نار بدليلي تسعر جسم الحسين مطشر
جثة وصفت عليها غير المحنه شبيها
جسم الحبيب مطشر
_

هميت ادوره بحيره بنص الجثث ماشوفه
ضل الكلب يتلعثم

لن جثه بين الموته مسلوبه ثوب وراحه
متروسه طعنات وهم

وهنا عرفته الوالد من كتله طلعت زينب
ضل يجوي المخلص دم

شفته العزيز شخاله وحده اليلم بربعه
بالشمس ضل ما يلم

وجروح ترس الهامه ما يختفن بعمامه
ملعون الماذيها غير المحنه شبيها

____

يابس عطش مي عيني والشمس غير لونه
ذاك الكبل يروينه

حق اليموت الدفنه مو يبقى بالحر عاري
هيج النبي موصينه

كابلته اعاين جثتة سهام ورمل متروسه
جا هلكد متعذبينه

شايل حصيره بايدي بيا نعمة المن حاير
بحافرهم موذرينه

المرضني هذا المنظر عريان نايم بالحر
ترجف جفوفي عليها غير المحنه شبيها
_

محد يعيش الخنكه بس اليسحكه الحافر
لمن يكسر ضلوعه

وحسين ابوي كبالي من صدره طالع كلبه
ما ينفهم موضوعه

فزعوله وادم تنهب ماضمدوله جروحه
صارو عليه مجموعه

حته الرمل هم سلب بايك حلات عيونه
وشل هذيج دموعه

جيب اليعيش الحاله من تسحك الخياله
تشلع كلب راعيها غير المحنه شبيها

___

شلته بهداوه ودمعي غسل دمة مذبوحي
ومردت دليلي لحسره
مشي التلعم توه شايل ابوي وخايف
من عنده توكع وذره
نص الدرب لن اسمع طكة ضلوع الوالد
يطلع عظم من صدرة
ماباقي شي بي سالم مشلوع راسه وكلبه
من الضيم غادي شكبره

يطيح من اشيله براحه سهام ودمه من صفاحه
حار الترب ماليها غير المحنه شبيها
____

كل فجر جان يصلي يسبح محنه ويه الله
تسبيحه نقصت بيده

يمكن حجه وي الباكه رجعلي تسبيح امي
انت البصبعي تريده

كصوله اصبعه معاند وصار بجدم يا حافر
لو طاح يم وليده

ماميت الراد الله كلما كلت يا فاطم
ينزف دمة من وريده

حنيته ردت روحه وونينه مو لجروحه
كلما يمر طاريها غير المحنه شبيها
_
مات ويفكر بولده نام الرضيع بصدره
يم جدمة الاكبر صاير

حته بدفتنه يلمنه بس المحنة التبقى
ما تنسحك بالحافر

جي دمة ينكط غيره بنص ربعه قرر موته
يحس جنه ليل العاشر

حته اليجي ويزوره ما ينسه وكفة ربعه
موقف رجوله لباجر

يصبح عظيم المنظر جون وحبيب وقنبر
وعباس المحليها غير المحنه شبيها

الخادم : حسن العبودي

نذر  الكم

كلمه وليدي جبيره
خادمه ابابك اصير
من اكون اني بمقامك
وانت عد الله جبير
الحصير الجاسه جدمك
عندي احلا من الحرير

يل كلشي يروح.     فدوة لعينك
جم فدوة تصير.   بيني وبينك
صار العباس.       يشبه طينك

عين.  شلة بيهه. وانت مرسوم اعله باله
موت. كتله لكن.  بس للحسين وعياله
صير . انت اقرب.  من رمش عينه وخياله

نذر الكم

بل عرش اسمك يلالي
يل جنت ضاوي المكان
من قبل فتحت رموشك
واني احبك يل امان
حته اخوتك حضرتهم
فدوة راحو من زمان

