صباح الخير يا كل الخير ❤

أما بعد...
مازالت تؤنسني مقولة الرافعي..

"يجعلُ الله الهموم مُقدّماتٍ لنعمٍ مخبوءة"

مازلت أؤمن بأنها مهما ضاقت فهي في النهاية ستُفرج من حيث لا نحتسب، وبأنّ العُسر حتمًا سيتبعه يُسر، وأنّ البلاء لا يأتي دون لطف، وأنّ الصبر مهما طال سيتبعه جبر!

مازلت أؤمن بأنّ القادم سيمحي آثار السابق
وأنّ الله سيعوّضنا عما مررنا به وسيعطينا حتى نرضى }

جماعة كاين صوالح ينحفظو ما تقليش علوم مش حفاظة
هي صح نسبة كبيرة تعتمد على فهم ولكن كاين عناصر في درس يتحفظو و تستحقهم باش توظفهم على شكل كلمات مفتاحية لي راح تدي عليهم نقط بزاف .
ما تنساوش تركزو كي تجو تشوفو تصحيح على كلمات مفتاحية لي يمدو عليهم نقط و كتبوهم في كراس خاص ولا حفظوهم باش تستعملوهم مرة اخرى و تربحو نقط
و ثاني ركزو مليح في وثائق و عاودو قراو السندات بسك حل التمرين راه تلقاوهم فيهم و استنتاج يجي على حساب واش مكتوب في السند (يقلك مثلا نريد الكشف عن العنصر X باينة في استنتاج تكتبلو نستنتج أن العنصر X موجود) وحدة اولى رغم انها ساهلة الا انو تلقى بزاف ناس تغلط فيها و ذلك بسبب الإهمال و التساهل معها لذاك لازم تعطو كل وحدة حقها و بخصوص المناعة فيها أفكار ماعندهاش حدود لوكان تحل الف تمرين مرحش تلم بكل الأفكار لذلك ما تتقلقش كاين astuce حفظو بروتينات متدخلة في عملية الدفاع المناعي كاملين راح يلعبو غير عليهم كل خطرة يدلك خلل في بروتين ما و زيدو روحو عند كتفي شوفو اهم الافكار لي تجي فيها صراحه انا عاونوني بزااف
و نعاود ديرو ملخصات راح تحتاجوها سمانة تاع الباك
و زيدو اصبرو معاها مرحش تلقاو نتيجة بين ليلة ونهار ❤

الزبدة في #العلوم_الطبيعية
ملخص تجربة ثلاث طلبة تحصلو على نقطة ممتازة في العلوم الطبيعية 🧬
📌اليوتيوب:
كتفي شريف زينة رقم واحد كنت نعتمد عليها فيما يتعلق بالملخصات تاع الدروس خاصة كنت نقرا عندها و نكتب معها كل صغيرة و كبيرة و نركز على التفاصيل اللي تهدر عليهم و اعتمدت عل مجلات الهيستونات كل الوحدات مام التمارين اللي كانت هي تختارهم نحلهم قبل و من بعد كي نكمل نحضر معها الفيديو و نشوف فاش غلطت و واش نسيت و نسيي نخدم كيما دير هي و قريت شوية عند استاذ طلحي في نهاية السنة يمدلك les astuces

📌- المراجع :
الكتب :
- كتاب السلسلة الفضية
-السلسلة الزرقاء
- مجالات الاستاذة كتفي ''الهستونات'' ❤️
كيفاش قريتها ! واش السبب لي خلاني نطلع من 15 الى 19.5 🎖️

📌الطريقة

كنت نقرا الدرس على الاستاذة فاليوتوب و نكتب معاها حرف ب حرف ، كنت دايرة يعني ريجيستر تع العلوم ''كراس الخفاء ''
كنت نكتب معاها و نرسم واش رسمت والخ يعني حرف ب حرف

بعدها مباشرة بعد ما تكمل الوحدة لازم التلخيص؟
🔹كيفاش كنت نلخص !

