اجت تركض مصايب الي ورمات
اخوي .وريت گلبي بعجل ورمات
مو رجلينه رجل النوگ ورمات
الحادي مسرع يريد الهديه

يخو زينب تره زينب خيلها
انشاف. وكونك اتباوع خيلها
بخمس اخوان اجت ماضل خي لها
بسبي راحت وعافتهم رميه

يروحي اثكثر للطف ون هديتي
واشوف الحبل شدته ونه ديتي
ليزيد الحادي اسمع وين هديتي
جبتلك هالحرم كلهن هديه

احنه الچان احسن منزل النه
وعند الله اشكبرها منزلنه
الشال الراس حاقد منزلنه
مثل بيرغ يهوس بي اليه

القصر شفته وعسني ماني شفته
ودمعي الجره مني ماني شفته
اشوفن يطگ شفته ماني شفته
وضرب المخزره چن يگع بيه

الشاعر غضنفر الزيداوي

ليلي ما انامه .. اسهر عاليتامه
خلي ليلي يشرح الكم
كون غمضت عين اختكم
ــــــــــــــــــــــــــــــــــــــــــــ
شلون انام الليل خويه واني موجوعه
الله يحزن من يتيم ينام بدموعه
اغفه ويفززني حلم الخيل بضلوعه
صوت كسر عضامه لسه بذني مسموعه

اتعب وأمن اغمض .. انظر جثه تنرض
وافز بلساني اسمكم
كون غمضت عين اختكم
ــــــــــــــــــــــــــــــــــــــــــــ
يابو فاضل ريت تحضر تنظر لحالي
أمن التعب لمن اگومن گاعد اخيالي
ياوكت زينب اسيره والخصم عالي
يمته صارت امشي بلله بدون كفالي

اگعد عالترايب .. واسكن بالخرايب
بكل نفس خويه صحتكم
كون غمضت عين اختكم
ـــــــــــــــــــــــــــــــــــــــــــ
الحادي يتوعد يزيّد بالحرم خوفه
وسوطه كل اشويه فوگ امتونه يطوفه
الچان مايعرفني احد هسه معروفه
وگالو العباس گطعناه وچفوفه

گطعناها ادينه .. وطفينها عينه
كله گطعنا گمركم
كون غمضت عين اختكم
ـــــــــــــــــــــــــــــــــــــــــــ
گلبي مشتاگ الاخويه وارد اشوفنه
چنت كل ماشوفه اركض اني احضننه
هسه راسه اعله الرمح واتمنى انزلنه
بسوطه يبعدني لَمَن يم رمحه اتدنه

حسيني ياعيوني .. منك يمنعوني
شوگي ليزيد قهركم
كون غمضت عين اختكم
ــــــــــــــــــــــــــــــــــــــــ
تفز الايتام وسط الليل موجوعه
واحد أمن اسياط اميه وثاني من جوعه
شرد اسوي من اشوف اطفالك بلوعه
وكلمة المسبيه تعرف ماهي مسموعه

محتاره بسبينه .. واندب يا علينه
ياعلي احضر البتكم
كون غمضت عين اختكم
ـــــــــــــــــــــــــــــــــــــــــــ
السبي ما خلص لحد ما خلصت اعيوني
وردت ارد الكربله وقبلو يردوني
جيت متلهفه لخوتي وهادله امتوني
أمن احچي ماكو اجواب چنهم مايعرفوني

محسبه ينهضولي .. اعليهم چافي طولي
كلمه ردت اسمعها منكم
كون غمضت عين اختكم

الشاعر غضنفر الزيداوي

آه .. آه .. آه .. حسين
ـــــــــــــــــــــــــــــــــــــــــــــــــــــ
من صعدنه النوگ بويه بكربلاء
لحد ما طبينه للشام العزاء
عالهزل من انعه وتون النساء
بويه من ونهن بچت اهل السماء

آه .. آه .. آه .. حسين
ــــــــــــــــــــــــــــــــــــــــــــــــــــــــ
شفت موقف بويه شبعني قهر
اچفوف عمتي امچويات أمن الجمر
قبل من تمشي يرافقها الگمر
وسفه هسه بالسبي ويه الشمر

