امشي بالشارع ودور اقرايه
گلبي ويه حسين مو ويايه
----------
گلبي شابع بس هضم
وينجبر بس باللطم
والدمع يهمل تمسحه الرايه
--------
امشي،ب الشارع ودور والتفت
وين ريحه مجلسك وينه صحت
ياحسين مراد من عدك ردت
ياشفيع ذنوبي گومني طحت
دربي خلصته نحيب
التفتلي يالحبيب
ارد اندبك كون بس بهايه
--------
ارد اندبك ياشفيع المذنبين
گلبي موجوع وعرف بس الونين
نظره يامولاي عن ذيج السنين
بداعة الزهره وعليك ام البنين
سجل اسمي وي الخدم
وعطر اسمك خل اشم
الثبات نريد يا مولاية
-----------
الثبات نريد بالخدمة صدگ
ومن يذكرك گلبي كونه يحترك
ومن نگول حسين نشهكها شهگ
وعهدنوصل حضرتك مانفترگ
كل سنه ياسيدي
بسمك احنه نهتدي
وباربعينك نخدم ومشايه
----------
باربعينك نوصل وكلنا عزم
الشوگ ماخذنا عليك ونستهم
نوصل الشباجك نبوسه ونشم
ونمسح الدمعات تحضنا وتلم
سيدي كلبك جبير
حاشا يمك مانحير
جينه يالمحبوب الك عنايه
---------
تمت بعون الله
7 محرم
السبت 6/8/2022

قصيده لاستشهاد اميرالمؤمنين ع
----------------
ياعلي راسك بهاليله انشطر
ولسماء تنادي مذبوح الفجر
ماكشف مصباح الله ولابدر
ظلمه والدنيا افگدت واليها
--------------------
ياعلي الاملاك تنحب كلها ليك
والافلاك السبعه تبچي بس عليك
كلها چانت طايعه ومابين اديك
هسه تنحب كلها ومبچيها
--------
ياعلي عرش الله ينزف بالدمه
واعلياه صوت ناده من السمه
طاح حيدر والاركان امهدمه
نهدمت اركان الهدى البانيها
----------
ياعلي الدنيه عليك امكدره
اليوم ترحل ياصهر خير الوره
والملائك كلها نادت حيدره
بطيحتك بس تنحب امخليها
-----
ياعلي جرحك بعد مايندمل
هامتك منشطره ياخير العمل
والدموم تسيل من عدهاوتهل
وضربتك حاير طبيبك بيها
------
ياعلي من دونك الدنيا دمع
الليله كل شيعي ينوح ومنفجع
شايل الكرار من عدنه ضلع
والضلوع الباقيه مكسريها
---------
ياعلي كل ضلع بينه منكسر
بيوم طبرو هامتك وكت الفجر
كون ماشفنه الصبح ردنه ويطر
وهامتك منشوفها مطبريها
---------
امل فلوحي الموسوي
20 رمضان
26/5/2019

جرحك ياعلي مو جرح خله جروح
ودم من السمه تنزف عليك تنوح
نثلم دين الله ونصاب
وگع والينا ابو اتراب
ودم من السمه تنزف عليك جروح
واماماه. ..واماماه
--------
الليله ابلايه حس زينب تون سكته
ومثل طير الحمام تحوم وي ونته
تمسح بالجرح وتبلل ابشفته
صعبه اعله الابو يعوفها البنته
شلون اگضيها الايام
ونته بگبرك تنام
دم من السمه تنزف عليك تنوح
------
يبويه اگعد دخليك وافتح عيونك
اباب الدار بويه ايتام يردونك
تهل ادموعهم بويه ينادونك
وبدموع الحزن رادو يضمدونك
گوم وفرح الدار
يحامي الدين ولجار
دم من السمه تنزف عليك تنوح
--------
يابهجة حياتي وعمري وسنيني
شلون تروح بويه يكثر ونيني
ماصدگ يبويه علي تخليني
بعدك ياعلي الدنيا توليني
الليالي تكضي صعبات
تخلص بويه صدمات
دم من السمه تنزف عليك تنوح
-------
ايدك حطها بيدي وخل اسندنك
يابعد العمر خليني اضمدنك
واعصبك بويه بيدي خل اشمنك
اخافن بعد ماشوفك وفگدنك
منك تنزف ادموم
گلبي اعليك مهموم
دم من السمه تنزف عليك جروح
------
شسوي لورحت من عدي ياغالي
بعدك منهو اليه بويه يبرالي
اضل امحيره ويصعب علي حالي
يتيمه بلا اهل ومنغير هم والي
ي بويه وبعد العيون
دگلي افراگك اشلون
دم من السمه تنزف عليك جروح
-------
امل فلوحي الموسوي

