لمولاي صاحب الزمان

فرحان اجيت وكلبي رايد يطلع
والمافرح ويانه خلو يسمع

هالليله شرفنه الختم للكرار
بثار الزجيه وكلبه ضل يتوجع

صار الذي على الكون ربك سواه
وعلى القيامه هناك هوه اليشفع

صاير امامي وحقي هالليله اختاض
ماشفته مره وضال بس بيه اسمع

بس صبروني شويه كالو يرعاك
ولاتنسى للغايب عذر من يرجع

ونصحوني تصبر والصبر هم مفتاح
بس اني شصبر وانت عينك تدمع

يالمانسيت بيوم جدك عطشان
مسرباتلك وين الثكيله التفجع

ذب منهن عليه التعاون محلاه
لو مستعز بالنوح ها يالتسمع

مولاي اريدك مره ترتاح بليل
وخليني ابجي ارداني خل تتنكع

خليني اصيرن كون مثلك بليل
مو بس صلاتك بالبجي خل اخشع

بس انت تدري عليه كلهن صعبات
كلبك حنين وماردت نتوجع

مولاي اكلك كلمة وعذرني بهاي
كلمة محب مايوم منك يجزع

خافن اموت وهذا حق ع الناس
من كبري ردني وياك خليني اطلع
..
مصطفى ستار العبادي

لمولاي صاحب الزمان 💔

ناطـرك والشـوك بيه يعاتـبك
مرني لحضات بحلم مشتاكلك
يمي احسـنك وادور يمي احسـنك
ليش ماشافنك اسئل ليش ماشافنك
……………………………………………
ناطرك والشيب شيب يمته اشوفك يا مناي
تعبت عيوني على دربك شوفي يكصر من وراي
دورت حتى بأهلنـه وماشفـت مـثلك فياي
ردت اصدك روحي جزعت بالكلب فز مستحاي

ناذر عيوني على عتبت بابك
مرني لحضات بحلم مشتاكلك
…………………………………………….
بيك احس جروحي تشفى من اذكرك بالدعاء
شحال لو جفك يمسني وبيك اشم طف كربلاء
وتعرض عليه المصـايب وستراح بكل بكاء
بلـكي اخفـف عنـك الهم ولو همـي ازيـد بلاء

اعرف بذنبي ثكيل وجارحك
مرني لحضات بحلم مشتاكلك
……………………………………….
خذني يالماخذ صفنتي وبيدك اتعبرني اريد
خايف يسئلوني بأسمك وماعرفك بس وحيد
تمطر عيوني بغيابك وماعرف منك شريد
ادري ماترضى على ذنبي وارجع اذنب من جديد

خذني واسمع مني كلمة حابك
مرني لحضات بحلم مشتاكلك
…………………………………………..
ردت ادورك بس حـرت ويـن ابـدي بيـك
لاتضن عايـش بزودي والله عايـش بس عليك
فدوه دليـني على بابك جـدامي وحدها تجيك
هـم الك مؤنـس حبيـبي هـم يحن ويعتـنيك

اني مثلك هم اون لمصابك
مرني لحضات بحلم مشتاكلك
………………………………………….
العالم تسولفلي عنك واعرف بعالمنه زين
من يونون على فكدك انت تبجي على الحسين
كلي مولاي المجالس بيـها تحضـر كلي وين
حتى اقبـلها الأماكن مـن تجي وتهمل العين

منك اسمع كلي كلمة عاذرك
مرني لحضات بحلم مشتاكلك
…………………………………………..
اعـرف ذنـوبي الخـذتني بعـيد عنـك يالقريب
شما تـريد تكضـني يرجع جفك بذنبي يخييب
وفـوك هذا افـراكي كلـه تدعـي ربك يالحبيب
تكله اعـفوه وهوا اكرم بسـرعه لجفـوفك يجيب

ومني يامولاي الله يساعدك
مرني لحضات بحلم مشتاكلك
…………………………………………….
مصطفى ستار العبادي

كلب لون العبايه وعتك . من حر
الشمس ماخلت ع حسين. من حر
منو مثلي بيتامه وروس .. من حار
وجثث لخواني ضلت ع وطيه

مصطفى ستار العبادي

الرحت عنه بهزيله … بيش اعدله
وهدل بالسوط متني .. بيش اعدله
حرت يوم اربعينك … بيش اعدله
الحرك والحبل صم اجفوف اديه

