خدت دووش سخون يرخيلها بدنها بعد يوم طوييل متعب ومعبي حركة.. صلت العشاء والوتر وخشت لسريرها مشتااااقة للنوم الطويييل..
وفي لحظاتها الأخيرة من النعاس تفكرت نرجس والحارث ومعاذ وريم وابتسمت من قلبها…

(وشن فيه قلبك غير الحب الكبير اللي يسد حتى الزنقة والعاصمة كلها مش غير عيلتك بس ياوقار)…

_فلاش بااااك…

بعد شربوا قهوتهم وهدرزوا مشوااار مع كل الحاضرين في الصالة..
ناضت وقار رفعت السفر ورقت للدور الثاني..
وهي راقية من الدروج نادت نرجس بصوت عالي عمدًا..
وقار: جوسة تعالي معاي ساعديني..
نرجس شدت ضحكتها وفهمتها..
نرجس: هيا هي جااااية..
مشت لدار وقار خدت عبايتها ووشاحها ولحقت وقار للدور الثاني..
وقار واقفة في الصالة فوق اللي كانت بين ديار النوم..
وقار: هههههه منظرك تقول ليلة حفلتك..
نرجس: اسكتي معاش تزيديني قريب نتبخر..
وقار: هيا كلميه فيسع…خلي ندير دورتي على خوتي لا يرقوا هني..
نرجس ايديها يرعشوا واضحات.. كتبتله رسالة..
("تعالى فوق")

كان الحارث مقعمز في الصالة مع الشباب والرجالة كلهم..
شاف الرسالة شد ابتسامته وشوية وناض..
رقي للدور الثاني من دروج جيهة الجنان مش من الخوش الداخل..
وقار: قلتيله؟…
نرجس هزت راسها..
وقار: حتى لسانك تبخر هههههه اول مرة نشوفك قطيطيسة بلون البسيسة هههههههه
نرجس مسكرة على سنونها وتتكلم: وقار انتلفييي…
نزلت وقار وماخلتش حد لاحظها نازلة…
واقفة فوق وادور وترعش وتفرك في ايديها من التوتر..

شوية وخش بهدوء من باب الصالة متع الدروج البرانيات وقربلها بالشوية: بسسسس..
انخلعت وسكرت فمها ماتبيش تعيط..
الحارث: اسس بتفضحينا..
مد يده ليها: تعالي..
قعدت نرجس تشوفلها ومترددة تحط يدها في يده..
الحارث: خيرك مش من اليم يم راهوا .. (اليم يم اللي ياكلوا في البشر)..
نرجس شدت ضحكتها ومدت يدها بالشوية..
شدها بقوة تي تعالي بلا سلاطة..
خش للدار وخلاها مفتوحة..
وهي رخت يدها ورجعت تفرك في صوابعها بتوتر…
الحارث: غريبة مش زي في الشات قريب تاكليني ولسانك هك طوله..
نرجس: واضحة فيه فرق..
الحارث: شكلك من قريب محلاه..
حطت يدها على جبهتها: بدي هاا..
الحارث: هههههه الخرارة ولا؟..
نرجس: بننزل مانقدرش نعطل..
الحارث: باهي كيف رقيتي هني؟..
نرجس: تو نقولك غير خلي ننزل بنروح خلاص..
الحارث: باهي تمام المهم شفتك❤️…
جت طالعة شد يدها..
نرجس انخلعت ورعشت..
الحارث: سامحيني خليتك اديري هكي لكن خوديها كلمة راجل حتكوني حلاله برضاك وراحتك..
نرجس حست روحها سخنت وتوترت وترعش وتخلطت عليها وابتسمتله وكملت طريقها نزلت..
لاقتها وقار طول..
وقار: شنو بتروحي؟..
نرجس: اي خلاص ليل..
سلموا على بعض بوسات.. ومشت نرجس تسلم على الباقيين وخدت شنطتها وطلعت..
وفي الطريق تمشي وتشم في يدها كانت ريحة الحارث فيها.. تشم باستمرار وكأنها تستنشق فيها لقلبها.. وتبتسم..❤️
لين وصلت للحوش…

…..
رجعنا للوقت الحالي..
ولبريطانيا..
هويدة في الكوجينة ومعاها مراد وعبد الرحيم..
هويدة: قولولي خيركم هكي وجوهكم ماتتفسرش..
عبد الرحيم: اششش نقصي صوتك ردي بالك امك تسمع..
هويدة زادت خافت..
مراد: جانا واحد في المكتب.. خش وسأل من فيكم مراد…..؟
استغربنا.. لما لاحظنا قال انا من طرف خوه محمد..
انا نضتله طول قعذت نقوله وينه وشن صايرله وكيف عايش ودوة زي هذه…
قالي انا موصيني نوصللكم الأمانة هذه لما يجي وقتها..
مدلي زرف ومشي..
هويدة تسمع وعيونها مفتوحات: باهي وبعدين! اعطيني الزبدة يامراد رجليا معاش نقدر نوقف…
عبد الرحيم شد في كتافها ويشوفلها..
مراد: محمد توفى…

_ زنقة الحُب والرمان..
_الجزء السابع والثلاثين…
_يتبع…

……..
في السيارة كانوا العرسان في طريقهم لحوشهم..
في رواااق تام.. الجو كان صقع ومطر تصب بالشوية..
وكان وقت غروب.. والأغنية اللي كانت مرافقتهم ديما ( الحب اللي إنت أوله مابينتهيش ❤️)…

ماسك يدها وبحنية مفرطة يبوس فيها كل شوية وهو يسوق..
وهي عيونها مرة في المطر ومرة في فرحتها يلي فازت بيها.. واللمعة اللي في عيونها بارزة هلبا وكأنها تقول ياحظي الحلو من كل الدنيا ربي يديمك ليا طول العمر?…