لاتديرون الوجه ونتم نجاة
ياسفينه شراعكم حاشه ايهدنه
حسين ياثمره دنيتي بالحياة
انتو سادتنه واملنه وكل اهلنه
ننطرد من بابكم وسفه نگول
منهو يشفع غيركم ويباوع النه
ليش يامولاي مانحمل زعل
ورحمة الله انسدت البيبان منه
وليش بابك ليش مسدود وحزين
ندري من ذنوبنه اوجهك يصدنه
تحله بس الكم دموع النايبات
والطم ميجوز بس لحسين جنه
بغفله ماندري وزلك جدم النعيم
وهسه حسينه بذنبنه من بعدنه
لوعه الفرگه تحز تحت الضلوع
وصفعه التأديب حيل تاذي خدنه
نعتذر تقصيرنه زاد الحدود
ردنه لحضانك يبو الشدات ردنه
ابابكم سائل واتوب انه اجيت
ونتو باب المغفره واهل المحنه
&&&&&&&
امل فلوحي الموسوي

لسان حال السيده معصومه ع بنت الامام موسى ابن جعفرعليه السلام
-------------------------------------------
دوريتك.. يابه يابه.. والدمع بالخد تحفر
دوريتك يابه يابه ..بويه يا موسى،ابن جعفر

اني معصومه يبويه والگلب مني تمرد
مانسيتك تدري يابه وغيبه الوالد متنسد
ليله ليله ناشدتها والگلب حسره يتنهد
صحت وينك يل عفتتي عمري بغيابك تطشر
دوريتك يابه يابه.. بويه يا موسى ابن جعفر

العمر ورده وتطشر وانه بديار الغريبه
انتظر جيتك وعاني والدمع مامل نحيبه
كلمه البويه عظيمه ليش منعدي سليبه
سنين صار سنين اتاني ضايع وتاه الخبر
دوريتك يابه يابه ..بويه ياموسى ابن جعفر

سنين اونن يابه تدري والوضع نفسه الوضع
وانه اگولن هسه يرجع يمسح ينشف الدمع
وينك اسأل جبت عمري وينه ابوي ومارجع
ابچي والدمعات تهمل والعمر يحترگ اخظر
دوريتك يابه يابه ..بويه ياموسى ابن جعفر

بويه اسمع بالحديد يابه ليش مگيدينك
شلون تحظني يبويه ونت مربوطه ادينك
ليش ياروحي واملها بالسجون معذبينك
بويه اخبارك تأذي والگلب يشبع قهر
دوريتك يابه يابه ..بويه يا موسى ابن جعفر

ارد اجيلك لو تجيني بويه عذبني الحنين
الهج باسمك يغالي وصار يحلالي الونين
بويه كل يوم اليمرني بويه احسنه سنين
ولله مليت انتظارك عيوني ذبلها السهر
دوريتك يابه يابه ..بويه ياموسى ابن جعفر

اسأل ودمعي يلالي ليش منعدي بعيد
وشنهو ذنبك والجنيته وتنچتف بويه بحديد
بالسلاسل خلص عمرك بالسجون المو رشيد
فرك الطاغي بسجونه راد يمحيلك اثر
دوريتك يابه يابه ..بويه ياموسى ابن جعفر

ولله مايمحي اثرنه وهيه كالتها العقيله
بالسلاسل چتفوها بويه عمتنه الجليله
ورثواالطغيان يابه وكل سلاسلهم ثگيله
هذا هارون الرشيد وذاك يابويه الشمر
دوريتك يابه يابه ..بويه ياموسى ابن جعفر

