كلنا جنودك  ... يا امام الزمان

.....
١.
أيُها الموعود ... ضاكَت الأنفاس بينه ... أيُها الموعود
أيُها الموعود ... وجارت الدنيه علينه ...  يا أمير الجود

اتمادت  ...  سيدي اسرائيل
واتعنت ....  للقدس بالفيل
خل سيفك ...  يمطر السجيل ... راوينه

غضب فقارك
يتاني الثارك
مثل متاني
جموع انصارك

امتانينه .... امتانينه ... يومك يراعي النصر
امتانينه.... امتانينه ... اشما باقي بينه عمر
امتانينه .... امتانينه ... موت اليمر عالكفر

كلنا جنودك ... يا سفير الحنان
......
........
٢.

شيعتك كل يوم ... امشيعه قائد مثل الاشتر ... شيعتك كل يوم
شيعتك كل يوم ... تنذبح مرتين واكثر .... يادوه الملجوم

يا جمعه ... ننتظر ملكـاك
كل واحد ... بينه روحه اوياك
ما نصبر ... اكثر وفركَاك ... ماذينه

يناصر دينك
نناشد وينك
بعيده اديارك
بعيده اسنينك

ندعيلك ... ندعيلك ... كلنه ابدعاء الفرج 
ندعيلك ... ندعيلك ... يا محيَّ كل المهج
ندعيلك ... ندعيلك ... يا باقي نسل الحجج

كلنا جنودك .... ترجع النه ابأمان
.....
.......

٣...
أشر بيمناك .... وانظر انصارك يغايب  ... أشر بيمناك
أشر بيمناك ... ندخل ابهمه ونحارب  ... سيدي العاداك

يا قائد ...  ثورة الإسلام ...
يل بسمك ...  تنتخي الايام ...
يا وراث ...  حيدر الضرغام .... والينه

قسم بالكوثر
نرَّجع خيبر
على كل ساتر
تشوف الأكبر

يا مهدي ... يامهدي ...  صيحتنه ساعت نطب
يا مهدي .. يا مهدي .. اسمك نخط عالكَلب  ...
يا مهدي ... يا مهدي ... لجلك نخوض الصعب ... هد بينه

كلنا جنودك ... من كَلب مو لسان
.......
.......

٤.....

كثرت الثارات ... يابو صالح عجل امرك ... كثرت الثارات
كثرت الثارات ... وبدمه المنحر ننصرك ... تشهد الآيات

حشمنه ...  وانظر الأفعال
تلكَانه  ....  والله خوش ارجال
ما نركع ... للظلم لو طال .... تدرينه

نظل وفايه
ونرف بالرايه
امن اخير الدنيه
نجيك اعنايه

فرسانك ....فرسانك... جربنه كَول وفعل
فرسانك .... فرسانك ... باجر لمن ننسئل
فرسانك .... فرسانك ... عنك ابد ما نزل

كلنا جنودك ... كل زمان ومكان
......
..........

٥.....

انتقامك حان ...دكَ طبول الحرب بيدك ..انتقامك حان
انتقامك حان ... يا نصير الحق نريدك .. انتقامك حان

أمريكا ... موطن الكفار
هب ريحك ... واشهر البتار
يامهدي .... تطلب اشكم ثار ... مهدينه

كثر ثاراتك
وحق لوعاتك
ظلوع ومنحر
أوسبي عماتك

وبروحك ... وبروحك ... اكبر جرح منفتح
وبروحك ... وبروحك ... جم قائد اعله الرمح
وبروحك ... وبروحك .... حركَ الخيم كل صبح

كلنا جنودك ... من يحين الأوان
...........