معاذ نقص شوية في صوت الأغنية: ها وين نمشوا توا ؟…
ريم: مش قلت للحوش حبيبي؟…
معاذ: نبي نغيرلك جوك ياعمري انا ليك هلبا ماطلعتيش..
ريم: باهي نروحوا للحوش وانظموا وضعنا وبعدين نطلعوا الليل مايتمش في الشتاء…
معاذ: حاضر.. إنت ماتطلب ترا تؤمر أمر…
ريم بضحكة: إنت حاجة لازم إنها تستمر …

وكملوا لحوشهم…

في مدينة ثانية من مدن العاصمة..
في مكالمة فيديو..
هبة وهدى يهدرزوا على هويدة وأمهم…
هبة: شني مشيتي يما عاينتي؟…
أمها يادوب تتكلم لأن الجلطة مأثرة على لسانها: ايي توا نراجوا التحاليل والصور يطلعوا وشن يقول الدكتور..
هدى: ليكم قريب شهر شن قريب هو شهر سكر وهذا وين درتوا تحاليل؟؟..
هبة: ايي احني قلنا حتى قريب يروحوا..
هويدة: مراد لهي في شغل ثاني قال إنه مستعجل هلبا وهذا وين فضي لأمي..
هبة مدت شواربها مش عاجبها: مفلحه ياكبدي بالك عنده مصلحة فيه هذا علاش؟..
هويدة: سلطي حتى انتِ مرات حاجة ماتراجيش ومهمة هلبا..
هبة: معقولة ماقاللكمش؟!…
هويدة: ماقالش..
هدى: غير خلونا منهم توا وريني كلبوزي استاحشته هلبااا..
هويدة: شن نوريك ?؟…
هبة: فدغولك..
هدى وهبة: هههههههههه
هويدة قلبت عيونها عليهم: اسمه حيدر لو سمحتي انتِ وياها وياها..
هبة: حاشا النعمة شن هالإسم مالقيوتش غيره؟!..
هويدة: هو يبيه وعاجبه.. حلو اسم ولدي سكري فمك ايييواه..
هدى: تي وينه باهي!..
هويدة: كيف رقد لما ينوض نصورلهولكم…
هدى: وين مراد والنسيب مالا!؟…
هويدة: طالعين بيجيبوا عشي ليهم ساعة..
هبة تفكرت طنجرتها : هيييييي غبارتي… وناضت تجري..
سالمة: اللطف خيرها؟!..
هويدة تلفتت لأمها: واضحة يما مشيطة الطنجرة مانبيلهاش تفكير..
هبة من الكوجينة ترد: مصححححح وجهك والله….
هويدة: اهم جو هيا بنسكر انا نبي نتعشى قريب نتوفى من الجوع..
هدى: باهي سلمي عليهم.. مع السلامة..
هويدة: باي…

سكرت وخشوا مراد وعبد الرحيم للدار اللي هما فيها..
وجوههم ماتتفسرش.. لاحظتهم هويدة..
هويدة: خيركم؟!…
مراد انتبه ومايبيش أمه تعرف: ااه شني خيرنا شيء..
عبد الرحيم اشر لهويدة من ورا أمها : ?…
هويدة سكتت وقلبها يرجف خايف..
وتشوفلهم وهما يادوب ياكلوا بالسيف…

……..

خشوا لحوشهم بعد داروا دورة بالسيارة تحت المطر وفي أجواء رومنسية تخطف البنادم من قحالة العالم برا…
خشت للدار حطت شنطتها على السرير فتحتها وكيف جت بتطلع باكو صغيرون جاها حضنها من وراها ولف ايديه على بطنها وخصرها… واتكى بلحيته على كتفها ومتلفت لرقبتها..
ابتسمت وحطت ايديها على ايديه واتكت براسها على راسه..

معاذ يشم في ريحتها: اااااخخخخ قداااش استاحشتك…
ريم بنبرة دلع مع زعل: معاش تخليني بروحي هكي وتمشي باهي؟..
معاذ: أصلا انا تأدبت وتربيت ماعاد نعاودها الا وانتِ معاي..
قدم لرقبتها خدي منها بوسة طوييييييللة?..
وهي مغمضة عيونها وقلبها يدق من الأمان طااير…
تلفتتله وحطت ايديها على رقبته ويتبادلوا في النظرات بعيون مشتااقة شووق كبييير..
رفعت روحها على روس صوابعها وقربت خدت بووسة طوييييلة… لين نفسها انقطع..
حط ايديه على خصرها وجي بيقيمها في غمره..
ريم: هااا شوية بس حبيبي..
معاذ: شنو؟..
تلفتت للشنطة خدت الباكو الصغيرون..
عطتهوله وهي ساكتة ومبتسمة وتراقب فيه بنظراتها..
معاذ مستغرب: شنو مفاجآت وحركات..
ريم: هيا افتح..
فتح معاذ الصندوق الصغيرون.. كان فيه اختبار الحمل وسلسلة صغيرونة فيها مجسم مراة وراجل وبيبي…
قعد يشوف فيهم ومش فاهمهم في البداية.. بعدين قام عيونه فيها وضحك..
معاذ بضحكة: قصدك حامل؟…
ريم مبتسمة وتهز في راسها بـ اي..
قربها ليه حضنهااا بقووة ويعصر..
ريم تضحك وتحضن فيه واطبطب على ظهره..
معاذ: مش قتلك حاس انا ريتي كيف طلع صح!..
ريم: هذه عملتك طبيعي بتحس مش غريب..
قامها في غمره وغمزلها: يا أحلى عملة معاك نعاودها للأف ومانملش..
وعاشوا وصال الشوق الكبييير…….?

