با قسەی خۆش ون نەبێ
ـــــــــــــــــــــــــــــ
ـ تەنیا ئەو بابەتانەی بە تەختەکلیلی کوردی دەنووسرێن ئەگەری بڵاوبوونەوەیان هەیە.
ـ ئاڵوگۆڕی بەستەرمان نییە?
.
@terexe57
?? ? ??
WE LOVE HELICOPTERS!!!
Last updated 6 months, 2 weeks ago
Last updated 1 month, 4 weeks ago
هەڤاڵ
دەگێڕنەوە: کاتی خۆی کە "ژنبەژنە" باو بووە، زۆر جار لە کاتی بووکگۆڕینەوەدا، لەسەر کێشەیەکی زۆر چکۆلە بووەتە شەڕ و تێکچوون و گەڕانەوەی لایەنەکان بۆ ماڵەکانی خۆیان و هەڵوەشانەوەی کاتی یان هەتاهەتاییی هاوسەرگیرییەکە هیچ، بەڵکوو کوژراو و برینداریشی لێ کەوتووەتەوە. یەکێک لەو کێشانەی کە شەڕی لەسەر هەڵگیرساوە ئەوە بووە کە لە شوێنی دیاریکراودا، لەپێشدا کێ بچێتە پێش و بەرەوپیلی جەماعەتی بەرانبەرەوە بچێت. دوو قۆڵ گیریان داوە کە نەخێر ئێمە نایەینە پێش و ئێوە دەبێ بێنە پێش.(سەرتاچوونەپێش، بە شکان و عەیبە پێناسە دەکرا.)
جا دەڵێن: ماڵێکی خەڵکی دێی شاڵگەی سەر بە شاری ڕەبەت لەگەڵ شوێنێکی بانە ژنبەژنەی دەکەن. لە شوێنی بووکگۆڕینەوەکەدا، بانەیییەکان دەڵێن دەبێ ئێوە بێنە کن ئێمە. شاڵگەیییەکانیش حەول دەدەن؛ بەڵام بانەیییەکان مل نادەن!
باباغای گۆڵێ(کوڕی محەممەدئاغا کە بە نێوی باوکیانەوە کردبوو و هەر ناسناوی ئەویان دابووە سەر و پێیان دەگوت باباغا)، لەگەڵ جەماعەتی شاڵگەی دەبێت.
ناچار جەماعەتی شاڵگەی سەردەشتێ مل دەدەن و دەچن بۆ لای بانەیییەکان.
بانەیییەکان بووکەکەی خۆیان تێ گەیاندبوو، کە لە کاتی گۆڕینەوەی لەگەڵ بووکی شاڵگەی، خۆی تێ گیرێنێت و بە عەرزی دادات. بووکەش هەر بەو دەستوورەی کرد و کچە فەقیرەی شاڵگەی و بووکی ئەوێ ڕۆژێ دەکەوێت!
باباغای گۆڵێش کە ڕقی هەستابوو و داخی مانگرتنەکەیانیشی هەر لە دڵدا بوو، دەڵێت: جەماعەت خەمێ مەخۆن؛ ئەوی ئازاکە بەر ئێمە کەوتووە و ئەوشۆ بە هەموومان دەیگێین!
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
هەڤاڵ
مەحموودجۆڵای گۆڵێ، خودا لێی خۆش بێت، زۆر قسەخۆش و قسەزان بوو. لە هەمان کاتیشدا لە بواری مادییەوە کەسێکی هەژار بووە. ڕەنگە هەر لەبەر ئەو هەژارییەی بێت، کە لە سەردەشتێ نێوی دەرنەکردبوو.
دەڵێن: ساڵێک مەحموودجۆڵا دەچێتە مزگەوتێ و مامۆستای ئاوایی مەوعیزەی ئەوە دەکات کە «سڵاو» بکەن و بەتایبەت کە سڵاو لە خاووخێزانتان بکەن.
ئەویش کە دەچێتەوە ماڵێ، دەرکەی لێ دەکاتەوە و دەڵێت: سەلاموعەلێک ئامین(ئامین خێزانی بووە).
خێزانیشی لە وەڵامدا دەڵێت: ئەیەڕۆ! ئەو مەکرەت لە کوێڕا هێناوە؟!
(خێزانی مەبەستی ئەوە بووە بۆ قەت سڵاوت نەکردووە و ئێستا دەیکەی)
مەحموودجۆڵاش لە وەڵامدا دەڵێت: ماڵە مەلای بەقوڕێ گیرێت، دەنا ئەمن گووی وا ناخۆم!
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
قوولەر
سەبارەت بەو نەقڵەی دوکتور لوقمان، زەمانێک ئامۆزایەکم لەگەڵ کوڕێکی هاوڕێی تیپی موسیقایان بوو و گۆرانیبێژی حەفلەکان بوون.