سجلت اسمي.   خدامتكم
بختي وصيتي.   من خيمتكم
كلشي بهل كون.  مخلوق الكم

ماي.  خذني بيدك.  طشني بشفاف اليتامه
ليش.  ماكو غيره.  كلما محضر سهامه
هناك . ليبقى وحده.  يحترك كلبه وخيامه

نذر الكم

عطشت خيامك محنه
وابو فاضل مي جره
اني وصيت اربعتهم
الموتة عند المقدره
كون فطره كلب ولدي
ولا شفاك مفطره

فدوة لشيبك.     كل هاي الناس
بجدام الخيل     لا ما تنجاس
مو فوكك كون.   بعون وعباس

خيل. بس عليهم.  ولا تمس جسمك حوافر
نار.  تجوي ديهم.  حته ماتجوي الحراير
صيت.  باجر الهم.  خوتك دم والمشاعر

نذر الكم

خنكة المغرب جبيره
وانت يا اعذب هواء
لمسة جفوفك عجيبة
تشفي كل هم وبلاء
صحره بس لمن دستهه
خضرت كل كربلاء

مكرود لماي.         ما ضاك شفاك
جنت اتمناه.        يشرب بضماك
محضوض الراح.   ينداس وياك

نام   والحوافر.  تندل مجان التدوسه
وين.  شفاف طه. والمكان البي يبوسه
ليش سكت كلبك والخيول عليك هوسه
نذر الكم

جنت اتاني اخبار عنك
لن بشر جاني بونين
كلي ولدج كلهه ماتت
فدوة كتله احجي بحسين ؟
نزلت دموعه وحجالي
داسو ضلوع الحنين

شاغت روحي.       وغوش دربي
صار بنص خيل.     رباي وتعبي
يا ذاك الدوس.      كونه بكلبي

حسين. ياجمالك. وعين التحسدك حوافر
كون. يمي اضمك. ضمة غماد الخناجر
ناس. حيل تحقد. وانت يل كلك مشاعر

نذر الكم

خنكة الفوكه الحوافر
صعبة لمن تنوصف
جنهه خنكاتي من اذكرك
انحب وعيني ترف
كسرة جتافي اعله بابك
وانت ما عندك جتف

مورد والخيل.  داس جبينك
متعبيك هواي   الله يعينك
ماضل تراب.   ما طب عينك

شوف. فكلي كلبك انت من تمشي اعله نيتك
حيل. حلوة جانت.  هسه شو حمرة لحيتك
ااه   وين الكه.  وذره منك جا اجيتك

الخادم حسن العبودي

مقدمة الى مولاتي الزهراء عليها السلام

صافن عل حرك بلباب
طافي ومحترك كلبي
ماخذ مني احلا احباب
واصل مرحلة بتعبي. خلص حيلي

_

متعود اشوف عيون الترد حيلي
شمحلات ذاك الملكه من تحجيلي
روحي علي شتاكيتها تكليلي
هسه اختنك كلما يطول ليلي

طولج طابع اعله الباب
والمحسن ورة ضلوعج
مرسومة برماد النار
سولفهن بجي دموعج. خلص حيلي

___

لحكيلي حيدر جاي تطلع روحه
شوفي اعله طول الباب كوه يلوحه
باقي اعله كلمه وكلبي تشفه جروحه
فاهي الحجي ومنج ينكط ملوحه

يا محله الكلام الحار
يسوة الواحد يسمعه
واني ادري الحجي ياذي
الكسرو بالعصر ضلعه. خلص حيلي

____

بس انتي نقطة ضعفي وامن اتعنوج
يدرون بيه اتنفسج هل عصروج
لوما عزيزة كلبي جا ماحركوج
اول ضريبة لحبنه بسمار نطوج

عدنا الكسرة حته ضلوع
مو بس كسرة الخاطر
اني من اختنك بالليل
مثل الينسحك حافر. خلص حيلي

____

من جنتي يمي الحيل ما اعتازة
رحتي وبقيت اتوجه عل عكازة
بهذا التعب عازة حنانج عازة
من كلبي شلتج عل متون جنازه