✍️ كلمات موسى الخادم

مجالس فاطمه .... تحبهه اهل السمه
تحبهه اهل السمه .... مجالس فاطمه
......
رابح البيهه حضر هاي المجالس
اعليهه حتى الأنبياء صارت تنافس
والملائك تكَصدلهه  كالنوارس
والمنابر تشهد ابهاي القضيه
.....
هل مجالس نعمة الله ومن حضرهه
ما تمس  النار عينه ولا تضرهه
جنة الله اتصير اله دار بكبرهه
ياهو اليحصل مثل هاي الهديه
....
كل حوائج ما تظل ابهل مئاتم
كلهه توكع بيد امنه الزهره فاطم
الف هنيالك يمن عالصدر لاطِم
هل وسام يصير الك اعظم هويه
.....
فاتحت ام الحسن ألهه اهلهه
موش ياهو الجان يكَدر يوصلهه
بس التحبه الزجيه يحضرلهه
ويا كبر حضه العلي ترضى الزجيه

......
باجر ابسجل الزجيه ايشوفه اسمه
كل شخص محروك لم حسين  دمه
وبكثر دمعاته الهه وكثر لطمه
أجره ياخذ اي وحق حامي الحميه
......
✍️ كلمات موسى الخادم

احب ملكَاج ... يا يمه
صعب فركَاج ... يا يمه
اموت اوياج ... يا يمه .... يا زهراء
.......
الحياة ابلا وجودج ظلمه تدريهه
وزغيره انه ييمه اشلون اظل بيهه
تريد اوياج روحي اتروح خليهه
من شوفت اعيونج لا تحرميهه

الكَلب يهواج ... يايمه
صعب فركَاج ... يا يمه
اموت اوياج ... يا يمه .... يا زهراء
.....
على ارسومج ييمه اعيوني متعوده
ودليلي اعليج من النوح شيهوده
التموت امه يعيش ابدنيته الوحده
مثل واحد غريب وكلشي ما عنده

ابدمعتي انخاج ... يايمه
صعب فركَاج ... يا يمه
اموت اوياج ... يا يمه .... يا زهراء

.......
يم حلو الحجي ويم حلوت الملكَه
بعد عينج نضيع وفرحه ما نلكَه
عليج ابداعت الخيل العده اتسحكَه
افتحي ااذراعج اواخذيني بالشبكَه

أظل انعاج ... يا يمه
صعب فركَاج ... يا يمه
اموت اوياج ... يا يمه .... يا زهراء
.......
ييمه المكَبره ما لايكَه السنج
وبعدنه ما شبعنه اهواي من حضنج
تدخلين الكَبر وانتي الورد جنج
ابعمر اثمنطعش حرمو هلج منج

طفو عيناج .... يا يمه
صعب فركَاج ... يا يمه
اموت اوياج ... يا يمه .... يا زهراء
......
باجر ياهو اليه ابحركَت الخيمه
ومنو ايلملم اعيالي وماكو اهل شيمه
تجيني لو اظلن وحدي بالهيمه
امن اصيحلج تعالي ابصيحت ايتيمه

إلحكَي أرباج  ...  يا يمه
صعب فركَاج ... يا يمه
اموت اوياج ... يا يمه .... يا زهراء
.......
✍️كلمات .. موسى الخادم

هذا ما وفقني به الله
وفضل ساداتي ال محمد
سائل من الله ان يتقبل منا هذا القليل
ببركة الصلاة على محمد وآل محمد

لا تنسوني ووالدي من صالح دعائكم

منَّ أول الدنيه الأخير الدنيه نمشي
يوم اربعينك ما نعوفه وعفنه كلشي

...1....
متهمنه المسافات .... نجيك ابكل عزم
حفاي اعله الاجدام ... زلم تتبع زلم

على مد البصر ممشانه كل عام
نكَصد حضرتك حفاي الاجدام
نحسب لربعينك احنه ساعات
مثل ما نحسب المهدينه ايام

( زوار بدربك خلينه )

.... 2 ....
تتناقلنه الاخبار ... على كل الصحف
ثورة عشكَ لحسين... تعدت كل وصف

من كل الجهات اعليك مولاي
تتوافد تزورك ناسك هواي
مو مليون لا عشرين مليون
عدَّاد الارقام اتحَّير ابهاي
( من كل الكون التمينه )
......3.....
كل نكَلة جدم ليك ... يبن حامي الحمه
تتمناها الاملاك ... تصيح امن السمه

