غريبة تنزل دمعتي
يا ضامي كل عمري الك يغالي
وحدك شريج بمهجتي
وحروفك كبال النظر تلالي
مولاي اجيتك من عدم
ما رايد العز واخذ دلالي
ارزقني دمعه اعله الخدر
خل تخرب العين واثر جمالي

انة اجيتك منكسر كلي ذنوب
ليل وبكل ظلمة تاخذني الدروب
مدلي ايدك لا تضيعني من اديك
عبدك المذنب اجه ورايد يتوب

اغفرلي مولاي ذنوبي
بچفك استرها عيوبي
يا باب يلما ردله واحد
اترسها من خيرك جيوبي

ما رايد اعشگ اي بشر
بس رايد عيونك تصدها لية
يا اعز واحد بالگلب
حبك فرض ومحبتك هدية
خل يشتعل گلبي بجمر
ويا ريت جرحك ينتفض علية
ارحم بشر عمره گضه
يريد ينعى اعلة المشت سبية

كون عيني ما تغمض وتنام
عالغريبة الباتت بنص الظلام
خلي گلبي ما يبطل الونين
شلون اهوود والعلاوي بلا خيام

اچويني من حرگ العباية
خل اروح وي السباية
ارد اشوف جروح زينب
شلون تمشي بلاية راية

يا گلبي ابد ما ضل وكت
لا تبرد ولا تنسى هالمصيبة
بالك يلهيك الزمن
خل تنگضي ايامك على الغريبة
فزز شكو بروحك جرح
ولا تنطفي نارك تضل لهيبة
حسين حزو منحره
وخدره انوله واعمامته سليبة

ليش خدر الله بسبي وغربة يروح
هالتساءل دوم ماليني بجروح
بالصحاري ينام مسلوب ورهين
وسفة چم قرآن مچتوف و ينوح

حسين يلمحد بچالك
وانحده بهيمة دلالك
من هوان الدنيا كلها
تمشي وي غربة عيالك

يلطايح بعازه متن
وما برد جرحك داستك حوافر
شيهود جروحي الك
ضعنك رهينة وللغرب يسافر
لا خيم ضلت لا لوة
ولا كافل اليحمي الخدر يناطر
شينسي روحي غربتك
لا بية انسى وبالجرح أكابر

شلون انسى وروس مرفوعة برماح
وجسد مطروح بترب كله جراح
ايتام طرت بالفلا بلاية معين
وصار بالخيمة السلب كلشي مباح

بية چم لوعة وهضيمة
راسك امتاع و غنيمة
وخدرك الما شاف راحة
وسفة يحدونه بشتيمة

علينا التمت العدوان صوبين
وبس نسوان ضلت بالصواوين
زلم هدت واصيح بصوت مبحوح
ما خلالي راي صواب الحسين

خيل ونار بكل خيمة
واركاض ايتام بهيمة
احا يا گلبي وظيمة .. يا حسين

شيلم اطفال بصحره
راح حسين وضل نحره
من داست خيل بصدره .. يا حسين

ما ظل دلال ولا حمة
وچفي ايدي ضايع بالدمة
وكل خدري يصرخ بالظمة

ركض صار بصحاري وموش بهداي
ونتحسر بقينا بعازه افياي
لا كافل بقى وكل خدري مرهون
ويبست كل لهات التصرخ الماي

ما جانت خوية ابالي
تصرخ وبحيره اطفالي
ميت طايح كفالي .. يا حسين

ضليت انة بهالحيره
بس عدوان بلا غيره
من ديره نطب الديره .. يا حسين

مشونة وبدرب السبي
ويحدي بضعنا الأجنبي
بس التراب اعله العبي

مشونا بدرب بي غربة وتعيل
وبعد اچفوف اخوتي ينهد الحيل
تعبانة وناشد وين الاضعون
بنص غربة وادور تالي بالليل

ما تغمض عيني وتغفه
ونار بصدري ما تطفه
وين الچف ايدي بچفه .. يا حسين

وحشة ومامش خواني
والفاگد عمره يعاني
ميته فراگك خلاني .. يا حسين

ميته انه من طف كربله
يا وسفه چنت مدلله
ضيم الخذاني شيحمله

ما ترهم اروح مچتفة احبال
مشوني بغصب ما ضلي كفال
كل فكري يسولف بخوّتي وين
وفوگ الضيم كله ظيم الاطفال

كل حيلي راح بحافر
من سحگت صحت شصاير
داستني جروح العاشر .. يا حسين

ما خلو شي من دمك
سحگوك وداسو جسمك
ولا خيط الباقي بهدمك .. يا حسين

سحگو عليك بكل فخر
يا وسفه ما يمك گمر
يم النهر طاح النهر

مهند شاكر

https://youtu.be/hwlZnW1L6hc?si=ndBWw2rsXdAidnvu

(( ثكيل ))

