**(الليالي الفاطمية المقدسة )

{قصيدة ,, صدمتني}

مولاي أمير المؤمنين
ومولاتي الزهراء صلوات ربي عليهم

عالمغتسل صدمتني حيل اجروحهه اهواي
خافن ضلعها ينلچـــم مــن گـطـرة الماي
راسي شيب من وضعها
من شفت كسر بضلعها

فاطمــة ٠٠٠ فاطمــة
————————
فاطمـــتي بدموعي اغسلت جثتهه
والدمعة من وگعت احس لجمتهه
عـــن الضلــع چفيــني اعبــــرتهه
متكســـــرة فاطــم ترى ابطيحتهه

الباب مــــن اجــــذوع والحـــايط احجــار
وبنصـــها فاطــم بالضلــع صـــايبها بسمار
ترجية طاحت من صفعها
من شفت كسر بضلعــها

فاطمــة ٠٠٠ فاطمــة
————————
ازرگ ضهرها من السياط البيهه
حرگو الباب ونار تچــوي أديهه
الباب جمــرة ينطفي ابرجليهه
وگعت الباب ثگيلـة كلها عليهه
————————
انار من شبت تصيــر اجفوفها احجاب
وحترگ چفهه فاطمة من حرگو الباب
الباب اثگيـــلة ودفـعها
من شفت كسر بضلعها

فاطمــة ٠٠٠ فاطمــة
—————-
چن الهوا انسـد من اچفن بيهه
ودمعي فـــــوگاها يهل  اعليهه
نار ابدليلي اعليهه وشــ يطفيهه
فاطمـتي راح اتروح وين الگيهه

گوة وّگفت انه اعلة طـــولي وگوة امشي
كل جسمي يرجف فاطمة وشيبتي رمشي
عالمغتسل ينزل دمعها
من شفت كسر بضلعها

فاطمــة ٠٠٠ فاطمــة
————————
فوكَ المتن تصـعب عـــلي شيلتهه
وكل حيل ماضــل فاطمــة موتتهه
عينوني خل نحمـــل سوة جنازتهه
وللمگبــــرة نمـشي سوة الدفنتهه

ادموعي طاحن عالگبر وجذبت حسرة
الروح تطلــع مني لو اذكـــــر العشرة
حنينة فاطم من طبعها
من شفت كسر بضلعها

فاطمــة ٠٠٠ فاطمــة
————————
‏من المگبرة المن رحعت امشي اني
وبالدرب شفت انه الـحسين امتاني
من شـافني يــركض اجـــــه تلگاني
مـــن گلي ويـــن آمي شكثر بچاني

روحي ادفنتهه وبس جسد رديت للبيت
الحيل بايـــد رت اطـيح حسين كضيت
اتموت فاطم من وجعها
من شفت كسـر بضلعها

فاطمــة ٠٠٠ فاطمــة
————————#اللهم_عجَّل_الوليِك_الفرج

. السيد عبدالرحمن الموسوي**

*?*? صباح الورد ??
الصباح معكم يحمل أنوارا متألقة
صباح ملون بألوان الزهور الجميلة
صباح السعادة المحبة الصادقة
صباح جميل كجمال نفوسكم الطيبة
صباح الورد و الياسمين ❤**

(موشح)

أيـعـينـك الله يا علي فـحـل الـفـحـول
يـوم عــينـك شـاهـدَت ضـلـع الـبـتـول

------------------------------*

أشـكبر صبـرك سـيـدي يا بو الحسن
أخـذ مـنـك فـاطـمـة بـسـاع الــزمـن
فـتـح باب اعـليـك حزنـك والـمـحـن

وصار دمع العين بخدودك هَطول

------------------------------*

ادري هــد حـيلـك يـكــرار الــضـلــع
وخـتـلـط مـاي الـغـسـل وي الـدمـع
راحت الچـانـت ضوه البيتـك تـشـع

ولتهب گلبك على بنت الرسول

------------------------------*

اثمنطعش عـام الـعـمــر مـثـل الـورد
خـلـوا بخدهه عـلامـه اهـل الـحـقـد
اشـلـون لـو خـليّـتهـه بـوسـط اللحد

