https://www.facebook.com/lkbylthny?mibextid=ZbWKwL

ضلع ضلع ــ مكسوره
تضل تضل ــ مـقهوره
فوك الجفن مسطوره
هضيمه ــــــ هضيمه
ـــــــــــــــــــــــــــ
زهرة عمري واسنيني
هيه النور البعيني
نبضات الگلب هيه ــ
وهيه دم شـرايني

مـن أنضرهه محنية
جن يشح هوا الريه
تنزل دمعـة اعيوني ــ
واشكبره الجرح بيه

علـي علـي ــ بيا موقف
شفت شفت ــ دم ينزف
وهـذا الـزمان وجـوره
هضيمه ــــــ هضيمه
ــــــــــــــــــــــــــ
عشـنه الحلوه والمره
اني فـاطمة الـزهره
روحيـن بجـسد واحد ــ
بضلعي أشعر الكسره

حيـدر حـاضـر الـشده
موصه ودمعتة بخده
ياكلبي وحزن كلبي ــ
بابي يـنوصـل حـده

گلب گلب ــ بيه جمره
حزن هـظم ــ عـالـزهره
ليش ابحقد معصوره
هضيمه ــــــ هضيمه
ــــــــــــــــــــــــــ
الغالي اليفكد الغالي
جرحه يعـيش للـتالي
بجـفي دافـن الـراحه ــ
يبقى الموقف ابالي

وكتي هوايه جارحني
ضيم وتعب شوفني
لآخر لحظة من عمري ــ
عالراحت يضل حزني

كضه كضه ــ كل حيلي
بچي بچـي ــ يمر ليلي
روحي تون مجبوره
هضيمه ــــــ هضيمه
ــــــــــــــــــــــــــ
حضر دمعك وانحب
وتخـيل وضـع زيـنب
شافت محسن الطايح ــ
شافت ضلع يتخضب

شافت عـينها الـحمره
وضحت بالوجه سطره
صاحت يـمه حاچيني ــ
بكلبي الـغربتچ حـسره

اضل اضل ــ بأحزاني
كسر كسر ــ عـنواني
بعيوني ضلت صوره
هضيمه ــــــ هضيمه
ــــــــــــــــــــــــــ
جرحي تبقى سالـفته
زهـرة عـمـرة عايـفـته
نار الفركة مـو سـهله ــ
كلبي اجروحة طايفته

طـفوا كمـرة ايـامي
وخـدي للدمع ضامي
مـاكو واحد ألـيحـمل ــ
الصار ويجري كـدامي

جفن جفن ــ يصب دمه
طفح طفح ــ كل همه
بيتي طفه كل نوره
هضيمه ــــــ هضيمه
ــــــــــــــــــــــــــ
يتراب الـكبر شـحچي
حـكي ألـطم وابـچي
انته الگاطع أنـفـاسي ــ
وانته الـنزلت دمـعـي

صـعبه جـدمي يتعـثر
هـذا آنة صـدگ حـيـدر
حالي مختلف حـالي ــ
ألشيلة ثـوبي ما أكدر

اجـوا اجوا ــ شـتموهه
غرب غرب ــ ضربوهه
كلبي الحزن كل دوره
هضيمه ــــــ هضيمه
ــــــــــــــــــــــــــ
تمت بعون أسد الله الغالب
العبد الذليل علي الكعبي

اسمع حديث ضلوعي
وركـز عـله مـوضوعي
داري عـلـي حـركـوها
ونزلت غزيزه دموعي

بيا دين آنة يطلبوني
روح الله ويشتموني
كلـمـة وإن أسـمـعـها
والسطره فوك عيوني

انـذال ومـابيهم رحـمـه
وين الخاين والمو زلـمه
هجمو عالدار وهضموني
مات ابني وماكالو زحمه

زهراء ويلي يازهراء
ــــــــــــــــــــــــــــــــــ
سر الحياة آنة اسـمي
كوثر لاجن صب دمي
وبـعـد الابـو خـلـونـي
ملجومه وابچي بهمي

لـمـن أجـو عـصروني
بكسر الضلـع عافوني
آنة الامـيـرة بعـرشي
بذاك الحقد ضربوني

اشكف سوط ونار بجفي
ومـارد الـظالـم لا يعـفـي
زيـنب ناحـت نـادت يمه
لجروحي المدمع مايكفي

