الخادم احمد ماجد الكلابي
القناة الرسمية والموثقة لـ أخبار وزارة التربية العراقية.
أخبار حصرية كل مايخص وزارة التربية العراقية.
تابع جديدنا لمشاهدة احدث الاخبار.
سيتم نقل احدث الاخبار العاجلة.
رابط مشاركة القناة :
https://t.me/DX_75
Last updated 1 Jahr, 3 Monate her
القناة الرسمية لشبكة ملازمنا كل مايحتاجه الطالب.
((ملاحظة : لايوجد لدينا اي حساب تواصل على تلكرام ولا نقوم بنشر اعلانات في القناة))
Last updated 1 Woche her
جينه ننشد فاطمه شخبارها
وليش مگطوع الهوى عن دارها
///////////////////////////////////////
جينه ننشد فاطمه شثگل الجذع
وگدرت أتحصل دوه إيطيب الضلع؟
لو بقت تتلوه مابين الدمع
وتضم ذاك الألم عن كرارها
///////////////////////////////////////
جينه ننشد والدمع عل الخد سبگَ
بله هم يدري الحطب ياجف حرگَ؟
وياهو خلف الباب كابر واختنگ؟
الله لاهنه الضحك يم نارها
///////////////////////////////////////
جينه ننشد عن ابنها والمهد
شجانت امقرره شسمي الولد؟
وعگب ذيج اعيونه شتاني بعد!!
آه ع الدم الوگع بأكتارها
///////////////////////////////////////
جينه ننشد فزّعت فضه شتريد؟
صح عمرها اثمنطعش بس مو بعيد
خان بيها الحيل وأدور اعله أيد
وجنها تعبت حيل من بسمارها
///////////////////////////////////////
جينه ننشد علي عاش بيا گلب
گالو اويه الباب عنده أصعب حرب
ايموت كلما يطلع وكلما يطب
وجي ثگيله ايلوم روحه اختارها
///////////////////////////////////////
بيش مطلوب الحسن شاف الزنيم
غيّر اسمه امن المدلل لليتيم
حسبي الله عل العصر ام الكريم
التبجي لو شافت گطعَ خطارها
///////////////////////////////////////
جينه ننشد من يجيها تروح وين
وهيه ماتگدر بعد تشبگ احسين
شلون بله بالحنينه والحنين
شهالمصيبه ويه حضن ازغارها
///////////////////////////////////////
جينه ننشد عن گبر بنت الرسول
يمتى نسمع صوت من واحد يگول
من هنا تذهب الى صحن البتول
وتنحسب عد الله ممن زارها
أحمد ماجد الكلابي
ياسيد اعيوني ارتاح
ماعيش تدري بلياك
حسبة تره جم رمضان
واتلاگه بالجنه وياك
أنسى الافراگ ونوحي.... ياروحي يمك روحي
ياسيد اعيوني ارتاح
...........................................
طايح عالباب ايكلولي..... حيدر گوم اوگف يا طولي.... وداعت محسن ما أنساك
لاتبجي لخاطر عشرتنه..... وعيونك ترجع بسمتنه.... ونرجع نلتم انه وياك
يبو سوالف دوه ساكت الك يومين
علي شمثگلها تبجي اگبال ابنه احسين
أنسى الكسر يم طاريك
ماكاتبلنه الله افراگ
يدرينه نحمل گلبين
واحد لواحد يشتاگ
يحبنه ويعرف البينه..... اختارلنه نفس الطينه
ياسيد اعيوني ارتاح
...........................................
الگايل عصروها ومحنيه..... مايدري انته شكبرك بيه.... يا أكبر من كل اهواي
بعز العصره ويمك بالي.... وگلت بحيدر يا هنيالي..... كلشي ايهون وانته اوياي
وحگ كل دمعه طاحت الك بلمحراب
منك (يم حسن) تسوه الضلع والباب
شويه العمر وانته اهواي
تطلبني بالجنه اسنين
ما أريده ضلعي البجاك
غير أنته أعز يابو حسين
كلهن عليك ادموعي......حيدر فداك اضلوعي
ياسيد اعيوني ارتاح
.............................................