وتدري بحزانك بعد ما ضن تزول

------------------------------*

يا علي بـحزنـك تـره ايطول العمر
مـن بـدايـات الـضلـع حـد الـطـبـر
ألبس بفـگـد الـطـهـر ثـوب الصبـر

اسنين عمرك بالجرح والهم تطول

------------------------------*

الـفـاطـمـة گـلبـك حـمـل نـار وألـم
وصـار بـسمـار الضلع مـثـل السهم
أصـبـر ورب الـعُلـى هـوه الـحـكـم

بغير صبرك سيدي ماكو حلول

------------------------------*

انـت حـامـي ادخيلهه وليث الحرب
الصـار شـفتـه والـجـره كلش صعب
بـاقـي بـالـزهـره أثــر مــن الـضـرب

وما رضت ام الحسن يمك تگول

------------------------------*

الـلـه يلـعـنـهـم تــره الـگـالـوا وأن
الـخلـوا بـروحـك يـكـرار الـحـزن
بعينك الدنيه صفت تـشبه سجن

والسبب كلمن اجه الدارك جهول

------------------------------*

✍خادم الـزهـراء ع
الشاعر رعد الجريخي

كل يوم الأعيشنّه ...
محرم ينحسب چنّه
ابد مانشفن ادموعي...
جمر يسعر چوه ضلوعي
٠٠٠٠ ٠٠ ٠٠٠٠
تمر بيّه السنه مولاي 
ومصابك ساكن عيوني
ابچي عليك والوادم
المسودن يسمّوني
لو شافو جرح بالطف
چا ركضو يعذروني
ما سمعو رقيه تصيح
يعمّه احميلي امتوني

جفني من اغمضنّه...
الطف كله اشوفنّه
وكل صوره خذت روحي..
. وافزّن تنزف جروحي
كل يوم الأعيشنّه
٠٠٠٠ ٠٠ ٠٠٠٠
عشگ الدنيه فتره يروح
يل عشگك فلا ينمل
شحلاتي بمجلسك مولاي
كون اصيرن مبهذل
وادگ صدري واصيحن اخ
مثل الوگفت عله التل
واذبل بالمصيبه عليك 
مثل رقيه من تذبل

واصفر ينگلب لوني...
وهلي وربعي يظيعوني
واشوفن لوعت ايتامك...
واشوفن نار بخيامك
كل يوم الأعيشنّه
٠٠٠٠ ٠٠ ٠٠٠٠
نار بگلبي ما تطفه
من الطف ورّثت لوعه
بخيل اشگد  بخيل ايصير
عليك اليحبس دموعه
فشله الزلمه يبچي انگول
وعليك الدمعه مشروعه
يامثلك بشر مذبوح
وحافر كاسر اضلوعه

وفرّت بالفله  اعياله...
وسيوف اتگطع اوصاله
ومن اشرب لذيذ الماي...
توگف صورتك وياي
كل يوم الأعيشنّه
٠٠٠٠ ٠٠ ٠٠٠٠
طحت لاچن عليك الناس
جيمه اتحشم بجيمه
يظامي ومنذبح عطشان
بوكت بيه شحّت الغيمه
عيّشني بجرح يحسين
واچويني بجمر خيمه
وخل گلبي يفر عليك
فرّت طفله بالهيمه

يل عايش جرح بيه...
جرت انفاسي  لطميه
لو ما انته شنهي انه...
اليحبك يرتفع شانه
كل يوم الأعيشنّه
٠٠٠٠ ٠٠ ٠٠٠٠
اعشگنك عشگ للموت
وغيرك ماردت محبوب
الف وتسع ميه تشيل
حتى تطيح مني اذنوب
ينايم منسلب عريان
واكشخ انه لابس ثوب
خليني اخدمك يحسين
العاش بخدمتك مهيوب

من الطم بالحسينيه
هذا اكبر شرف اليه
ويصبح بختي اشكبره..
وتسمع صرختي الزهره
كل يوم الأعيشنّه
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي

مولد الرسول ص

يا شمس والدنيه بيك اتلالي

الدنيه گبلك ظلمه چانت يالنبي
إندعت جمّلني ربي ابهل صبي
بنور وجهك گلها يالله اتحجبي
انه سويتچ لجل هل غالي

يا شمس والدنيه بيك اتلالي

انته لو لاك الضوه ما بي ضوه
گبل يومك چان مخنوگ الهوه
يالله بسمِ الله گلتلهن سوه
بيچن اشرگ عالارض يحلالي

يا شمس والدنيه بيك اتلالي

انته فوگ الگاع اجمل من نزل
بالصفات وبالكرامه وبالعمل
چان گبلك يالنبي مر العسل
تصفه گتله من تصف ابجالي

يا شمس والدنيه بيك اتلالي

انته عن كل الخلائق تنفرد
بورده نتعنه ونگصده الينولد
لاچن انته اليوم زينت الورد
كل عطر عايد الك بالتالي

يا شمس والدنيه بيك اتلالي

الليله كون الله ابجمالك ينفرش
يالنبي مهدك صبح ساگ العرش
والسماء انجوم الك ظلت تطش
عالي يابو الزهره شانك عالي

يا شمس والدنيه بيك اتلالي

لاربعينك امي لا ما اقتنع
ابمهده عيسى يسولف ابين الجمع
بصدرك الله طابع آيته طبع
الله گلك بيك ابث اقوالي

يا شمس والدنيه بيك اتلالي

الشاعر اياد الديراوي

طَلَعَ البَدْرُ عَلَيْنَا واِتَّضَحَ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي
                ــــــ༺༻ــــــ

ابتهجنه بهل ولاده وموعد الفرحه ابتده
نرفـــــــع آيات التــهاني اله ابليلة مولده
ابهيبته وآية جماله منفرد بس وحــــــده
على اخـــدود الورد نوره نازل بهيئة نده
طه للخيراتِ بابٌ وانْفَتحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي

ــــــ༺༻ــــــ

اول اصـــحاب الكســاء وســــــيد الكل البشر
صار ساق العرش مهده وخيره عالدنيه انتشر
ضايع وما عنـــــــده ذوق الما فرح بيه وبتشر
انبعـث للائـــمه رحمه اوطـــن والعافه خسـر

فيهِ مَنْ يَزدادُ حباً قَد رَبحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي

ــــــ༺༻ــــــ

عالي شــــــانه والله زاده بالكــرامه ودللــه
وختلف لعيونه كلشي الكون اصبح بس اله
الشافه صــــــاح الله أكبــر ياخلق مااجمله
والســـماء طشت نجمها واهليــــه ابمحفله

وَجْهَهُ بالعرشِ نورٌ قدْ قَدَحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي
               ــــــ༺༻ــــــ

اسمه بلسم للجراح وشوفته اتروي الضمه
ابمولده الاصــــــنام كلها اصبحت متهدمه
اتشـارك اويانه ابفرحنه نازله املاك السمه
محفله راحــة تعبــنه وبيه نجــــي ونكلمه

صدر من والا ابوالزهره انشرحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي
                  ــــــ༺༻ــــــ

كلشي بيها الدنيا فاني وحُبّه دايم للابد
حيل غـزر بينه عشگه وثابت لوِلد  لوَلَد
هوّه ابونه ودلانه وســـــور للائمه وسند
بالشداد انصيح بسْمه مــدد يا طه مــدد

طه غوثٌ باسمِهِ الصوتُ صَدَحْ
وَجَبَ الشُّكْرُ عَلَيْنَا والْفَرَحْ
فرحه فرحه للنبي
سهره سهره للنبي

                 ــــــ༺༻ــــــ

✍الخادم
كامل السعيدي

#نعي **مولاتي فاطمة صلوات الله عليها

من غاب شخصک یا ولينه
علگت روايه الشر علينه
لفانه الصهاکي اوشیاطینه
اویاهم حطبهم شایلینه
نشدته اشعندك جاي لينه
اوكل يوم گلبي املوعينه
وحدنه ابعزانه دخلينه
بس ما لمحني اوزرگ عینه
عصرني اومني استافه دینه
وآمر على اشيوخ المدينه
تگود الفحل ليث العرينه
گادوا اوراسه امچشفینه
اوببنود سیفه امچتفينه
ينخه اولا واحد يعينه
وراه اطلعت ولها او حزينه
لاوین اصيحن ماخذينه
من شافني المشرچ ابدينه
رد لي اوسطر عيني ابيمينه