مع وقت العصرية.. وشتويًا كان الساعة ثلاثة..
واقفة في الكوجينة توتي في القهوة والشاهي بعد ماتريحوا شوية بعد الغدي..
معاها نرجس وريم ونساوين خوالها الزوز..
وقار: مشعارفة كيف بنوض غدوة للكلية حسني متهتكة متدقدقة مسحووونة…
ماجدة مرت خالها: ساهلة ماتمشيش..
وقار: وااو حل ..
نرجس: صح مش لازم تمشي مايضرش كان رقدتي هاليوم وارتحتي فيه..
وقار: مش عارفة، تو نشوف…
ماجدة لريم: شنو مافيش حويجة ياعروسة!..
ريم بضحكة: ووكك السؤال اللي ماكنتش نبي نتزوج على خاطره..
كلهم: هههههههههههههه
وقار تهز في حواجبها لماجدة: اصلا فييييه وبتجيبلنا وليد زي العسل…
ريم رافعة حاجبها: داراته ولد وهو قاعد ماتمتش خلقته باش يبان..
ماجدة ترد في الحركة لوقار: اصلًا حتى انا عندي حوييييجة…
نرجس: هههههههه بدت منافسة هي ولا شنو…
وقار: شنو خالي معاش بيبطل حويجات شوره هههههه..
سلفتها: بيشكلوا واحد من الاثنين ياكتيبة يافريق كورة..
كلهم: هههههههههه
وقار شادة الولاعة واتكتك بيها: اهو بدت ألسنة اللهب تتطاير بين السلفات ههههههههه…
مدت يدها نرجس وطقها في وقار ويضحكوا عليهم…

على خشة فهيمة للكوجينة: ماتقولوليش امتى قهوتكم وشاهيكم لينا بابور نراجوو.. خيركم تضحكوا على شنو!…
وقار: ماتعرفيش خير خالتي هههههه..
فهيمة: مادامك قلتي هكي معناها زدت عششت بنعرف…
ريم: مدايرين ساليطة عالسلفات..
فهيمة شافت لنساوين خوتها: أصلًا كناينا سمحات ماريت زيهم كناين.. تقول فيها بغرور..
ماجدة وسلفتها داروا حركة (سحنة فيك) وبحواجبهم…
وقار: ننننننن وحتقعدوا سلفات غيورات من بعض…
فهيمة: سقدوا هيا بنرقد…
ضحكوا عليها…
شوية ورن تليفون ريم شافت لقاته معاذ..
طلعت من جنبهم خشت لصالة المعيشة..
ريم: ايوا..
معاذ: اطلعي حبيبي معاش فيها..
ريم: ههههههه باهي حبيبي خلي نحطوا القهوة والشاهي ونطلعوا..
معاذ: مانبيش شيء غير نروحوا توا بس.. تو نشربوا مع بعض..
ريم: للدرجة هذه استاحشتني عمري؟!…
معاذ: تي لللأرررض تعرفي..
ريم: هيا هي اهو نلبس ونطلع..
معاذ: تم هي…

مشت لدار وقار تلبس في عبايتها ووشاحها وخدت شنطتها..
طلعت مشت للصالة اللي مقعمزين فيها كلهم بتسلم عليهم..
فهيمة: شنو على خير ماما!؟…
ريم: بنروح قالي هيا..
سلمت عليهم وطلعت…

فرقوا البنات القهوة والشاهي والحلو المشكل من هلبا انواع والمكسرات..
قعمزوا يهدرزوا.. جت رسالة لنرجس اللي كان تليفونها محطوط على الطاولة في الصالة.. ولما جت وقار بتحط السفرة على الطاولة جت عينها بلا قصد عالمسج كان ("دبري كيف نشوفك ضروري ") والرقم كان رقم تعرفه لأن رقم الحارث كان مميز وساهل ينزبط…
شافتها ودارت روحها ماشافت شيء..
تلفتت لنرجس..
وقار: جوسة تليفونك ..
قدمت نرجس خداته ورجعت قعمزت جنب وقار..
طبست وقار على جنب وهمستلها..
وقار: على فكرة نقدر نساعدك راه..
تلفتتلها نرجس مصدومة ومش فاهمة شيء..
وقار شادة ضحكتها: ماتقوليليش خيرك لونك يولي بسيسة لما تنخلعي هههههههههه…
نرجس تضحك ومصدومة معاش عرفت شن ترد..
وقار: اشربي قهيوتك على رواق وتو انظملك لمور ولا يهمك..
نرجس تضحك وخلاص: خطيرة انتِ راه كل مرة نكتشفك اكثر..
وقار قعمزت تقعميزة الثقة وتهز في حاجبها وتضحك وتشرب في القهوة..

في زِحام يومك، من روتين وأشغال ومواضيع، إياك أن تغفل على القرآن، القرآن صاحبك اللي بيشفعلك يوم لا تنفع الشفاعة إلا لمن ارتضى…

فاتت الربع ساعة في طريقهم..

عند عيلة جلال…
اب جلال: انا خلاص بنوض ندير حل مش معقولة لتوا الساعة قريب الثنين وماتكلمش!…
نوارة: شن بدير!…
اب جلال: بنمشي لحوش جميل أكيد واصلين وهو معاهم..
لحظات وكانت السيارة مدرسة قدام الباب..
وأب جلال كان في طريقه للباب بيفتحه وسمع صوت سيارة..
فتح الباب لقي جميل في وجهه كيف بيطقطق…

قعدوا يشوفوا لبعض بلا أي رد فعل لكل واحد منهم…
وحذيفة كان مسند جلال على كتفه وجاي بيه…

فاتوا دقايق وأب جلال مش عارف شن يقول وماعنداش أي ردة فعل للافعل أصلاً…
لحظة وتكلم جميل: السلام عليكم… مد يده لمصافحة أب جلال..
أب جلال شاف ليد جميل وشافله وسلّم عليه..
اب جلال: وعليكم السلام…. ووخر عطي المساحة لجميل..
قدم جميل خش للحوش.. وجلال يشوف لبوه اللي كان جاي للباب مع حذيفة..
يشوفله ويراجي في أي رد فعل منه..
أما بوه فا مادارش لولده أي تعبير غير انه شافله بطرف عينه وخش للحوش..
وكله على عين حذيفة اللي مركز فيهم.. بعد اب جلال عطي بالظهر لولده شد حذيفة على كتفه وطبطب عليه كتعبير للأسف..
وكملوا طريقهم خشوا للحوش..