كنت نحكم كراس لي كتبت مع كتفي فيه وريجيستر تع ملخصاتي يعني و نشوف كتاب السلسلة الفضية المعلومات و طريقة تنظيمها في هذاك الكتاب باه نعرف كيفاه نرتب معلوماتي و نجملهاااا فالملخص من بعد نكتب ملخصي و ندير مخطط الوحدة اذا تطلب الامر
بعد ما تكمل الوحدة كنت نبدا ب تمارين الاسترجاع لانو كان عندي مشكل كبير فيها خصوصا النص العلمي

🔹أكثر حاجة ننصح بيها للناس لي متعرفش المنهجية ! هي الاستاذة كتفي كي تولي تحل فالتمرين شوفو معاها كيفاه راهي تجبد فالكلمات المفتاحية
و كيفاه راهي تحلل وتفسر
بطريقة أخرى -كــيفاش راهي تخمم- 😌🔥

🔹كنت بعد ما نكمل الوحدة نروح الوحدة الاخرى 😌مي كنت مرة مرة نضرب دورة الوحدة لي سابقاهـا و نحل تمارين عليها للاستذكار

🔹مهم كيما قتلكم ثلاث سوايع في نهار طبيب ما ينحيهالكمش مكانش كيفاه راح باغي تدي mention و تقراها ساعة في نهار

"على سبيل الطمأنينة ومِن باب ادخال السرور على قلبك، أردت أن أُذكِّرك بقول الله تعالى:
"وَأَنْ لَيْسَ لِلْإِنْسَانِ إِلَّا مَا سَعَى * وَأَنَّ سَعْيَهُ سَوْفَ يُرَى * ثُمَّ يُجْزَاهُ الْجَزَاءَ الْأَوْفَى"
فمهما حدث؛ ومهما واجهت من صعوبات، جاهد واسعى لهدفك في الحياة بكل جديَّة، حتى لو كانت خطواتك بطيئة وصعبة، ولا تبالي للنتيجة، أنت مسؤول فقط عن السعي ليس النتيجة، فالنتيجة اختصّ بها رب الخير، رب الخير الذي لا يأتي إلا بالخير، وطالما أنك تسعى وتحاول الوصول؛ ستصِل وسيكرمك الله ويفتح لك كل الطُرق، حتى تلك التي لم تتوقعها يومًا."❤️‍🩹

📌 ‏#خلاصة:
-شبه طبي حضور اجباري هذا مشكل كبيير
-ميدسين تحضر غير TD/TP
-كي تغيب من معهد لازم مبرر شهادة مرضية من عند طبيب وسي تشرحلو الوضعية يفهمك واذا كان عندك المعرفة بصحتك 👌🏻
-‏سطاج شبه طبي دير قدام داركم اذا كنت تعرف chef service ولا اذا مكانش دير وين تقرا و شرح ل شاف سارفيس الوضعية هو يفهمك