الزارك عارف ابحقك توافيه
حجه وعمره رب الكون ينطيه
هنياله اليزورك باجي الاعيون
ما تبقاله كل اذنوب تاذيه
( ربحان الزارك والينه )
....4....
يا ابو الأكبر اوياك .... نظل لاخر عمر
فدوه الأجلك انروح ... يبن فارس بدر

ما نخلف وعدنه اوياك يحسين
كل يوم اربعينك نجي ماشين
ما يمنعنه عنك يا بو الاحرار
بس موت الله يا سلطان الاسنين
( تشهدلك نبضات البينه )
....5....
كل يوم اربعينك .... نجي انحب عتبتك
وبدمعات الاعيون ... نطب الحضرتك

يحسين اعله بابك نوكَف اصفوف
والعالم ابأسره ربعك أيشوف
شياب وشباب وحرم واطفال
نكصد مرقدك وابيوتنه انعوف
( والراية اترف المهدينه )

......
كلمات .. موسى الخادم

تعلمنه الاعزوبية
بمواكب الاربعينية
حسين ابا عبدالله .... حسين ابا عبدالله
...1...
جبناهه امن الزغر .... بالموكب نفتخر
ما يوم النعتذر .... عن خدمت حسين

واحدنه ابروحه اله .... امعزب مو مشكله
سر هاي المسأله .... ما نعرف امنين

مو حجي السان ابفخر نحجيهه
لو يريد الروح هم ننطيهه
حسين غالي وعزبنه ابروحه
شما نقدم روحه منوافيهه

شنقدم نشعر اشوية .... بمواكب الاربعينية
حسين ابا عبدالله ....حسين ابا عبدالله
2............
سفرتنه عامره .... للزاير ناطره
والعين مساهره ... تستقبل الجاي

بأهلاً نستقبله .... كل زاير كربله
بالخدمه اندلله .... من جاي مشاي

شما يريد ويطلب انوافيله
لو يريد النجم هم نمشيله
الجاي زاير للحسين الضامي
على العين وعلى الراس انشيله

الكَصد زاير لبو ارقيه
بمواكب الاربعينية
حسين ابا عبدالله ....حسين ابا عبدالله
.....

...3.....
خدمتنه بكل سنه ... مو بس هاي السنه
والعاده انجننه .... حال اليلومون

متحزمين الخدم ..... للباجي اعله الخيم
واحدهم يبجي دم .... من يذكر ام عون

ما يهمنه خل يلوم اللايم
موكب الخدام باقي ودائم
لو يضل امن العمر بس ليله
هم نجي ونخدم الهاي الوادم

طريق حسين حرية
بمواكب الاربعينية
حسين ابا عبدالله ....حسين ابا عبدالله
.......

.....4....
علمنه اهل العشك ... معنى الحب الصدك
ما بينه اليفترك ... عن سيد الاحرار
ميهمه كل تعب ... لحسينه الكَلبه حب ...
ميبدله بالذهب .... لو يدخل النار

بينه ما واحد يخون العشره
فدوه كلنه انروح لابن الزهره
يا ذهب يا مال الي ايخلينه
انعوف ابو اليمه حبيب الفقره

مشاعرنه حسينية
بمواكب الاربعينية
حسين ابا عبدالله ....حسين ابا عبدالله

5...........
كل عشرين ابصفر ... موعدنه اويه النحر
نحجيهه ابكل فخر .... خدامه للموت

عن دربه ما نزل .... والخدمه ما نمل
وبالرحمه ننشمل .... رددنه فد صوت

للمواكب نعتني احنه اعنايه
ابكلشي نملك نخدم المشايه
اتعلمينه انعزب ابأرواحنه
للذبيح و ما ندور غايه

فدائية فدائية
بمواكب الاربعينية
حسين ابا عبدالله ....حسين ابا عبدالله
........
✍️ كلمات موسى الخادم