كان كله على أنظار البنات وأمهم من روشن الكوجينة اللي يطل على الجنان.. ونوارة تسحن في روحها على جميل وكان في يدها الموت راهو طلقتها عليه..

……
في المربوعة..

جميل: انا اليوم جيتك والجية مش فاضية، عارفك تفكر كل مرة في فكرة ومش لاقي جواب، وعارف انك متحزم الغضب في نفسك لكن كاتمه، وانا حاس باللي تحس بيه وفاهمك مزبوط.. وللسبب هذا انا جيت باش نقولك راني بريء انا وولادي من كل اعتقاد حطيتوه علينا..

أشر على جلال..: وآهو ولدك موجود قدامك وهو يحكيلك كيف جي تبرعه كانك مش حتاخد منا الكلام بنظرة صدق خوده منه…

جلال: اللي درته انا يابوي مش نادم عليه بكل ومش حنندم، صاحبي عمر عنده عليا دين ورديتهوله، وانا راهو قصدًا ماقلتلش لحد من العيلة لأني مقرر ومصمم على تبرعي..
يعني في النهاية هي كليتي والعبي عليا انا بنعيش بوحدة..
وانا راضي.. وانتم من شنو خايفين ولا راقيلكم؟..
كانكم على الموت راهي تجي حتى للصحيح اللي ماطاقاته تكة مرض ولا عمره قال اه..
وشهادة لله عمي جميل وولاده سكروا روسهم مانديرها..
لكن انا عاندت وألحيت..

بوه يشوفله ويغير في نظراته بين حذيفة وجميل...
شوية وعمّ السكوت المربوعة..
تكلم حذيفة: وهذا احني ياعمي جيناك لعندك وهي سخونة لضرورة نفهموك اللي لينا واللي علينا..
الكل يشهد شهادة حق إن جلال الله يعطيه الصحة قرر وشد في قراره قدام الكل وحلف مش حيروح الا والكلية الثانية عند عمر..
بعدين ياعمي لو تحساب عمر توا متعدي للخطر راهو حسبانيتك غلط.. لأن حتى اللي زرع كلية أو أي عضو جديد خشله من جسم ثاني فيه احتمالية بنسبة 50% إن العضو مايتأقلمش مع الجسم ويسبب مضاعفات خطيرة هلبا…
واحتمالية سلامة اللي تبرع هي الأعلى، وهذا كلام العلم والطب وزيد استفسر بروحك..

أب جلال ساكت ويسمع ومن داخله حاس بكلامهم راكب في مكانه الصح ومافيشي ولا غلطة..

قعد يهز في راسه وساكت..
جلال: ماتبيش تقول شيء يابوي؟!…
شافله بوه وغيره نظره لجميل: اللي بنقوله حاجة أهم..
أكيد سمعتوا باللي صار الأسبوع اللي فات، لما مشيتلك للحوش ومالقيتكش ومعاي المراة…

هز راسه جميل بأسف: سمعت سمعت…
اب جلال: هذه امسحها في وجهي انا وحقكم عليا.. ولا كنت حاسب للي صار أبدًا..

جميل: معليشي حصل خير وان شاء الله معاش تتكرر بس..
وهيا انا نستأذنكم واهو ولدكم وصل بخير وسلامة وربي يحفظه شهادة حق إنه راجل في الرخاء قبل المواقف..

جلال جي نايض: خليك اشرب قهوة ياعمي..
حذيفة وجميل: لالا مشكور.. بارك الله فيك خليك مع عيلتك يبوك..

حذيفة وجميل: هيا نستأذنوكم… مع السلامة..
طلعوا وتوجهوا للباب ومنها للسيارة..

ناض جلال بقلة حيل وجهد وبوه جاه شد يده يساعد فيه..
لما وقف حضن بوه بقوة.. وبوه عيونه تلمع بالدمعة ومش قادرة تنزل..
ولا منهم قال كلمة….
شوية وطلع معاه من المربوعة.. خشوا للحوش وأمه تلقاته من الباب تحضن وتبوس وتبكي…
جميلة وجيهان وراء امهم يشوفوا لخوهم وشادات دموعهم..

أب جلال قبل مايطلع: مانبيش نسمع ولا كلمة على الموضوع لين نطلع ونفس الشيء لما نروح مانبيش الموضوع ينفتح اييواه.. شاف لمرته: انا كلمة وقلتها..
قعدوا يشوفوله وهو خش لداره..

في الصالة..
جلال جي بينوض بصعوبة..
جنبه عمر: خيرك ؟..
جلال: خلاص هو هداكا لازم نروح أكيد مشغولين عليا هلباا..
عمر اشر لبوه بيده..
قدملهم جميل: خيركم؟…
عمر: جلال بيروح قال..
جميل: مازال خليك تتغدى وبعدين ساهل..
جلال: سامحني ياعمي فضلك واصل والله العيلة مشغولين..
جميل هز راسه: تمام هي..

رجع جميل للرجالة واستأذن منهم..
وأشر لحذيفة بعيونه وفهم عليه وناض وراه…
مشي حذيفة شغل السيارة..
وبوه شاد في جلال وطالع معاه..