‏

سلام عليكم ورحمة الله وبركاته
بعد الطلبات المتكررة قررت يوم نعاود نحكيلكم تجربتي
‏ مع #دراسة_تخصصين
‏🔹نقطة اولى #اداريا :
‏اولا في قانون ممنوع تقرا تخصصين مهما كان الا الاعوام الاخيرة دارو تخصصات #المزدوجة ولكن مكانش حرية في اختيار التخصصين هوما يسيفو عليه واش تقرا
‏هيه بصح كيفاه قدرت نقرا انا تخصصين؟
‏صرات ثغرة صغيرة و ناس فاقتلها هي انو شبه طبي تابع لوزارة الصحة (ماتقدرش تسجل في progress) و الطب و باقي التخصصات تابعة لوزارة التعليم العالي تسما تقدر تسجل في تخصص شبه طبي و تخصص اخر جامعي (طبعا لازم يكون عندك زوج تاع لي باك) بشرط ما تسجلش في #المنحة #bourse بسك يفيقو بيك (مكانش كيفاه تخلص من جيهتين)+مالازمش تاع ادارة يسمعو بيك بسك يديرولك مشاكل و يحطو عليك العين تولي في حل و ربط +هذا العام كاين لي طلبو منهم باك جديد للاسف و ماقدروش يسجلو
‏🔹نقطة ثانية #تنظيم_الوقت:
‏كيما تعرفو كامل شبه طبي حضور #اجباري و هذا عائق كبير بزااف سيرتو كاين بعض المعاهد صارمة في تطبيق القانون و تزير في غيابات ولكن هذا مش عائق كبير لانو ميدسين عندك تحضر غير TD /TP على حساب رزنامة تاع كل مؤسسة كيفاه تخدم كيما انا كان عندي سمانة ب سمانة و يومين او ثلاثة فقط في اسبوع و غير فترة صباحية.
‏ مهم نبدا نحكيلكم من اول العام
‏كي العادة سجلت في الكلية و مع دخول الجامعي كانو ديجا بعثونا سطاج في باراميدكاال
‏فوت السطاج تااعي كي العادة و اسبوع الاخير ديت الاذن باش نغيب ونروح نبدا نقرا ميدسين راكم عارفين حماس و كذا مهم حضرت اسبوع الاول تاع قرايا (غير بليزير وصايي مشيي اوبليجي) كنا مزال ما نبدو tp td من بعد دخلنا نقراو في معهد
‏شهر الاول كنا عاد مزال ما نبداو tp td في ميدسين تسما كنت نحضر صباح و عشيا باش نبعد على روحي المشاكل
‏كي بدينا تيديات في مييد هذا وين بداو مغامرات و ديبلاصمو بين ولاية ولاية كل يوم bus. رايح جااي ركابيا فشلو كنت صباح في وهران وعشيا في بلعباس حتى لي يقراو معايا نخلعو مين يشوفوني يقولولي مشي غير صباح كنت في وهران 🤣🤣🤣
‏هدرت بزاف علابالي وحنا مزال ما دخلنا في مفييد سمحولي تحمست 😅
‏مهم كان عندي تيدياات نهار الاحد و الاثنين و نهار لاربعا
‏من زهري طاحولي اساتذة شويا راخفين في غياب كل خطرة و كيفاه خطرة يكتبوني غايب و خطرة لا
‏و مليحة بزاف في معهد تاعنا ما يحاسبوش على نص نهار لازم تغيب نهار كامل باش يحاسبوك (عكس هذا العام رجعو مزيرين بزاف وصحابي راهم يعانو)
‏مهم كي يكون عندي tp اناطو بالاثنين كنت نغيب يومين على طريق من معهد بسك تعب بزاف ما نقدرش نروح ونجي زيد دراهم مكانش 💶ايا هنا كنت نجيب مشاكل روحي و وصلت وين مدير في روحو و خفت بزاف نكذبش عليكم لذلك في اخر لحظة كنت رح نبلوكي العام بسك عندي الاب قلي قرا ميدسين بصح كون تصرا مشكلة ولا قرايتك لولا ما نتفاهموش لذلك كنت مضغوط بزاف وقررت نحبس و نكمل شبه طبي بيلاما و زيد كنت روطار بزاف في قرايا كنت غير نحضر برك اما والله ماكنت فاهم حاجة و اكزاما كانو قراب عليها قلت نبلوكي خير من بعد تراجعت و كي كملنا في ديسبمبر عاد ريحت شويا بسك مدير هذاك وين زاد زيرهم و منع عليهم غيابات ودارلهم عقوبات ردعية صارمة
‏دينا عطلة تاع شتا وكان مورها عندنا اكزاما لذلك قعدت نقرا كلش من زيرو قاع لي موديل ما كنتش قاريهم سييت نتقدم ماكسيمو باش نلحق .. بعد عطلة درت سطاج في وهران وقت امتاحانات درت طلب خطي لشاف سارفيس + جدول تاع امتحانات كمبرر لغياب و الحمد الله تفهمو الوضعية و قعدت مركز مع اكزاما ❤
‏بعد اكزاما نفس الشي شاف سارفيس كانت متفهمة الوضعية وخلاتني نغيب شحال من مرة في سمانة و سطاج تالي درتو في ولايتي و ماكنتش نروح
‏بخصوص ميموار من بعد نهدرلكم عليها 🙌🏻