آه .. آه .. آه .. حسين
ــــــــــــــــــــــــــــــــــــــــــــــــــــــــ
بحضنك ينامن خواتي كل حمام
عالترب نامن يبويه ابلا خيام
تريدك ارقيه تجي بوكت الظلام
تگول مو يدري اعله صدره يلله انام

آه .. آه .. آه .. حسين
ـــــــــــــــــــــــــــــــــــــــــــــــــــــــ
ريت ميت وياك ويطمني التراب
ولا اشوفن عالكفر يدخل حجاب
أمن الدمع صرت انظر الجو بي ضباب
صعبه عالخدر ينامن بالخراب

آه .. آه .. آه .. حسين
ـــــــــــــــــــــــــــــــــــــــــــــــــــــــــ
بويه عند الناس عيد بهل جروح
گلبي ما يتحمل اسكت ما انوح
الحرم انظر جسد ضلن دون روح
بحجر تشمرنه الخلگ من السطوح

آه .. آه .. آه .. حسين
ــــــــــــــــــــــــــــــــــــــــــــــــــــــــ
السبي شيخلصه بعد ما ضلي حيل
راحه ماكو صرنه نمشي انهار ليل
الشام من شافونه واحنه اعله الهزيل
بويه كل نظره احس تسحگني خيل

آه .. آه .. آه .. حسين

الشاعر غضنفر الزيداوي

قصيده للطفل

طفل عطشان .. وعذب محروم
رجع لمه .. بسهم مفطوم
________
بيا ذنب هذا الطفل گطعو وريده
لزم لحية والده أمن الوجع بيده
شگد قديم السهم والرگبه جديده
أمن السهم حنجرته وانشمرت بعيده

شرب مو ماي .. شرب لدموم
رجع لمه .. بسهم مفطوم
_______
نايم ونام السهم وگفه برگبته
وچوت ايد حسين من نزلت دمعته
أمن انضرب صوب الخيم صارت نضرته
چن يگل لمه العذب هم ما شربته

عليه حسين .. شكثر مالوم
رجع لمه .. بسهم مفطوم
_______
عطش گلبه ما حمل مو الم نبله
حسين شاله وانذبح بس ماينزله
رافعه ودمه نزل عالوجه كله
فرغ دمه ونزّله بنحره يقبله

بنحره من شاف .. سهم مسموم
رجع لمه .. بسهم مفطوم
_______
رجع بيه لخيمتّه يبچي ويشمه
حته ماتدري الرباب بحضنه ضمه
من وصل يم الخيام ولاگه امه
وين ابني ومايرد لمن تكلمه

صمت ودموع .. لخبر مفهوم
رجع لمه .. بسهم مفطوم
_______
گلها افتحي الحضن خلاه ابحضنها
وچان شارب ماي يرجع هذا ضنها
بيدها وخله الطفل واتدنه عنها
باوعتله وما مصدگه مات ابنها

النبض بعدك .. عسا ليدوم
رجع لمه .. بسهم مفطوم

الشاعر غضنفر الزيداوي

قصيده للقاسم

يزينب خلف الخيام .. ادفنيها حنته
برجعتچ طفي وياچ .. يحره شمعته
راح اولدي .. راح اولدي
______
بعد لا فايده منهن
گلب ماعندي وادفنهن .. يزينب
اخذي الحنه ادفنيها
الشمعه وياچ طفيها .. تعذب
يزينب شوفي محلاته
بس اخذنها ضرباته .. تعجب

يزينب ابني جسام .. لمهر ما يلوحه
جسمه ازغير والله .. وچبيره جروحه
راح اولدي .. راح اولدي
_______
ثيابه تبقه ويايه
اشمهن رايده اهوايه .. عليهن
عطره وتهده بي روحي
بس مايشفي بجروحي .. وبچيهن
احس ايده عله ايدي
أمن الزم ثوب لوليدي .. أمن اديهن