شافلهن بسام كان في بلكونة داره يهدرز في ليان…
ركبوا السيارة وتحركوا…

**فاتت الربع ساعة في طريقهم..

عند عيلة جلال…
اب جلال: انا خلاص بنوض ندير حل مش معقولة لتوا الساعة قريب الثنين وماتكلمش!…
نوارة: شن بدير!…
اب جلال: بنمشي لحوش جميل أكيد واصلين وهو معاهم..
لحظات وكانت السيارة مدرسة قدام الباب..
وأب جلال كان في طريقه للباب بيفتحه وسمع صوت سيارة..
فتح الباب لقي جميل في وجهه كيف بيطقطق…

قعدوا يشوفوا لبعض بلا أي رد فعل لكل واحد منهم…
وحذيفة كان مسند جلال على كتفه وجاي بيه…

_رواية زنقة الحب والرمـّان..
_الجزء السادس والثلاثين…
_يتبع…

*في ضفة ثانية من الأجواء العكسية..
يراجوا في اتصال من ولدهم وماجاش..

نوارة كانت متكية ناعسة من التعب وفاقت على صوت راجلها…
أب جلال: زعما وين هالولد ماقالش تعالولي وصلت!..
جميلة: معناها قاعد ماوصلش يابوي..
نوارة ناضت قعمزت وحاطة يدها على راسها: شوف اي حد من ولاد اللي مايسوى هداكا..
اب جلال: ماعنديش ارقامهم ولا رقم بوهم..
جيهان: باهي جربوا اتصلوا بجلال!…
اب جلال: ماهو لين تقوليلي ولا؟..
قعدت تشوف وساكتة..
نوارة: خيره مايردش؟.
اب جلال: يعطي مقفل وخارج التغطية….
جميلة: بالك مافيش تغطية راجوا مكالمة منه وخلاص…
…
وجلال سكر تليفونه بأمر من جميل للاحتياطية…
…

استمرت أجواء الزكرة والتموا عليها ولاد الجيران الكبار والصغار وكلهم يسلموا ويتحمدوا بالسلامة..
بعد ساعة إلا ربع من الأجواء السعيدة..
خشو الكل للصالة الكبيرة الخاصة بالإستقبال ودخلوا معاهم كل من جاهم..

وبدوا البنات يصبوا في العصير ويوتوا في الشوكلاتة..

ونبيلة وفهيمة والحاجة لطيفة وريم مشو للجنان قدام الدروج وجوهم جميل والولاد..

بسام جاي مع عمر وحاط يده على جنب عمر وعمر متسند على خوه ويمشوا بهدوء..
قدمتله أمه حضناته…
تبكي وتحضن وتبوس في راسه وكتفه..
وهو دموعه نزلوا وفيسع مسحهم وماقالش ولا كلمة..

ووقار تسلم على بوها وتحضن فيه..
معاذ يسلم على حناه ويبوس في ايديها..
وحذيفة يسلم على خالته..
شوية معاذ جي لريم سلم عليها باليد ويادوب لف ايده على كتفها وهمس في ودنها: استاحشتك نار راني❤️?..
ابتسمت وخدودها ولو كرزيات وتشوفله..
رخاها ومشي لأمه..
وتبادلت الأحضان بين بعض..
وقعدوا يهدرزوا لدقايق…
شوية وجت نرجس بتنادي وقار تقوللها قولي لواحد من خوتك يجي ياخد السفرة.. وشافها بسام وحول عيونه والحارث برضوا شافها..
وخرت تجري مسكينة وهي ماتندريش عليهم.. قعدت متحشمة..

جتها وقار..
وقار: خيرك وليتي زي لون البسيسة اسم الله!…
نرجس: هههههه مانخسابكمش هني تحشمتتتت.. شافوني خوتك..
وقار: ههههههه عادي خلي يشوفوك باش ياخذ واحد منهم..
نرحس شقلبت عيونها وشادة ضحكتها: ايياح.. اسكتي اسكتي..
وقار بنظرة تشكيك ومعاها الحواجب يهزو: هييي هيي فوتيه على حناي لطيفة.. ياروحي عليها …
الزوز: ههههههههههههه
نرجس: بري ناديهم ياهدوا السفر بري…

**على الساعة الحادية عشر صباحًا…
في حوش عيلة مراد…
راقدات في آخر هدوء وآهر راحة..
هبة وهدى ومعاهم دلال مرت مؤيد وصغارها..

كانت تشوف في روحها قاعدة في خوشهم ومامعاها حد..
الحوش كبير أكبر من توا ومنظره مظلم ومهجور ومافيه حد غيرها.. تدور فيه من مكان لمكان من دار لدار.. تسمع في صوت بكاء ومش قادرة تعرف لمني…
والصوت مرة مرة ينادي في محمد.. يبكي وينادي في محمد..
وشوية خش مراد يجري ويعيط ويقول بصوت عااالي هلبااا أميييي….
فاقت هبة من الحلم وعيطت..
انخلعوا دلال وهدى والصغار معاهم..
دلال: خيرك بسم الله عليك…
هبة تتنفس بقووة وحاطة يدها على قلبها وترعش..
هدى ناضت قعمزت وتساوي في شعرها: خيرك شن شفتي!..
هبة تتعوذ من الشيطان: أعوذ بالله منه.. مانعرفش حلمة خاشة في بعضها ومش مفهومة..
دلال: هاكي اشربي امية وكان ما ارتحتيش نوضي صلي ركعتين..
شربت امية وقعدت تذكر وتتعوذ وتستغفر..
هدى شافت للساعة: حي عالوقت الطناش ياعيلة واحني راقدين في آخر سبات..
دلال: اي والله حق هذا الشتاء طبيعي..
خلي انوض نبدا في الفطور فيسع باش نلحقوا نديروا غدانا…
وناضوا على طول هدى وهبة يضموا في الحوش ولاهيين بصغار خوهم..