استشهاد الزهراء ع

بين مولاتي زينب وفاطمة عليهما السلام

ما راح اضل مدللة
لو رحتي اروحن كربلة

وتضيع الاحلام
وتضيع الاحلام

★★★★

من رسمچ علي غاب
گمت اشتم بالتراب
ياخذني العطر ليچ
واغفى بحضن الگبور

مات الضوة البلبيت
يا يمة الچ حنيت
راحت ذيچ الايام
احترگن مثل البخور

يا يمة فگدج مو سهل
وضيم السهر ما ينحمل
وگليبي محتام

جرحچ ولا مثله جرح
يلچمني كل فزة صبح
وتزيد الالام

شيصبره اليفارگ هلة
ما راح اضل مدللة

★★★★

طبع الفاگد يصيح
وتحمل ونته الريح
عمري اتبده دمعات
بلكي يردچ الموت

ما چانت على البال
وحدي بطرگ الخيال
خنگة ومظلم البيت
وسفه وما الچ صوت

كون ادفن وياچ البچن
وگليبي يمة خاف احن
ولحضنچ اشتاگ

الراحو اهلة بلا خبر
يشبع بچي ويشبع سفر
ويكتله الفراگ

يمة الحزن عگبچ حلة
ما راح اضل مدللة

★★★★

حزني اعله الگلب داس
وحشة الديره والناس
كلشي بروحي تعبان
ثكلت حتى الهدوم

حزنچ باقي بالروح
وبية مچلبة الاجروح
رسمج تارس العين
وباقي بگلبي للدوم

اتخيلج يمي واصيح
رسمج بصفي يستريح
يتسامر وياي

كلما اريد انسه المحن
اتذكر انة ابلا وطن
وبعازة فياي

حزني الخالق رتلة
ما راح اضل مدللة

★★★★

كون الرايح يعود
ونطش فوگه الورود
بشوفه نكحل الشوف
وتشبع منه هالعين

صارت حمرة هالعين
هيج الله وتردين
ونلتم حدرج ايتام
ونچلب بالايدين

ما اصدك بجوة التراب
ضكت التعب ضكت العذاب
من زغري وصباي

المن اضل اشتم هوة
خل اندفن يمج سوة
يا ذخري وحماي

يا يمة يلكلچ هلة
ما راح اضل مدللة

★★★★

مهند الشاكر

(( ثكيل ))
استشهاد الامام الحسن العسكري ع

وازكياااه ..... واشهيدااه

سيدي عليك المدامع هاملة
جروح شيعتكم لأجلكم ماثلة
هسة سم قتلك گبلها بكربلة

ذبحو حسين الشهادة الكم فخر

★★★★

ضجت املاك السماء المقتلك
لا تزال احزانك انتة بكل فلك
سرُ من رادَ الجنائن يوصلك

واليريد الله على چفوفك عبر

★★★★

سيدي يا ذا المناقب يا حسن
يا شهيد الله يا ذات المنن
عيون اليحبونك بموتك عمن

الأرض واسمانا هزاها الخبر

★★★★

ضوة سمهم طفه نورك بالقتل
عادة عدكم من تموتون بفعل
ذابل ولونك تغير بالمثل

وكل محبينك فجعهم هالسفر

★★★★

مهند الشاكر

شور دكة ونص

(( اذآن الزيارة ))

اذن وچان الصوت يندب گمر
نمشي الك بالعطش حد النهر
محزمين الأزلام وبيا علي
شدو الحيل اسباع صوب النحر

مشي مشي حد كربلة .. والمنحر الغاية
واعدادنة هواية .. وكلها تنگط غيرة
مشي مشي ماكو تعب .. انت التواسينه
وتكضنه چفينه .. ويانة ديرة بديرة

عشگ ... ما ينوصف هذا العشگ يهوى التعب
عشگ ... طول الدرب هذا الگلب هام وندب
عشگ ... كل اليحب يم كربلة بيها انجذب

★★★★

تمشي الك هالحشود ممشة الدمة
شالت الراية چفوف ومحزمة
حطو الايد بأيد ولكربلة
والدرب دمع صار من فاطمة

بچي بچي صار الدرب .. علما طفت ناره
تبچيلة زواره .. وبصدرها الحافر
بچي بچي طاح الدمع .. والعين ما سكتت
كل الزلم هدت .. وبيهة جمرة عاشر

