‏من غيهب الظلماء الى واهج النور
‏قدتك وخالفت الفكر والمبادي

‏منسي و مستوجع و تايه و مغمور
‏صنعت منك أنسان ما هو ب عادي

‏جعلت لك في داخلي رجم وقصور
‏شفتك عزيز أهلي وغالي بلادي

‏وساعة نبت ريشك وغنت لك طيور
‏أدمت مخاليبك حمامه فوادي .

اقبلي يا طب قلبي وارتياعي
‏اقبلي عقب المسافات الطويله

‏واحضنيني ي جميله من ضياعي
‏الضياع الي ما خلا لي وسيله

‏مرحبابتس من ذراعي لذراعي
‏جابتس الله علم وانتي حلم ليله

‏مدعين الحب والشوق الصناعي
‏كل ابوهم فدوتن لتس يا جميله .

الوجع فيك وانا اللي مرضت وشكيت
‏نكبة الفال . . ما ينفع تنهاتها

‏اتظاهر مع العالم وانا ما سليت
‏القطاعه , على وجهي علاماتها

هانت عليك أيام وسنين وشهور
‏ذكرى السنين أنهيتها في دقيقه

‏ليه الزعل من عقب ما كنت مسرور ؟
‏ليه الحبيب يخون ذكرى رفيقه

‏من طيب قلبي ما أعرف ألفّ و أدور
‏صدّقت كذبك وأحسب إنه حقيقه

‏عاهدتني وأثر العهد زور في زور
‏خنت العهد بعد العهود الوثيقه .

قارنت بين الخميس وليلة الجمعه
لافرق لافرق بين اليوم والبارح

الحزن نفس الحزن والدمعه الدمعه
والجرح مازال والجارح هو الجارح .

جعل عذبات القصايد مداوية الكبود
‏فدوة الرمش الجري والحجاج المنتبه

‏احفظي مبخوت الأبيات في طابوق عود
‏ولا خليها على الصدر سلسال رقبة

‏بري حالي كل ما هب من مرباك نود
‏والله لو أن الهوا ينقضب لي لا اقضبه

‏و أنتي أبعد من شعور الرضى على الحسود
‏و أقرب من الفوضوية لـ باب الموهبة

‏و أنتي أصدق من رسوم الزمن في وجه عود
‏و أكذب من الشعر لو أكذب الشعر اعذبه

‏أن وقفتي كل الأغصان مالت عود عود
‏و أن مشيتي كل شبرٍ من القاع انتبه

‏و إن رضيتي يقطع السيل مع لبّة نفود
‏و إن زعلتي يزحف الكون لك على ركبه

‏فيك للأبيات غاية ولـ القيفان مود
‏ينعقد في لساني البيت قدام اكتبه

‏أعشقك و أدرى خطاويك من هرج النقود
‏والطريق الملتوي والكلام المشتبه

‏جعل دارٍ فيه طرياك حنّان الرعود
‏الربيع يفاوله .. والسحايب تسكبه