تازە سەردەمی ئەو گاز لە ماشین کردن و شتە هاتبوو و دەبوو شەوانە دوو ساعەت لە سەفی گاز بووبایەی تا نۆبەت دەهات. ڕەحیمی ئامۆزام لەگەڵ ئەنوەری هاوڕێی، لە حەفلە هاتبوونەوە و لە سەفی گازلێدان بوون. ڕەحیم ئاوای گێڕاوە: کوڕێکی گەنج کە دەستفرۆشیی دەکرد، هاواری دەکرد: وەرە بۆ ئودکوڵۆنی هەرزان و بۆنخۆش.
کوڕە هاتە پێشێ و کوتی: کاکە ئودکوڵۆنتان ناوێت؟
ڕەحیم: ناوەڵڵا بەقوربان.
کوڕە: ئەی قورس؟!
ڕەحیم: هاااا...! قورسی چی؟
کوڕە: قورسی تەئخیری!
ڕەحیم: ئەوە چییە؟
کوڕە: کاکە زەمانەتی، تا یەک ساعەت تەواو نابیت!
ڕەحیم :نا بەقوربان، نامانهەوێت، بڕۆ.
(لێرادا سەرگوێی میرزائەنوەر دەجووڵێت و کرمەکانی ختیلکەی دەدەن)
ئەنوەر: کاکە بەچەندە؟
ڕەحیم:?
کوڕە: پووڵی دوو نۆشابە!
ئەنوەر: دا بێنە بزانم، زەمانەتییە ئیدی؟
کوڕە: ئەرێوەڵڵا!
ئەو ڕۆژە دوای تێکهەڵچونێکی زۆری ڕەحیم و ئەنوەر، قورسەکان دەکڕن و ئەنوەر کە ماڵیان لە گوندێکی سەر بە شاری بۆکان دەبێت، دەگەڕێتەوە و قەراریان وا دەبێت ئەنوەر ئاکامی خواردنی قورسەکە بۆ ڕەحیم بگێڕێتەوە.
سبەینێ ساعەت ۱٠ی بەیانی دەگەنەوە لای یەک:
ڕەحیم: ها ئەنوەر بوا وەڕەزی؟ چی بووە؟
ئەنوەر: کوڕە هیچ، لێم گەڕێ. مەگین ئەو قورسفرۆشە سەگبابەی نەبینم!
ڕەحیم: بۆ چی بووە؟ بڵێ بزانم چیت کرد سەگە؟!
ئەنوەر: کوڕە ڕۆیشتمەوە و هەر لە دەرکاوە کوتم ژنەکە خۆت بگرە بۆ ئەشەو؛ ئەنوەر، ئەنوەری چەلان نییە. خێزانم پێ کەنی و کوتی دەی با بزانین ...
کاکە ساعەت بوو بە یازدەی شەو چووم قورسەکەم خوارد. ئەو توخمی سەگە کوتبووی نیو ساعەت زووتر بیخۆ و کوتم با لەپێشدا کچەکەم بخەوێنم، دوایی عەمەلیات دەست پێ دەکەم!
(ئەنوەر لێرادا بڕێک بێدەنگ دەبێت...)
ڕەحیم: دەی دوایی؟
ئەنوەر: کوڕە ئەگە هەستام حەوتی بەیانی بوو! خێزانم سێ هەزار قسەی پێ کوتم. دەیکوت شەوی ئەوشەو هەرام لێ کردووی، دەتکوت لە حەوت ساڵان ڕاستبوویەتەوە و هەر جوابت نەداوەتەوە. تۆ مەڵی ئەو هەتیوە قورسی خەوی پێدا بووم!
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
کەریم کەرپیس
میرزامحەممەد گێڕایەوە: برادەرێک هەوای خانەباغ کڕین لە کەللەی دابوو و خۆی بۆ شووڕای شار ناوزەند کردبوو. تووشی بووم؛ قولێکی کارت بە دەستەوە بوو. بەرێکی تەقمین بوو، بەرەکەی دیش ئەکسێکی خۆی لێ چاپ کردبوو. کارتێکی دامێ و کوڕووزاوە: ئەوەتا فڵانکەس هێشتا بانگەوازی هەڵبژادن دەستی پێ نەکردووە، دوو ملوێنی خەرج کردووە و من لە دوو سەت هەزاری جێژنانە پتر نیمە خەرجی هەڵبژادنی کەم. خۆلاسە کورد کوتەنی، هەم دەیخورا و هەم دەییەشا.
کوتم شتێکت پێ بڵێم، بێ خەرج خەڵک ڕەیت دەنێ؟!
- چییە؟!