زهراء ويلي يازهراء
ــــــــــــــــــــــــــــــــــ
محـسن وكـع عالغبره
عـشت الالم والحسره
فوك الترب ظل دامي
مـات الضوه الأنتضره

صـاح الحـسن يـايـمه
حيـلي الـوداع يـهدمه
حـنيتچ امـن افـكدها
بسنيني اكـبـر صـدمة

حيدر بيه يدرون موصه
ونتاحت الهـم هالـفرصه
مـا بيهم خـيـر يتـعـاتـب
وماعدهم كطرة البلكصه

زهراء ويلي يازهراء
ــــــــــــــــــــــــــــــــــ
النحره يصب دم باجر
شافـاني ضـل يكـابـر
بعيـونه شـفت الغـربه
وشافاني ليلي العاشر

مـعــتـازچ يـحاچيـنـي
بـس وحـدي لتخليـني
شاف الـضلـع متكـسر
من كلـبه ون احسيني

ضليت امسح دمعه عيونه
وباجر بالخـيل يـسحكـونه
كـل دمـعه التنزل لجروحة
مسجلتها الزهره ومضمونه

زهراء ويلي يازهراء
ــــــــــــــــــــــــــــــــــ
ركز بـعـد واسـمـعــني
صـعبه عـلـي يـودعني
حـيـله نـهـدم حـسـيـته
بضلمه ومـشه شيعني

بخطواته ويـلاه يعـثـر
الـيكدر صـبح مـايكدر
يـنـادي حـبيبة كلـبي
روحتچ سـيف بـمنحر

مـيته وهم بچتني جروحه
صعبه الواحد يـدفن روحه
حيدر دافن روحـه وراجـع
ضلت بس همـومه ونوحه

زهراء ويلي يازهراء
ــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

شهادة الامام الحسن العسكري
عليه السلام

بويه ــ ارحم كـلبـي مـايـتـحمل افراك
بويه ــ عيني لشوفتك يالغالي تشتـاك
بويه ــ أنه المهدي دمعي اعليك حراك
ـــــــــــــــــــــــــــــــــــــــــــ
عايفني طير ومذبوح ــ
هجرك يطشر بالروح
جرح فركه وموت غالي عذباني
يابويه انظـر للحـال ــ
طولي نحنه صار هلال
وهالـزمن ساعة مـماتـك شيباني
يالعسكري بيه شلون ــ
للمهدي ماتبقى عيون
من شفته طولك ابنعشه ودعاني
حاجيني يابعد العين ــ
اجل السفر رايح وين
بيه نار واني شـمعه وليك اتـاني

بويه ــ صيت الـدمع يـكبر فـوك الخدود
بويه ــ سفره الحزن بعدگ يبقى ممدود
بويه ــ هذا النـفس والله بروحتك ضاك
ـــــــــــــــــــــــــــــــــــــــــــــ
هبطت راسي ونـيت ــ
لجنة عيونك حنيت
مـات حيلي بـتنظارك ياكشختي
يابويه ياعطر الياس ــ
صعبه تراها الانفاس
ماأشوفك واشـكـبرها ياكسرتي
تـمنيت والله تـمنيت ــ
وياك امـوتن ياريت
ولا تضل النار تجري وي دمعتي
أول ضوه طمه تراب ــ
للحزن مفتوح الباب
اخ ياروحي الحزينه ويا غربتي

بويه ــ راحـه مـاتمـرني وانته مـدفـون
بويه ــ المن ضـاله مـن تـمشي الـعيـون
بويه ــ ظهر الصبر من ثكل الحمل طاك
ـــــــــــــــــــــــــــــــــــــــــــ
ماريده عمري ابلياك ــ
بـويه دلـيلي اليـهواك
حسرته ترسم جروحي ابهالمسيه
خليني اشمك ورتاح ــ
افراك وجـهك ذبـاح
وعفيه كلبي شـكثر يـتحـمل اذيه
ماي الحياة شمحلاك ــ
حكي اذا ون ونـعـاك
ورد روحي وانته راح تشح عليه
الفركه جبل فوك متون ــ
ماترحم اليشتاكون
بيني وبـينك وكـف سيف الـمنيه

