كلشي مـات بـعيني
        مـن دفـنت سـنيني
==============================================================================
1️⃣
راجـع ومكـسور بأحـزان الكـلب
من يدليني وطفه بعيني الدرب
والوضع بجفـاها يا عـالم صعب
راحت ودنيانه مـن راحت غرب
                ~~~
       يعله صـوت ونيني
       مـن دفـنت سـنيني
===================
2️⃣
من وصلت البابها وطاح الدمع
مـيته فاطـم يا كلـب ما تـقتنع
عاتبتها الباب من شـفت الضلع
ليش من عيوني طفيت الشمع
               ~~~
       وحـالـهـا يـبـجيـني
       مـن دفـنت سـنيني
===================
3️⃣
من وصلت الـدارها بنار الـفكد
مـحترك كلبي عليها شلون ارد
بعـد ما نـشـتم عـطر من الورد
ابريحة الدخان مـختنكه الولد
                ~~~
       وكل طفل ياذيني
       من دفـنت سنيني
===================
4️⃣
الحسن شفته من ينوح اعليها
صاح بــويه الـجنه ما اجازيها
اشـكد تـون وما عـرفنه شبيها
ثـاري كـسرات الـضـلع تـاذيـها
               ~~~
       ويـالـدمع خـلينـي
       من دفـنت سنيني
===================
5️⃣
يم الحـسين الـمدامع مـن تهـل
امي راحت والمـوادع مو سهل
والمصايب ع الجفن ما تنحمل
ليـش باب الجـنه جهراً يشتعل
              ~~~
        شـرايـد يـنـسيـني
        من دفـنت سنيني
===================
6️⃣
ظهر زينب بالمصايب ينكـسر
يا علي يم الجرح مات الصبر
شيـعوها وسـافر وياها العـمر
ياهضيمه روحي نامت بالكبر
               ~~~
        ودمعتي تواسيني
        من دفـنت سنيني
=======================================
              محمد خشان ✍️.         
=======================================

رحمة الله عيونك
           ما نعيش ابـدونك
                 يا محمد
==============================================================================
1️⃣
     رحـمـة الله اتنـزلـت بعـيـونك
     شبعـت الـوادم تـره بماعـونك
     انت عالي وكلها صارت دونك
     جبل ما كـدروا تره يلـوحونك
                  ~~~
            وكـلهم يـعرفونك
            ما نعيش ابدونك
                  يا محمد
====================
2️⃣
     الدنيا ضـاويها بـياض الشيبه
     ومثل كلبك ما نحـصل طيبه
     الله واضـح بالـعلـن تـرتـيـبـه
     الله فارض اسـمك وتنـصـيبه
                    ~~~
            الأفضل يسمونك
            ما نعيش ابدونك
                  يا محمد
====================
3️⃣
     ماكو اعـظم منك بهل السيره
     سـيد الاكـوان شـيـخ الـديـره
     هوه واحد وابد ما صح غيره
     والله غطـانه ابنـعمته وخيره
                   ~~~
             الدنيا كلها بلونك
            ما نعيش ابدونك
                  يا محمد
====================
4️⃣
    الجبل ما يكدر يـشيل احزانك
    وتـختــلف عـن البـشـر الـوانك
    انت شجره وطيحوا اغـصانك
    شكثر شايف ظلم من عدوانك
                   ~~~
            الــوادم يــأذونـك
            ما نعيش ابدونك
                  يا محمد
====================
5️⃣
    كلشي يرحل من تغمص عينك
    تموت فاطـم من تروح سنينك
    صـحنه يا حـيدرنه الله يعينك
    والحسن مجروح ويه حسينك
                   ~~~
            وكلهم يفـكدونك
            ما نعيش ابدونك
                  يا محمد
====================
6️⃣
     اليوم حـزنانه عـليك الـشيعه
     عـهد نبقى وهـالدرب منبيعه
     وامـرك الرباني كلـنه انطـيعه
     لحـيدر الكـرار ننـطي الـبيـعه
                    ~~~
            وعفنه اليضدونك
            ما نعـيش ابدونك
                  يا محمد
=======================================
           محمد خشان ✍️.     
=======================================