مصطفى ستار العبادي

مولاتي العقيله (ع)

رحت بالراس أزتنه ... ورد بي
الرمح خضر لون شاله... ورد بي
وصلني الخبر بس لاجن... ورد بي
ارد اردود للشام وسبيه

مصطفى ستار العبادي

مولاتي العقيله

الوكت عكب ابو فاظل... دار بينه
انسبينه وغدت وحشه... دار ابينه
بخرايب نمنه محد .... دار بينه
انسبيت ودارت الدنيه عليه

مصطفى ستار العبادي

يـا يـمه زينـب ليـه دنـي
حضنج وشبكيني ع حضني
بس بالج اتلجميني
هاليله اودع أسنيني.
دنيلي حضنج.. دنيلج حضنج
ــــــــــــــــــــــــــــــــــــــــــــــــــــــــــــــــ
أخر ليله ومودعتكم التمو خل اشبع منكم
حسين وزينب راح افكدكم ... رايحه امكم
ادنو يم حضني شويه يايمه بحركه ارد اشبكم
بس خافن ضلعي يأذيني ... أحمل وجعكم

كل لجمه اتحملها بخاطر
من يعرضلي بعيني العاشر
حسين بكلبه يدوس الحافر.. أعظم مصيبه

يا يمه زينب باجر حسين
يوكف وحيد ومامش معين
و مسبيه كرة عيني
هاليله اودع أسنيني.. دنيلي حضنج
ـــــــــــــــــــــــــــــــــــــــــــــــــــــــــــــــ
راح أشكي لجدكم ع الصار من حركو بيتي الكفار
بدمعه ولوعه راح أشكيها ... من طبو الدار
راح أشكيله بدم المحسن ونسولف عن البسمار
باجر يبنـيتي على المـهدي ... يتحول الثار

باجر يـم جدج واشكـيله
ع الصار هواي اني احجيله
ولأخرنه المهدي أدعيله ... يعجل ظهوره

من السهله باجر يرجع الثار
من يظـهر وتلـتم الانصـار
خليني اسكني اونيني
هالليله اودع اسنيني ... دنيلي حظنج
ــــــــــــــــــــــــــــــــــــــــــــــــــــــــــــــ
مو اخر ضلع يكسرونه حسين بحافرهم يكضونه
باجر يبقى مطـشر بالطف ... ماتكـدرون تلمـونه
وراسـك محـزوز من المـنحر باجـر برمـاح يرفـعونه
يوم العاشر مصباح اكشر... صـدرك بالخـيل
يدوسونه

ماتلكه لجسمك تابوت
و لادفانك بعد المــوت
باجر ماتلـكه الزاتـوت ... يبني اليزتك

و اخر صدر باجر يعصرو
صدر الفرج بالهـم يمـوتو
يبجي لمصاب حسيني
هاليله اودع أسنيني ... دنيلي حظنج
ـــــــــــــــــــــــــــــــــــــــــــــــــــــــــــــــ
مامتخطين صواب الجد يايمه وراح تفجعينه
فكدج مو هيـن ونحمله ... لو رحتي هواي تأذينه
نبقى نغص باليمه ونشهك عليج ونذكر ماضينه
من هسه الاسود رافكنه ...جا من نكبر شيضل بينه

ماصاير سـن الاحـلام
وين نشوفج من نحتام
اهل البيـت نصيـر ايتام ... هذا أسمنه

الحلم حلمي اكبر واشوفج
لمـن أنـام تمـر طيـوفج
ويمج أنشف عيني
هاليله اودع اسنيني ... دنيلي حظنج
ـــــــــــــــــــــــــــــــــــــــــــــــــــــــــــــــ
وي فتحت كل باب اذكر ذيج العصره وذاك المنظر
ويتخيلي الصوت بأذني... صوت ضلوعج من تتكسر
اركض وبكل حيلي اتعنه والحيل يبيد و أتهطر
اركض يايمه ارد امنعها... بس بالمامش ابقى أتعثر

ضليت اتخيل بالصار
شلون بدارج شبو نار
ماعدهم رحمه وكفار ... أهل السقيفه

باجر جهنم الهم تصير
والشايعاهم ماله تدبير
بس روحتج تاذيني
هاليله اودع اسنيني ... دنيلي حظنج
ــــــــــــــــــــــــــــــــــــــــــــــــــــــــــــــــ
مصطفى ستار العبادي