روحي تضل تفتر ابيتك.... وهم ذيج انه ابقى امتانيتك.... وياحيدر ابقى اتلگاك
ما اعوفك لو لحظه لوحدك.... بس نزل اجفوفك من خدك...... بداعت زينبنه اترجاك
يلمعيشني نبضه لگلبك الطيب
سامحني علي خليتك اتشيب
بأسمك مسجلتها الروح
وامقصره اضلن مولاي
لثامك نگع كله ادموع
نيتك شنو تموت وياي؟؟
اهواي اعتذر من لونك....طيحت دمع اعيونك
ياسيد اعيوني ارتاح
.............................................
الما لحگنه انگله اسم الله.... مداره يطلبنه ويم الله..... يسمع ها يمه ومو آه
انه وياك بذيج الجنه..... نكعد ونكبر محسنه..... ونعوضه اعله الصار وياه
عمت عيني اعله دمه ايباوع لأيدي
بهذيج العتبه طاح المحسن وليدي
صح عمره دم بس مهضوم
شأدعي اعله ذاك المسمار
حس بيه من اتجويت
وما بي يگوم اعله النار
شفته اعله طوله اجروحه..... ومن وني طلعت روحه
ياسيد اعيوني ارتاح
...........................................
ادريك احنين وتحبني.... مو ضلعي اعيونك توجعني... يا ابو عيوني شلون تنوح
حيدر ما عاش الي يتعبك........وين الله وما يزعل گلبك.......
صعبه اعليه أتضل مجروح
الله اليدري شنهو اجروحي والشفته
علي ماهمني كل الصار بس أنته
بدونك حرام الايام
راح ابقه كل عمري اتناك
شيجيب حيدر رمضان
واتلاگه وياك هناك
سامحني اروح ابدونك.....بس روحي بين عيونك
ياسيد اعيوني ارتاح
احمد ماجد الكلابي
لسان حال احد الفقراء القاصدين دار مولاي علي في يوم الهجوم على الدار :_
أتعنيت حيدر اگعد بفيّه
ونص الدرب ضاگ الهوى بيه
شفت شگد ناس.... تخنگ بأحلامي
مدري ليا بيت.... هدوّ گدامي
تعنيت حيدر اگعد بفيّه
...............................................
مابيه أكثر انتظر
كلت امشي واشكيله الفقر
واگصدت للمايعتذر... لداره ومجانه
اتخيلته يوميَ بجفه ألي
وبالباب واگفلي علي
ويگلي اهلا سائلي... بذاكه حنانه
رايح للما رد واحد من آدم لليوم
واكيد امن اوصل بابه ما ارجع مهموم
بس هو البير اليسوّه اتسولفله المضموم
وهنيالي من ياخذني بأحضانه
خلي أهم روحي واوصل امجانه
رايد ارتاح... من ضيمي وتعبي
بس للكرار.... احجي ألي بگلبي
اتعنيت حيدر اگعد بفيّه
...................................................
امشيت او مشه اوياي الأمل
وكل صعب حسيته سَهلَ
خطار عد خير العمل..... حامي الحميه
وتوني اوصلت نص الدرب
وشو بده شلعان الگلب
اتلاگيت وي وادم غرب.... هدوّ سويه
واحد شفته يفزع الثاني بحرگه وبصياح
والخلاني اقلق أكثر مدري اشگد ارماح
وياهو الأتمعن بعيونه الگاه ذباح
أشويه گلت اتحمل الرهبه
وكلمن يروح ان شاء الله بدربه
وضليت ابعيد...... امراقب ممشاهم
ونتفارگ اكيد.... هسه آنه اوياهم
اتعنيت حيدر اگعد بفيّه
...................................................
