هاي الجملة اگولها لكل شخص جاي يتعب هنا ومحد جاي يشوف تعبه ، اگولها للشخص اللي يتمنى انها تنگال اله بنهاية كل يوم♥️

كل اللي چنت اريده قبل إنه هاجر الصغيرة تشوفني وتطمئن ،
وتعرف إنه اللي چانت تخاف منه ماصار ، وإنه الاحلام اللي چانت تحسها بعيدة صارت روتين يومي الها وصرنا نحلم بأشياء اكبر بعد ، كل اللي اريده انه تكون فخورة بيه لان جاي اختارلها الناس اللي يشوفوها ويحضنوها قبل لا يشوفون هاجر الچبيرة
اريدها تشوف شلون كل لحظة عدتها بحياتها چانت تبني بيه شخص مستعد يحضنها ويحميها♥️.

يمكن مرت هواي ليالي دموعك چانت تحچي اكثر منك وانت تدعي لربنا ..
تأكد ان ولا دمعة منهن ضاعت و وصلت اله قبل كلماتك حتى ، وراح يمسح هالدموع الك بطريقة ما تخطر على بالك و إجابته جايه .

علمود كل المسافة اللي مشيتها لحد هسه
علمود كل مرة گعدت تتخيل نفسك محقق حلمك
علمود كل اللي گلولك ماتگدر
وعلمود كل الدعوات اللي طلعت من گلبك للسما
علمود كل البدايات الحلوة اللي منتظرتك تعيشها
وعلمود الطفل الصغير بداخلك اللي وعدته انك راح تاخذه لمكان أحسن من اللي موجود بي هسه بأصرارك وجهدك
علمود كل هذا واكثر ، انت راح تكمل♥️.

تستاهل تكون بعلاقة ماتلحگ تطلب بيها شي من المقابل لان كل اللي نفسك بي جاي يتقدملك من عنده بدون ما تطلب
العلاقة اللي ما تلحگ توصل بيها لشدة الاحتياج لأي شي لان الطرف الثاني عيونه عليك دائمًا ومحاوطك بكل اللي تحتاجه من حُب واهتمام ودعم.

ربنا ما ناسي حسرة گلبك وانت تگله " لا تنساني" .. اتطمن .

التعب ، والزعل ، والركض اللي الإنسان يدخل بي بكل يوم جديد
كلهن اشياء يخلن الواحد ينسى هو ليش جاي يركض
و لوين يريد يروح اصلًا؟ وليش؟ ليش يريد يوصل لهذاك المكان؟

مرات تكون جاي تسوي شي
وتوگف تحس ان اللي جاي تسوي ما اله اي معنى
نحتاج نذكر نفسنا دائمًا
كل مانفقد هذا المعنى
نحتاج نكتبه من جديد لنفسنا
يمكن انت ماتحتاج معجزة حتى تگوم على حيلك من جديد
يمكن كل اللي تحتاجه هو ان تتذكر هذا المعنى البسيط اللي اني متأكدة انه ماراح يتجاوز السطر ♥️

هذا التعب اللي تحس بي بنهاية كل يوم اول ما تخلي نفسك على فراشك
هو اللي راح يوصلك لليلة اللي ماراح تگدر تنام بيها من گد الفرح وانت شايف اخيرًا نتائج سعيك ومُحاولاتك.

ماراح اطلب تكون سنة حلوة يارب
ولا راح اطلب منك تحققلي اشياء بأيامها ، خليها بس سنة تكون انت موجود وياي بيها .

تگعد من النوم وانت متوقع انك راح تعيش يوم عادي
وبنهاية هذا اليوم ترجع لفراشك وانت لاگي صديق يشبه روحك
او لاگي شريك عمرك اللي يهون عليك سنينك
او خلصان من مشكلة چانت ثگل على چتافك لمدة سنوات

وتطول القائمة .. وتطول الاحتمالات
لا تفقدون الأمل ♥️