اشمهن لحد مانام .. وطيوفه تجيني
وافز لمن اشوفه .. بجروحه بنيني
راح اولدي .. راح اولدي
______
بعدني لهسه واتأمل
يجيني وليدي بس اطول .. واحضنه
وابوسه براسه وعيونه
واعوذه أمن اليحسدونه .. واحصنه
چا غير اقتنع ميت
اشوفه وياي كل اوكت .. اعله حسنه

أمن اغمض عيني بالنوم .. اشوفه يجيني
ويگلي اهوايه مشتاگ .. ييمه احضنيني
راح اولدي .. راح اولدي
_______
اشوفن عالرمح راسه
بحنان الطير اجه وباسه .. بجبهته
نحچي بعينه وبعيني
يگلي يمه نزليني .. فهمته
وصلي الرمح بعيوني
حته بهايه اذوني .. سمعته

ييمه من يجي الليل .. انه بهاي اطلبچ
نزلي الراس بسكوت .. اريدن اشمچ
راح اولدي .. راح اولدي
________
عساني لداري لا ارجع
وعلي بالزايد اتوجع .. أمن افگده
چنت من نومي من اگعد
اقبله و يمه اتمدد .. اعله خده
هسه القاسم اشحاله
بگبر متگطعه اوصاله .. الوحده

عسه سبيي يخلص .. واردله برجوعي
واگله عوف التراب .. ودفنه بضلوعي
راح اولدي .. راح اولدي
______
يموتي يمه واحضرني
غيابه اهوايه يوجعني .. انه امه
بگبر واحد انه وابني
اشمه مره ويشمني .. وانومه
اشيفيد اعله الگبر اگعد
ابچي والطم اعله الخد .. واكلمه

يموتي اشتاگو اثنين .. الولد ويه امه
تراه الگلب موجوع .. تگرب وارحمه
راح اولدي .. راح اولدي

الشاعر غضنفر الزيداوي

قصيده للقاسم

مو مالت ذبح .. انه ابني ترف
حنينه اصبعه .. مات وما نشف
_
الحنه ضلت بيده خضره
والشمع ما خلص عمره
وابني طاح براسه طبره .. انذبح

عرسه صار بكربلاء
من دمع فرحه لعزاء
هنانه حيرة النساء
تهني تاجر عالبلاء

منزف بالعرس .. بس جرحه نزف
حنينه اصبعه .. مات وما نشف
___كيفت كلش ابزفته
وحلمي چان انظر خلفته
حلمي مات بدم رگبته .. النضح

لاجرح وانطر يطيب
اگبالي مذبوح الحبيب
الضحك حولته نحيب
تالي حلمي يصير شيب

ياحلمي اعتذر .. ماتصبح أسف
حنينه اصبعه .. مات وما نشف
__
اثر حنته مو بصبعه
مابقت راحت بسرعه
غيابه مو مر حته اجرعه .. الصبح

يمه گلي وين اروح
وداعتك مابيه روح
بعرسك وهاي الجروح
مدري افرح مدري انوح

متت وعايشه .. گلبي شگد صلف
حنينه اصبعه .. مات وما نشف
_
لكبري اكبر بيك يبني
ولو متت انته التزتني
مو بموتك تكبرني .. وجرح

يمه بجروحك اشوف
بيك شمسويه السيوف
صحت بس بصوتي خوف
شجابني لرض الطفوف

ازغيره جثتّك .. بس جروح الف
حنينه اصبعه .. مات وما نشف
__
من طحت عمك انظره
شيل جاباك اعله صدره
مختنگ خانگته عبره .. ومسح

مسح من عينه الدموع
وصاح طفوها الشموع
القتل جاسم هالجموع
وانفرد وحده يلوع

دمع النزله .. بي شوفه ضعف
حنينه اصبعه .. مات وما نشف
_
يمك ارد ابقه والمك
ساعه احضنك ساعه اشمك
ياهو اليخليني يمك .. والح

