☘️☘️☘️☘️☘️☘️☘️☘️☘️

Биринчи севги

📝 Шерали Икромов

🎞 Нурсаид Рахматов

☘️☘️☘️☘️☘️☘️☘️☘️☘️
@kuydirding

🌴🌴🌴🌴🌴🌴🌴🌴

Шоирлик қисмат

📝 Шерали Икромов

🎞 Дунё

🌴🌴🌴🌴🌴🌴🌴🌴
@kuydirding

Шоирлик - қисмат

Шоирлик касб эмас, хобби ҳам эмас,
У - қисмат, деганда ҳақ эди даҳо.
Қисматда бор экан, бошқаси абас,
Манглайда не ёзиқ, ўйлатар гоҳо.

Не буюк шоирни кўрмади дунё,
Ростданам улар сўз санъаткорлари.
Жумласи мувашшаҳ, ижоди дарё,
Ўқигинг келади, ўқиган сари.

Лек қисмат хатлари ёзилди эгри,
Манзилга элтади ёлғизоёқ йўл.
Ҳассаси суянчиқ, ўша ҳам букри,
Бошпана тополмас, ёғиб ётар дўл.

Қаламни ўткирлаш учун тарошлар,
Сўнг равон ёзади, аниқ ва тиниқ.
Шоирни пишитар отилган тошлар,
Ҳақиқат, қисматдан қониқма қониқ.

Қарсаклар ўлдирар, ерпарчин қилар,
Ишламай қўяди ўзин устида.
Осмонда учади ҳаволанган шар,
Эртага кўрамиз пойлар остида.

Шоирман, дедингми, энди тайёр тур,
Навоий бобомдек четлатиласан.
Бу ҳали ҳолваси, сенга эмас қур,
Бобурдек қувилсанг, кейин биласан.

Дуэлга чиқарсан Пушкин сингари,
Қаршингда бир сайёд, сен ҳуркак кийик.
Тириклик чоғида душмандир бари,
Есенин мисоли ўлганда суюк.

Ковушинг ичида фитна болалаб,
Терингни шиларлар оғам, Насимий.
Ё дўстлар оғзида ғийбат оралаб,
Усмоним йўқ энди, жоним нима дей?

Чарақлаб кўринди иккита Чўлпон,
Бири кўк, бири ер юлдузи эди.
Кўкдаги дахлсиз қолди-ю, инсон,
Ўзидан чиққаннинг бошини еди.

Юраги ёнмаса ёзармиди у?
Бўғзидан тутдилар Рауф Парфининг.
Шоирлик ўйинмас, қисмат хати бу,
Миллат деб, элат деб, бўлмади тини.

Халқ учун ёздингми, қойил, тасанно,
Энди бор, боравер Балх дори сари.
Шоҳ учун ёздингми, гарчи йўқ маъно,
Унвону мукофот сенгадир бари.

Найингни чалмасанг муқомчига мос,
Ё найдан, ё жондан бўласан халос...

Шерали Икромов, Бухоро вилояти.
@kuydirding

ЖАННАТ ТУПРОҒИ..
📚📚📚📚
РИВОЯТ...
🌿🌸🌿🌸🌿🌸
✍️ШЕРАЛИ ИКРОМОВ..
🌿🌸🌿🌸🌿🌸
🎙ОЙГУЛ УСМОНЗОДА..
🌿🌸🌿🌸🌿🌸

Жаннат тупроғи
(Ривоят асосида)

Донишманд ўғлига буюрибди иш:
-Жаннатдан бирор не тезда олиб кел.
Уддалай оласан, қайтиб келма бўш,
Борақол ва шошил, тўрт томонга ел.

На ташвиш, на ўйга ботмади йигит,
Бир муддат ўтказиб келди хотиржам.
Отадан эшитган қанча панд, ўгит,
Қулоғдан киргану, дилга бўлган жам.

Ўғилнинг қўлида бир ҳовуч тупроқ,
Донишманд отага тутди бош эгиб.
-Бу нима?-сўради билсада бироқ,
-Жаннатнинг тупроғи,-деди тиз букиб.

Синовчан тикилди:-Қаердан олдинг?
Ё жаннат шу қадар яқин ердами?
-Онамнинг оёғи остидан олдим,
Беҳиштдир унинг ҳар босган қадами.

Азизим, равзаи жаннатинг онанг,
Сен уни излама саргардон кезиб.
Давлату савлатинг, тожинг бу-отанг,
Харсанглар бағрига қўйилган ёзиб.