الشاعره امل فلوحي الموسوي

قصيده بذكرى إستشهاد الإمام الكاظم ع
( لحـن / يخـيمات )
===========
يمظلوم..
شلون العمر خلصته ..يمظلوم
نهارك ابد ماشفته.. يمظلوم
ظلام بدنيتك عشته.. يمظلوم
---------------------------
عمرك خلص ونت بسجن.. يل ماشفت احبابك
وين الاهل ليش بغرب ..محد نعه وبچالك
ياسيدي دمعك يصب.. حزنك تعب من حالك
وضعك صعب جلد وعظم.. جن باقي بس خيالك
يسجان
السلاسل گطعت ايده. يسجان
غريب وديرته ابعيده. يسجان
عظيمه امصيبتك ولله ..يمظلوم
-----------------------
سجن السجن ياسيدي.. هذ العمر خلصته
ماهمتك گيد العده ..نشر العلم ماعفته
ونت بسجون المارحم.. تنطي الدرس علمته
ظلمه السجن نورك يشع.. ياسيدي عكسته
عله الدار
خطينه القطع سوده.. عله الدار
وكتبنه بروح ممروده.. عله الدار
ماننساك يالكاظم يمظلوم
----------------------
دمع وحزن حبل وسجن.. .ليل وخلص احزانه
بسمه يجود وحده الامام.. مافارگ الزنزانه
خلص نحيبه بلا اهل..تبجي وتون سمانه
يمسموم
اجينه اعله الجدم صحنه.. يمسموم
دموع الحزن تجرحنه. .يمسموم
يضل طول العمر حزنك ..يمظلوم
---------------------
نعازي البتول وحيدر علي .. ومنقصر بعزائك
اشما يمر وكت وزمن. ..نحظر نون لمصابك
انت الرجاء يابو الجواد.. تعطف علينه ابابك
والاحزان
خلصنه العمر عشنه. والاحزان
وغير الهظم ماشفنه..والاحزان
نهل ادموعنه وجينه يمظلوم
---------------------------
ماكو مثل موتك غريب ..ابلا اهل متحسر
ياما دعيت ونت بسجن ..الموتتك متحظر
روحك تون من العذاب.. وبدنيتك متحير
للاجيال
عبره ودرس يالكاظم. للاجيال
نمشي والمشي ماهم .للاجيال
تاريخ الشرف تبقه يمظلوم
-----------------
ابن الزچيه اعله الجسر..اليوم نتهت حياته
من السجن لوعه وعذاب..قصه وحچت مماته
مفارگ اهل وبلا ود اع..خلصت حزن ساعاته
بلااوداع
راح وعاف معصومه ..بلااوداع
يتيمه وتون مهمومه ..بلااوداع
عمرها بدونك شيسوه ..يمظلوم
---------------------------
الشاعره امل فلوحي الموسوي

زنجيل.. لاستشهاد الامام موسى ابن جعفر عليه السلام
----------
ايا مصيبه الكاظم جمره ونار تچوينه
چن عاشور وهلاله تكثر بيه بواچينه

نار وتسعر بروحي لو اذكر سجن هارون
ماوفي بدمع لا نوح روحي ترخص وممنون
للناشر علم جده من سجن السجن مرهون
مگيد والدموم تسيل ينصر امته ودينه

بزنزانه العمر خلص وبيده السلسله تبره
ايامصيبه الكاظم ماتنحجي ولا تطره
والسجان هل دمعه ضل متعجب بصبره
وشمس الله يهزها الشوگ تريدتشوف والينه

عاش بليل ايامه وماشايف ابد صبحه
من ثگل الحديد يلوع بيده يضمد ابجرحه
تغيب الروح لو ذابت ترد تعيش من تصحه
وحنه اليوم مشايه بمصابك تعنينه

جيت مسلسله روحي گلبي بالوفه مگيد
اريد اوصل الك مولاي وجدامي الك تشهد
ماناسيك يالكاظم بروحي سجنك تجسد
اجينه وبدموع الشوگ للحظره تودينه

اجينه وماحسبنه حساب للناصب واليكرهون
اويلاه صحنه يامسموم يالعمرك خلص بسجون
موبس نلطم اعله الراس نعميها بعد العيون
ريت نكون خدامك وتسجل اسامينه

ونت بالكرم معروف وانه سائل ابابك
اريد،انخاك يامولاي ونت التكرم احبابك
اجيتك والگلب لهفان روحي تعنت اعتابك
بجاه ظليمتك مولاي گلبي برد اونينه
*
الشاعره امل فلوحي الموسوي

غمضي عينج.. وداعت الله يالحزينه
غمضي عينچ.. گلبج يسكن انينه
غمضي،… عينچ

غمضي يازينب وخل العين تغفه
عمرج يگطر عذاب وماله وسفه
هايهيه والجرح ماضنه يشفه
وينج اوين الهضم مو انت ترفه
غمضي عينچ… الگمر لاتنطرينه
غمضي عينچ..وداعت الله يالحزينه
گلبج يسكن أنينه

غمضيهه العين ونتي بالمنيه
بعد لاخيمه توج ولا سبيه
هايهيه كل عذابج هايهيه
ماتلوذ اطفال سدچ يالوفيه
غمضي عينچ..والعتب لاتعتبينه
غمضي عينچ .وداعت الله يالحزينه
گلبچ يسكن أنينه