وطول الوقت يخطر على هبة الحلم ثاني وتتعوذ من الشيطان وماتبيش تحطه في بالها ولا حتى تفسره..

على تمام الساعة الطناش وشوية..
كانوا المسافرين واصلين للمطار..
والحارث وبسام مشولهم يراجوا فيهم قبل وصولهم بوقت بيستقبلوهم..
وجميل نبه على جلال إنه مايحكيش لعيلته على وصوله مخافة لو يصير أي ردود فعل من عيلته قدام الناس ولأن جميل ناوي على شيء بيديره..

تلاقوا الأحباب بأحبابهم بعد غياب مادامش أكثر من شهر….
تبادلوا الأحضان والتحميدات والإبتسامات..
لما وصل الحارث بيسلم على جلال وقف قدامه ضربله تحية الجندي وصفقله والكل شافوا بسام وقعدوا يصفقوا..
وجلال يادوب مبتسم..
قدمله بسام يحضن فيه ويطبطب على ظهره..
بعد ختموا الجوازات وخدوا شناطيهم ركبوا السيارات وتوجهوا للحوش..

في الطريق وفي السيارة يلي كان يسوق فيها بسام معاه جلال من الخلف ومن قدام معاذ..
بسام دار اتصال: الوو!.. ها وين!… كل شيء تمام؟…
مية مية منورين.. ماشي.. وسكر الخط…
معاذ انتبهله: مني هذا؟…
بسام يسوق ويشوف للطريق: تو تعرف لما نوصلوا..
شوية وجت رسالة لمعاذ.. فتحها..
"الحمد لله على سلامتك ياروحي انا هذا وين حسيت عندي روح وقلب مطمن❤️"..
ابتسم وسكر التليفون..

وفي سيارة الحارث معاه بوه وحذيفة وعمر…

……..
خمسة دقايق ويوصلوا المنتظرين للحوش…
واقفين في الجنان كلهم..
نبيلة واختها ووقار وريم ونرجس وأمها ومرت نوري والحاجة لطيفة وكناينها الثلاثة وجيران الزنقة القراب..

فجأة سمعوا تطبيلة على الطبول.. ومعاهم دفوف..
وقار انتبهت وعلى طول عرفت إنها زكرة ضحكت…
الحاجة لطيفة: العفو عرس منو عندكم في الجيهة يانبيلة!!..
ضحكت نبيلة: هذا عرس عمر يا أمي..
الخاجة لطيفة مقعمزة على الكرسي وحاطة ايديها الزوز على عكازتها وتشوف لنبيلة: دايرين حتى عرس كبير وحتى هو ماقلتوليش عليه!!.. اابَيْ عليك ضنوة بنوض نروح انا علاش جاية اصلا..
قعدوا يضحكوا كلهم…
نبيلة بهمس: ها بدت…
فهيمة: غير وسعي خاطرك ياحاجة غير وسعي بالك مش هكي..
الحاجة لطيفة: شن هو اللي نوسعه كان العين الحمراء ليكم بس ماتحسبوا ولا تعبروا خزززيي..

وقار حست حناها جديات جتها تجري: غير قعمزي ياحناي يبصرو عليك راهو هذه زكرة جايبها بسام على خاطر عمر..
قعمزت الحاجة وقارنة حواجبها فيهم..

وبدت الزكرة تتقوى أكثر.. وصوت السيارات خاشات للزنقة ويكلكسوا…
ناضت نبيلة نطت نط وجرت لقدام الباب..
ومعاها وقار..
الزكرة بصوت واحد:
ياناس اليوم باركوله..?
وع السلامة تحمدوله..?

نزل جميل طول مشي للباب ينادي في نبيلة..
لقاها ورا الباب.. سلم عليها وباس راسها..
نبيلة: الحمد لله على السلامة ياغالي..
جميل: الله يسلمك ويحفظك لينا
هيا خشو شوية معانا جلال صاحب عمر..
نبيلة: نبي نشوف عمر ياجميل قلبي نار…
جميل: باهي باهي غير يخشو تو يجيك..
نبيلة هزت راسها بإيجاب ورجعت للجنان..
قالتلهم وخشوا كلهم..

وقار شافت لنرجس.. ونرجس فهمت عليها طول..
لبسوا شباشبهم ورقوا للدور الثاني للبلكونة..
ريم لاحقتهم: استنوني ياسفتولات خزي…
نرجس: انتِ خليك مع النساوين..
ريم: مصحكم والله لما نجي هي..
نرجس ووقار: هههههههه
وقار: بالشوية عليك لا اطيحي..
ريم بنبرة تكشيخة وببصارة: حملت انا مش وليت عيّلة..
نرجس ووقار وريم: ههههههههههه
ركبوا للبلكونة يتفرجوا عليهم..

جايبين كراسي لجلال وعمر..
والباقيين واقفين..
بسام يصفق معاهم وخش يرقص بينهم..
ومعاذ واقف يتفرج..
وحذيفة مقعمز حتى هو..
والحارث واقف يصفق..
وقار فتحت تليفونها تصور..
وريم ونرجس كل وحدة هايمة بقلبها وين مايشوفوا عيونها..

وقار انتبهتلهم ومش غريب تشوف ريم سرحانة في معاذ..
لكن الغريب ان شافت نرجس تشوف ومبتسمة وحاطة يد على خدها وسرحانة برضوا..وفهمتها

ابتسمت عليها ورجعت تصور…

من بريطانيا وقتها أقلعت الطائرة من مدة ساعتين تقريبًا كانوا فيها جميل وولاده وجلال..

أما عبد الرحيم ومراد فمازالوا قاعدين على خاطر علاج سالمة أم مراد…

…..

في حوش عيلة جلال..
كانت الأجواء عكس اللي في حوش جميل تمامًا..
الأم ترحي من داخل على عيلة جميل تامة، وبوهم مش مفكر شن يدير ولا مبين أي فكرة في باله.. ولابد إنه حيفعل طول..