بويه ــ متـعـود اجيـك واحـضنك حـيل
بويه ــ والله بغير ضيـك كل صبح لـيل
بويه ــ بيش اقنع دليلي اليمطر أشواك
ـــــــــــــــــــــــــــــــــــــــــــــ
هالروح بالشوك تهيم ــ
كـاتلها بغيـابك ضيم
اخ يابــويه رحيـلك كــسر ظـهري
انطر رجوعك يايـوم ــ
خليتني شكد ملجوم
دوم أشوفك وبحنانك يروه صدري
يبقى الابن دمعه واه ــ
ويريد ابوه مـا يلكاه
والحزن بالـروح بعدگ عاش تدري
ياعازتك وكت الضيج ــ
ينشف تره ليها الريج
من غبت عني وغلاتك ضاع عمري

بويه ــ وحـشه ومـاتسـدها غيـر عـيناك
بويه ــ كلب المهدي راح ابهالمسه وياك
بويه ــ اخ الـمـــوت لا مـا خـلـه عـشـاك
ـــــــــــــــــــــــــــــــــــــــــــــ
صعبه تره كلمة مات ــ
اوياك السوالف حلوات
يـالحنيـن ويـاك شيـرجع كـعـدتي
البيت ماريـده البيت ــ
بين الصحاري حتاريت
أبو صالح لاجن مدفونه ضحكـتي
اخ الحزن كلش طال ــ
ياحال متعـوب الحال
بويه بعدگ تحرك بروحي جمـرتي
يانور من يطفه النور ــ
مجبور انحب مجبور
وين أشوفك صوت دمعاتي ولهفتي

بويه ــ يفـراكـك جـرح كـلبـي والحـساس
بويه ــ حاجي المهدي شيب كلبه والراس
بويه ــ غـفـلـه ومـن اديـه شـلـون شالوك
ـــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

حزن حزن ــ طايفني
الأبو الأبو ــ عـايفني
ضيم وهظم شوفني ــ زماني
ــــــــــــــــــــــــــــــــــــــــــــــــ
كلبي الحاير الفاكد ــ دمعي والحزن وارد
لا ما ينتهي نوحي ــ مـني شـايـل الـوالـد
ضلت عيني تبچيله ــ وسفه رايح احچيله
تكبر غربتي وانحب ــ جرحي محد يشيله

ضوه ضوه ــ مفاركني
مشـه مشه ــ وحيرني
متعـوبـه آنة وشـيبني ــ زماني
ــــــــــــــــــــــــــــــــــــــــــــــــ
روحي تحترك شمعه ــ وتالـيتة الـعمر دمعه
كلبي الشايل الحيره ــ وينك بويه ضل ينعه
فضلك صعبه يتجازه ــ رحت وعازتك عازة
عايف عيني ملجومه ــ بس شوفتك معتازه

أعـز أعـز ــ من روحي
عفت عفت ــ بس نوحي
ولمن رحت عذبني ــ زماني
ــــــــــــــــــــــــــــــــــــــــــــــ
انته أنفاسي يالغالي ــ وانتـه نـبض دلالـي
موتك عبره بعيوني ــ جمره افراكك ابالي
فوك امتونه انشيلك ــ من اغيابك اشكيلك
ظلمه دنيتي ابدونك ــ ارجع ياضوه دخيلك

شفت شفت ــ تـابـوتك
حرت حرت ــ من موتك
بعدگ صدك مرمرني ــ زماني
ـــــــــــــــــــــــــــــــــــــــــــــــ
كلبي بضيمه يتنفس ــ من جيتك بعد أيس
حنيتك صدك راحت ــ ثوب الحزن راح البس
ورده وذبلت اغصاني ــ دهـري غـيـر ألـواني
الماي الجان يسگيني ــ بديره صحره خلاني

جـمر جـمر ــ يچويني
جرح جرح ــ يـأذيـني
بـهم وحـزن ضاهدني ــ زماني
ـــــــــــــــــــــــــــــــــــــــــــــــ
دفنوا طـولك الـهـيبه ــ نـورك راح شـيـجيبه
كل دمعه التصب مني ــ تخضر بالگلب شيبه
هز حتى الحبل وني ــ جفك بويه من هدني
كل يـوم اكـعد أذكـر ــ من تحضني وتحبني

عشت عشت ــ جن ميته
صحت كـلت ــ جـا يمـته
ترجع علية تشبگني ــ زماني
ـــــــــــــــــــــــــــــــــــــــــــــــ
بعدگ يختلف وضعي ــ باجر ينكسر ضلعي
فـوك الـعين مسطوره ــ وينك انحب وانعي
سوط يـورم امـتـوني ــ واطفالي يشوفوني
أصرخ بت رسول الله ــ وماجنهم يعرفوني

