أللهُمَّ صَلِّ وَسَلِّم عَلى مُحَمَّد...وَآلِ مُحَمَّد

في النِّصفِ مِن شعبان ذا مِيلادُ عَدلِ الله
مّهديُ آلِ المصطفى سُبحانَ مَن سَوَّاه

( نورُ الله ) مهدينه ...وعِشَّاگه اتسمِّينه
عيد اصبح ميلاده...وهل اهلاله اعلينه

للخلگ يومه...بانت اعلومه
والگلب بِسمه...تنجلي اهمومه
الليله نحييهه...ونجتمع بيهه
ليلة الفرحة...حَگ نِسمِّيهه
اللهم صل وسلم على محمد...وال محمد

أزكى الصلاةِ على النَّبِيِّ وَآلِهِ نُهدي
لِلعَسكَرِيِّ وَنَرجِسٍ في مَولِدِ المَهدي

وانبارك للزهره...ابميلاد الننتظره
والينه وأحبابه...مسروره ومبتشره

حگهه دنيانه...تفرح اويانه
هذا ابوصالح...نوره ضَوَّانه
للحفل جينه...وكلنه نادينه
هله يالغالي...هله مهدينه

اللهمَّ صَلِّ وَسَلِّم على مُحَمَّد....والِ مُحَمَّد

نَدعُو الإلهَ بِحُرمَةِ الأقمارِ من هاشِم
يارَبَّنا عَجِّل لنا في طَلعَةِ القائِم

بالطافه وابنوره...يمليهه المعموره
أنصاره وخِدَّامَه...تِترَقَّب لِضهوره

أمره كل ليله...ردنه تعجيله
كل عَزَه ومَحفَل...نبقى ندعيله
لَمَّه يلفينه...ابنوره مهدينه
تغمر الفرحه...كل ليالينه

اللهمَّ صَلِّ وَسَلِّم على مُحَمَّد...والِ مُحَمَّد

سيد علي الموسوي

من يوم امي جابتني لِمَهدي
گلبي الغير هالخدمه لَم أهدي
تهاني اليوم اقدمهه لمهدي
واگله ان شاءالله اتعاود عليه

مثل نار العشگ بيه يغالي
يحبك گلبي وابداً ما يغالي
مثل ماتاني ميلادك يغالي
اتاني طلعتك يبن الزچيه

اسهام الهجر بالدلال شعبان
وعليه الحزن يبن الحسن شعبان
لچن بخمسطعش من شهر شعبان
أفرح فرحة اضهورك عليه

سيد علي الموسوي

‏مقطع صوتي من سيد علي الموسوي

هالعزاء....مانتوفق انحظره
هالعزاء....لوما نظرة الزهره

من حظرنه للعزاء واتوفقينه
هاي دعوة فاطمه ونظرتهه لينه
اهواي ام الحسن متفظله علينه
حتى جيتنه بديهه ومو بدينه

هالعزاء...مانحظر إله ونقره
هالعزاء...لوما نظرة الزهره
.....................................
چان بيت احزان واحد فاطمه الهه
هسه صارت هالمجالس إلهه كلهه
هيه ام التعزيه وعونه الوصلهه
والله هذا الخير كله من فضلهه

هالعزاء...گلب الطاهره ايجبره
هالعزاء...لوما نظرة الزهره
.......................................
خل تلوم الناس بينه ماتهمنه
على حب هاي الخِدامه انشد حِزِمنه
نعتبر أم الأماجد هيه أمنه
نبتعد والزهره بالمجلس تلمنه

هالعزاء...يضمن للمُحِب أجره
هالعزاء....لوما نظرة الزهره
..........................................
بالعشگ يهل العشگ صرنه عوابس
وابمحبة فاطمه يحله التنافس
غير هاي الخدمه ابد ماعدنه واهس
واعله كل جو يختلف جو المجالس

هالعزاء....حَتماً يختلف عطره
هالعزاء....لوما نظرة الزهره
........................................
إي وحگ زينب واخوهه الغالي عباس
نبقه خدام الزچيه الآخر انفاس
عالم الخدمه يوادم عالم احساس
باچر ايبيض وجهنه ونرفع الراس