احتاريت بيهم من بطو
وامنين ما أمشي مشو
اهواي بطريقي اتعطلو... بس آنه اكابر
وضليت مشغول بأمر
ودم گلبي أحر امن الجمر
هدوّ عليمن هاكثر؟؟..... هاي العشاير
يجوز الراح يروحوله عنده اهواي اخوان
وبظهره عنده عشيره من غير الجيران
وأي واحد هسه اسأله اطلع ما غلطان
وبس اوصل لحيدر اسولفله
يمكن علي يعرفه ويعرف اهله
المن محتار...وانسيت اجروحي
خل انسى الصار... واهتم بروحي
اتعنيت حيدر اگعد بفّيه
...................................................
راح اوصل لبيت ام حسن
ولسه العشاير ما مشن
گامن ادي يتراجفن....امن اگطعو دربي
يارب علي لخاطر علي
احفظ علي وحرمة علي
المقصود خافنه علي....أنخمش گلبي
أمنيتي اگلهم لحد يفتح باب الدار
خله يضل مسدود بوجهي اوجه الخطار
بس خلها اتعدي اليوم ونرجع للكرار
وغلطان من كثّرت خوانه
ولو يحترگ ماتهم جيرانه
مامش فزاع... يمشيله لداره
ويوصل للباب.. ..يشلع بسماره
اتعنيت حيدر اگعد بفيّه
.......... .......................................
هجمو عله الماله ظهر
اواحد وره الباب انعصر
ومن عنده مدري شنكسر... يمكن اضلوعه
وكل بيت ابو حسين احترگ
وبالعتبه اكو انسان انسحگ
وريحة مهد يمكن شهگ... بآخر ادموعه
للوادم هاي الهدّت ما حسّبت احساب
جا اجيت وگلت لحيدر خل انشيل الباب
الله يساعد گلبه الورّم من هيجي امصاب
وتالي اعرفتها ام حسن معصوره
وامن الضرب ماتت ومقهوره
اتمنيت الموت... ولا هاي الجيه
شمدريني البيت.... بيت العلويه
اتعنيت حيدر اگعد بفيّه
أحمد ماجد الكلابي
ان شاء الله سوف يتم نشر برنامج قصائد مولاتي الزهراء صلوات الله عليها
عن لسان مولاي صاحب الزمان صلوات الله عليه عندما أراد أن يغسل مولانا العسكري صلوات الله عليه بعد فراق خمس سنوات فيكلم ماء المغتسل قائلا:
ياماي شحجيلك....عن والدي وافراگه
ما جانت إبالي....... بالمغتسل نتلاگه
ما شابع أمن احضانه
عيوني إله عطشانه....... يا ماي
...............................................
ما شفت الراحه ومتعذب
خمس اسنين وگلبي امشيب.... اهواي اجروحي
نعيش آنه اوياه ما خلونه
بگماطي وفارگت اعيونه.... وحرت بنوحي
ما يتضمد اصوابي وكلشي البيه يوجعني
لا آنه اشبعت منه ولا هوه شبع مني
آه ياعازة البويه وآه يا عازة اليبني
من عنده حرموني...... ولازم اغسله بأيدي
بس ضلت بنفسي..... اسمع يگلي وليدي
بلكت يفك ذرعانه
عيوني إله عطشانه...... ياماي
.............................................
تشهد كل ادموعي اعليه
هضمتني شگد هاي الجيه... ...وهدت حيلي
البعده أخضر يا محلى اسنينه
شاب وما خلصن عشرينه....آه ياويلي
عاش أمن السجن للسم وجاب اسنينه بس ساجد
كل الدنيه جارحته الما جارحله كل واحد
راد الخير للوادم منهم كلشي ما رايد
بكلشي الحسن هوه.... وادلاله ضلت حمره
تشهدله سامره..... وبالأخص ذيج الفقره
واسأل عليه جيرانه
عيوني إله عطشانه....... ياماي
...............................................