جيتك اوجبت الراس وياي
واعله الكَبر رشيتلك ماي
اه يعطشان

...1...
جيتك وجبت الماي وياي ارد ارويَّك
مذبوح جبدك بالعطش يا خوية ادريك
ألماي شح اعليه ذاك اليوم انطيك
هسه انه جبته اوياي الك بلكي الله يحييك

عطشان عفتك يوم الاطفوف
ما بيك حيل اترد الاسيوف
وحيل تعبان

...2...
من بعد ضيم الشام اجيتك يابن امي
بالكوه امشي اعله الجدم كايدني همي
جم ليلة مرت وانت غايب ماهو يمي
رديت الك مو زينب، المسبية اسمي

ابنوك الهزيله الشام طبيت
وبسوكهم جم شامت الكيت
امتاني الي جان
.....3.
مر تسعه وتلاثين يوم اعلية غايب
ماشفت طولك يالنمت جوه الترايب
كوم اعله حيلك يالعليك الكَلب ذايب
افراكَك كتلني وعاشت ابروحي النوايب

بعدك يخوية حالي يا حال
وياك راحت راحت البال
والكَلب حزنان
...4...
كبرك وصلته اكعد يخوية اتلكه أخيَّتك
عطشانه تدري الشوفتك وانته ابغربتك
زيح التراب وكوم روايني كشختك
ما ريد اشوف اسهام بيك ولا ذبحتك

مشتاكه اشوفك ببيض الثوب
واكف تصلي فرض الاغروب
حان الاذان
...5...
جبت الدرب وي روحي اسولف يابو الاكبر
هلبت ارد والكاك سالم ما موذر
ويطلع خبر موتك جذب ما لايحك شر
وابعيني اشوفك سالم اعله اخيامي تفتر

وعبدالله فوك امتونك الكاه
شابع ضحك ما شابع اضماه
موش ذبلان

.....6....
جيتك يخويه ابلا نبض كلبك رقية
بذيج الخرابه انه ادفنتهه ابهاي ادية
من جابو ابطشت الذهب راسك اليه
اتلكته بلهفه وشبكَته شبكت منية

ما ودعتني ماتت ابساع
وانه ادفنتهه بدمعة اوداع
جوه تربان
........
✍️ كلمات موسى الخادم

قصائد الاربعينة

يصاحب ضحكتي وكل الأماني ... قميصك بالدمه امخضب أجاني
يالذبحك اخذ عمري
الكطع نحرك كطع نحري
...1...
من شفته ابدمه امخضب
قميصك صرت اون وانحب
وركضت العمتي زينب

كلتلهه الابو اتسلب
لحمه ابحافر امجلب
علي هذا الامر يصعب

انه طفله وما اتحمل هذا الحال
صور الشافتهه اعيوني اتهد اجبال
عميه اعيوني اتمنيت ابهل ساعات
ولا شفت ابحافر لحمك بويه انشال

اعاين عالحوافر كلهه حمره ...
حرت امشي ألك لو كلبي اصبره
دمك عالارض يجري
...2...
جنت اتأملك ترجع
سالم مو تجي امكطع
اعله طول المشرعه اموزع

صيحاتي الك تسمع
ما اكدر اجي المصرع
ومنك شوف اريد اشبع

ما شايفتك صار أكثر من ساعات
ومتعوده اعيوني اتشوفك باللحضات
متعوب اهواي ادري وما ظلك حيل
شيرجعك ماترجع سالم هيهات

جروحك نازفه اشيشفي جروحك
اعرفك ما ترد طلعوهه روحك
يتموني وانه بزغري
الكطع نحرك كطع نحري
...3...
كبل لا تمشي عن عيناي
جانت امنياتي اهواي
اكثر من نبع هالماي

الهسه الرايده بس هاي
يمينك تاخذ ابيمناي
عليك امشيه بوية ابجاي

مشتاقتلك بوية ابكد هذا الكون
كلشي ايهون الا افراكك لا ميهون
موتك ما يتقبل عقلي ولا روح
لو ترجع لو تاخذني اتحلهه اشلون

