Aruvlarım, ilk olaraq siz ile paylaşam! Gagavuz arqadaşımnen çıqarğan podkastımızdan soñ, meni GRTge (Gagavuz razio televizyonu) musafir olaraq çağırdılar! 😎Böyle bir haber eşitmekten quvandım, elbette!

"Gün gündän” adlı leyhası boyunca qırımtatar milletimizni gagavuz halqına tanıttım. Levha tünevin yayında edi, şimdi onı Youtubelerinde baqmaq mümkün.

soyadımnı yañlış yazdılar 🥲* amma deñiştirmege söz berdiler

Buyurıñ⬇️⬇️⬇️

https://youtu.be/6oDVJN0G3Js?si=oEpHTeVFeql-pzZt

Тилини амелий шекильде инкишаф этмек ичюн даа бир меракълы усул яратылды - «Лаф устасы» маса оюны.

100 дане картларда 1000 ! сёз терджиме иле берильген+ къум саатынен берабер оюн тахтасы дюльбер ве онъайтлы къутучыкъта келе.

Шартлары: картларда язылгъан сезлерни ачыкътан-ачыкъ айтмайып, оларнынъ манасыны анълатмакъ ве бойледже къыдырылгъан сёзини тапмакъ керек.

Оюнны эм достларнен, эм къорантанен берабер ойнамагъа мумкюн. Бир тарафтан эглендже, башкъа тарафтан огренюв - супер!

Тертипчилер: Диляра Джелил, Алине Куртсеитова, Ленур Ваджип, Эмиль Муратов. Семерели Ленур Ваджипнинъ дерслери😀

Оюннынъ янъы партиясы келеджек йылнынъ ильк айында cатувлар ичюн азыр оладжакъ. Оюнларны «Терджиман» ве «Хазине» миллий тюкянларымызда сатын алмагъа мумкюн оладжакъ.

aqşam şaqası ?

Bugün bitamnen telefon vastasınen bağlandıq. Subet sırasında bitam böyle bir ikâyeni hatırladı:

Bir çingene ölgen eken, apayı da artından taqmaqlay:

Buzlap öldiñ, deseñ - üstüñde tonuñ bar;
Açtan öldiñ, deseñ - tumanıñda boquñ bar;
Aqçañ yoq, deseñ - topnen qırslanğan cebiñde aqçañ bar...

Luğat:

taqmaqlamaq - ölüniñ artından ağlap aytmaq

ton - qışta kiyilgen qalın urba

tuman(şive) - ştan

qırslamaq (Bağçasaray şivesi) - hırsızlamaq

"Halqımız pek yaramaz da! Amma aqıllı yaramaz, çünki aqılsızlar bu qadar güzel sözlerni tapamaz"
©️Femiye bitam ?

İşte, bu sözlerini, bitamdan bu ibareden soñ eşittim:

Cadı ketti - cayrayıq, öbür ketti - oynayıq!

‼️cadı/öbür - bu sözlerniñ manası aman-aman aynıdır, tek "öbür" sözü temiz tatarcadır, cadı arapçadan kelse kerek. (sihirli, mücezeviy küçlerge saip olğan ve insan şeklini alğan mahlüqlar)

➕bitama köre: cadı - apay kişi, öbür - aqay kişi (amma mında emin degilim)

Qullanuvı: Bu ibare arañızdan (msl: evden) siz begenmegen, sizge hoş kelmegen bir insan coyulsa/ketse aytıla.

Daa çoq mısqıl olaraq tüşüniñ ?

Bunı yazğanda daa bir şey aqlıma tüşti:

qart öbürqullanuvı: esli bir insanğa aqaret olaraq aytılır.

unutmağance mında kirip yazayım, dedim:

5-10 daqqa ögüne Nasıpköyden Kefe tarafına aydağanımda, yol boyu cayav ketken bir adamnı kördim. Onı ozıp, keteyatqanda içimden: alayımmı yoqmı, dep tüşündim. Bayağı keç, maşnada bir özüm, tanış olmağan birisini almağa biraz telükeli kelse de, beti tatarğa oşağanı sebebinden olsa kerek, toqtadım ?

Maşnağa mingeninde birden, seslice
- Sâmalkim, dedim
O da, quvanınğanından:
- Alekimsam, dedi

(içimden: "fuuuh, tatar eken, Allahqa şükür" dedim)

Subet devamında maşnası bozulğanı aqqında bildim, kimsege telefon etip olamayıp, zavallı cayav evine keteyatır...
Meni şaşırtqan bir şey - temiz-pak Çöl (şimaliy) şivesinde laqırdı ete. Özü de Canköy betinden eken. Subetimizden bir ibare aqlımda qaldı, onı da mında yazıp qaldırmağa isteyim:

Ayaq yerge cetmese - attır ?
tis tiske tiymese - ettir ?****

tis [tīs] kibi aytıla "i" ve "ı" arasındaki ses ("tiş" demektir)
cetmek - yetmek

Manası: qopaymamaq, forsa satmamaq, Allahnıñ bergenine qanaat etmek.

Bizim qorantamızda ise buña oşağan başqa bir atalar sözü bar:
"Yorğanıña köre ayağıñnı uzat" (manaları kelişe)

Abunecilerim, baqıñ, böyle bir şey bar: men siziñ adıñızğa ?Yıldız?mecmuasına abune yapa bilem, sizden tek tekmil ve doğru adresiñiz kerek ve 750 kümüş, qalğanı menden ?

İlk qış ayınıñ başlarına qadar abune olmağa istegenleriniñ cedvelini tizip, doğru poçtağa baracam.

Mence, pek oñaytlı) yani 5 daqqanıñ içinde mecmuağa abune ola bilesiz)

Abune olmağa istekleri peyda olğan, milliy neşriyatına qoltutmağa istegen, halqını qayğırğanlar olsa
şahsiy beyanatlarğa keçsinler ?