جميلة وجيهان كانوا متأسفات على حال خوهم وماوصله فجأة..ولكن هما الزوز بس عارفات مزبوط إن جميل وولاده مستحيل يجبروا جلال على التبرع ولو كان عمر حيموت لا قدر الله..

نوارة أم جلال مقعمزة تبكي وتراجي في ولدها يوصل…
حتى بعد كلمها وطمنها بدال ماتهدى زادت نارها ركبت..

جيهان لجميلة: توا أمي علاش تبكي!.. تحساب مايعيشوش بكلية واحدة ولا شنو!..
جميلة: أكيدة تعرف لكن هوينا لازم يحافظ هلبا..
جيهان: ربي يستر وخلاص انا نفكر في بوي شن بيدير ومش قادرة نوصل لفكرة..
جميلة: لالا مانتوقعاش يدير حاجة اللطف..
جيهان: اي باه.. اطمني مالا..

……..

كان في الطريق ماشي لحناه بيجيبها ويكلم في حبيبة عمره..
بسام: اسمعي راهو مازال مطول التصوير اهو قتلك من توا..
ليان: لقداش معطل زعما ترا؟…
بسام: هكي حاجة شهرين ثلاثة..
ليان: لااااااع تبصر انت.. قول نمزح بالله..
بسام: والله ياحبي انتِ عارفة الضغط اللي انا فيه واهو خوي بيوصل وبنلهى معاهم في الحوش عرفتي كيف يعتبروا فيا زي أصغر ولد ماعندهم حد غيره يبعتوه طبعا حاشاني..
ليان تضحك..
بسام: اضحكي اي باهي.. وزيديها توا نخدم على مشروعي ياروحي اللي ساكنة بين ضلوعي…
ليان: Game over ياسي بسام راهو اللسين هذا مش عليا هههههههههه..
بسام: شن فهمتي ياهمي ترا؟..
ليان: تمشي فيا بالكلام باش نقولك باهي ونلقى روحي نساير فيك بالشهور بلا تصوير وتخيلها الشغل يرقد؟..
بسام: وخلي يرقد ياحبي مش لازم يرتاح؟..
ليان: وااااك بسام مبردك مبردك خليك جدي حتى شوية اووفففف..
بسام: للأسف ياعمري مانقدرش نكون جدك لأني حبيبك نييههههههههههه….
ليان بدال ماتتعود على البرادة في كل مرة تزيد تحرقلها في دمها أكثر… وفكرت تحرقله دمه تردهاله…

ليان بصوت جديات: امممباهي معناها يا افندم يامودل إنت مابين كملت إجازتك تو نشوف مودل ثاني غيرك…
بسام درس قدام حوش جده.. وشد فرينو قوي…
بسام: يفتحلك ربي ان شاء الله..
ليان باستفزاز: ان شاء الله انا وإنت حبيبي..
بسام: معاش تعاوديها بصارتك هذه يا للّة.. للحيطة والحذر بس…
ليان هي مكلمة استفزاز لكن ماتبيش تبين إنها خافت: ومن قالك بصارة!…
بسام خبط يده على الدومان وتنرفز ويكشخ عليها ويده تتحرك في الهواء: باهي جربي ديريها هي جربي وشوفيني شن ندير… وسكر عليها وقعد خاط ايديه على الستيرسو ويشوف القدام شوية ًوانتبع لخد واقف جنب السيارة..
تلفت لقاه خاله واقف يشوفله بعدم فهم…
ابتسم بسام على طول ابتسامة عريضة ونزل الروشن..
بسام: سسسلاموعليكم ياخال تي شن الحال..
خاله: فيك حاجة ولد اختي!.. نرفعك نعاينك!..
بسام نزل من السيارة وسكرها: والله الا ماشية ما أدور شي..
وطق يده في يد خاله… وخاله صايرله ستك..
خاله: جاي بتاخد جداك؟..
بسام: ان شاء الله اي..
خاله: باهي ارفع معاك ماجدة (مرته) انا عندي مشوار وبنعطل عليها وكلكم بتكونوا غادي..
بسام: عادي اي ولا يهمك.. خلي نخش لحناي ونقوللها الخبر ونتلقى الهزايب نيابة على أمي…

"تسريع أحداث"
"بعد مرور أسبوع تمامًا"..

نايضة بكري هي وأمها وحاسوا حوستهم في الحوش ومعاهم فهيمة وريم ونرجس اللي زي وخيتهم من قبل ويابال السبب الأكبر بدي الحارث..
مطيبين الغدي رز بالبصلة ومعاه امبطن وكفتة محشية ومحاشي وبازين..
نبيلة ماتعرفش تستقبل حد زايرها بالعافية إلا وتكرمه إكرام كبير فما بالك اللي زايرها فلذة كبدها..

ريم ونرجس ووقار كانوا موتيين العصير والحلو وسفر القهوة والشاهي يادوب على تطييبهم بس وعلى جنب الفواكه والمكسرات..