هالعزاء...نعمه ونكسب البُشره
هالعزاء....لوما نظرة الزهره

سيد علي الموسوي

ياعلي...إلك أدعي ابدمعتي وبجروحي
ياعلي...ألله ينطيك الصبر ياروحي
( إنَّا للهِ وإنِّا إليهِ راجِعُون )

إلك أدعي ودعوتي..ابجرح گلبي ودمعتي
الله ينطيك الصبر يابو المصيبه
اشلون تگظي دنيِتَك...وَيَّه وادم أذِّتك
الغربه يعني اتعيش وي وادم غريبه

الوادم الماتستحي امن الله ورسوله
اشلون راح اتعيش وياهم هذوله
الطبو الدار الوصي وضلمو بتوله
والله ماعدهم كرامه ولا رجوله

ياعلي...ندعي ربنا ومايرد دعوانه
ياعلي...الله لايرضه على الأذَّانه
( إنا لله وإنا إليه راجعون )
......................................
گلبي بالهم مبتلي...وبالي يمك ياعلي
ضلعي مايوجعني توجعني غربتك
صعبه اشوفك تنكسر...وانت المبچّي الكفر
وصافن اعله الباب واجروح ابصفنتك

ايعينك الباري يحماي الحميه
حين شفت الباب دفعوهه عليه
ياعلي وابدفعة الباب القويه
تالي آنه ومحسنك طحنه سويه

ياعلي...واكبر اجروح الصفت تاذيني
ياعلي...أبچي گدام الحسن وحسيني
( إنا لله وإنا إليه راجعون )
......................................
جرحك ابكبر السمه...وحالك ابلا فاطمه
عايش ابدنيا مُضلمه وگاع صَحره
آنه بالنسبه إلك...روح عشت ابداخِلَك
وادري بفراگي تصير العيشه مُرَّه

آنه يمك ياعلي ومشدوه بالك
بلله عنك لو غبت شيصير حالك
واليگول البگه ابراسك عالجرالك
ابهالمصيبه ياعلي هو اشبگالك

ياعلي... حيلك انهَد والعيون امغيِّمَه
ياعلي...اشلون باچر من تودع فاطمه
( إنا لله وإنا إليه راجعون )
......................................
يالمصابي امعذِّبَك...وهاضمك وامتعِّبَك
وادري راح ايشيب گلبك من مصابي
اشلون عنك لو رحت...وين يافاطم صحت
راح تلگه اجواب حسرات اعله بابي

أقره بعيونك أنه ابهاي المسيه
ادگول كلشي ولا تروحين امن اديه
انكسر گلبك عالجره والصار بيه
اشلون لو دارك تضل مِنِّي خِليه

ياعلي....تنحب وكسر الضلع موضوعك
ياعلي...ابغيبتي ياهو الينشف ادموعك
( إنا لله وإنا إليه راجعون )
.....................................
أنحب ودمعي ايهلي...(حسبُنا آلله ياعلي)
عالضلمنه وفرهد العِشره وهظمنه
باچر اولادي تحن...وزينب اوياهم تون
ويلي وينادون مشتاگين لُمنه

آه باچر لو متت تشبگني اديهم
تنحب املاك السمه وتبچي البچيهم
ولدي اعز امن الهوه وعينك عليهم
وآنه ماداعي بعد أوصيك بيهم

ياعلي....ولدي كون ابعينك اتخليهم
ياعلي...اهواي اريد ابزينب اتوصيهم
( إنا لله وإنا إليه راجعون )

سيد علي الموسوي

على مصاب الحسن دمعتنه سچابه
نواسي فاطمه والمهدي بمصابه
والآه...يالعسكري
ويلاه...يالعسكري

ابآهات وحزن ننصب عزيتنه
نون وانزيد لبن الهادي وَنَّتنه
والعُظمِ المُصيبه اتسيل دمعتنه
ونار اگلوبنه الهاليوم لهَّابه
والآه...يالعسكري
ويلاه...يالعسكري

