de saúde que necesariamente debe estudarse e preservarse porque nos axudará a promocionar a saúde no futuro”.

Por outra banda, explicou tamén que o Concello colaborará co congreso anual da sociedade, un evento de ámbito internacional que reunirá o vindeiro ano en Ourense 300 expertos e expertas de diferentes países.