Тошчалик бўлмаса сендаги юрак,
Бу гап ҳам беҳуда айтилди, демак.

Шерали Икромов.
@kuydirding

Биринчи севги

Ким учун орзусан, ким учун армон,
Ким учун хотира, кимнинг бугуни.
Бўлолсанг бировнинг дардига дармон,
Ҳеч қачон бўлмасанг дилда тугуни.

Сен дея оқмасин кўзларидан ёш,
Юраги зардобга тўлмасин сира.
Кўз ёшин оқизсанг артмоқ учун шош,
Тўрт кунлик дунёнинг ўзи ҳам тийра.

Гоҳида вароқлаб қалбинг дафтарин,
Дуч келиб қоласан кўҳна битикка.
Матога тикилган каштадек заррин,
Айланиб қолгандай энди ушукка.

Кўнгилнинг тубида йилт этар учқун,
Йилларнинг сурони суролмас уни.
У ҳамон кўнгилнинг чоҳида тутқун,
Минг йилки тирикдир, ўчмайди уни.

Ҳа, ҳануз хархаша қилар туйғулар,
Биринчи севгингни ёдингга солиб.
Армонга айланган ширин орзулар,
Ўзинг-ла сақлайсан, кетасан олиб...

Шерали Икромов.
@kuydirding

Меърож воқеаси

Ҳақ чорлаб расулин меърожга бир тун,
Унга кўп асрорин айлади ошкор.
Арзимас матоҳдир бу дунёи дун,
Фано деб бақони сотмагин зинҳор.

Жаҳаннам ичида манглайи шўрлар,
Даҳшатли азоблар чирмаган чунон.
Оғриқнинг дастидан тинимсиз додлар,
Юрагинг тўхтагай кўрсанг ўшал он.

Ким олов қаърида ёнар муттасил,
Ким заққум мевасин ютолмай ҳалак.
Ким улкан илоннинг бағрида асир,
Амалга яраша азобдир бешак.

Бирови ёнида тоза гўшт туриб,
Йирингли ва сассиқ гўштни ғажирди.
Аллоҳнинг элчиси бу ҳолни кўриб,
-Бу жазо боиси не,-дея сўрди.

Жаброил бу ҳолга берди бир изоҳ,
Кимсага ўзга панд ҳеч бўлмагай шарт.
Бу ҳикмат бебаҳо, гадо бўлсин шоҳ,
Эшитган илмига амал қилар мард.

-Уйида ҳалоли жуфти бўлиб ҳам,
Нафсини ҳаромдан қондиргандир бу.
Дўзахда енгиллик берилмайди дам,
Зинокор одамнинг бунда ҳоли шу.

Эй шоир, насиҳат олмоқ истасанг,
Атрофга теранроқ назар сол, ўйла.
Ҳар қандай темирни емиргуси занг,
Гуноҳдан четда бўл, эшит, кам сўйла.

Шерали Икромов.

@kuydirding

⚘️🌹🥀⚘️🌹🥀⚘️🌹
ЯНА КЕЛАР БИЗ КУТГАН БАХОР⚘️🥀🌹⚘️🥀🌹
✍️ШЕРАЛИ ИКРОМОВ..
🥀⚘️🌹🥀⚘️🌹🥀
🎙ОЙГУЛ УСМОНЗОДА
⚘️🌹🥀⚘️🌹🥀⚘️🌹
🥀⚘️🌹🥀⚘️🌹🥀⚘️

Доғдаман доғда

Киприклари жаллод, тўкар қонимни,
Висол ҳали эртак, сўрар жонимни.
Тўлин ой, кўрдингми ўшал хонимни?
Мен бир кўролмайин доғдаман доғда.

Келар йўлин пойлаб кутиб юраман,
Қучоқ-қучоқ гуллар териб юраман.
Балки билар дея ойдан сўраман,
Мен бир кўролмайин доғдаман доғда.

Сой бўйида мажнунтолга ҳамдамман,
Бир бор йўқламадинг, айт, кимдан камман?
Йўлларингга интизор бўлсам ҳам ман,
Бир бор кўролмайин доғдаман доғда.

Шерали Икромов. 2009-йил.
@kuydirding

🌿🌿🌿🌿🌿🌿🌿🌿🌿

Юракнинг манзили

📝 Шерали Икромов

🎞 Нурсаид Рахматов

🌿🌿🌿🌿🌿🌿🌿🌿🌿
@kuydirding