- لەبن ئەکسەکەت بنووسە: لە گۆڕی ... بەم!
بێ خوداحافیزی ڕۆیشت. بەقسەی نەکردم و ڕەییشی نەهێناوە.
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
هەڵگورد ـ خانێ
جەماڵ دراوسێمان بوو. ڕۆژێک دوای نەهار دەچوومەوە دووکان. دیتم کاک جەماڵ چاوەڕوانی تاکسییە. لەو دەمەدا پەیکانێک هات و جەماڵیش دەستی لێ هەڵینا؛ بەڵام تاکسییەکە ڕاینەگرت. جەماڵیش زۆری پێ ناخۆش بوو و لەداخان کوتی: های ڕەزگت نێم کاکی تاکسی! کابرای تاکسی گوێی لێ بوو و پاشەوپاش گەڕاوە و ڕایگرت؛ کوتی: کاکە بۆ جنێو دەدەیت؟ پێت عەیب نییە؟
جەماڵیش کوتی: کوا کاکە خۆ جنێوم نەداوە.
ئەمنیش بۆ بەدفەڕی کوتم: کاکە وەڵا منیش گوێم لێ بوو ئەگە جنێوی پێ دای!
کابرا کوتی: کوڕە هێندت ڕەزگ نێم تا ملت دێتە دەرێ و لێیدا ڕۆیشت!
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
برایم بابایی(ئارگەش) ـ ئیندرقاش، مەهاباد
ئیندرقاش کاناڵێکی گەورەی ئاودێری شاروێرانی بە نێودا دێت کە پانتاکەی 10 میتر و قوڵایییەکەی 3 میتر دەبێت. ساڵێکی کاک سمایلی حاجی وەیسی تێ دەکەوێت و کاخالیدی براگەورەشی لەکن دەبێت و مەلەی نازانێت کە براکەی دەرهێنێتەوە. کاک سمایلیش دە حاڵی خنکاندا هەر هاواری کاکی دەکا و کاخالیدیش لەبەرخۆیەوە کوتبووی: خۆ ئەمنیش مەلەی نازانم؛ دەیجا یەکمان بخنکێین لە دووان چاکترە!
دوایە خەڵکی دێ بە هاوارییەوە دەچن و لە خنکان ڕزگاری دەکەن.
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
حەمید ـ تۆرۆنتۆ، کانادا
دایکم بەتەمەنە؛ لێرەوە سڵاوی لێ دەکەم و چاوی ماچ دەکەم. زۆر قسەخۆشە. وشەی ڕەسەنی کوردی زۆر بەکار دێنێت و لە بواری پەندی پێشینیان بەڕاستی شارەزایە و تەنانەت هێندێ وشە و پەند بۆخۆی ڕاستەخۆ سازیان دەکات و بەقەولی فارس (فی البداهە) دەیڵێت.
ڕۆژێکی باسی سیاسەت دەکەن و دەڵێن ئەوە ٤٣ ساڵە ها ئێستا ها سبحەینێ بڕووخێت و تێک دەچێت. دایکیشم دێتە نێو قسان و دەڵێت: جا وەڵا نە تێک دەچێت و نە لێی دەچێت!
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
حەسەن ـ شیوەمێرە
لە ساڵانی ڕابردوودا دیاردەیەکی زۆر ناشیرین لە دێهاتەکاندا هەبوو کە لاوەکان دەچوونە لای ماکەر و ماین و شت. جارێکیان ماڵی حەمەدەمینی جیرانمان نیوەشەو هەڵڵایان لێ پەیدا بووو؛ هاوار هاوار کە تۆفیقی کوڕمان شوێنەون بووە و دیار نییە. دەروجیران خڕ بوونەوە و شوێن نەما لە تۆفیقی نەگەڕێین و نەماندیتەوە. دوای دوو کاژێر تۆفیق وەژوور کەوتەوە و کوتی: ئەوە چ بووە و ئەو خەڵکە بەو نیوەشەوە لە چ دەگەڕێن؟
کاحەمەدەمین کوتی: توتکی سەگ! ئەوە لەکوێ بووی، لە کەنگێوە ئەو جەماعەتە بەدوای تۆدا دەگەڕێن.
تۆفیقیش زمانی تێک هاڵا؛ جارێک دەیکوت دز هاتبووە زگ مەڕی و بەدوای دزان کەوتم، جارێک دەیکوت پیشمەرگە هاتوون ڕێگایان نەدەزانی و لە خەویان هەستاندووم و بەزۆری دەگەڵ خۆیان بردم... خولاسە بۆی خڕ نەدەبووەوە بە درۆودەلەسان شتەکەی جۆر کات.
