قصيدة منبرية نزلة للزهراء عليها السلام
ابو عبد الله الكعبي
نسألكم الدعاء

المستهل..

عظم الله اجرك ياعلي

النص..
1
قلبك الله ايساعده ابهاي الرزيه
عظم الله اجرك ياعلي

شيعتك هاليوم يا حامي الحميه
عظم الله اجرك ياعلي

جايه اتواسيك واتواسي الزجيه
عظم الله اجرك ياعلي

الكل يواسيج وايواسي الولي
عظم الله اجرك ياعلي

2
ام حسن و حسين بالنار اتجوه
عظم الله اجرك ياعلي

بلوتك هاليوم يالكرار بلوه
عظم الله اجرك ياعلي

تطلع الچلمات من السانه كوه
عظم الله اجرك ياعلي

حيدر اليوم بالهم مبتلي
عظم الله اجرك ياعلي

3
الضلام اليوم خيّم عالمدينه
عظم الله اجرك ياعلي

ابعصرة الباب انعصر حيدر ولينه
عظم الله اجرك ياعلي

بالضلع بسمار وابقلبك علينه
عظم الله اجرك ياعلي

حايط او باب بالدم منملي
عظم الله اجرك ياعلي

4
يا مصيبه الما بعد منها مصيبه
عظم الله اجرك ياعلي

الحبيب اشلون شيعها الحبيبه
عظم الله اجرك ياعلي

او ضال يتنفس علي والله عجيبه
عظم الله اجرك ياعلي

ماله تبديل حب الأولي
عظم الله اجرك ياعلي

5
خدمة الزهراء هاي اعظم خدامه
عظم الله اجرك ياعلي

واليقيم المأتم اتعلي مقامه
عظم الله اجرك ياعلي

ياخذ الحاجات واينول الكرامه
عظم الله اجرك ياعلي

نبقه خدام آنه او كل هلي
عظم الله اجرك ياعلي

قصيدة منبرية للزهراء عليها السلام
ابو عبد الله الكعبي
نسألكم الدعاء

المستهل..

امي من مثلها
تسوه الدنيا كلها
ميتها او عدلها

النص..
1
امي ماليها البخت
ابد ما يوم اشتكت
اتحملت واتحملت
واتحملت

ما تشيلنه حمل
الصعب عدها سهل
فاطمه كول او فعل
كول او فعل

تخفي كلشي بالقلب يجرح قلبنه
كل سوالفها ضوه اينور دربنه
اشكد نحبها بس اكيد اكثر تحبنه

قلبي ايرف عليها
مشتاكه الحجيها
زينب ياهو ليها

2
تيهت حته الدرب
تنسي هذا صعب
هيه شريان القلب
اه يالقلب

امي أصفه امن الهوه
عدها أنواع الدوه
العطش منها ارتوه
منها ارتوه

الماي مو سر الحياة الزهره سرها
ثمره من الجنه يا محلى ثمرها
لو تمر ابأي مكان ايضل اثرها

منج ضلت آثار
وابكل صفحه بالدار
النا بيها تذكار

3
امي ديره آمنه
اليوم من تبعد سنه
اوداعتج ظهري انحنه
ظهري انحنه

بيه بسمار الضلع
نار تحرك بالشمع
عيني يجويها الدمع
اه يالدمع

كلشي يجويني الجواج الزهره يمه
واشكثر ملجومه بيه لجمه لجمه
عكب عطرج فاطمه ياعطر اشمه

عطر الجنه عطرج
كون ابضلعي كسرج
من عمري اعله عمرج

4
مردت اقليبي مرد
ضيك اعليها اللحد
ازغيره وابعمر الورد
عمر الورد

ضلمه كاع المكبره
وينه دفانج تُرى
علي او دافن حيدره
ياحيدره

من سكت صوتج سكت صوت الولي
علي شيّع فاطمه او شيّع علي
يالزغيره آنه زغيره وابتلي

بلوتنه جبيره
لا ماهي زغيره
ودعنه الأميره

قصيدة منبرية وداعية ليلة العاشر
ابو عبد الله الكعبي
نسألكم الدعاء

المستهل..

وداعاً / وداعاً .. يا اهل بيتي .. وداعاً
وداعاً / وداعاً .. يا اهل بيتي .. وداعاً

النص..
1
واحد واحد آنه اليله اودعنه
ابوسنه واحضننه واشمنه
اوصيجن بناتي النوح عوفنه
لا تبجن لان قلبي تبجنه

وداعاً / وداعاً .. يا اهل بيتي .. وداعاً
وداعاً / وداعاً .. يا اهل بيتي .. وداعاً

2
نامن باجر ايحرموجن النومه
وحدتجن تضل من كلشي محرومه
باجر محد اليسلم على اهدومه
شي مسلوبه شي بالنار مضرومه

وداعاً / وداعاً .. يا اهل بيتي .. وداعاً
وداعاً / وداعاً .. يا اهل بيتي .. وداعاً

3
اولادي نجوم اتضوي بسمايه
واذا راحوا ضلام اتصير دنيايه
اليوم اويايه باجر محد اويايه
بالعاشر شسدن هايه لو هايه

وداعاً / وداعاً .. يا اهل بيتي .. وداعاً
وداعاً / وداعاً .. يا اهل بيتي .. وداعاً

4
يوداع الاخو ما ينحمل ياناس
يكبر ابنادم او شيبه يغطي الراس
اليفاركله اخو مثل البطل عباس
حاله حال شجره امكطعيها ابفاس

وداعاً / وداعاً .. يا اهل بيتي .. وداعاً
وداعاً / وداعاً .. يا اهل بيتي .. وداعاً

5
اودعنكم وأبد ما تنطفي الجمره
تضل ابقلبي نار الفركه مستعره
الله ايساعدج يازينب الحره
لهيب النار باجر بالخيم كبره

وداعاً / وداعاً .. يا اهل بيتي .. وداعاً
وداعاً / وداعاً .. يا اهل بيتي .. وداعاً

قصيدة منبرية للخدم
ابو عبد الله الكعبي
نسألكم الدعاء

المستهل ..