كلشي لبيتي يرجع كون
حته الكسرة تتعوض
ليش اسمع وره التابوت
صوت ضلوعج التنرض. خلص حيلي

__

طولج وصل بآخر حياتج شعره
جا ليش نعشج ثكل كون بكبره
ثأري الثكل مو بالشكل بالعشره
بجتافه حيدر كوه شايل عمره

وزنج جنه ريشة طير
المن رجفت جدامي
نشفت عيني من فركاج
يسود كلشي كدامي. خلص حيلي

____

جانت عشرتج كلها خير ويايه
يا احلا من تكعد عل مصلايه
بسمار بيتي الكسر عندي مرايه
شال ابني من بين المدافع آية

كبرج سكته مثل البيت
كلش موحش وخالي
جي صار الترب فوكاج
صار من الذهب غالي خلص حيلي

الخادم : حسن العبودي

ملتمين بحضن الزهرة نسولف عل محسن
كل افراد البيت تناطر ولملكاه تحن

اخوانه هواي يحبونه     محسنهم جان يتانونه
*_

جان الزهرة تسولف الهم
والبسمة بخدهم مرسومة
حسين مناطر بزر الكعدة
وام عون تصفط بهدومه

اتكلهم المحسن تره هنيالة بيكم
مدلل يصير عله اخوته لمن يجيكم
كلش حنين واني احس يطلع عليكم

فجئة وحيدر طب لبيته من شاف الكعده
كال الله يساعد كلب امكم ودموعه بخده

اول مره تهل عيونه
محسنهم جان يتانونه

____*

لم دموعه وكابل ولده
وشال حسين ابين احضانه
كلهم شمو هواي بفاطم
باجر ما تكعد ويانه

باجر اميرتكم بعد ما تكدر تكوم
باجر ضلعهه من العصر تلكونه مثلوم
شبكوهه حيل آخر شبك عد فاطمة ليوم

يحجي وياهم بس بعيونه تسولف دمعاته
فاطم آخر مرة تكوم تبوس وليداته

بهاي الحنيه يبجونه
محسنهم جان يتانونه

_

صار موادعهم بل نضرة
جنهه تكله لخنكه فراكك
باجر لو ماتت ام كلبك
لا تكعد وتلوم ابابك

باجر تجي لنار وتوج وتجوي العيون
مرتك ورة الباب وزلم كلهم يدفعون
الما عدهم مجان الدفع باجر يشتمون

ماخلاهه تكمل حيدر كال الهه اسم الله
لا تحجين بفركه وانتي امن كليبي وصله

ياباب عليج يدفعونه محسنهم جان يتانونه

*هذا اليوم انعاش بحيره
فات الليل وحيدر كاعد
والزهره تودعهم سكته
كل شويه تبوس بواحد

تشتمهم وتجري الدمع وتكله ابو حسين
بالك على ولدك علي ادري انت مو زين
حاول اذا شفت الضلع لا تدمع العين

لو شفت الدم تارس ثوبي حاول ليشوفون
زينب تكبر باجر عكبه وخاف تلبسه شلون

كل خوفي الثوب يشوفونه
محسنهم جان يتانونه
___*

ليل وخلص بس موادع
صبح بس بكلبه الحسره
كله حسين اول ما شافه
صبحك الله بوجه الزهره

وهنا علي شيب قهر من الحجي الحار
وجه الزجيه شكد ترف ماينجوي بنار
وجمالة ضلع أمة وطن خطاره بسمار

يمسح ضل دموع الوالد بجفوفه شويه
ويكله تعودنه الضحكه اعليك الصبحيه

مخنوك هواي يحسونه
محسنهم جان يتانونه

*_

شبت نار وحيدر شيب
نار تجوي الجار السابع
وي صياح الناس لطبت
كسر ضلوع بحايط سامع

عاينته اليعثر الخلك يتعثر شكد
شاف الجذع كلة دمه والحايط أسود
والمحسن بغيمة حرك للباري يصعد