لمولاتي فاطمه (ع) لسان حال مولاي الحسين (ع)

اعبرها ياكسر الضلع
ماريدن بأمي انفجع
من انداس بذيج الصحره
بكيفك يا ضلع أنته تكسره
ضلعي ولاضلع امي الزهره.. وا اماه.. وا اماه
..........
من طبك هالباب يايمه على صدرج
بيه حسيته الوجع. من كسر ضلعج
يمـه وسـفه يصيـر بالبسمار ذبحج
يمه والمدمع جرء مو هينه اودعج

منج المحسن بعد رااح ... يمه
واني بس الزم بالاصفاح .. يمه
وبهالعمر جا يمته ارتااح .. يمه

وضلت تكبر بيه الحسره
لو عفتي اوليدج من زغره
شنهي العمر بلايه الزهره.. وا اماه.. وا اماه
......
ياضوء الله و. ع الملاء ساطع وجودج
انتـي ترتيـل الكتـاب بكـل حـروفج
الليله تطـفى الدنـيا مـن يغيب نورج
و ياضوء لو رحتي يمه يصير دورج

جلمة اليمه تصير بالكاع ... صعبه
من تندفن ويصير الوداع ... صعبه
و بهـالعمر يايمه شبساع ... صعبه

ما شـابع مـن جلـمة يـمه
حسين وليدج عاش بهظمه
ومن حظنج هالموت يحرمه.. واماه.. واماه
.................
من انشف عيوني يمه تصير عالباب
يكبر بكلبي الجرح كل ساعه ماطاب
و أعتنيلـه لـو تحـرك بالهـوء الـهاب
اعتب وبدمـوعي اكله منج اشجاب

من أمي ماجايب خبر زين... كلي
معقولة ما حنت للحسين ... كلي
حاجيني خل تغمظ العين ... كلي

كال ابجي وضل زيد بنوحك
مـا ترجـعلك زهـرة روحـك
امك راحت روف جروحك.. واماه.. واماه
..............
كل جـرح هيـن يفض بجـلمة تهـون
بس حنـان الدنـيا كله اللـيله مدفون
جنت أضن كل العمـر بحضانها نعيش
بس عرضلي الموت خيب كل الضنون

زاد الجرح كل يوم ماطاب... يمه
كلما افكن عيـني عالباب ... يمه
صعبه الحنان يظمه التراب... يمه

جلمه وهالجلمه نغص بيها
متعـود كل يوم أحجيها
الـ يمه. نفكـدت تالـيها... وا اماه... وا اماه
.........
أنتـي يا أكـبر فراغ نعيشه كل يوم
من يلمـنه الزاد وتطـشرنه الهموم
هموم فرغت مكعدج ويانه عالزاد
يمه نشبع بس بواجي نخلي ونكوم

ضلينه مانعرف شنو الليل... يمه
ومن البواجي اتهدم الحيل... يمه
فكدج حمل مو سهله ويزيل... يمه

دمع العين أشكد تعبنه
كلـما نلتـم ويطـشرنه
يا موتج والله الكاسرنه... وا اماه... وا اماه
...................................................
مصطفى ستار العبادي

عبد يمه ?

