ПОРТРЕТ

Узоқ термуласан нигоҳларимга,
Кўзларингда мунг бор минг йиллик, э, воҳ.
Сўзсиз саволлар-у, сўзсиз жавоблар,
Юракка тиғларин санчаверар, оҳ!

Келасан! Соғиниб, интизор, интиқ,
Машина, тирбанд йўл, таниш сигаранг.
Сенинг битта изҳор, табассумингдан,
Олам кўринади менга ранг-баранг.

Соатлаб сўзлайман алланеларни,
Учраган ғамлар-у, камлар йўлимдан.
Сўзлайман тинглашни бир четга суриб,
Жилмайиб турасан, тутиб қўлимдан.

Қайноққина кофе, ёмғир шивири,
Кўзингга боқаман севги уммони.
Бесўз, бесас, беун бу муҳаббатинг,
Пойимга келтириб ташлар дунёни.

Кейин эслатади, соатлар, миллар,
Соғинчни етаклаб ортга қайтишни.
Қўлингдан тутаман эслатмоқ бўлиб,
Жоним, унутдингми бир сўз айтишни.

Жимсан... Билмагандек, англамагандек,
Гўё, барчасидан дилинг хотиржам.
Бироқ, шивирлайсан майин, оҳиста,
Ҳаётим! Бу бахтим сенсиз бўлар кам!

Қувониб кетаман, шодлик мен билан,
Севинч кўзларимдан қалқир ёш бўлиб.
Сўзлайсан: "Жоним, айт қачон иккимиз -
Яшаймиз бу ишқдан лиммо-лим тўлиб".

"Ўзингни асрагин, менга кераксан",
Демоғинг жонимга жон бўлар инон.
Мени кўпроқ севсанг, мен кўпроқ севсам,
Ахир яқин бўлар бизга, Художон!

10.03.2024 14:48

Дилноза АБДУҲАМИДОВА

https://t.me/DilnozaNur_ijod