هواي مرات نحس نفسنا ما منشافين وصوتنا ما مسموع ، ونحاول نفتش على عيون حقيقية تشهد على حياتنا و مواقفنا الصغيرة قبل الجبيرة ، وتساعدنا نضمد جروحنا من الجرح الصغير اليصير بأصبع أيدنا لحد ذاك الجرح المخفي الموجود بأحساسنا . ♥️

مع ذلك ورغم أهمية هذا الاحتياج الفطري ، يبقى الاهم أنُ تختار العيون التستاهل تشوف حقيقتك
لا تختار عين سطحية ماتعرف تشوف عمقك ، ولا عين تشوف بس الي هي حابة تشوفه
ولا عين تراويك مدى سوئك رغم كل محاسنك .. أختار العين المهتمة فعلاً أنُ تشوفك وتساعدك تشوف حتى الاشياء الي ماتبصرها أنتَ بذاتك . ♥️

أحتياجك لعيون تشوفك ، هذا أحتياج طبيعي فطري يبدي وياك من الطفولة ، من تسوي أي فعل حتى تجذب انتباه الاهل وتضل تكرر بي لان أكو عيون مهمة كاعدة تشوفك .
ومن تكبر شوي تكوم تشارك بالاعمال المنزلية ( مثل منغسل المواعين ونكعد نراقب رد فعل امهاتنا اذا انتبهو او لا ) في سبيل تحصل على النظرة المطلوبة من أهلك .
وهيج نضل ندور وندور على العيون المهمة المهتمة طول ما احنا عايشين ومهما كُبرت اعمارنا . ♥️

مَرة قريت بوست على الانستا عن شخص مشهور يصنع محتوى مختلف ويشارك الناس بكثره ، وفجئة توقف عن صنع المحتوى وصارت منشوراته جداً قليلة وعلى فترات متباعدة ، ومن سئلو المتابعين وين محتواك وليش متغير ؟ ردلهم " اني قبل جان عندي فوك المية الف متابع بس جنت حاسس بوحدة ونقص وقلة عاطفة بس من دخلت زوجتي على حياتي أكتفيت ، وماصرت أهتم بمصدر أخر للحب والتشجيع غيرها " ♥️

بالشغل اصلي بغرفة تجهيزات حديثي الولادة ، وكل ما ارفع ايدي ادعي ، تجي عيني على هالتجهيزات وابتسم واردد " رَبِّ لَا تَذَرْنِي فَرْدًا وَأَنتَ خَيْرُ الْوَارِثِينَ " ♥️*♥️*♥️♥️♥️**

https://youtu.be/IJLiQ__g5UE?si=UJn-rUjwLB-gbDno

الحنين مراح يرجعك لنقطة الصفر ، هذا المفهوم كلش لا انساني عن الحنين وما احبه لان ماكو شي اسمه الرجوع لنقطة الصفر
احنة عدينا اشواط عديدة واجت لحظة الحنين خلتنا نوكف بمكانا شوية وبعدها كملنا ..
لحظة الحنين ممكن توكفك بمكانك بس مترجعك لنقطة الصفر ابد
خلي گلبك يعيش حنينه و يحس بكل المشاعر الي حاويها وخَلي يوكف شوي ويبجي وعوفه يصعد سلم التشافي درجة درجة على مهل مهلة ، لاتنسى ان هالگلب هو گلب انسان مهما تظاهر بالقوة فهو رقيق ?

مَرة صديقة الي كالت " شفت صوري القديمة بلا حجاب وحسيت بحنين وضجت من هالحنين وأنبت نفسي ، مع انُ اني مرتاحة هسة كلش وما الي نية انُ اتخلى عن الحجاب ، بس ليش حسيت هيج من شفت نفسي قبل !! " ?

هذا صور من صور الحنين الي نحسها تجاه نسخنا السابقة ، اكو الي يحن لنفسه السنگل ويأنب نفسه ليش حس هيج مع أنه مرتاح وي شريكة فليش تطلعله هالمشاعر !
واكو الي تحن لنفسها قبل الامومة ... وسلسلة من مشاعر الحنين الانسانية الي كلنا نمر بيها وكلنا نحس بالعار تجاهه ونخاف نشاركها حتى لا يتم انتقادنا ?

لكن بالحقيقة بعمرك لا تحارب حنينك ، هالشعور احسه مثل الطفل الي مو راضي يفهم انُ الوضع القديم غادرنا بوعي وبعمرنا منفكر نرجعله لكن هو مچلب بكم ذكرى حلوة قديمة ومخليهن بأيده مثل اللعبة بأيد طفل ، منكدر نجرها من أيده بالقوة ولا نكدر نحاجي بمنطق لانه طفل
نكدر نحتوي ونطبطب على ظهره لحد مينام وناخذها من أيده ونبعدها بعيد . ?

لازم تتعلم تكون اكثر رحمة تجاه مشاعر الحنين التظهر فجئة تجاه وضع سابق معَدي ومتخطي
هنا هالمشاعر مو معناهه رجوعك لنقطة الصفر ولا تمنيك أنُ ترجع للوضع الي غادرته او للشخص الي عافك ، لا هاي مشاعر طبيعية نحسهه تجاه كل شي سبق ومرينا بي ?

بالغالب احنة نحس بهلع من مشاعر الحنين خاصة اذا لكيت نفسك بيوم حان لعلاقة سابقة او لصديق صار بينكم موقف سيء وغادرك او لوضع قديم جنت عايشة ..
هنا تبدي تاخذ رد فعل الي هو " ليش دترجعلي هالذكريات !! اني مو تخطيت فلازم متجي على بالي بعد وما اتذكرها ولا حن .
بس الي لازم تعرفه انُ اي وضع تتخطاه انتَ فقط غيرت مكانه من قائمة الاولويات مو محيته من ذاكرتك ، احنة منكدر نمحي كل شخص غادر من حياتنا او اي وضع سابق مرينا بي .. كل هالاحداث هي حياتنا فمو من الطبيعي كل وضع نتخطاه نتمنى نحذفه للابد ، هيج مراح تكون عدنا حياة ولا تجارب ?

تعالو اشاركم شي

جنت داشوف فديوهات عن عالم البحار والفضاء وشلون كلشي بيهن شاسع ومترتب بنفس الوقت .
فحسيت روحي ذرة بنص هالملكوت ، ومشاكلي الشايفتهن نهاية العالم هن مو نهاية العالم ولا حيضيقن بيوم من وسع هالدنيا مهما وسعن ، ورغم اتساع كل شيء .. فأني مو وحيدة ولا منسية ، و ربي مدبرلي كل امور حياتي وكأني عبده الوحيد !
حسيت گلبي أكبر من كل خوف وحزن وتدبير ، فكمت فتحت الشبابيك وتشمست وصليت بكل حضور ولعبت رياضة وشربت فيتاميناتي وخليت السكن كير مالتي وكعدت اتخيل روحي ذرة محمية مدللة ، وهذا جان احلى شعور غمر گلبي اليوم ♥️♥️♥️♥️

فمهما جان الوضع الانت بي ومهما جانت المشاعر الضاغطة على گلبك ، لاتنسى تذكر روحك بأنك ذرة محمية مدللة . ?