وقار كانت طالعة من الكوجينة تجيب في سفر كبار لتقديم الغدي.. خشت للكوجينة اللي كانت فيها نرجس وريم..
لقت ريم تقيم في شيشة امية سبعة لتر بتحطها على الرخامة..
خشت عيطت طول
وقار: لاااااا شديري يانهاري انا..
ريم ونرجس انخلعوا
ونبيلة كانت جايتهم من صالة المعيشة سرعت خطواتها..
نبيلة: خيركم يابنات شن فيه؟..
نرجس: شيء ياخالتي غير وقار خافت القهوة تفوج بس..
نبيلة: باهي علاش العياط هذا كله العفو.. سادنا خلايع ياماما..جيبيلنا قهيوة انا وخالتك في الجنان قبل ماتصب المطر منظرها مغيمة هلبا..
ريم: حاضر خالتي اصلا بنشربوا مع بعض احني كملنا حوستنا..
خلتهم نبيلة وطلعت..فجأة تذكرت انها مخلية تليفونها على الرخامة بتكلم بسام ضروري..
ريم لنرجس بابتسامة: كيف عرفتيني مانبيش خالتي تعرف إني حامل؟..
لقوها واقفة في باب الكوجينة ومدايرة يد على خصرها وتهز في رجلها ورافعة حاجبها وشادة ضحكتها..
نبيلة: ماتبينيش نعرف صار؟..
انخلعوا الثلاثة وقعدوا يضحكوا..
ريم متحشمة وتضحك: مش مانبيكش تعرفي.. انا قلت نخليها بعد يروح عمر ويرتاح بالك بس..
نبيلة: انا يابنتي مرتاح من يوم كلموني قالولي دار العملية على خير… ربي يهنينا كلنا ويفرحنا وتنوضي على خير وتجيبي أول أحفادنا..
معاش ادسي حاجة زي هكي على أمك بدات.. ولاتعرف؟
ريم هزت راسها بالنفي..
نبيلة: فالحة… تو نمشي نحرشها فيك انا..
شوية ضيقت عيونها وشافت لوقار:
نحس فيها فكرة وقار ولا؟..
وقار فنصت عيونها بصدمة: غر اشيي…
ضحكوا عليها نرجس وريم وأمها ..
وخدت نبيلة تليفونها من الرخامة وطلعت..

نرجس تضحك: قلتي للدنيا كلها مايقولوش وطلعت منك إنتِ ههههههههههههه…
يضحكوا عليها..
ريم: اسس بالله معاش تفكريني الموقف العبيط اللي انا اعبط منه اقسم بالله..

في الجنان على طاولة خشبية كانت فهيمة ونبيلة مقعمزات يهدرزوا..
فهيمة تتثاوب: ااااخخخ تعرفي ماجانيش نوم البارح بكل وتوا شوفي مفقعين من الفجر..وتوا بنطيح خلاص نشوف فيها كلها فراشات ومخاد طبية..
نبيلة: مالا انا اللي بيجيني نوم !.. زيك بالزبط..
نبيلة: بنتك الفالحة حامل وماتبيش تقول..
فهيمة فتحت عيونها وابتسمت: حاسة بيها راهو غير نراجي فيها منها.. علاش داسة مثلًا..
نبيلة: شورها متحشمة ولا شني…قتلي قبل بنقولك بعد يروح عمر ويرتاح بالك.. ربي يريح بالها بنتي..
فهيمة: سلمك وهنّيك وان شاء نشوفوا وقار عريّسة يا رب..
نبيلة: ان شاء الله يا رب.. اي تفكرت خلي نقول لبسام جيب حنّاك انا عارفة بتسبنا لكن عادي متعودين اصلاً..
على جية وقار والبنات..
فهيمة تشوف لنبيلة وعاضة شاربها اللوطي: حيه علينا حي لما توصل في جدي المرزوقي وهي تسب..
كلهم: هههههههههههههههه..
نرجس: علاش ماقلتولهاش باهي..
فهيمة: أمي فيها السكر مانقدروش نرعشوها طبيعي..
نرجس: ااه ربي يشفيها ويعافيها..
كلهم بأصوات متقطعة: سلمك وهنيك.. امين يا رب… ان شاء الله..

…….

سبحان الله
والحمد لله
ولا إله إلا الله
والله أكبر
-الباقيات الصالحات خير عند ربك ثوابًا وخيرٌ أملًا.

الحال كما هو عليه، من بعد اليوم اللي تعدت فيه نوارة أم جلال على عيلة جميل وحاولت تضربهم..
واليوم اللي الصاحب أثبت الكلمة بمعناها في وقت الصحبة ولت اسم بلا منفعة..جلال اللي تبرع لصاحبه وخوه بالغالي قبل الرخيص..

عيلة عُمر اللي قاعدين في الحوش يراجوا على أحر من الجمر باش يروح ولدهم سالم غانم بالصحة والعافية..

وقار بدت تمشي للكلية بعد اطمن بالها على خوها وفاتها أسبوع قراية تام.. مع العلم إنهم آخر مادتين فاصلينها على التخرج وتتويج شهادة الفخر يلي تحلم بيها..

فهيمة ماخلتش نبيلة بروحها نهائيًا.. يا اما جايتها من الصبح لليل هي وريم يا اما تقعد وتبات عندها..

وريم مشت هي وجميلة ووقار للعيادة دارت تحليل وطلعت حامل ?
وخدت كلمة من وقار وجميلة مايقولوا لحد..
تبيها مفاجأة لمعاذ، وخالتها توا تعرف بعد يرجعلها ولدها وقتها حتحسها الفرحة من قلبها..

ليان وبسام، نرجس والحارث.. الثنائيين الهاديين من اللخبطة اللي صايرة كلها..

وفيه من قاعدة تتوجع ليل نهار والجرح يسطر في قلبها قبل جنبها، وهي عارفة مزبوط إن دورة الدنيا خدت حق غيرها منها، وما اعتراف المذنب إلا حاجة تفرح المظلوم والمكسور وتنصفله حقه أحق انصاف.. سيرين يلي خوها قاعد في السجن يراجي في جلسة الحكم، الجلسة اللي بيقضي فيها القاضي جميل رجب بن عثمان حكمه..

وإلى جميل وأولاده وصحاب ولاده ومن نعم الناس والرفاقة،
قاعدين في بريطانيا لأسبوع ثاني لضرورة تعافي عُمر وجلال وقدرتهم على الحركة ولو القليل وباش يقدروا يروحوا بيهم للبلاد..