بتصد ؟ صد و روح لا تمتحني
مصيري أبنساك مهما تعلقت

كنت أتضايق منك لا غبت عني
والحين لو غبت الدهر ما تضايقت

مابي أقول الوقت ماخذك مني
أنت الذي فقيت فجأه مع الوقت

لاني اللي تجاوزتك .. و عشت متهنّي
‏ولاني اللي رضيت أتبعك وأترك مكاني

‏صادق من تصادق وحب اللي تحب
‏أنت أعلم ف نفسك وفي تكوينها

‏مصيرك تشوف الحقايق عن كثب
‏الأيام شدّتها تغالب لينها

‏لا أقدامك إن زلّت وصوتك لا انتحب
‏مرآة احاسيس الأوادم ..عينها

‏لو تعرف شعور الدموع بلا سبب
‏عفت الدموع اللي تطيح بحينها

يبي بعدي و دمعه بلل ثيابي

مع أن كل فرض إلى أذن المذّن أصليه
معي ضيقة .. اللي ما يصليه في وقته

من أول أضحّك واحدٍ عند قبر أخيه
وذالحين لا واجهني الطرب ضايقته

لا شفت الجماد أسمع وش يقول وأحاكيه
والإنسان ما أفهم وش كلامه لا ناطقته

أعيش الحزن مع كل من يفتقد غاليه
لو أشوف غصنٍ جف ساقيه .. عانقته

طموحي سرابٍ جاني الموت قبل أجيه
وعزمي عزم من جمرة القيض محرقته

تقولون..دام إنه سراب ولحقته ليه ؟
ترى متعتي في شوفه وفي ملاحقته

شعوري ورا حلمي وأنا أصايده وأخطيه
أخاف إنه أحلى من شعوري لا حققته

حبيبي يا ليت العمر منا إلين أنهيه
مثل ضحكتك لا قلت شي ما صدقته

ما تقدر تقول إن فاقد الشي ما يعطيه
وأنا أعطيك ضحك لي سنه من يوم فارقته

لقاك أسرع من الحلم مع فارق التشبيه
لو تسابقه الأحلام ماهي بسابقته

أنزّه محبتك الشريفه من التشويه
وأنا العاشق اللي رغبة النفس مرهقته

ما طلت العنب .. لكن ما والله أعذرب فيه
أشوفه .. وأعرف إنه حلو ما بعد ذقته

بين اللقى والبعد .. كم خطوه مواريها سراب
مدري بقربك مرتوي مدري ذبح قلبي الظما

كنت الوطن لا مال وقتك ليه احس بـ إغتراب
كنت انتمي لك ، ليه مالك لا ولاء ولا انتما

كنت انتقي بين الخطايا لحظة بروز الصواب
كنت الوضوح اللي تشوفه ليه يغريك العمى

كنت السؤال المنطقي لا صارت الراحه جواب
وكنت الرضا قبل الزعل يطلب من الجرح الدما

كنت البراهين لـ سكون الوقت وانت الإرتياب
وكنت اليقين بـ عز شكك ليه اشوفك ربما

كنت الشتا يوم المقيظ يمر تلقاني سحاب
وكنت الغيوم اللي تغيثك يوم وبلك ما هما

على رصيف الأمنيات لـ خطوتي مافيه باب
إلا و تقّفل يا رفيق اشتّد ساعده و رمى

صار الرحيل اكثر هدوء بدون عثرات العذاب
ضاعت عناوين الأمان وخطوة امجاد الحمى

ذاك الشروق اللي تخبره ما بقى بـ نوره عتاب
طاح الشفق غرب الأماني وانطفى ضي السما

أمّا بعد هذا الشطر في داخله آخر خطاب
بـ وداعة الله يا طموحٍ في سنيني ما نمى

‏اطرب لصوتك ودايم كل كريمٍ طروب
‏وياطيب من ينطرب مع حفظ رزانته
‏
‏انا عزيزٍ قضى وقته بقرع الخطوب
‏ويشوفك العزّه اللي تزود مكانته
‏
‏ومن لا يدور على العزّه بكل الدروب
‏في كل دربٍ يمره تاجب إهانته
‏
‏مايشبه لطهرك الا طهر بيض النصوب
‏ماتشبه لـ جيلك المعروف لعانته

‏ماكنّك الا حقيقة من لسان الكذوب
‏كلٍ يشك أنها من حبَك ذهانته
‏
‏اكثر قلوب البشر تعرضت للقلوب
‏وحنا نحفظ العهد ونزود رصانته
‏
‏أحبك .. إلين نُبعث عند رب الغيوب
‏ماهو فقط لين ربي ياخذ أمانته

جل من وحّد عباده فالأرض وفالقبور
‏لا اله الا الله اللي عطاك اللي عطا

‏كثر ماقررت اسامحك واقول معذور
‏ما بقى للناس غيرك لاستر ولاغطا

‏كلهم يخطون عندي ويلحقهم قصور
‏وانت لا قاصر معرفه ولا منك خطا

‏عينك اللي كل مادارت الدنيا تدور
‏وين اسافر عن مداها ولا اخاف البطا

‏والوجيه اللي تسر النواظر والصدور
‏مستحيلات المصافح .. سريعات الخطا

تعود الذكريات بـ عودة التذكار
‏هلا یا ضحكةٍ ماني بـ عايفها

‏على ليلة غيابك ماتت الأعذار
‏تراني كنت ساهرها و خايفها

‏ارحّب بـ القصيد و بـ الكلام الحار
‏و انا عارف نهايتها و شايفها

‏ادوّر لي جواب .. يترجم اللي صار
‏وش يصد الولايف عن ولايفها ؟

‏صحيح الخطا وارد لكن الأسف مطلوب
‏مهوب عيب لا زليت ثم جيت متأسف

‏لكن لا تحاول تلبس الثوب بالمقلوب
‏تزيد الخطا ب عناد و تصير متحسف