" ‏‌ الدعاء⁩ إذا كان وقت إجابة كآخر ساعة من ‌ يوم الجمعة⁩ ، ثم صادف خشوعا واستقبال القبلة على طهارة ، ورفع الداعي يديه ، وبدأبحمدالله والثناء ، وصلى على رسوله ، وقدم بين يديه الاستغفار ، وألح على الله في المسألة، وتوسل إليه بأسمائه وصفاته ، وقدم بين يديه صدقة
‏فإن هذا الدعاء لا يكاد يرد أبدا "

الإمام ابن القيم

ساعة إستجابة ❤️ : ادعوا وبالغوا في الدعاء ، ادعوا وأنتم موقنون بالإجابة ! 🥺

ميساج لناس لي مزال ما تبداااااا 😶🔥

رسالة لجماعة الباك بعيدا عن الإضراب 😶
مر شهرٌ بالفعل منذ أن دخلتم آخر سنة دراسية لكم في مشوار دام لما يزيد عن 12 سنة ، ذقتم فيهم الكثير ، حلوًا كان أم مرّّا ، إنّها النهاية ، لرحلة حملت في طياتها الكثير والكثير ، وسيكون بإذن الله الختام لائقًا بها ،
بغيت نقلكم بلي ما نقبلش واحد مزال ما بداش !! مام اللي يقولولي ما عرفناش كيفاش نبداو، ممكن في البداية تجيكم صعيبة و ثقيلة و ما تعرفوش من وين تبدااو ! لكن لازممم تبداو عاجلاً و ليس آجلاً لأنو راح يبداو يتراكمو عليكم الدروس ! و راح توليو في تأخر كبيييررر ❌

اللي مزال تالفتلو يروح يبدا بالدروس تاع المواد الأساسية، مام اللي ضعاف فيهم ابداو في الدروس تاع الباك ! درس بدرس، و كل درس يكفيكم الوقت ليه ✅ ما تتقلقوش !
مهما كان مستواك ، اعتبر هذه السنة بداية جديدة مُنعشة ، الجميع هُنا سواسية (حتى بالنسبة للأحرار ماشي نظاميين فقط)، لا فضل لفرد على آخر ، لأنّ العبرة بالخواتيم …🏅
‏كذلك مهما كنت متقدم ولا متأخر ، ما تقارنش نفسك بغيركِ ، إيّاك إيّاك ! ، فلكلٍّ رحلته ، و أهم نصيحة ،هي التوكل على الله تعالى وإحسان الظنّ به
ثانيًا : اجتهدوا و اسعوا واحتسبوا الأجر ، لا تدخروا جهدًا مهما صغر في سبيل بلوغ ذلك الحلم ❤ على الأقل اذا ما لحقتش تقول "االلهم إني حاولت" مشي تندم و تقول "يا ليتني حاولت" لذلك فضلًا لا تضيعوا تعب سنوااااااااااات ، بتهاون بضعة شهور ، وصدقوني لربما أصعب شعور قد يمرّ به الإنسان هو شعور الندم لذلك اقرا باش ماتندمش ، اقرا باش توصل لهدفك ، اقرا باش تخلي كامل الناس لي يحبولك الخير فخورين بيك ، والأهم لازم أنت ! أنعم أنتَ ! تكون فخور وراضي بالشيء لي قدمته … وتذكر قوله تعالى ﴿وَأَن لَيسَ لِلإِنسانِ إِلّا ما سَعى۝وَأَنَّ سَعيَهُ سَوفَ يُرى﴾ دير مليح في بالك بلي ربي سبحانه رااه يشوف في تعبك ، وحاشاه أن يردك خائبًا ،
اجتهدوا في الدعاء كما تجتهدون في الدراسة وأكثر ، بالغ في الدعاء فأنت تسأل من هو على كلّ شيء قدير -
ولا تنسوا مشاركة هذا الفيديو مع أحبائكم ❤و دمت في حفظ الله
‏#team_interleukin