رجع ظعن السبايه
             رجع ما عـنده رايه
                يوم الأربعين
»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»
1️⃣
رجـع ظـعـن السـبايا بـدمـعه سـجابـه
رجع كل خطوه تنعى حسين ومصابه
كـصـد مـوكـبها زيـنـب يا حـزن جـابه
تـراب الحـومـه يـسـأل فـاكـد اغـيابـه
                      ~~~
              كصد ظعن العقيله
              عـله الناكه الهزيله
                 يوم الأربعين
»»»»»»»»»»»»»»»»»»»»»»»»»
2️⃣
رجـع والـشـوك عـابر مرحـله وحـرگه    
واجت كل وحـده مشتاكه عله الملكه
وعـلـه الأكـبر لـيلى ابشـوكه مخـتنكه
ورمـله اتريـده جـاسـم رادت اتـشبكه
                      ~~~
             الورد يـنكـط ترافـه
             العطر ينشم مسافه
                  يوم الأربعين
»»»»»»»»»»»»»»»»»»»»»»»»»
3️⃣
الرباب اتشوفه عبد الله وتشم عطره
وكـعـدت تـشـتـكيلـه الـنايـم ابـكـبره
راحـوا كـلـهـم وصـار الـدمـع جـمـره
تطشر كلشي وسـفه وراحت العشره
                    ~~~
           الاهـل حـدر الترايـب
           عله عيوني المصايب
                 يوم الأربعين
»»»»»»»»»»»»»»»»»»»»»»»»»
4️⃣
عله العـباس حـزني الما بـرد لحـضه
جفاني وخالي ظعني ومحد يعوضه
امـشي بهل الدرب مسـبيه ما يـرضه
وصلت الكبره واسـمع دكتـه ونبـضه
                    ~~~
          الكلب ينبض يزينب
          اموت وباقي انحـب
                يوم الأربعين
»»»»»»»»»»»»»»»»»»»»»»»»»
5️⃣
يـم حـسين روحـي راحـت بـسرعه
عله كبره وصـلته وطاحـت الدمـعه
وذكرت ابيـوم شفته حـاير ابوضعه
وصلته وطشره الحـافر منو يجمعه
                    ~~~
         ومصابه ابكد بجينه
         وله ابحـسره اجـينه
              يوم الأربعين
»»»»»»»»»»»»»»»»»»»»»»»»»
6️⃣
شبعنه اشكـد بواجي وعاتبت بيهم
دكـافي مـن العـتب وادري يـأذيـهم
اجينه من السفـر نكعـد نحـاجـيهـم
ونـخلص كـل بجـينه وهـم نخلـيهم
                     ~~~
           مشيت ابكلبي حسره
           ويموت اليمشي عمره
                  يوم الأربعين
»»»»»»»»»»»»»»»»»»»»»»»»»»»»»»»»»»»»»»»»»»»»»
                محمد خشان ✍️. 
»»»»»»»»»»»»»»»»»»»»»»»»»»»»»»»»»»»»»»»»»»»»»