مام ڕەسوو کە لە هەمووان قسەنەقەڵ و پیتۆڵتر بوو کوتی: ئێستا ڕوونی دەکەمەوە لەکوێ بووە. وەڵا چوو چاوی لە پێڵاوەکانی تۆفیق کرد؛ ڕیخی ئێستریان پێوە بوو، کوتی: جەماعەت بڕۆنەوە ماڵی خۆتان، دزی چی و پێشمەرگەی چی؛ تۆفیق کاری شەرعیی بەدەستەوە بووە!
تێبینی: ناوەکان خوازراون
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
لێفەجەیران
برادەرێکم کوتی: لەگەڵ هاواڵێکی دانیژگام چووبووینە سەر شایییەکی تایەفەی ئەوان. کوڕە هاتە لام و کوتی: وەعز چۆنە، هی جوانی تێدایە؟
بە ئیشاڕە کوتم: ئەو کراسڕەشە تیکەی چاکە.
کوڕە قوت بوو و کوتی: هەتی ئەوە خوشکەزامە!
منیش خۆم نەدۆڕاند و دەمودەست دەستم ڕادەشت و کراسڕەشێکی دیکەم پیشان دا و کوتم: کوڕە هۆوە دەڵێم ماڵتە!
کوڕە کوتی: وەڵا ئەوەش خوشکمە!
ساڵان ڕابردن و دانیژگامان تەواو بوو. من دامەزرام و بوومە بازڕەس لە ئیدارەیەک و کوڕەش بوو بە دوکتور. پاش ئەوەندە ساڵە لە بازڕەسیدا ڕێم کەوتە دووکانی برای ئەو دوکتورە و زۆرم گیر پێ دا. مۆڵەتێکم دایە و دامنابوو جەریمەی کەم. جاری دووهەم کە چوومەوە (دیار بوو کوڕە لە کاکی پرسیبوو ئایا کەس لە فڵانە ئیدارە ناناسێت قسەیەکی بۆ بکات) کوڕە کوتی: کاکە دوکتورم زۆری سڵاو دەگەیاندن و دەیکوت نیشان بەو نیشانەی، شایییەکە تیکەی چاکی تێدابوو؛ خاترێکمان بگرێت!
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
ڕزگار ئەلیاسی ـ قەرەگۆل، بۆکان
لەلای ئێمە خەڵک زەوی بەو عەجەمانەی میاندواو و مەڵکەندی و بناو بە ئیجارە دەدەن. جا زۆر جار لەسەر چەندوچۆنیی زەوی و سۆریی ئاو تووشی دمەقڕه و چەلەحانە دەبن.
کوڕەخاڵێکم لە "دێ مەڵا" له وەرزی زستاندا زەویی دابوو به عەجەمێکی بناو بە زەوی چاک و ئاوی زمزم!
کابرای عەجەم لە بەهاردا دێتە سەر زەوی و دەبینێ ئاو وەکوو قوزەڵقۆرت وایە. له‌گەڵ کوڕی خاڵم هەر هەرایان بوو و ئێمەش ببووینە نێوبژیوان. کوتمان: کاکە چییە بۆچی وا دەکەیت؟ ئەوپەڕی پووڵەکەت بۆ دەستێنینەوە.
عەجەمه وەجواب هات و کوتی: کاکە من لە بناو خاوەنزەوی بووم کە بەهۆی ویشکەساڵییەوە ئێستا بەڕەڵامان کردوون. جا ئەوە دووهەم جارە کورد پێوەم دەدەن. دووهەمیان ئەو خزمەی ئێوەیە و هەوەڵەکەشی کوڕێکی کورد لە بناو کاری مەزرا و شتی بۆ دەکردین. ئێمەش کە دیتمان کوڕی چاکە و سەڵتیشە کچێکی خۆمان کە دەبووە خوشکم پێمان دا و لە حەساری خۆمان خانوومان بۆ ساز کرد و دوای ماوەیەک بە کەمترین تێچوو کچەمان دایە و زەماوەندمان بۆ پێک هێنا.
شەوی هەوەڵ، چوونە ماڵی خۆیان و ببوو بە زاوا. کاکی زاوا بەیانی زوو کە هێشتا کەس لە خەو هەڵنەستابوو، یەکبەخۆی لە حەسارێ دەینەڕاند: ئێێێێرە دەنگیییی کوردستاااااانی ئێێێێرانە!
⚠️ کۆپیکردن و بڵاوکردنەوەی بابەتەکانی ئەم کەناڵە تەنیا بە هێنانی ناوی سەرچاوە ڕێگەپێدراوە
✔️کەناڵی "با قسەی خۆش ون نەبێت"
?? ? ??
WE LOVE HELICOPTERS!!!
Last updated 6 months, 2 weeks ago
Last updated 1 month, 4 weeks ago