السيد المرحوم
عبدالحسين الشرع**#اللهم_عجل_لوليك_الفرج

قصيدة بحق الامام الحسن العسكري عليه السلام

يمة يا مضلوم صاحت فاطمة
عليك سامرة حزينة ومضلمة
===================
انصاب گلبي من سمعت مصيبتك
والطم اعله الراس فوكَ جنازتك
ريت مشلولة ادين السمتك
نار بالدلال ضلت مضرمة
===================
نور سامرة انطفة واصبح ظلام
يمة ما رحموك اولاد الحرام
يالحسن يمة صعب هذا الكلام
اتلوج بالسم والطغات امنعمة
===================
بالحزن متروس گلبي يالحسن
شوفني بيا حال انعاك بشجن
ضلوعي چن اليوم هذا اتكسرن
مو دمع لحلك تصب عيني دمة
===================
انصب الماتم واون ليل ونهار
واحزن وانعاك وبدلالي نار
يامصيبة ايشيب من عدها الزغار
حالك ايبچي الارض وي السمة
====================
راحوا الاولاد لو سم لو چتل
المُعين اللَّه گلبي شيحتمل
بيك يتشفى النذل ابن النذل
ايريد يطفي النور والله ايتممة
===================
يمة يالمهدي الابو يحني الضهر
سهمة بالدلال صاباك وعبر
عظم الله اجرك ييمة المنتضر
جيت اواسي ابهالمصيبة المؤلمة
====================
أسألكم الدعاء رائد الاسدي

يوسفنه  مارد وين
نسأل ادموع العين
......... ..........غايبنه ما جانه
طور   النعي  يقره
عالعسكري بحسره
..................والدمعه عنوانه

جروح   الدنيا   تاخذ  مصدر  الايه
علامه اشبعد نحسب صارن اهوايه
نحلفك   بالكفيل   وصاحب  الرايه
تجينه  ابرايتك   ثق احنه   شرايه

نحسبهه جيته امنين
كون ابضريح حسين
......................نتلاكه بحزانه
كل  مأتم  ايحضره
عالعسكري  بحسره
...................والدمعه عنوانه

حزنه  وياك  عايش  لوعة امصابك
على المسموم ننعه ابحسرة اعتابك
تون  سامره  هايه  ابلوعة  اغيابك
يبو  صالح   دخيلك  طمن  احبابك

والكلب حار  اشلون
من  زمرة   الملعون
....................يا لوعة اشجانه
نار    اشبعد   تبره
عالعسكري بحسره
..................والدمعه عنوانه

عجيبه الليل   ياخذ   دمعة  اعيونك
اعله جدك والمصايب سيدي اشلونك
اشوف  الزهره  بيك ومنخطف لونك
تون  عمرك   گضيته  ذبلت  اجفونك

جرحك يظل حساس
اتخونك بني العباس
................والحسره بوطانه
والحزن   بيك  اسره
عالعسكري  بحسره
.................والدمعه عنوانه

حكيمه  ابدمعتك  ترسم  حزن بيها
اظنهه  الزهره  يمهه  اتشد نواعيها
اجت  يم  نرجس  اتنوح البواچيها
اتشوف المهدي حسره بعينه تاليها

دمعك صبح ملچوم
يا ويلي  عالمسموم
................مجروحه صحبانه
ذاب  الگلب  صبره
عالعسكري بحسره
.............. ...والدمعه عنوانه

مراسيم المصايب تحسب اصروحك
حكيمه  وياك  تسمع  بالبچي نوحك
متت چم مره وادري بعالم اجروحك
مصاب حسين  ماخذ حيلك وروحك

چم خيمه محروگه
وانفاسه   مخنوكه
...................والمهجه تعبانه
لا طر  صبح  فجره
عالعسكري  بحسره
....................والدمعه عنوانه