**اويلاه.......اويلاه......اويلاه
              بعد ماكو خيم

»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»
1️⃣
     اجـانـه الليل واتـخـيل ظـلامـه
     بسـواده يأخذ اگـلوب اليـتامـه
     لفـانه الخـوف ما ضلت سلامه
                    ~~~
     رماد من الخـيم غاطي العبايه
     وبقت زينب غريبه ابلا حمايه
     غداً يمشي بغرب ظعن لسبايه
                     ~~~
       اويلاه.......اويلاه......اويلاه
              تره الحيل انهدم
»»»»»»»»»»»»»»»»»»»»»»»»
2️⃣
     نشوف حسين بالدمعه الجبيره
     نذبح عطشان مافزعت عشيره
     وبعـد يومين يـنشال ابحصيره
                      ~~~
     النحر مگطعوع والجثه سليبه
     لحيته مخضبه وصـارت تريبه
     ومـصايب كربله كلش عـجيبه
                     ~~~
        اويلاه.......اويلاه......اويلاه
             صدر شفته انهشم
»»»»»»»»»»»»»»»»»»»»»»»»
3️⃣
     شفت نار المصايب والفجيـعه
     شفت عـباس نايـم ع الشريعه
     الجبل معـقوله جفينه گـطيعه
                      ~~~
      تـره الـعباس كـفـال الـحرايـر
      يحاميـها الخيم بالشده ناصر
      يمقياس الحرب ذلها العساكر
                     ~~~
        اويلاه.......اويلاه......اويلاه
                بقينه ابلا علم
»»»»»»»»»»»»»»»»»»»»»»»»
4️⃣
     بقت نسوان هاشم بالصحاري
     بعد حرك الخيم شعلوها ناري
     بقـيت اجمع يتـامه بأنكساري
                     ~~~
     تره لمهضومه لو رادت ظناها
     تـهيم ابليل والـسوط ابـكفاها
     وتـدور ع الولد بس ما اجـاها
                   ~~~
       اويلاه.......اويلاه......اويلاه
             الكلب والله انلجم
»»»»»»»»»»»»»»»»»»»»»»»»
5️⃣
     كضه ليل هدعش كله بمـناحه
     اشوف لجيش وتخيل صباحه
     نسافر عالهزل ما شـفنه راحـه
                    ~~~
     الـف وسـفه وبعد ذيج المهابه
     بنات حـسين كعـدن بالخـرابه
     بنات حـسين يغـفن ع التـرابه
                    ~~~
       اويلاه.......اويلاه......اويلاه
            عله عيوني نرسم
»»»»»»»»»»»»»»»»»»»»»»»»»»»»»»»»»»»»»»»»»»»»»
          محمد خشان ✍️.                 
»»»»»»»»»»»»»»»»»»»»»»»»»»»»»»»»»»»»»»»»»»»»»**

**گبر ذنبي..........كثر تعبي..........يمحبوبي حسين
هوه گلبي........ضوه دربي........يمحبوبي حسين

»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»
1️⃣
اتعنيت ابروحي الخجلانه...واتعذرلك يحسين انه        
                  وابجيلك دمعات العين
تأخذني الدنيا وماادري.....واتعنيتك جايب عذري
                   و شگد مقصر يحسين
هاي الروح اشما اوديها..............يمك اولها وتاليها
                    ناذرلك عمري وسنين
ولبابك تأخذني الحسره...انظر شباجگ والحضره
                    ما وفيت وياك الدين
                             ~~~
گلب شاعر ......صبح حاير........اجه گاصد حزين
گعد يمك........صرخ بسمك.........يمحبوبي حسين
»»»»»»»»»»»»»»»»»»»»»»»»»»»»»»»»»»
2️⃣
امشي وذنوبي اتماشيني..وبأعتابك ما ارفع عيني
                     نزلت الرأس وخجلان
معقولة اتلازمني الحيره.....وللضايع سموك الديره
                     يحسين وجيتك تعبان
وشراح الگه لو ضيعتك..جيت ابدمعاتي وفزعتك
                   واسيت وجيتك عطشان
جفينك خليها ابراسي.....سلمتك روحي وانفاسي
                   طالب يا بويه الاحسان
                            ~~~
وعمت عيني........اندثر زيني.......عمر خلص ونين
اهز بابك .........عله اعتابك.......يمحبوبي حسين
»»»»»»»»»»»»»»»»»»»»»»»»»»»»»»»»»»»
3️⃣
لشباجگ متعنيه اجدامي.گلشي يسولفلك يالضامي
                 يا حيره وبيها احتاريت
حاجيتك يا نور دروبي.........خجلان وادريها ذنوبي
                 تلجم بيك وما حسيت
يا مهضموم اشگد اذيتك...يكبر جرحك ما واسيتك
                  من عندي شگد اتأذيت
اتعنيتك ندمان ابگلشي.........لو تقبلني لو ما امشي
                  قصرت وياك أو عانيت
                           ~~~~
اشم عطرك...........عله گبرك.......شكثر شايل حنين
ردت نظره...........رضا الزهره.......يمحبوبي حسين
»»»»»»»»»»»»»»»»»»»»»»»»»»»»»»»»»»»
4️⃣            
اغسلها اذنوبي بدمعاتي......بالمذبح تسكت كلماتي
                اشهگ يا بويه بأحساس
گطعوا يامذبوح المنحر...رضوا صدرك وانت معور
               وانه الجم بذنوبي الرأس
للعاشر تأخذني بأيدك.........شوفني لجمات وريدك
                  موتني واخذ الانفاس
ما وفيت لجرحك ذره.........ارجع لو كلت آخر مره
                 ربيني اعليك العباس
                          ~~~
جمر حزني...انطفه بجفني...گضت حسره السنين
عشت جرحك....شفت ذبحك......يمحبوبي حسين
»»»»»»»»»»»»»»»»»»»»»»»»»»»»»»»»»»
5️⃣
اخر جلمات الما تگضي......ودعت وما ودع نبضي
                  خليت ابابك حسرات
خليت الدمعات وعذري....مكسور لحد آخر عمري
                  والمات ابحبك ما مات
لاتأخذ يحسين النعمه...يارحمه وتنطيني الخدمه
                   وكثرها اعليه الخيرات
ما اريد الدنيا وما بيها.....يالخيرك وحده امكفيها
                    قرينه ابحبك  ايات
                             ~~~
الترگ حبك......وجفه دربك......صدگ اخرته وين
انجبر كسري......قبلت عذري.....يمحبوبي حسين
»»»»»»»»»»»»»»»»»»»»»»»»»»»»»»»»»»»»»»»»»»»»»
               محمد خشان ✍️.         
»»»»»»»»»»»»»»»»»»»»»»»»»»»»»»»»»»»»»»»»»»»»»**