يا أبا عبد الله .. يا أبا عبد الله
يا حسين
يا حسين

النص..
١
عالمك عالم خيالي .. يحتوي كل الضروف
ديرتك ديرة محنه .. ديره ابد مابيها خوف
كل حرف يسوه الاسامي .. او ضاعت ابسده الحروف
الله يعميهن هذني .. اعيوني لو غيرك تشوف

يا أبا عبد الله .. يا أبا عبد الله
يا حسين
يا حسين

٢
ناصب ابنص روحي خيمه .. او نارها ابوسط القلب
والدموع البيه غيمه .. خالصه الوجهك تصب
يالغريب المالك احد .. وحدك ابنص الغرب
جسمك الغالي توزع .. وذره وذره اعله الدرب

يا أبا عبد الله .. يا أبا عبد الله
يا حسين
يا حسين

٣
ثوبك الماخوذ منك .. ماخذ اقلوب البشر
صورتك من انت دامي .. مو مثل باقي الصور
يانهر يروي العطاشه .. او ماشرب ماي النهر
الحافر الداس اعله صدرك .. جم عظم منك كسر

يا أبا عبد الله .. يا أبا عبد الله
يا حسين
يا حسين

٤
نزلت امن العالي دمعه .. غركّت مهد الطفل
او ماطفت ناره اعله ابنه .. والقلب ضل مشتعل
ياحمل مثلك يشيله .. او هو ضيمك ينحمل
الولد مذبوحه كلها .. والبنات اعله الهزل

يا أبا عبد الله .. يا أبا عبد الله
يا حسين
يا حسين

٥
بالترابه كاضي ليله .. يلجم ابجرحه التراب
هم تضل اعيون عدنه .. من بعد هذا المصاب
كل سوالفنه اعله طفك .. والكتاب ايجر كتاب
تحترك يوميه چلمه .. عالخيم وام الحجاب

يا أبا عبد الله .. يا أبا عبد الله
يا حسين
يا حسين

قصيدة منبرية ليلة الحادي عشر من محرم
نسألكم الدعاء ( ابو عبد الله الكعبي )

المستهل..

يايمه جيبيلي النعش .. يالزهره يمه
ام الخدر ليل احدعش .. يالزهره يمه
لا عدها صيوان .. لا يمها خوان
يالزهره يمه
يالزهره يمه

النص..
١
العدها خوان اشكثر .. وابيوم واحد راحو
احسن تموت او لا تضل .. اويه اخوتها لمن ماتو
لو عالو اعليها الخلك .. المن تحشم عالو
بالطف ولا واحد بقه .. عالغبره كلهم طاحو

واحد وره الثاني انذبح .. يالزهره يمه
والضالم ابدمهم سبح .. يالزهره يمه
بذنوبه غركان .. لا يمها خوان
يالزهره يمه
يالزهره يمه

٢
كلهم اعزاز اعله القلب .. ماضل قلب بجفاهم
لو روحي مقبوضه امس .. واندفن كون اوياهم
كلشي ابحياتي ينسي .. واخوتي اشلون انساهم
روحين جنه ابفد جسد .. ما اكدر ابلياهم

ماضل ولا واحد عدل .. يالزهره يمه
يمه انذبح حته الطفل .. يالزهره يمه
مذبوح عطشان .. لا يمها خوان
يالزهره يمه
يالزهره يمه

٣
يتعوض ابنك لو مشه .. بس الاخو شيعوضه
صحتك تردلك لو صحه .. وايمرضك الي ايمرضه
اعيونه جانت قبلتي .. وابوجهه جنت اتوضه
ما ادري تالي ينذبح .. والخيل كلها اترضه

شيبت من شفت الولي .. يالزهره يمه
احضر دخيلك ياعلي .. يالزهره يمه
عالغبره عريان .. لا يمها خوان
يالزهره يمه
يالزهره يمه

٤
يم النهر طاح النهر .. واليل يذبح كمره
لا نجمة ضلت بالسما .. واهلال كسرو ظهره
جف الحنين ابيا كتر .. وياي ياهو ايدوره
بس شعره ضلت بالقلب .. كطعولي هاي الشعره

كطعو اجفوفك وانكطع .. يالزهره يمه
قلبي ولا واحد فزع .. يالزهره يمه
فزعتلي نيران .. لا يمها خوان
يالزهره يمه
يالزهره يمه

٥
حاجيني يمه ابلوتي .. هم مثلي صارت بلوه
شمسويه آنه ابدنيتي .. وحسين يمه اشسوه
الخنصر ايردو الي .. والمحبس الهم فدوه
يمه انعميت ابكربله .. وامشي كمت بالكوه

حاجيني يمه ابقصتي .. يالزهره يمه
هم شايف احد بلوتي .. يالزهره يمه
او مرت عله انسان .. لا يمها خوان
يالزهره يمه
يالزهره يمه