اخذني العالمك ما بية اكابر
صبر ما عندي اظل اصبر لباجر
نفذ من عندي كل صبري
الكطع نحرك كطع نحري
....4....
كلشي ابداخلي ينعاك
روحي اتحن على ملكاك
حل موتي بخبر فركاك

خوفي لا اجي والكاك
مطشريهه يبويه اعضاك
يكولون الذبح أذاك

ما بيه انظر جسمك ساحكته الخيل
وبكلبك نابت رمح ابطول الليل
خليني امن ابعيد اتوادع وياك
يالمنك باكو روحك كبل الحيل

اودعك من بعيد احسن الية
ولا المك وذر بالغاضرية
صعب ما احتمل تدري
الكطع نحرك كطع نحري
..............5
لقانه ما يطول اشهور
اشوفنك بعد عاشور
بخرابه خالية امن النور

راسك بالطشت مشمور
يجيبونه الي منحور
واعاين سنك المكسور

اركضلك ركضت لهفانه امن اسنين
اوي حضنت راسك اموتن بوية حسين
جرح اغيابك ما يحمل كلبي يعيش
مثلك والد لرقية ايصح امنين

اموت احسن الي بعدك حبيبي .... نصيبك موت اذن موتي نصيبي
من بعدك شلي بعمري
الكطع نحرك كطع نحري
.....
✍️ موسى الخادم

مو هسه ميت من زمان
عالداسته اخيول الجثيره
مو هسه ميت من زمان 
عالملمو جسمه بحصيره
........
مو هسه اخذني الموت اخذني صارله سنين
من يوم كالولي أنذبح عطشان الحسين
ما ظل عمر عندي بقت بس دمعت العين
ويومية ذابحني الشمر مو مره مرتين

عالبلعطش يابس لسان
اسنيني العمر صارت كصيره
مو هسه ميت من زمان 
عالملمو جسمه بحصيره

.......
الميتله مثل حسين يبقى عايش اشلون
نوحو اعله جدي اعليه ما حاجه تنوحون
اتشيع اني حسين ما ظله اليشيعون
فوك الذبح دوس الحوافر باكت امتون

ودم منحره غطه المكان
واظلوعه يا وادم كسيره
مو هسه ميت من زمان 
عالملمو جسمه بحصيره
........
عاشر محرم يا خلك  شيبلي كل حال
من عندي اخذ روحي وتركني سارح البال
من عنده شنسه انه الحرك لو سبي الاعيال
لو عمتي زينب من خذوهه امكيده بحبال

ظل عمتي ما ينشاف جان
هاي العلي كلش جبيره
مو هسه ميت من زمان 
عالملمو جسمه بحصيره

.....
ما حاضر المقتل لجن وصلتني الاخبار
سولفلي ابوي وكلي جدك طمه الأحجار
ومن كثر ما داست عليهه اخيول الاشرار
صدره اعله ظهره انطبك جدي وصار طشار

مارحمو ابسيد الجنان
الجانت الوادم تستشيره
مو هسه ميت من زمان 
عالملمو جسمه بحصيره

......
عالاقل انه ابين ناسي اوماني اوحيد
بس جدي ما ظل عنده ناصر يا أجاويد
فوك الترب مطروح ظل امسبل الأيد
وعيونه تندار الخيامه الفزعته اتريد 

حتى الزمن تاريخه خان
ما راعه حرمه ولا زغيره
مو هسه ميت من زمان 
عالملمو جسمه بحصيره
.....
جعفر الصادق انه ما ذبوحني عطشان
ولا سلبو مني ثيابي وصرت عريان
ولا جسمي ظل ابكربله اموسد التربان
من غير تغسيل وجفن من غير دفان

ذبحو اويه حسين الامان
من سلبوه ذيج الظهيره
مو هسه ميت من زمان 
عالملمو جسمه بحصيره

......
كلمات
✍ موسى الخادم