**نار الهجر بضلوعي...ومحد ينشف دموعي
               يا فاطمه الزجيه

»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»
1️⃣
الحال...ودعَت...ضيعت....فاطمه الزجيه
اليوم...خطوتي..وعبرتي...تسولف الرزيه
الشوگ..يعتلي...يا علي...وحشه هلمسيه
                      ~~~
شايل عله متونك حنانك والروح
يا دافن أحـلام الـعمر وين اتروح
ايتامك اگـبال الـجرح كلها اتنوح
تشتم عـطر من فاطمه من يفوح
                   ~~~
           راجع واعـاتب دهري
           تراب الحنينه بظهري
              يا فاطمه الزجيه
»»»»»»»»»»»»»»»»»»»»»»»»»»»»»
2️⃣
الروح...تنكسر....وينذكر...موقف الجفوني
الموت....اعتنه....ونحنه....ظهري فاركوني
الدار.....التفت...ورجفت..وغمضت عيوني
                     ~~~
راجع واشوف الـحادثه بأم العين
وهـنانه مـاتت بالـفعل ام حـسين
والباب راسـمها الـصـور من ونين
كلشي يـنادي يا علي راحت وين
                     ~~~         
           الصوره تعيش بعيني
           وحـته الـهوه يأذيـني
             يا فاطمه الزجيه
»»»»»»»»»»»»»»»»»»»»»»»»»»»»»
3️⃣
انشاف...ياجرح...والصبح...انطفه بجماله
وريت.....ما ارد....والفگد....عايش بخياله
احزان.....تكتمل....والطفل....لو فگد دلاله
                      ~~~
وشلون اصـبر والـجرح كام يـفور
جرح الحسن باجر عليه من يدور
وحسين ينتظره جرح من عاشور
وزينب ظهره والـگلب هم مكسور
                      ~~~
           بين الجرح والعشره
           شابگ اصـابع عشره
              يا فاطمه الزجيه
»»»»»»»»›»»»»»»»»»»»»»»»»»»»
4️⃣
نشوف.الحسن...يازمن..عايش انكساره
وهاي..دمعته..وشمعته...ماتت ابجواره
يصيح...فاطمه..من دمه..دمعته اتجاره
                     ~~~
كاعد اشـوفه مـنكسر لو مـهضوم
وعيونه تحجيله جرح ما مرسوم
جبدك يغالي بالطشت يا مـسموم
والدنيا ماترحم گلب عاش هموم
                    ~~~
         وين اليضمد اجروحي
         كل ساعه تطلع روحي
            يا فاطمه الزجيه
»»»»»»»»»»»»»»»»»»»»»»»»»»»»
5️⃣
الراح....ما يجي....والبجي...يكثر بغيابه
حسين..بالحزن..لو يحن....ينسمع جوابه
الحيل...بالترب..والگلب...ينحب ابمصابه
                    ~~~
يحسين جرحك مايحملنه گلوب
والعاشر ابـعينك اشـوفه مكتوب
ياوسفه باجر من يسلبون الثوب
ما ضل جمال ابكربله ما مسلوب
                   ~~~
        طفه ومصابه وضيمه
        والبـاب صـايـر خـيمه
           يا فاطمه الزجيه