تجي مَولاتنه الزهره او تضل اتحوم
صوب التعزيه وتجري الدموع ادموم
تنادي ابحسره واويلي على المسموم
ضاهدهه الجرح واتنوح لغيابه
والآه...يالعسكري
ويلاه...يالعسكري

جينه للعزاء وبلوعه نادينه
وبالدمعات هالليله تعنِّينه
نعزّي فاطمه وانعزّي مهدينه
خدام الحسن كل احنه واحبابه
والآه...يالعسكري
ويلاه...يالعسكري

تبقه اگلوبنه الهاليوم منكسره
تهيج احزانَّه اشما مَرَّت الذكره
وعلى حب الحسن تجمعنه سامره
وكل عاشگ گصد هذا العشگ جابه
والآه...يالعسكري
ويلاه...يالعسكري

رغم أنف اللعين القَرَّر ايسِمّه
يبقى العسكري بَوَّابة الرحمه
شمس والمايشوف الشمس هذا اعمه
ويضل بيت الأمان ونگصد اعتابه
والآه...يالعسكري
ويلاه...يالعسكري

سيد علي الموسوي

‏مقطع صوتي من سيد علي الموسوي

ياإمامي...آنه احبك وافتخر
ياإمامي...إلك كل عمري نذر

سيدي وعِلَّة وجودي ياوِدادي
يالحسن واتحَقَق ابحبك مُرادي
أعتنيك ابلَهفِتِي ولابس سوادي
آنه خادمكم أضل للموت انادي
وابهَيَامِي...صوتي رَدَّدهه اشكثر
ياإمامي...إلك كل عمري نذر

أبقه الك يالعسكري أعلن ولائي
آنه بالدَّارين أفخر بانتمائي
ابكل مجالسكم يضل عالي ندائي
بيكم ايفوز التِمَسَّك يارجائي
بِالتِزامي...أبقه أحيي هالأمر
ياإمامي...إلك كل عمري نذر

آنه احبك عن عقيده ومبدء او راي
گلبي ضامي ياإمامي وحبك الماي
يقسي وياي الزمان وتكثر اعداي
وابقه انادي ماأهم مادامك اوياي
واعتصامي...بِاسمَك المايندثر
ياإمامي...إلك كل عمري نذر

آنه والزوار صحنه اليوم اجينه
المرقدك ياسيدي ابلهفه اعتنيه
بالدعاء ابحظرتك نرفع إدينه
عَجَّل الله فَرَجِ المهدي وِلِينه
گلبه ضامي...كل موالي ينتظر
ياإمامي...إلك كل عمري نذر

كل زياره تنجمع هاي الموالين
للزچيه والرسول الله مُواسين
الليله يجمعنه رحاب العسكريين
لرض سامره اعتنت خِدَّام الحسين
هالأسامي...شرف يمكم تنذكر
ياإمامي...إلك كل عمري نذر

سيد علي الموسوي

ابيات نعي

بالخواطر تحز ياسيد البريه
ليش مايمك زياره ولا عزيه
كون يمك حتى نقرالك نعي اعله الغاضريه
كون يمك اوياك نبجي الفاطمه الزهره الزجيه
واعله زينب ياابالقاسم نون ونه شجيه
نجري دمعه ابحظرتك عالضل ثلاثه اعله الوطيه
بالمدينه ليش فاتحتك صفت وحشه وخليه
ريت يمك بالمواكب نعتني وننعه سويه
يانبينه هايه احبابك تنوح ابهالمسيه
اتعظم اجرك وتجري دمع العين وي حامي الحميه
ولبو صالح جينه يالهادي نواسيه بالعزيه

هاگد ودعينه اعزاز ياماه
وكل ميت هله ايحظرون يماه
بس حسين وحده يصيح يماه
غريب وشحت احبابي عليه

انه اهمومي تضل كل حين ولماي
ويضل حزني ودموع العين ولماي
اليموت ايحظروله الچفن والماي
وماحصلن هذن بالغاضريه

سيد علي الموسوي