"‏اليوم من راح مقفي جعل ما يلفي
‏ملّيت اداري عقولٍ صابها خلّه

‏هذا سبب من جعل كبدي ربع كفي
‏أداري الناس وأثر الناس مختلّه"

"وقفنا عند بابك مالنا مطلوب غير رضاك
‏معاصينا كبار وعفوك اكبر من معاصينا"

"‏يالله أسترني بلطفك دام سترك ثوبي
‏وأغفر لعبدٍ كساه الذنب وأصفح عنّه

‏ما لنفسي غير نورك في ضلال دروبي
‏والمُنى عفوك وحسن الخاتمة والجنّة

‏مذنب ولاجيت أقارن رحمتك بذنوبي
‏ أذكر إن ذنبي عظيم وعفوك أعظم منّه"

"تموت جروحنا مادرى عن نزفها مخلوق
‏مقابرها الصدور وعزة النفس تدفنها"

‏"لو انك تعرف ظروفنا الخافيه بالذات
‏ تعجبت منا كيف نقدر نخفّيها

‏عيال الأمل ترضع ولا كبر ورع مات
‏وحنا نراقبها ليالي .. ونبكيها

‏يا عزّي لبيض قلوبنا زينة النيات
‏يتامى فرح ما عندها غير أمانيها"

"‏تدلّل وش تبي يا المبسم الضحّاك
‏لجل عينك عذابي في الغرام يْهون

‏جمالك شي يستعصي على الإدراك
‏عليك الكل من هول الحسن مفتون

‏عطيتك قلب مهما تجرحه يفداك
‏تمون وكل جرح ٍمن طرفْك يْمون

‏مرامي ساعةٍ تحت المطر ويّاك
‏دقايقها فرح من كل شكل ولون?"

"‏عسى لي أثر طيب مواقف و ذكرى خير
‏و نفسٍ تنول اللي تمناه يا ربي

‏ولا تبتليني بالسعيّ في نصيب الغير
‏ولا تضيّع سنيني و أنا أدور لطبي

‏و هب لي بصيره ما توردني التقصير
‏تميز قلوب الناس في كرهي و حبي

و نورني أشوف الحقيقه مثل ما تصير
انا أشوف الاشياء مثل ما يشتهي قلبي"

"‏يا رب هب لي من لدنْك الباقيات وما لديك
‏واجعلني العبد الصبور اللي رضاتك مطمعه

‏أنت السلام المؤمن المتعالي الحق المليك
‏اللي تسبّح له عباده و الجهات الاربعه

‏يا رب أنا عبدك وابن عبدك وناصيتي بيديك
‏أحيان نفسه تدفعه و أحيان نفسه تمنعه"

"‏يلومون الصبور إن ملّ من صبره وأنا ما ألوم
‏من اشقاه الثبات و هدّت ظروف الزمن حيله

‏سواءًا منتصر في معركة الأيام أو مهزوم
‏لا زال بـ حاجة الإنسان لـ أي إنسان يشكي له

‏و لكن لا لقيت الناس حمّالة حطب وهموم
‏لا يقرب سرك من البير وارشاه ومحاحيله

‏متاهة صدرك أولى والليالي غيبها معلوم
‏مع اللي بـ أمره يساق السحاب و يندرج سيله

‏عن أسرار العباد تضج الألسن والعزيز يشوم
‏و أنا أكثر ما ابغضه فـ الحكي تحريفه وتأويله

‏من أوغل فـ الحقايق وأنصدم فـ الواقع المشؤوم
‏ما عاد يفكر يسولف لـ أحد بـ أصغر تفاصيله

‏ما عرّضنا مغاليق الضماير . بيعة أول سوم
‏لها الله لا أستضاقت من غثا الوقت وغرابيله

‏لو إن أحيان تصعب وقفة الخاطر على الحلقوم
‏عسى ما فات من عمرٍ مضى فدوة مقابيله

‏و عسانا لا عطينا السر أحد ينساه ثاني يوم
‏ما هو ينساه لا من حبنا و إن عاف يطري له"

‏"يااالله هب لي من أفراحك وأجعلني شديد الباس
‏لين أضحك على شتّى الجروح .. الهش منها والندي"