كل  هذا  الجره   يمكن    سهل  امره
عجيبه  اشلون گلي المنسحك صدره
انهشم  حتى  الگلب من حافر المهره
طلع حتى  السهم ياويلي من  ظهره

ياويلي طاح احسين
سهم   الچبد   ثلثين ....
...................ظل يابس السانه
والكلب  ظل جمره
عالعسكري  بحسره
.................... والدمعه عنوانه

تمت بعون الله
#خادمكم......... يوسف الفتلاوي

(استشهاد الامام الرضا)

بالسم صــــــــوبو چبده
زماني وي الرضا شعنده
بالغــــــربه اندفن وحده
مثل جده ٠٠ مثل جده
ــــــــــــــــــــــــــــــــــــــ
آنه ام اهدعش معصوم ٠٠ واحضر كل مصارعهم
مابــــيـن القتل والسـم ٠٠ دهــــر الغــــدر وزعهم
رغم ضلعي والم كسري ٠٠ اجـــي ليهم واشيعهم
وهاي الليله بخريســان ٠٠ هدني مصـاب سابعهم

ظهري اعله الرضا محني
الغريب مصابه جـارحني
وسيف الغــــربه ذابحني
مثل جده ٠٠ مثل جده
ــــــــــــــــــــــــــــــــــــــ
مصاب الضامن الليله ٠٠ ببو محمد يذكــرني
الحسن لمن نفض چبده ٠٠ هضمني وحاله حيرني
ومن شفت الرضا امدد ٠٠ لهيب مصابه وجّرني
انظره بآخــــر انفاسه ٠٠ وهو بهالحال ينظرني

الوكت مـا يرحم اسياده
وسن ظلمه علــه الساده
الرمل ماصار اله اوساده
مثل جده ٠٠ مثل جده
ــــــــــــــــــــــــــــــــــــــ
المصايب مهما تتعــاظم ٠٠ لمصاب الحسين تهون 
الرضا بطوس اندفن وآنه ٠٠ اصارخ وي اليدفنون
وماسحگت عليه الخيل ٠٠ ولاعنده صدر مطحون
الله يلعــــــــن الطاغين ٠٠ الشمر ويزيد والمأمون

خلـــــــو بالگلب هضمه
وجفوها اشبيهم النعمه
الرضا مــــاوذرو جسمه
مثل جده ٠٠ مثل جده
ــــــــــــــــــــــــــــــــــــــ
حزني اتجـــــدد الليله ٠٠ عله السجــاد والباقر
عاشو ولدي المصابين ٠٠ وشافو محنة العاشر 
وشافو زينب الحـــره ٠٠  سبيه وتكسر الخاطر
وتالي گوضـــو بالسم ٠٠ وكلمن چـــبده متناثر

وللصادق اجــــــــــر ونه
وحضرت الكاظم بسجنه
وهالليله الرضا بحـــــزنه
مثل جده ٠٠ مثل جده
ــــــــــــــــــــــــــــــــــــــ
اواسي الليله معصومه ٠٠ الغريبه العاشت بغربه 
وظلت بالگلب حسره ٠٠ ودمعها للرضا تصبه
من گصدت لخوها شلون ٠٠ ماتت بالدرب صعبه
چانت تدعي ليل انهار ٠٠ الله ايحقق  الطلبه

توصل للرضــا تشوفه
وتحبه بعينه وچفوفه
وتالي بغـــربته تعوفه
مثل جده ٠٠ مثل جده
ــــــــــــــــــــــــــــــــــــــ
الجواد بدمعة عيونه ٠٠ نزّل والده بلحده
يصد اعله الجسم سالم ٠٠ واصابع عشره لبيدّه
ماظل عالترب عاري ٠٠ سليب وراس ماعنده
ولا بجدل گطع صبعه ٠٠ ولا سهم الگطع چبده

الجواد بحسرته اينادي
الچتل ریحــانة الهادي
الرضا مابات بالوادي
مثل جده ٠٠ مثل جده
ــــــــــــــــــــــــــــــــــــــ

حيدر بشار الدراجي