الأجه اجه ــ بنيرانه
عليه أظل ــ غضبانه
كسر الضلع موت ابني ــ زماني
ــــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

أهـل المـواكب ــ كـلـها تـراقـب
  زوار لحسين زوار لحسين
تكوه النشـامه ــ درب السـلامه
مشايه لحسين مشايه لحسين
حياكم يازوار حياكم
ــــــــــــــــــــــــــــــــــ
طول الدرب نسمع هله
يـالـكـاصـدين الـكـربـله ــ حـياكـم
اهـل المـواكـب تنتـضر
خدمتكم أغلى من العمر ــ نفادكم
بيكم عـطر مـن الخيم
منكم كفو يهل الـشيم ــ محلاكم
شياب والـشاب عتنت
نسوان واطفال الاجت ــ شفناكم

آهــلا يـزايـر ــ لـحـد المـنـايـر
زوار لحسين زوار لحسين
اعـظم تجاره ــ شـفنه الزيارة
مشايه لحسين مشايه لحسين
حياكم يازوار حياكم
ــــــــــــــــــــــــــــــــــــ
هذا التعب هذا السهر 
يحـميكم بجـفه الكمر ــ ويحبكم
أبدفتر الخـدمه كتب
زواري لو ماي الذهب ــ سـجـلكم
بيكم عزم من حيدره
وفـايـه دنـيه وأخــره ــ حافظكم
فـدوه المـوال الـطاله
ومشايه كـلها الـعايله ــ ويرعاكم

شيخ العشيره ــ يراعه المسيره
زوار لحسين زوار لحسين
طلعت قوافل ــ وحارسها كافل
مشايه لحسين مشايه لحسين
حياكم يازوار حياكم
ــــــــــــــــــــــــــــــــــــ
كل عـام ويعود الركض
يحسين تمشي بالنبض ــ خدمتكم
شـايف مـلايين الـبشر
مـن البحر حـد الـنـحر ــ كصدتكم
ماشين وبحر وشـمس
نـذكـر يبو الـيمه امس ــ غـربتكم
شفنه الدرب كله خيم
ومـعـزب يـنـادي هـلـه ــ بجيتكم

متعنيه صوبين ــ كلهم سلاطين
زوار لحسين زوار لحسين
مـن كل الديان ــ عافوها الوطان
مشايه لحسين مشايه لحسين
حياكم يازوار حياكم
ــــــــــــــــــــــــــــــــــــ
صوت الخدم يامرحبه
كـلمـن محـضر مـوكـبه ــ متانيكم
يـالجـاي شايل رايـتك 
كـلها تصـيح بـخدمتك ــ نـرويكم
ارواحـنه فــدوه ونـذر
هاي الزيارة مـن العـمر ــ نخـليكم
عالروس لا مو عالأرض
واحسينه نوصله فرض ــ ينطيكم

ينطيكم الحيل ــ والدمعه التسيل
زوار لحسين زوار لحسين
يمه الـثجيلات ــ يصيرن خفيفات
مشايه لحسين مشايه لحسين
حياكم يازوار حياكم
ـــــــــــــــــــــــــــــــــــ
شفناه كرم كـله الدرب
والزاد حاضر والـشرب ــ مجـهزينه
بـس الـعـراق تـوفـرت
كـثرت بـعـد وتـوارثت ــ هل الزينه
صحنه هله بكل الدول
احنه نضل الـهايه أهل ــ وتـدريـنه
نرفع عـلم فوك النجم
نـوصل زلـم تتـبع زلـم ــ ونـاديـنه

حجة ويه عمره ــ اليوصل الكبره
زوار لحسين زوار لحسين
اســرع سـفـيـنه ــ بـدربه لـكـيـنه
مشايه لحسين مشايه لحسين
حياكم يازوار حياكم
ـــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

طلعت مواكب العشك للغالي شدت حـزام
درب السلامه نندعي تعودون يحله خدام
مـن ادياركم يالـراحلين
والملتقى اباب الحسين
ـــــــــــــــــــــــــــــــــــــــ
خدام ــ ماشين ــ يحـفظكم الله بفاطمة ومـحمد
طيبين ــ كلفين ــ عين الشمس بيكم شفتها تنسد
اسباع ــ والكاع ــ كـل شـبر بيـهه مـوكب يتشـيد
اطهار ــ واحرار ــ عالخـدمه دمكـم ما اضنه يبرد

