Baş məşqçi Samir Abasovun “Turan Tovuz”la oyunsonrası fikirləri:

“Azarkeşlərə təşəkkür edirəm, bu soyuqda uzun yol gəlib bizi dəstəklədilər. Matça gəlincə, ilk hissədə rahat idik, oyuna nəzarət edirdik. Bununla belə, ikinci hissənin əvvəllərində qapımızda qol gördük. Oyunun gedişində Boqomolski ilə Ozobiçin yorulub oyundan qopmaları da özünü göstərdi. Bununla da ajiotajı rəqibə verdik. Futbolçularım sağ olsunlar, mübarizə apardılar. Burada oynamaq çətindir. 10-12 günlük istirahət edəcəyik. Düşünürəm ki, buna bizim də, futbolçuların da ehtiyacı var. Bir az rahatlaşmalı, dincəlməlidirlər. Yanvarın 19-dakı rəsmi oyunumuza qədər vaxtımız var. İşimizi buna görə quracağıq”.

Baş məşqçi Samir Abasovun “Kəpəz”lə oyunsonrası fikirləri:

“Futbolçularıma təşəkkür edirəm. Nəticədən razı qaldım. Çünki indi nəticə bizim üçün çox vacibdir. Oyun haqda danışmaq istəmirəm, amma futbolçularıma “sağ ol” deyirəm. Çünki üzərlərində olan təzyiqə baxmayaraq, bu oyunu qələbə ilə başa vurdular. Bu gün qələbəyə çox ehtiyacımız var idi. “Neftçi”nin heç bir üzvü üçün ev-səfər fərqi olmamalıdır. Yəni bu cür təzyiqli oyunlardan çıxmağı bacarmalıyıq. Təəssüf ki, hazırda psixoloji olaraq vəziyyətimiz çox pisdir və hər bir futbolçu özündə yük hiss edir. Düşünürəm ki, bunu da üzərimizdən qələbələr qazanmaqla ata bilərik”.

Baş məşqçi Samir Abasovun “Sumqayıt” ilə oyunsonrası fikirləri:

“Oyuna çox yaxşı başlamışdıq, istədiyimiz hər şey alınırdı. Amma durduğumuz yerdə rəqibə hədiyyə edib qol buraxdıq. Ondan əvvəl qol epizodu yaratdıq, amma 2 metrdən qapıya düşə bilmədik. Təhlil etsək, bu, bütün oyunlarımızda baş verən prosesdir. Bu gün isə oyuna nəzarət etsək də, hər iki qolu rəqibə hədiyyə etdik. Bu cür komandalar qol vurandan sonra müdafiədə bağlanmağa başlayır ki, bu da normaldır. Bütün komandanı nəzərdə tutaraq deyirəm ki, “Neftçi”nin futbolçusu məhz belə vəziyyətlərdə keyfiyyətin hesabına üzə çıxmalıdır. Problemləri aradan qaldırmağa çalışacağıq”.