لاتنوحين الدمع بلل حجابچ
خلصت ايام السبي البيها مصابچ
خلي روحچ لاتضل توگف ابابچ
تنتظر جيت الحبايب تعب حالچ
غمضي عينچ…والدهر يغدر سنينه
غمضي عينچ.. وداعت الله يالحزينه
گلبج يسكن أنينه

بعد،لاسوط اليورم بيه متنج
ماتشوفين الشمر بصوته يزجرچ
والعده ماتحدي،بيج ولا تجرچ
ومايسلبونه بعد يالحره خدرچ
غمضي عينچ… والقصر ماتطبينه
غمضي عينچ .وداعت الله يالحزينه
گلبج يسكن أنينه

ماتشوف عيونج ازنود ومناحر
ولايطك صوت الضلع من الحوافر
ومايشتمونج يزينب بالعساكر
عفيه گلبچ عالهضم والقهر صابر
غمضي عينچ..اتطمني ونتي الحنينه
غمضي عينچ وداعت الله يالحزينه
گلبچ يسكن انينه

رايح اوداعچ يزينب راح وكته
من علناگه تركتي حسين جثته
شبحت عيونه تودع اثر اخته
غيمت عينچ حزن تمطر بسكته
غمضي عينچ. صار الموادع ونينه
غمضي عينچ. وداعت الله يالحزينه
گلبج يسكن أنينه

الشاعره العلويه امل فلوحي الموسوي

الكافل جا وين
جا وين حسين
يغمضون العين
زينب بفراش،الموت
الليله اوداع ابلا صوت
الكافل چا وين
------------
انادي بصوت يخواني اريدنكم
اغمض العين لو گلبي يتانيكم
تغيب الروح نوبه تفز تحن ليكم
تدنه الموت خاف احجي واذيكم
زينب بفراش الموت
الليله اوداع ابلا صوت
الكافل چاوين

الاخت تنهاب كل الهيبه بخوتها
شحلات سباع لو حملو جنازتها
بيارغ عالنعش مهيوبه دفنتها
حسافه بت علي اغراب شالتها
زينب بفراش الموت
الليله اوداع بلا صوت
الكافل چا وين
-**
بعد هيهات توصل الهم اخبارج
يزينب مابقه واحد يجي الدارج
هضيمه بالارض مدفونه اقمارچ
وصفيتي بلا اهل بالغربه يانارچ
زينب بفراش الموت
الليله اوداع بلا صوت
الكافل چاوين

استراحي وغمضيها العين يازينب
حترگ گلبج يبت حيدر يوج يلهب
شتنطرين ودمع عينچ جره ويصب
دكافي من العتب والروح تتعذب
زينب بفراش الموت
الليله اوداع بلا صوت
الكافل چاوين

شتنطرين ودمعتج من تهل جمره
وصوت الموت گرب ونتهى امره
وتدور عينج اعله الگمر تنتظره
وتحن الروح لمچ فاطمه للزهره
زينب بفراش الموت
الليله اوداع بلا صوت
الكافل جاوين
**اريدنكم يخوتي بهاي ساعاتي
تحظروني ويريت اسكن بوناتي
صب عرگ المنيه وشفت مأساتي
مصاب الطف ذكرت وحرگ خيماتي
زينب بفراش الموت
الليله اوداع بلا صوت
الكافل چاوين

امل فلوحي الموسوي

اكعد شوفهااحوالي ..يعباس
هاي الروس يالغالي..يعباس
_____
خويه اكعد تلكاني
دهري شلون عاباني
بيكم حيل اذاني
ردتي شلون يالوالي...هاي الروس يالغالي
___
من السبي ردينه
تعبنه وحيل تعبينه
وصلنه كبوركم جينه
ندفن روسكم تالي...هاي الروس يالغالي
__
جينه والكلب يلهب
صعدت نوكهم تتعب
نطيح ونوبه انجلب
ودمع عيونه اتلالي...هاي الروس يالغالي
__
اليوم الفاتحه هنانه
هاي الروس ويانه
كلمن راسه بمجانه
ميته كون واشوالي..هاي الروس يالغالي
__
بيدي واحفر الخفره
وخلي وجوه متعفره
روحي من الهظم جمره
بيدي ودفن ارجالي.. هاي الروس يالغالي
___
ارش كبوركم ونحب
موماي بدمع يسجب
خويه كبوركم ترهب
وياكم موتي يحلالي..هاي الروس يالغالي
____
جيتك والدمع يجري
خويه حايره بامري
وتايه ياكمر فكري
ومنكم ضعني رد خالي..هاي الروس يالغالي
___
امل فلوحي الموسوي