هلا ... بهاي الزلم كلها مشت من العدم
هلا ... مية هلا وهذا الدرب منها انثلم
هلا ... بغيرة علي وشيعة علي شالت علم

★★★★

حل فرض دين الشوگ والعاطفة
كربلة جروح حسين والها انچفة
عاشگ ينادي بصوت ونستمع
شددو الگلوب بساع لاهل الوفة

تعب تعب لا ما يضل .. تتزايد الهمة
علما برد دمة .. تباوع النة عيونه

تعب تعب هذا الدرب .. لا ما يكفينه
بس الياذينه .. طاري خدر ضعونه

ابد ... ما ننثني دوم ونضل هذا العهد
ابد ... عشگ الزغر ( يا كربلة ) من المهد
ابد ... ما ناسي ابد عشگ الگمر بية انولد

★★★★

اليتعب يشد الحيل طول الدرب
الزاير امنيته حسين عاف الغرب
كل صباح ومسه يصيح الحبيب
هلا بهذا المشي اليشفي الگلب

الك الك ما ينكضي .. هذا الحزن ديره
ولا ما يصح غيره .. مگصد لكل زاير

اجت اجت كل الزلم .. من كل درب هبت
ارض وسما اتعدت .. سوت الما صاير

الك ... هاي الزلم كلها اجت يابو علي
الك ... فدوة الگلب واهل الدرب صارو هلي
الك ... بس انتة الك شوگ ودمع صاير الي

مهند الشاكر

(( القصيدة مشتركة ))

الشاعر يحيى الظالمي
الشاعر مهند الشاكر

مولا ابو فاضل .. دخيلك
مولا ابو فاضل .. دخيلك

####

يا امير وكافل مولا ابو فاضل
عالحرايب نازل مولا ابو فاضل
يرهب بريشاته

مولا ابو فاضل ...

علحرب تعويده مولا ابو فاضل
چنها نار بأيده مولا ابو فاضل
چن علي طعناته

علي نازل حرب چنه سوا الما يصير هناك
دخيلك كامو يصيحون فوگاهم غدت يمناك
تاخذهم يسارك نوب وتردهم ردم بالكاع
چفك يشهد بهذا ويشهدلك فرار اعداك

انتة بس انتة الوحيد بكربلة
حامي الضعون وتحامي مدللة
اسمك المعروف باسم ابو الفضل
غيمه چفك صار فوك العايلة

####

شيخ الكتيبه وضلها مولا ابو فاضل
حامي الحراير كلها مولا ابو فاضل
رد الكتايب بيده

مولا ابو فاضل ...

لم الزلم بجفوفه مولا ابو فاضل
ردهم ركض للكوفه مولا ابو فاضل
يوم المعارك عيده

بعيونك يشوف الموت زلمه الكابل عيونك
بجفوفك تدير الكاع شيالة سمه امتونك
بس رداك صوت حسين ما رداك اي واحد
صاح بصوت رد ياخوي خدرنه يضيع من دونك

انت جفي و رايتي وضل الضعون
ياعضيدي ويابعد كل اليجون
الخيمه من بعدك تطيح بطيحتك
ومن بعد عينك اضل بلا عيون

####

بيوم شال الراية مولا ابو فاضل
سكتت الحچاية مولا ابو فاضل
فنهم يلاگونه

مولا ابو فاضل ...

قاهر بكل حيله مولا ابو فاضل
حمل الثگيل يشيله مولا ابو فاضل
يا حلات متونه

شايل نار بعيونه وبچفه الگمر بتار
دار الحومه فوگ الجيش سوا الما يصير وصار
واحد والعدا سبعين ركضهم ركض بالخوف
ما يهتم ولا يرجع زلمة ومن ظهر كرار

واكف وما صحله واحد ينتفض
مالت برجلينه من داس الأرض
بكيفه اليريده يصير بكل وكت
الموت واجب بالحرب صار وفرض

####

عالحراير عينه مولا ابو فاضل
ضلهن بچفينه مولا ابو فاضل
دنيا بين جفوفه

مولا ابو فاضل ...

بيده لم القاده مولا ابو فاضل
ذرهم خفت بعناده مولا ابو فاضل
حط بكلبهم خوفه

خيال وتطر الجيش ماهمتك خياله
حسين يناطر امن بعيد يبكي يعاود هلاله
بجفوفه مناجل موت ضل يحصدهم بكيفه
حط كل النهر بالجود محد كدر يدناله

الحرب غابه والضواري بسيفه
بكيفه ياخذها و يردها بكيفه
السلم من سيفه يفز بنومه
يرجع يضوگه المراره ابطيفه

الشاعر يحيى الظالمي
الشاعر مهند الشاكر