طاريك يا ماي يألمه
يحرگ گلبه ويحرگ دمه...وكل ارسومه
أمن امجانه وللطف ايسافر
ويضل يسولف بالعاشر.....عن اهمومه
وآنه بظهره يقرالي مقتل كربله الدامي
ويگلي أعطش بحس مبحوح عدنه احسين ضل ضامي
أمنهدها احمرت اعيوني جي ما رحت لأخيامي
ياماي ماعذرك..... وبعيني لا ما تغله
شيصير لو واصل..... عبدالله وام عبدالله
شتريد هيج ويانه
عيوني إله عطشانه...... ياماي
................................................
وكلما يسمع باب ودمعه
يجري ويلطم عينه وضلعه... بحرگة جمره
يعصر روحه ويبجي بحسره
يگلي اعصر روحك للزهره....... العاشت زهره
بين الباب والحايط حاجوز الضلع صاير
وعلي گدما بجه اعليها يطيح ويرجع ايكابر
هذاك اليحل كل صعبه الوكت خلاه يضل حاير
وضل محسن بدمه... أمن الگاع محد شاله
وبيت ام حسن ظلمه.... ولاواحد الضواله
وكلمن بجه لمبجانه
عيوني إله عطشانه...... ياماي
.............................................
مشتاگ هواي اسمع صوته
ماعندي امتون لتابوته...... العايش بيه
الكل ليليه وطوله بشوفي
شلون بحفره تنزله اجفوفي... اهواي اعليه
الما لحگ يهز مهدي مجانه بگلبي وبريتي
اخذ عافيته ذاك السم وأجيته ارگض بعافيتي
حلمي ويه ابوي أكبر لجن دفان تاليتي
وينه اليواسيني.... ويعيني بفاتحتي
دافن دوه اجروحي.... أوين اليطيب علتي
والبلعرش حزنانه
عيوني إله عطشانه....... يا ماي
أحمد ماجد الكلابي
اشتياق مولاي المحسن ع لمولاتي العقيلة صلوات الله عليها :
بظهر ابوي وبالي يمج جانت بنفسي اشوفج
وجنت اعدهن ساعه ساعه حتى اجي واغفه بجفوفج
وحق ضلع امي يزينب آنه ما مخلوق اعوفج
مسافر.... بس وغلاتج ماردت سفر
مسافر....معوز جنت ياخويه جم شهر
مسافر.... من عشرتج حارمني القدر
گالو كاروك محضرتلي
واسم المحسن مختارتلي
ومنتظرتني ومشتاگتلي
أختاه وداعاً....... أختاه وداعاً
.............................................
يا نوايانه البريئه ويا نواياهم الحنضل
عمري اگصر من حبلهم وردت عمري وياج يطول
شگد ثگيله الباب جانت لجن والله افراگج اثگل
زينب.... يا كلشي إنتي ومحلى هالاسم
زينب.....ياحلم بس ما ضل بعد حلم
زينب..... ابگد حنانج خويه منلجم
سهرانه انتي هواي اعليهن
تعبتج وادري تحبيهن
ضمي اهدومي الخيطتيهن
أختاه وداعاً........ أختاه وداعاً
.............................................
ياطموحي الماتحقق وبيتنه البي كلشي شاره
ردت يم الحسن اگعد يوم يشعل بيده ناره
وردت يم احسين ابجي من تفر ذيج الحياره
رايح.....بس كلبي يمكم باقي كل وكت
رايح....... وامنيتي تعتبروني ما رحت
رايح......من بيت احلى ايامي بي عشت
رگضه الموت وبيه اتعثر
ودمي اباب العتبه اطشر
ما مقسومه وياكم أكبر
أختاه وداعاً....... أختاه وداعاً
.............................................
