Да ўвагі дасьледнікаў

Шаноўныя сябры!

Скарынаўскую бібліятэку рэгулярна наведваюць дасьледнікі. У нашай калекцыі багата архіўных і іншых матар’ялаў, якія для многіх недасяжныя ў Беларусі. Мы маглі б прымаць і больш візіцёраў, але для гэтага патрабуецца фінансаваньне. Такое фінансаваньне можа быць і за кошт грантаў арганізацыяў, якія знаходзяцца ў Эўрапейскім Зьвязе. Напрыклад, асноўным аплікантам можа быць эўрапейскі ўнівэрсытэт, які займаецца беларусістыкай, і прыезд дактаранта ў нашую бібліятэку можа быць часткай дасьледчага праекту ўнівэрсытэту.

У сувязі з гэтым, мы запрашаем вас вывучыць магчымасьці фінансаваньня вашага праекту з прыездам у бібліятэку ў межах праграмы EU4Belarus – SALT III (Support for Advanced Learning and Training).

🤝 Сустрэча «Лідары ў выгнанні: будучыня Беларусі» ў Лондане

У наступную суботу, 18 студзеня, у Лондане адбудзецца сустрэча-завяршэнне праграмы John Smith Trust «Лідары ў выгнанні: будучыня Беларусі».

Гэта магчымасць сустрэцца з выдатнымі лідэрамі, абранымі для ўдзелу ў гэтай праграме.

Стыпендыяты падзеляцца сваім бачаннем будучыні Беларусі і акрэсляць свой уклад у гэта бачанне. Пасля дыскусій адбудзецца прыём для наладжвання кантактаў.

Калі вы хочаце прыняць удзел, калі ласка, пацвердзьце сваю зацікаўленасць на адрас [email protected] да панядзелка, 13 студзеня.

Вам дашлюць больш падрабязную інфармацыю пра час і месца імпрэзы.

📆 Дата: 18 студзеня
⏰ Час: паведамяць удзельнікам (час мясцовы)
📍Месца: паведамяць удзельнікам, Лондан

Зусім нядаўна да нашае музэйнае калекцыі далучыліся новыя лялькі батлейкі – у самы час, каб упершыню паўдзельнічаць у каляднай вечарыне, што адбудзецца ў суботу, 21 сьнежня, а 14.30 у Царкве Сьвятога Кірылы Тураўскага і ўсіх сьвятых заступнікаў беларускага народу.

Гісторыя батлейкі ў музэі Скарынаўкі пачалася ў пачатку стагодзьдзя, калі таленавітая майстрыха зь Беларусі зрабіла па нашай замове пачатковы набор лялек. Яны дэманструюць беларускую традыцыйную культуру батлейкі наведвальнікам музэя, а таксама зьяўляюцца важным атрыбутам штогадовага сьвяткаваньня калядаў, калі яны “ажываюць” у руках іхнага лялькавода.

У мінулым годзе рэжысэр Уладзімер Шчэрбань зрабіў ролік пра нашую батлейку, які некаторыя з вас, магчыма, яшчэ ня бачылі. Відэа дасяжнае тут. У ім наш батлейшчык распавядае пра гэты від мастацтва, а Ўладзімер нават пераўвасабляецца ў аднаго з пэрсанажаў!

Новыя лялькі дадаюць да багатай палітры нашых батлейных пэрсанажаў, якія прадстаўляюць розныя сацыяльна-этнічныя групы, што жылі ў Беларусі ў мінулыя стагодзьдзі. Лялькі і іхныя батлейныя тэксты - гэта сьведкі жыцьця і культуры тых часоў.

Сардэчна запрашаем усіх на батлейную вечарыну 21 сьнежня!

#калекцыяскарынаўкі