اكبـر بيـهم لشـيبي
واريد افرح بعد بيهم
اشوفن ولدك معرسين
وعبدالله اليحـنيهـم
محلاة الضنه يحسين
مـن تـذكر اسامـيهم
من نشوف المعرسين
ننشد جاسم عـليهم
ولدك للزواج اولام
وسفه ارماح تاليهم
عبدالله شنو السواه
وتالي يصير ماذيهم
عبد يمه عبد يمه..
...........
ابني واني اعرفنه
ست اشهور ارضعنه
شحلاته بالمهد من نام
نوم العافيه اتهنى
العطر من ينهز الكاروك
عبر صوبين اشمنه
من يغفى اشكثر اشتاك
ومـن يفـز احضـننه
ماجن ابني نايم لا
جنه اليوم فاركنه
ما حمله الوداع وياه
ابني هـواي احـبنه
عبد يمه عبد يمه..
...........
الورد ماينذبح ينشم
جاليش برمح شالوك
ماشموك من نحرك
ليش استعجلو ذبحوك
يبني الردته بس الماي
جاليش بسهم لاكوك
شفتك من شبكت حسين
ثـاري بهالسـهم أذوك
عبد يمه الليالي هواي
وحضني يعثر الباكوك
روح الحك عمامك غاد
روس على الرمح تانوك
عبد يمه.. عبد يمه...
.........
تانيت الكبر وياك
حتى افرح بعد بضناك
يبني استعجلت ع الموت
جاليش السهم وازاك
هم تذكر اخيتك غاد
العليله تلعبك وتنعاك
جلمه يمه ماكتلي
كبرت حسرتي بممشاك
من يهل علينه الليل
وتشع يا ضوء شمحلاك
هسه ايامي كلهن سود
وين بيا طريج الكاك
عبد يمه.. عبد يمه..
..........
كل الردته بس الماي
تشرب وشحلاتك جاي
السهم ما تيهه يقصدك
شاف بنحرك انت فياي
رد خلي العطش مو موت
رد يا يمه عيش وياي
المهد ماينحمل خالي
شنهي العطلك والراي
مو لايك عليك الموت
ليش استعجلت يضناي
عبد يمه الولد مريود
يهضمني الغياب هواي
رد كحل نضر عيني
يا اخر امل دنياي
عبد يمه.. عبد يمه..
......
مصطفى ستار العبادي

بدروب الشام .. ضيعت أحلام
عشنه الاوهام .. يردلنه حسين
شفت الايتام .. تبجي وتحتام
ماترضى تنام .. يردلنه حسين
«»«»«»«»«»
اناديكم بعد المن.. روس برمح كدامي
اوكل أمري للمعبود.. عليه حتركت خيامي
اصيح وماترد يحسين.. راسك ع الرمح دامي
راحو بالضعن يحدون.. حداي الضعن شامي

دخان حركة كلبي موش اخيامي
والتهـظم أكـثر روسـكم جـدامي
بين الغرب أشلون تكضي ايامي

كلبي المحتام.. ماتدري شضام
عشنه الاوهام.. يردلنه حسين
«»«»«««««»
بيدي من الحبل نيشان.. ومن خيامي الاحتركن
غـربه الشـام ميـدلون.. وايتـامك تـرا يتيـهن
من هجمت علينه الخيل.. بالهيمه ركض طلعن
ضلت بالرجل يحسين.. اثار وحرك طبعن

ماترحم اعيـون الغرب جتـاله
وشلون حال المايعرف خياله
اليفكد حسين شيضل بحاله

ماجنها ايام.. محسوبه بعام
عشنه الاوهام.. يردلنه حسين
«»«»«»«»«»»»
موته خواني بس راحو.. زواتيت برماح وياي
من تطلع شمس ع نوك.. روس تصير سد وفياي
من يخلي راسه حسين.. اضوء من الشمس بهواي
تنزل خجل من الراس.. عذرا سيدي ومولاي

بدروبنه حسين اليضوي الضلمه
ومانعرف الليل شكثر بي هظمه
كل مايهل راس الحسين يحرمه

راسك جدام .. وبكلبي الام
عشنه الاوهام .. يردلنه حسين
«»«»«»«»»««
هزله النوك بيه تميل.. طريجي بعيد ويتعب
والاكثر بعد بهواي.. منضر راسك يشيب
ليش ع الرمح خلوك.. مكانك كلبي يحبيب
كلما أقترب للراس.. أشمن ريحك الطيب

الحـادي مـن ابجي يعـثر الناكه
وشلون خويه بحالي الك مشتاكه
ماتصبر أختك بعد ماكو ملاكه؟

عالنوك أنام .. ماعدنه اخيام
عشنه الاوهام.. يردلنه حسين
«»«»«»«»»»«
دخلنه الشام بس شلون.. سبايا أمكيده ايدينه
طبو بينه خويه بسوك.. وكلها تباوع علينه
دفهم ماسكت يحسين.. ننكط خجل ضلينه
والاكثر بعد من هاي.. قصر الطاغي طبينه

ابكـل صـلافه يكلي وين اخوانج
شاء القـدر مسبيـه ضـل عنوانج
ويكضي العمر حسرات يم عدوانج

حسين ومادام.. يادنيا ايام
عشنه الاوهام.. يردلنه حسين
«»«»«»«»»««
مصطفى ستار العبادي