أرد اعيشن ليله وحده خاطر احجيلج البيه
نعصرت وگدما حنينه ضلت اتعاين عليه
ودنگت عالدم تلمه الله يا گلب الزجيه
طاحت.... ازغيره وعليها بيّن الكبر
طاحت..... سولفت فضه وماحجه العمر
طاحت.... وكل هذا ضلت مني تعتذر
باجر يم الله آنه الشاهد
امي الما أذت كل واحد
واحد عاصرها بدم بارد
أختاه وداعاً....... أختاه وداعاً
احمد ماجد الكلابي
لمن يود تعلم الأوزان الشعريه ☝️☝️
في حديث لمولاي سيد الشهداء مع نفسه.....
حسين بس ألزم دمعتك..... كافي تنحب
وقوي گلبك قبل لا...... ترجع لزينب
ظهرك خسرته وهايهيه
حضر حجي اتگوله لرقيه
كافي تنحب......... كافي تنحب
..........................................
قبل ساعه ابخير جيشك رغم بس عباس يمك
الغربه ثاريها ابو فاضل من تطيح وما يگومك
يلساكت ابعز الحجي شمثگل سكوتك
يحسين اول تالي ما ينسمع صوتك
بس آخ من دنيه الخذت منك تجوتك
وما خلتك تتهنه ويه ولدك واخوتك
هوه اخوك وجنت مثل... ابنك تشوفه
اهروش گلبك گطعوهن...وي جفوفه
مالايگ النوم لعضيدك
بس شتسوي ماهي بيدك
كافي تنحب.......... كافي تنحب
............................................
كابر وشد حيل ظهرك بعد رايد منك الطف
اعتبره ما ميت ابكلبك وگول ياعباس واوكف
ورد الاعمامه الراسك وألبس عباتك
صوت الشماته وصل حد خيمة خواتك
وضمهن بگلبك تره اتأخرك ذكرياتك
هو انته منا وانتهى كلشي بحياتك
گوم وبوجهك العامود المخيم
طيَحه بس لا توگع امن ايصير مأتم
التوجع تقنع ياهي منهن
بعباس متعلقات كلهن
كافي تنحب......... كافي تنحب
..............................................
ماي البعينك كضيته وكلشي أخضر بيك شيّب
راح امان اخيام زينب حگك تخاف اعله زينب
لاحگ وراك اشكد بجي امسح دمعتك
يلجيت ترگض للنهر حير برجعتك
واطلبها من طولك يرد بيك لوگفتك
وحاول تگض اعيونك أمن اتشوف اختك
توجع اسوالفها جي...... زينب امايه
أوين اخوك اتگلك أمن... اول احجايه
لا تحجي الها كلشي شفته
شما بيك تگدر خلها سكته
كافي تنحب........ كافي تنحب
...........................................
اعزاز طاحولك عشيره وما شكيت وگلت ظهري
جا گمر هاشم شكبره بگلبك المايرضى يدري
روح الگمر طلعت وروحك بدت تطلع
يحسين ما دامك عدل لخيامك ارجع
عندك رقيه استبطتك خافنها تسمع
گوم ارجعلها وخلي منك عاد تشبع
گلها عمج عالنهر يبنيتي عفته
وغير الموضوع من توصل جربته
وأبجي اعله كيفك من تضمها
ماريدها تحس مات عمها
كافي تنحب........ كافي تنحب
.........................................
ليش كل هذا المناشغ كافي مو خلصت انفاسك
افراگه ساعه ما يطول بين ما تنطي انته راسك
شمسوي بيك المامشيت ابدونه خطوه
بس عاذرك جي ادري بالعباس يسوه
الماي بيده واعلمودك ما تروه
ونكران ذاته العل نهر جسَد الخوه
آنه ذاك الينزف وضل يبجي سكته
آنه ذاك السولف اوياك اعله اخته
شگد حاولت الزم جروحك
يحسين انه احسين روحك
كافي تنحب............ كافي تنحب
احمد ماجد الكلابي
في آخر لحظات مولاي سيد الشهداء ع ودع الجميع ولكن عندما حان وقت وداعه مع مولاتي زينب بكى كثيرا وقال لها:
يلي عشتي بگلبي واگلوب اليتامه
أن شاء الله يعدي السبي يختي بسلامه
تبقين بعيوني الحبيبه
وما عاش اليگلج غريبه
أن شاء الله يعدي السبي يختي بسلامه
..........................................