يمه حضروها الهزيل
امن الصبح يبدي الرحل
واني انظر عندي ليل
بس للموادع قليل

من امشي بسبي .. وي راسك اصف
حنينه اصبعه .. مات وما نشف

الشاعر غضنفر الزيداوي

ياهو اليشيله للخيم .. مابيه حيل احمل علي
______
ناده ابو اليمه لخوته
متگطعه كلش چثته
دم منگطع من هامته
عينوني يا اهل الرحم .. مابيه حيل احمل علي
______
ميت وميحس بالالم
بس اني اخافن ينلچم
شيلو يخوتي للخيم
والكون بعيوني ضلم .. مابيه حيل احمل علي
______
ماريد امه تنظره
ماتحمل وهيه مره
تموت اذَ تشوفه تره
ادري متحمل هالالم .. مابيه حيل احمل علي
_____
هذا شبيه المصطفى
بسيوفهم جسمه صفه
قنعوني مو ميت غفه
مگطع مينبت بي سهم .. مابيه حيل احمل علي
_____
ياربي اسمع يالعلي
هذا اعز الناس الي
من راح چن راحو هلي
منه شدور شرد الم .. مابيه حيل احمل علي
______
ياعلي يابعد العطش
موتك نهش گلبي نهش
من شفت جسمك منفرش
من النواظر جره دم .. مابيه حيل احمل علي

الشاعر غضنفر الزيداوي

قصيده لعلي الاكبر

رجع متعوب .. وحيله مسلوب .. يمشي يعثر
يگلي يم عون .. اصبر اشلون .. راح الاكبر
______
هاي اول ذبحه اله قبل الذبح
يمشي بس مايدري ليل ولا صبح
شبيك گتله ونهر من عينه انفتح
يگلي من ظهر اولدي شلت الرمح

روحه متهيد .. يفرك اليد .. ودمعه احمر
يگلي يم عون .. اصبر اشلون .. راح الاكبر
______
يگلي خويه وليدي نساني العطش
شفت جسمه أمن الطعن كله انفرش
اشما اشيله يطيح حضني مو نعش
خويه بس براسه مضروب اهدعش

راح عطشان .. جسمه خلصان .. علي توذر
يگلي يم عون .. اصبر اشلون .. راح الاكبر
________
وداعت امي وعينها وكسرة ضلع
حسين اول مره اشوفه بهل وجع
مثل عين الماي شيب البي طلع
حسين عالاكبر وصل حالة جزع

شفته محتار .. طافي بي نار .. وناره تسعر
يگلي يم عون .. اصبر اشلون .. راح الاكبر
_________
بچه بحرگه وردت منه اعرف سبب
يگلي ابني يگله يابويه اقترب
راح اگلك واستحي من هالطلب
بويه تگدر حته لو غرفة عذب

وگطع كلمات .. خويه لن مات .. وگلبه محتر
يگلي يم عون .. اصبر اشلون .. راح الاكبر
_________
شفت ليله تقربت يمه وبچه
تگله وين ابني ودمع ما تمسچه
گلها راح وحيله وشّل من حچه
صاح عالعباس واعليه انتچه

بهاي تعبان .. اشلون الاخوان .. لَمه تُنحر
يگلي يم عون .. اصبر اشلون .. راح الاكبر
_________
يگلي خويه لجدي لمن چنت احن
اني الاتعنه يزينب للابن
يشبه الخاتم علي وأم الحسن
خويه لمن راح احس راح الوطن

چنت اكلمه .. ومن اشمه .. بجدي اذكر
يگلي يم عون .. اصبر اشلون .. راح الاكبر

الشاعر غضنفر الزيداوي

عن رسول الله ص
ان الله يرضى لرضا فاطمه ويغضب لغضبها

لسان حال السيده فاطمة الزهراء ع مخاطبه النبي محمد ص

برحيلك للحكم بويه يجي لدون
الامه بدالك الجاهل يجّدون
يگول اهله لخليهم يجدون
وانه كلشي انخلق خادم اليه

الشاعر غضنفر الزيداوي

لسان حال الامام علي ابن ابي طالب ع مخاطب النبي محمد ص

أمتك لون تنشد ونه بيها ( وين نبيها )
شگول ؟ وكلها ضدي ونه بيها (واني بيها )
يخي روحي بغيابك ونه بيها
آمن اونها ارموش اخلي تشيب بيه

الشاعر غضنفر الزيداوي