بنص لبيت وتيه دربه بحركه عيونه تكت
مو من ثوبه يعوف مريته تنطك ويسكت

بل زهرة هواي ياذونه
محسنهم جان يتانونه

_*

من طلعو من بيته بضحكه
وبتعدت من بابه لهوسه
شاف لزهرة تصيح فضه
بس دخان ودم متروسه

شافت علي وكلش بجت ضمت متنهه
والمشكلة ما لحكت تخفي بجفنهه
ما تدري حيدر من فزع جان اعله ونهه

حيدر كلهه العاشك يعرف لجمات ام كلبه
كون بعيني وموش بعينج يا روحي الضربه

ونج ماريد يسمعونه
محسنهم جان يتانونه

____

حيدر جاس ضلوع الزهره
من غسلهه بدمع عيونه
كل شويه يطيح بحيلة
يبجي اويلاده يشيلونه

شايلهه حيدر للدفن وتبده حيلة
زغيرونه بس من التعب كلش ثكيلة
تابوت عمرة اثمنطعش مابي يشيلة

مددهه وهل دمعه ويشمر لتراب بهيده
اول مره يسولف فاطم نومتهه وحيده

يتمنه وياهه يدفنونه
محسنهم جان يتانونه

الخادم : حسن العبودي

بل كوة صارت جيته 
روحتهه كلش خنكته
صح ميته بس اشتمته         الزجيه

_____
كعد يمهه ويكلهه شلونج العيد
والله وبس اشوفج كلشي ماريد
جان حساب بعدج خالة بعيد
وكت ينشاف حيدر بس تجاعيد

حيدر حبيبج من تعب
ضل ياكل بكلبه العتب
واجب دموع المستحب        علية

___

اول مرة اجيج وما تكومين
وين الهلة بيك الغالي ابو حسين
كلهن يوجعن وابديلج منين
ابيتج من مشيتي كلشي مو زين

بيتج ونين ام الحسن
وشموع الملاكة انطفن
عايشلج بديرة شجن       خلية

___

تصدكين بعلي ما يكدر يكوم
سنة يمر بغيابج صاير اليوم
الج ما عندي ذكرة غير الهدوم
 جبل شايل بصدري من الهموم

فص عيني طاح من البجي
يومية عل باب انتجي
يوجعني ضل حته الحجي       اذيه

__

لحسن ابنج ينوح مكابل الباب
بلبيت الحسين يشم بلثياب
وجرح زينب يصل عليهه ما طاب
وابو ترابج يذب عليج التراب

نستوعب فراكج صعب 
ما لايك وياج الترب
صرنه يتامه بنص غرب       رزيه

___

يزهره كلبي اريدج كلش هواي
صرت اعطش حنانج مو عطش ماي
مشيتي وشيب الفراك شكثر جاي
ريتي ختنكت من الفركه يهواي

يل زهره يا اجمل عشك 
يا هوه بيتي الينشهك
مو كلنة ابد ما نفترك         مسيه

____

يل ما ينحمل فركاج بيه
اني اتذكرج كل مغربية
كلشي بدونج تغير عليه
مو تدرين احبج يل زجيه

المن مشيتي وي المشو
وليدانج بحركه بجو
وياي يردونج اجو              خطيه

_

اول مرة حيدر هلكد يون
ويتحسر عليج وعلى المحسن
ادفنج مدري كاعد بيه ادفن
يم كلب الرقيق الكلش يحن

تذكرين احجايه الي
يل زهرة يا ريحه هلي
فدوات يغديلج علي     الزجيه

حسن العبودي

ورده وعصرهه الموش فلاح
سال النده من امتونهه وطاح
ما صاحت ادركني يبو حسين
كالتله يا راعي البساتين
جوريتك ابسمار تنلاح

*_

سمع بيته حترك وحتركن عيونه
بستان الورد المن يحركونه
سمع جورية خلف الباب مسجونه

سمع بيهه وعلي تحسر      يفزع حيلة ما يكدر
صرخ يا فاطم ويعثر        هضيمه
ورده اميه تزكوهه           وعل قبلة تخلوهه
مو هلكد تعصروهه          هضيمه