عـفتوهه الاديار ويـضل يدعيلكم گلبنه
ويصيح كل خادم طلع محلاته ياسهرنه
شياب والشـاب وجنين
والملتقى اباب الحسين
ـــــــــــــــــــــــــــــــــــــــ
دعوات ــ جلمات ــ صحنه وراكم الله اليكويكم
ازلام ــ متنام ــ واحسين هوه بجفه اليجازيكم
اتعاب ــ ماغاب ــ ويانه عايش مارحل طاريكم
عباس ــ ياناس ــ حك التعب حك السهر يوفكم

يحرسكم الباري وعلي بالصعبه يوكفلكم
طلعت قوافلكم مشت الله شكثر يحبكم
احـنـه وراكـم قـادمـين
والملتقى اباب الحسين
ـــــــــــــــــــــــــــــــــــــــ
اعداد ــ تـزداد ــ والنيه بيضه يالـخـدم شفتهه
لبيوت ــ تنعاف ــ رايتنه خضره وشكبر بختهه
لحسين ــ انصار ــ كل واحد ايكول الأهل عفتهه
ماريد ــ دنياي ــ خدمت الزاير جنة واعشكتهه

نحمل حرارت الشمس ونضحي بولدنه
عن خدمت احسين الولي ألموت مايردنه
آهلا وسهلا زائرين
والملتقى اباب الحسين
ـــــــــــــــــــــــــــــــــــــــ
شبان ــ واكبار ــ مشايه كلها الحضرتك تخدمك
مولاي ــ مولاي ــ نوفيك بيش وانته منطي دمك
مذبوح ــ مسلوب ــ ويانه تمشي بحزن تلطم امك
ننطيك ــ ارواح ــ فدوه ونذر مولاي كلنه لأسمك

يحسين بس انته العشك غيرك ماهوينه
دورنه أرضـنه والـسمة ومـثلك مـا لكينه
اصوات صاحت بالحنين
والملتقى اباب الحسين
ـــــــــــــــــــــــــــــــــــــــ
موكب ــ يكتب ــ يحسين دربك والمشي يحيانه
الدمعة ــ رحمه ــ بذمتنه هـالخـدمه تـضل امـانه
عشاك ــ عباس ــ والخـير كله ابفضله مـن اجانه
رايات ــ تنشال ــ وانادي يحسين العـشك ملانه

كل عام ينعاد الزحف وتعود المـواكب
مهدينه حاضر بالدرب وعيونه تراقب
أبدفتر المهدي مسجلين
والملتقى اباب الحسين
ـــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

يابو علي الحنين ــ اجينه زائرين
الك متحزمين ــ ننادي ياحسين
ــــــــــــــــــــــــــــــــــــــــــــــــــــ
تحزمنه وتقدمنه ــ بده فرض العشك
تكـاتفنه وتوالفنه ــ الك خـل نحـترك
مواكبنه تـضيفنه ــ خدم عندك صدك
تحالفنه تصاحبنه ــ نجي وبابك ندك

آهلا زوار ينادونه آهلا زوار

يابو علي الحنين ــ اجينه زائرين
الك متحزمين ــ ننادي ياحسين
ــــــــــــــــــــــــــــــــــــــــــــــــــــ
درب كله مشي يحله ــ ينادون الخدم
اكل حاضر هله زاير ــ جـثيره هـالنعم
يخدمـونه يسمونه ــ اهل نخوه وشيم
تعاهدنه يبو اليمه ــ نجي ونرفع علم

راية عباس نعليهه راية عباس

يابو علي الحنين ــ اجينه زائرين
الك متحزمين ــ ننادي ياحسين
ــــــــــــــــــــــــــــــــــــــــــــــــــــ
مواكبنه حـبايبنه ــ بكـرمهم عجبـونه
ينادونك يكلولك ــ حسين انته ابونه
واليزورك يسمعونه ــ هله تفضل يخونه
مواقفهم تعاملهم ــ بحچيهم شبعونه

نطويهه الكاع تعنينه نطويهه الكاع

يابو علي الحنين ــ اجينه زائرين
الك متحزمين ــ ننادي ياحسين
ــــــــــــــــــــــــــــــــــــــــــــــــــــ
ركضنالك تعبنالك ــ يمن تسـوه تـعبنه
طبخنالك يزايرنه ــ منامك خله عدنه
ضيافتكم تشرفنه ــ خدم احنه ولـدنه
فرد رايه يمشايه ــ لحبيب الله كصدنه

