*** Qizg'aldoq yopingan adirga boqib,
Otamning ul munglig' qabrin esladim...
Eh, men o'xshamadim polvon zotimga,
Kimlardan yengildim, ko'p bor pastladim.

Haq deb yashab o`tgan alpkelbat otam,
Qabri bu dunyoning gulistonidir.
Bolam, adirlarning ustiga chiqma,
Ular devqomatlar qabristonidir...

S.T.

So'z mulkining sultoni Alisher Navoiy g'azalini she'rko'ngilli olima Dilnoza Rustamova juda go'zal o'qibdi. Tasannolar!

Yashil...

Bugun kiyib oldim yam-yashil ko'ylak,
Sizning yaxshi ko'rgan rangingiz yashil.
Mening ko'rgan hamma tushim yashil-u,
Sizning chor atrofda o'ngingiz yashil.

Nechun rang-u ro'yim sarg'ayib borar,
Bilaman, hanuzki ko'nglingiz yashil.
Yo'lingizga qarab ko'zim qoraydi,
Vo ajab, bir umr yo'lingiz yashil.

Bu yashil yo'laklar eltmasmi bizga,
Sizni o'rab olgan tuzoqlar yashil.
Mening dil bog'larim xazonga to'ldi,
Siz tomon borguvchi kuzaklar yashil.

Tim siyoh osmonlar bo'g'ar jonimni,
Olib kelasizmi havolar yashil?
Voz kechay sarig'-u olov ranglardan,
Mening jon qushimni davolar yashil.

Ko'rdimki, yam-yashil libos kiyibsiz,
Endi yarasharmi faqirga yashil?! Ko'zimga bir qizil daryolar keldi,
Yozilmaganmi yo taqdirga yashil?!

Bugun kiyib oldim yam-yashil ko'ylak,
Sizning yaxshi ko'rgan rangingiz yashil...

Sitora SHAMSIDDIN
@SitoraShamsiddin

Бугун севимли шоирларимдан бири Усмон Носир туғилган кун. Шоирнинг шу шеърини жуда яхши кўраман. Сизга ҳам илиндим.

ЯНА ШЕЪРИМГА
(Сонет)

Шеърим! Яна ўзинг яхшисан,
Боққа кирсанг, гуллар шарманда.
Бир мен эмас, ҳаёт шахсисан,
Жоним каби яшайсан манда.
Юрагимнинг дарди – нақшисан,
Қилолмайман сени ҳеч канда!
Ўт бўлурми ишқи йўқ танда?
Дардимсанки, шеърим яхшисан.
Сен орада кўприк бўлдинг-да,
Гейне билан ўртоқ тутиндим.
Лермонтовдан кўмак ўтиндим.
Бутун умрим сенинг бўйнингда.
Саҳарда қон тупурсам, майли.
Мен – Мажнунман, шеърим, сен –
Лайли!

**ПОЛВОН

Ўзбекистоннинг миллий паҳлавони –
Турсун Али Муҳаммад Полвонга бағишлов

Ўғлонларим, зинҳор билинг, бас,
Фақат тош кўтарган полвон полвонмас,
Мусибатни, кулфатни енгиб,
Истибдодни, зулматни енгиб,
Эл ичра бош кўтарган – полвон!

Юрса кимдир чўкиб, сарғариб,
Вафо излаб, бир дўст ахтариб,
Инсон бўлиб, дунёда ғариб
Бир кўнгилни кўтарган – полвон!

Фақат тош кўтарган полвон полвонмас,
Мағрурланмай жасад кучига,
Ўз ғамини ютиб ичига,
Эл ғамини кўтарган – полвон!

Давр ҳақнинг ўткир ва синмас
Тишларига тош осиб турса,
Гурзи билан полвоннинг эмас,
Ҳақиқатнинг кўксига урса,
Даст кўтариб ҳақнинг туғини,
Ҳаққа чорлаб, халқнинг руҳини
Токи меърож кўтарган – полвон!

Фақат тош кўтарган полвон полвонмас.
Шовқин-сурон қилаётганлар –
Мусибатни куйлаётганлар,
Ишрат билиб ғамимизни ҳам,
Кўтармаса битта сўзни ҳам,
Раиятнинг қасоси учун
Чидаб, Ҳақнинг ризоси учун
Мазлум юкин кўтарган – полвон!

Фақат тош кўтарган полвон-полвонмас...

Аждодларннг қутлуғ либосин
Олақуроқ шимга алмашиб,
Мисли саҳна масхарабози –
Бутун авлод юрса адашиб,
Аёл – Кашмир санъати билан
Юрт саҳнида ўйнатса илон,
Худосини унутса тўқлар
Ва белида белбоғи йўқлар,
Номус қилиб бу ҳолдан андак,
Ор эгнига кийгизиб яктак,
Белбоғ боғлаб Номус белига,
Ўз касбини бериб ўғлига,
Юксак тутиб миллат шаънини,
Бошида тож кўтарган – полвон!..

1988 (1989)

Мирзо Кенжабек**
@m_kenjabek
┈┈• ❀ ❀ •┈┈•