لامو غرب عصروهه الاصحاب
من كد عصرهم غصت الباب
دم صارت بعصرتهم العين
كالتله يا راعي البساتين
جوريتك بسمار تنلاح

_____*

متن مو ذكره ويعلكونه بلبسمار
نخلة وطلعو من حيلهه الجمار
والمحسن وكع فدوة علة امه يغار

زغيرون وفزع لامه      ولجده مشه بدمه 
يكلة الهاجمو همه           صحابه
بدفعهم عصرو الزهرة   وصل يمي صده الكسرة
ابطنهه واسمع السطره      صحابه

بعيونك الجانت زغيره
وحدهه والهجمو عشيره
للعرش واصل صوت الونين
كالتله يا راعي البساتين
جوريتك ابسمار تنلاح
___

اول مرة اشوفه مورمه عيونه
حيدر جان بل زهراء يحزدونه 
ابو الحسنين شايل روحه بمتونه

يكلهه السكته المتني     احجي يا بعد متني
بلسانج يخبل اسمي      ابو حسين
عيوني فدوة لعيونج      بعدهه يونن متونج
تره مو زين من دونج       ابو حسين

زينب بجت حد ما عمت عين
وذب روحه فوك هدومهه حسين
تحبهم كثر ما يمهه باجين
كالتله يا راعي البساتين
جوريتك ابسمار تنلاح

___

يكلهه الفاتحه من اقراهه مختنكه
ابو الحسنين عشكج كتلته الحركه
شفت زينب تشم بهدومج مدنكه

تصد لثوبج بحسرة       اثر شك ودمه بضهره
تكلي اليوجع الزهره     ضلعهه
يبويه اطرافه ممزوكه     ترة جدام امي محروكه
عليهه الباب مطبوكه        ضلعهه  

يبجي الحسن ويخضر دلال
وحسين صارت عينه شلال
يايمه صاحو ليش تمشين
كالتله يا راعي البساتين
جوريتك ابسمار تنلاح 

____

الم ويلادي كلهه ونمشي يم كبرج
مختنكين اجينه نشمشم بعطرج
الكبر باب الرمل هم كاعد يعصرج

افتحي احضانج وكلبج       اجينه نشاركج تعبج
زينب كلش تحبج            حنينه
الحسن مريت ديوانه         وجبت حسين ويانه
عليهم حيل ولهانه          حنينه

وحدج يزهرة اوحشه الغروب
جيناج خل نتشابك كلوب 
نبضة كلب حسبي وتلاكين
كالتله يا راعي البساتين
جوريتك ابسمار تنلاح

____

الجرح من ما يطيب يصير للذكره
علي البيبان جان تذكره بل العصره
جم بسمار شافة ومات عل زهره

حيدر كل مغربيه             يذكر عنده جوريه
حمرة وكلهه حنيه             يحبهه
جان شكد يشم بيهه          مثل المي يداريهه
مات من البجي عليهه         يحبهه

كل مغرب يشم بوردته
ويرجع علي ينوح بحجرته
كال الهه ارجع لا تخافين
كالتله يا راعي البساتين
جوريتك ابسمار تنلاح

الخادم : حسن العبودي

جبت الكطن بكماطه ملفوف
تعناه سهم وبمنحره يحوف
شثكلاته صاير فوك الجفوف
شلع كلبي. شلع كلبي

___

تخيلته يكبر وي علي ويلبسه كل هدومه
يرحون للجامع سوه كل الولد ملمومه
تاليها صارت قصتة من المهد للحومه
عبد الله يا عالم ترف صاير خشب زردومه

شلته ابيض وردالي دامي
تمنيته واحد من سهامي
يطب كلبي ويموتني ضامي
يعوف ابني. يعوف ابني