حضرنه الزاد وتانينه حضرنه الزاد

يابو علي الحنين ــ اجينه زائرين
الك متحزمين ــ ننادي ياحسين
ــــــــــــــــــــــــــــــــــــــــــــــــــــ
تصافينه وتلاكينه ــ بدرب سيد البريه
توحدنه وتـوفقنه ــ بعشك حد للـمـنيه
كتبناها وحفظناها ــ الزيارة الكبرى هيه
أسامينه تسـجـلها ــ حنينه امنه الزجيه

مرفوع الراس بزواره مرفوع الراس

يابو علي الحنين ــ اجينه زائرين
الك متحزمين ــ ننادي ياحسين
ــــــــــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

التفكد أبـوها ومـذبوح
اعظم مصيبه بعيني
ــــــــــــــــــــــــــــــــ1
الـطفله العضيمه مدللت والدها
وسفه نطبع جف النذاله بخدها
هاي الـزمن عكب الاهل كـيدها

نار الخيم ضيم الشام
بيهن احس خليني
ـــــــــــــــــــــــــــــ2
تالي بخــرابه نامت الـمحروسه
فزت رعب من الحلم مـتـروسه
لزمت اخـوها وجفه كـام تبـوسه

وتـكله خـويه السـجاد
كلبي يريد احسيني
ــــــــــــــــــــــــــــــــ3
جابو طشت وتشمه ويلي بلهفه
هـذا ابـوها وراسـه هـيه تـعـرفه
شـافت مـعـانيه شـكثر مختلـفه

حاجيني بويه ترجـاك
انته العمر واسنيني
ـــــــــــــــــــــــــــــ4
متـعـوبه رقيه ومـاتت بحسرتها
فـوك الـنـحـر غـابت تــره ونتـها
بالـدنيا ما شايف مـثل غــربتـها

حـالتها جمـره وبالروح
طول الوكت تجويني
ـــــــــــــــــــــــــــــــــ5
هاي الزجيه الصغرى ياخــادمها
شعندك حوائج يله سولف يـمها
قبل الحجي حاجتك بيدك منها

كـلها اظل خـادم دوم
عد والدج وضفيني
ــــــــــــــــــــــــــــــ6
ارسـم طــريـقـك بالـدمـع تـنـدله
وكلها خـدمتج منها مـاكو الـحله
علميني ابوج الغالي كيف وصله

شديلي للخـدمه حزام
ومـنج مدد تـنطيني
ـــــــــــــــــــــــــــــــ7
حاجيها بدموع الصدك عالفطره
كلها عليج الضامي ذاك ونحره
حالي المصيـبه يا وكت وتغيره

فهـميني جرح الــمنحور
اعليج الحسن فهميني
ـــــــــــــــــــــــــــــــــــ8
كـلهـا اموت بهالـعزة وفـقيـني
دمع اليطيب الكم جرح رزقيني
ازغر عبد عـدكم انه خـليني

بداعت جـفوف الـعباس
مـولاتي بس قبليني
ــــــــــــــــــــــــــــــــ9
بالـدم سـوالف يا رقيه اكتبهن
منيتي ازورج والدموع اسجبهن
ادري الدموع المهدي حيل يحبهن

رايـد اجـيــج وانــعــاج
بس انتي التوصليني
ـــــــــــــــــــــــــــــــــ10
قبليني اروح واخدم بموكبكم
عايش عله الدمعه وعله خدمتكم
كلبي ينادي والله حيل يحبكم

يـمج بـعد ضـلت هــاي
وانتي حشه ترديني
ــــــــــــــــــــــــــــــــ11
زوار ابــوج الــكربـت طــلـعـتـهم
مـشـايه وتغـطـي الارض رايـتهم
حلم العمر مولاتي كون اخدمـهم

اهـلأ اصــيـحن بــالجـاي
لو مره بس تكفيني
ــــــــــــــــــــــــــــــ 12
هـذا صفـر يـوم الفـخر عشـرينه
كلمن ترك أهله وزحف لحســينه
كـلمن اجـه رايد يــوفــي بـدينه

شوفت ابوج العـطشان
هـيـه الـذي تـرويني
ـــــــــــــــــــــــــــــــ
تمت بعون أسد الله الغالب
العبد الذليل علي الكعبي

https://www.facebook.com/share/p/CHkopWBps2uFsXyJ/?mibextid=WaXdOe

Facebook

Log in or sign up to view

See posts, photos and more on Facebook.