»»»»»»»»»»»»»»»»»»»»»»»»»»»»
6️⃣
الصوت..ينسمع..والدمع..يشرح المصيبه
النوح...ينعرف...ينوصف...لزينب الحبيبه
اندار....هالظلم...والهضم...ابكربله غريبه
                      ~~~
ايمر عـليها ابكـربله اصـعب حـال
ياهضمه زينب بت علي ابلا كفال
هاي الـگبل مـحد يشوفلها اخـيال
ضلت غريبه بجفه مشدوده حبال
                     ~~~
         من يا جرح يا زهره
         هالدمعه ضلت تقره
           يا فاطمه الزجيه
»»»»»»»»»»»»»»»»»»»»»»»»»»»»»»»»»»»»»»»»»»»»»
         محمد خشان ✍️.                  
»»»»»»»»»»»»»»»»»»»»»»»»»»»»»»»»»»»»»»»»»»»»»**

**آما حان اللقاء......يا صاحب الزمان
قد نزل الـبلاء......يا صاحب الزمان

»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»»
1️⃣
وينك انت.....الدنيا سكته....عالجريمه
وينك انت.....الغيره ميته....يا هضميه
                  ~~~
والله ما عدنا امل تدري انولينه
والـشماته من غبت داروا علينه
تدري محد غيرك ينشف بجينه
لمنه بجفوفك يبو جف الحنينه
                ~~~
وما اقسى الجفاء....يا صاحب الزمان
قـد نـزل الـبلاء........يا صاحب الزمان
»»»»»»»»»»»»»»»»»»»»»»»»»»
2️⃣
يا بو صالح....بس مـصالح.....هالعوالم
يا بو صالح....المعنه واضح....بالمظالم
                      ~~~
رادوا يذبوحنه وتموت الـكرامه
الناكر الجيتك تره واضح كلامه
واحنه ندعيلك ترد لينه بسلامه
ابجيتك يالغايب تموت الظلامه
                ~~~
هذا هوه العناء.........يا صاحب الزمان
قد نزل البلاء...........يا صاحب الزمان
»»»»»»»»»»»»»»»»»»»»»»»»»»
3️⃣
كلها ضدنا...ومنهو عدنا....وانت غايب
كلها ضدنا....وضل عهدنا...ويالمصايب
                   ~~~
ننكسر يالغايب ونرجـع نندبك
والظلم يا سيدي والله يعذبك
وبدمعنا يابو صالح من نكتبك
تنهضم ما ترحم هسه التحبك
                   ~~~
لنا فيك الرجاء.......يا صاحب الزمان
قد نزل الـبلاء........يا صاحب الزمان
»»»»»»»»»»»»»»»»»»»»»»»»»
4️⃣
يا املنه.....ومحد النه.....وما نشوفك
يا أملنه..وعـطر اهلنه.....وما نعـوفك
                  ~~~
الـصبر فـاركنه والغيبه طـويـله
والزمن غرباله سوه المستحيله
طاحت الوادم الما جانت ثكيله
حگه ما يثبت تره العايف دليله
                   ~~~
فالحزن والبكاء......يا صاحب الزمان
قد نزل الـبلاء........يا صاحب الزمان
»»»»»»»»»»»»»»»»»»»»»»»»»
5️⃣
يمته ترجع.....كلها تفزع.....بالاشاره
يمته ترجع....النور يطلع.....عالغياره
               ~~~
للقدس محد فـزع بس الـغياره
شيعتك يا سيدي رهـن الاشاره
العاشگ اليدعيلك ابليله ونهاره
جيتك يبن الحسن اعظم بشاره
                 ~~~
هذا هوه الجزاء....يا صاحب الزمان
قد نزل الـبلاء.......يا صاحب الزمان
»»»»»»»»»»»»»»»»»»»»»»»»»»»»»»»»»»»»»»»»»»»»
                   محمد خشان ✍️.
»»»»»»»»»»»»»»»»»»»»»»»»»»»»»»»»»»»»»»»»»»»»»**