___

ماشارب بعمره سهم فل الكماط بهيده
وليدي نشف ماي ودمه يشبه عطشنه وريده
مابي يسولف عل خنك عاصر رداني بايده
عبد الله محتاج النفس ماي النهر ماريده

فزعت وين الينطي رية
عبد الله يستاهل خطيه
ينطي نفس واطي اميه
من عيوني. من عيوني

__

الما نقبل تلوحه الشمس فاض الدمه اعله خده
زغيرون ما حاجي حرف بالسهم ليش يرده
هذا الحجي يفطر الكلب بس بالخيام الشده
شحجي اذا امه انشدت شربتو بزر الكعده

يمه الولد تحجيله وينام
هل مره نام بصوت السهام
ماشاف بعده طيوف الاحلام
سكت كلبه. سكت كلبه

____

يكولون لو ابنك كبر لازم تكوم تخاوي
تفتحله كلبك بالحجي عل عشره كون تقوي
عبد الله باجر بالسبي وياي راسه مخلي
ساعتها نتشاور سوه يكدر يسولفلي شبي

اليوم يوليدي دللول
وباجر ربع نتساوه بالطول
يفتحلي كلبة شعاجبه يكول
بعد صوته. بعد صوته

_

رديت للخيمه وشفت كل الحرم تكصدني
ميدان سون للولد وامه اجت تنشدني
يمكن لان ماي ارتوه خضر سهم نحر ابني
عبد الله ميت لو عدل عوف البجي وجاوبني

كتلها مات وليدج زغير
شالنه بجنازه العصافير
وي الرماح وليدج جبير
تشوفينه. تشوفينه

الخادم/ حسن العبودي

حسين يا مولاي

بوكت جان النفس غالي
مو ياهو اليجي وينداس
الرمح عثرة بدرب خالي
مصدر رزقه رفعة راس

رخصت ريتك يبو انفاس الكريمه
الخيل من تسحك على ضلوعك حريمه
ما كسر خاطر رمح راسك هضيمه
_

الدمع ما يمشي بعيونه
المتروسه دمه وتراب
وانت يا ضوة عيوني
السحك حته لخيالك طاب

رايد انفاس اليدوسنة الحوافر
بوجهك استفحل عطش للرمح عابر
وشلت دم وبقت بيك المشاعر
___

الطف كله انتهه موادع
بس ضلوعك التمن
الهوه حسرة اعله انفاسك
بحرك وتراب يشتمن

كلشي بالطف ضيف بس جسمك تحزم
عزب لرمحه جرح وتغطى بالدم
نايم وفوكك سهام وخيل تلتم
__

كبل جان السحك مره
بنادم ينعصر بمجان
الخيل الركضت اتسحكك
شعلمهن على الميدان

يسحك عليك المهر ماجنه شابع
الحيل شيجيبة وترده بتسع اصابع
من يكلب جسمك يكلب المواجع
_

الشتم ما يعصر جروحك
كلبك مشكلة يحب حيل
اليكول انسبت زينب
جن دايس عليك بخيل

يعني مو بس جسمك انداست محنه
يل ترس راسك صريخ وتفتهمنه
علك شدنه بنص ضريحك لان تهدنه

الخادم : حسن العبودي
تمت ببركة صاحب الزمان ❤️

كلبي من الحنين شكد. رج عليك
رجيتك وادري مو هين. رجه عليه
الخيل الداس بضلوعك. رجع ليك

يريد برجعته يكسر البقيه
__

اخوتي مذبحه بحومه. شمرهم ؟
اذا كل ساعه يضحكلي. شمرهم
جوه الخيل ويلادك. شمرهم

ركض واليوكف يشوف المنيه
__

شحلات العشرة والشامت .. نفسها
واختكم تندعي يوكف. . نفسها
علينه وجوه ما ظلت. نفسها

يبسها العطش بالغاصرية

____
وحك ضلوعك الخرب .... شملها
السحك وعيونك الحافر .. شملها
المصايب ما يملني .... شملها

اذا مثل المطر توكع عليه

الخادم : حسن العبودي