....................
ادري لخاطر اعيوني ما بينتي تعبانه
ثلثتيام عطشانه وما گلتيلي عطشانه
شگلج وانتي عشتي اوياي كل تعبي
شيبتج بگدما تيهت دربي
اعذريني يزينب يابعد گلبي
كلشي خل اسمع ولا اسمع ونينج
أن شاء الله ذاك الحرگ مو يم أدينج
مو بيدي مجبور أمن اعوفج
وما ضن بعد يم عون اشوفج
أن شاء الله يعدي السبي يختي بسلامه
................................................
تلگيتني جم مره من هضمتني هاي الناس
وبكلهن نزفتي اوياي من عبدالله للعباس
ما شفتج گعدتي لحظة بخيامج
اعله ذيج الوگفه الله ايساعد اجدامج
استراحي شويه بعد هواي گدامج
امنيتي زينب محد يسألج عليه
أن شاء الله من ابطي ما تبجي رقيه
ياروح اخوها شدي حيلج
أمن ابعيد راح ابقى اندعيلج
أن شاء الله يعدي السبي يختي بسلامه
..............................................
شيريدون انطيهم وخل منج يبعدوني
عليج اهواي يا زينب أمن اگبالج يسحگوني
هاي الخيل ما تدري شغلاتي اعليج
كلشي أتريد مني وكلشي ما تنطيج
َوصعبه اعليه إذا اشوفج وما احاجيج
َوبرگضتج ذيج ضل مشغول بالي
أن شاء الله التل ما يصير اوياج عالي
زينب احلفنج ابجدي
فدوه اعله كيفج خويه اصعدي
أن شاء الله يعدي السبي يختي بسلامه
...............................................
وليهمج حجي الوادم ياهيبة عشيرتنه
وإذا سموج مسبيه تبقين انتي اميرتنه
ماكو هاشمي ما ماشيه بدمه
ابو فاضل بكبره ايصيحلج يمه
لجن عالشام يختي ابرينه الذمه
راح من فوگ الرمح نگعد نحرسج
روسنه اتحاميج ما عاش اليمسج
يم الله واختاريج انتي
ادريج گد السبي يختي
أن شاء الله يعدي السبي يختي بسلامه
.............................................
(جواب السيده زينب ع)
سويه عشنه كل افراگ الفرق بيناتنه بس هاي
هنيالك يخويه احسين افراگك ما تعيشه اوياي
أمن أمس محتاره شأدعي اعله اليذبحونك
اشهالتالي الأعيشه بدنيه من دونك
وأنه المتعوده أصبح بس عله اعيونك
شلون اعوفك باجر وامشي بخواتي
كون أضل يمك واغطيك بعباتي
لا هوه طبعي ولا هو طبعك
ماعرف حتى اشلون اودعك
أن شاء الله يعدي السبي يختي بسلامه
أحمد ماجد الكلابي
?الملا امجد كريدي السماوي
? || خلني بمچانك ||
✏️ الشاعر : احمد ماجد الكلابي
القناة الرسمية والموثقة لـ أخبار وزارة التربية العراقية.
أخبار حصرية كل مايخص وزارة التربية العراقية.
تابع جديدنا لمشاهدة احدث الاخبار.
سيتم نقل احدث الاخبار العاجلة.
رابط مشاركة القناة :
https://t.me/DX_75
Last updated 1 Jahr, 3 Monate her
القناة الرسمية لشبكة ملازمنا كل مايحتاجه الطالب.
((ملاحظة : لايوجد لدينا اي حساب تواصل على تلكرام ولا نقوم بنشر اعلانات في القناة))
Last updated 1 Woche her