نعي العليله جديد
… .
عليله خلافكم بويه عليله
وعليه هواي سفرتكم طويله
ثجيله الاخ يابويه ثجيله
ونه ابفرگاك وجعانه ونحيله

حملتو الظعينه گبال عيني
وانه امكدره وزايد ونيني
اتاني رجعتك لوماتجيني
حال البين مابينك وبيني

الابوذيه
……
البت ابغير ابوها ياهو الها
مصايبها الزغيره ياهو الها
العليله اشماتهفي ياهو الها
تموت ابخنگه عالراحوا سويه
…… ..
من ودعوني راحوا هلي وماشين من ودعوني
وحدي جفوني شمسويه اني وليش وحدي جفوني
شو ماخذوني من دون اهلنه ليش شوماخذوني
مايذكروني شالو بعيد ابعيد مايذكروني
… ..
علي الحاج الصبيحاوي

الليله جمعه الموته تستاهل ثواب
وچم عزيز العدنه نايم بالتراب
……
الليله جمعه الفاتحه نقراها كون
للغفو بالمگبره او وسط العيون
ياتراب النجف بيك شكم حنون
اندفنوا وفوگ الگبر سدينه باب
……
الليله جمعه وخلي نقراها ابدمع
كون فوگ الوجنه دمعه التنطبع
ودعينه اشچم عزيز وچم ظلع
راحوا ابغفله وكبر بينه المصاب
… . .
الميت ايتاني الثواب بكل خميس
يصيرله ابنص الگبر رحمه وأنيس
ابرحمة الباري ثوابك وانت قيس
حتى ربك ينقذه من العذاب
…… ..
أبرحمة الجمعه وثواب المستمر
اوياها سورة فاتحه كون العصر
ابقدرة الباري ايتنور هالگبر
كل خميس وينفتح عنه الحجاب
……
الليله جمعه وحسرة الميت دليل
من يمر عالباب يشعر بالسبيل
يدري كلمن يذكره لو بالقليل
يعرف ادموع النضر عدمن خضاب
……
ابليلة الجمعه ثواب الهم يسير
خلي نقره الفاتحه ابگلب وظمير
تنفع الميت وحقك بالاخير
الله ذاكرها تره بهذا الكتاب
……
علي الحاج الصبيحاوي

وين الوعد بويه.. شصبر بعد بويه
موتني الغياب.. وعيوني عالباب
بويه.. بويه
……
سفره وطويله وفاجعه ومن ياهو اشكي الياهو
موگتلي الاكبر يوصلچ وانه انتضر شو ماهو
يابويه چاوين الوعد لاانته جيت ولا هو

عمر المظه بويه.. بلحظه انگظه بويه
ومتانيه احباب.. وعيوني عالباب
بويه.. بويه
…..
بيت العشگته من الزغر شو چنه صاير خنگه
يمطول ادروب السفر تدري الگلب هم حگه
المعلوله ماعدها دوه وطب روحي منك شبگه

زاد الوجع بويه....گلبي انفجع بويه
حيل الجسم ذاب.. وعيوني عالباب
بويه.. بويه
…… .
مابيني اوبينك عشگ بيه العطف والرحمه
مشتاگه اسولف حالتي واسمع ولو فد چلمه
البنيه لو غير الابو تكشيله هاي الزحمه

يمته ترد بويه.. طال البعد بويه
دلالي انصاب.. وعيوني عالباب
بويه.. بويه
…… ..
اتأملك شهگه ابنفس يالماخذ احلا اسنيني
عشگ الطفوله والكبر ما بينك ومابيني
يابويه طولت السفر وانه المرض يغزيني

صارت صدگ بويه.. من نفترگ بويه
ياجرحي ماطاب.. وعيوني عالباب
بويه.. بويه
…… ..
محتاجه من عدك خبر طارش يصبر حالي
يوهسني لو يوصل الي واشتم هواك الغالي
بغيابك انه امدوهنه وكل محنه توصل بالي

طال الهجر بويه... شيسوه العمر بويه
راس الگلب شاب.. وعيوني عالباب
بويه.. بويه
…… ..
من ياهي اشكيلك بعد وانته ابدرب وبسفره
نحلانه بس من غيبتك والعبره تخنگ عبره
بين الظلوع وهالگلب نامت چبيره الحسره

گلبي انكسر بويه.. عمري گصر بويه
بهدومي التراب.. وعيوني عالباب
بويه.. بويه
……
علي الحاج الصبيحاوي

انه العليله ابدارهم خلوني
سهرانه ليلي وماتغمض عيوني
وحشه وخليه الدار.. بس الدمع تذكار
انه العليله ابدارهم خلوني
… ..
مثل اليتامه الليل شالع حالي
مشية ظعنهم كل وكت تبرالي
خالي النزل بس الگلب موخالي
وين انطي وجهي الصور تتراوالي

انه العليله الماخذوني وياهم
وحدي ومريظه شلون راح انساهم
متحمله گوه الصار.. بس الدمع تذكار
وجعانه وبيوم المشو سلوني
انه العليله ابدارهم خلوني
…… .
يادهري هجران الاهل اذاني
وانه الوحيده الماتروح احزاني
ياموتي شنهي العطلك شمتاني
مر بيه صدفه ادخيل لاتنساني

انه العليله ابدارها مسجونه
اتاني ظعنهم بلكت ايرجعونه
محد يجيب اخبار.. بس الدمع تذكار
حال الغريبه حالتي عافوني
انه العليله ابدارهم خلوني
……
ساعة اغروب الصفنه من تلويني
تاخذني يم احبابي وتوديني
حتى ابحلم ماألگه اليدليني
يابويه ليش الوحدي اتخليني

انه العليله الماخذتها اوياكم
ليل ونهار اتفكر بطرواكم
محترگه كلها بنار ..بس الدمع تذكار
مثل الرماد اخلافهم يلگوني
انه العليله ابدارهم خلوني
……
ياگلبي عيش ابمحنتك واتهنه
راح الحبيب وگطع خيط الظنه
شتمنه ياوكت الحزن شتمنه
بس حايط ومصبوغ بابه بحنه

انه العليه النامت ومكسوره
ما راحت وياكم بقت مقهوره
عدها گلب محتار.. بس الدمع تذكار
حتى وصيه اهلي ماوصوني
انه العليله ابدارهم خلوني
……
علي الحاج الصبيحاوي

الله ايعين بالفركه العليله
شالو والظعن اعلن رحيله
……
عليله والزمن كاسر گفاها
مشه عنها ابوها وماخذاها
مريظه وفارگت عزها ودواها
تعثر بالهوه گد مانحيله
……
الله يعين كلمن فاگد احباب
ليل نهار عينه مگابله الباب
الموت اهون ولا كل اهله غياب
يعيش اشلون المفارگ خليله
…… .
تعبانه وتدير العين بهداي
عطشانه ابو ماعطشت الماي
وجعانه وتصبر الداي بالداي
حال الظيم حالتها وهزيله
… ..
الفاگدله عزيز ابعمره مهموم
يعيش اسنين فوگ سنين مهظوم
عليله والوجع خلاها متگوم
بس يمها الحزن تارس شليله
…… .
مكسوره وجرحها اتشده بالاه
ليل الفرگه يخلص كله ويلاه
احاه يامصابچ كله احاه
وحيده ودمعچ امفتح سبيله
…… .
وحيده وفارگت كل التودهم
تريد اتعيش ماتگدر بعدهم
الدهر منچ خداهم مايردهم
ثگيله محنتچ والله ثگيله
…
علي الحاج الصبيحاوي

عباس حمل ضعوني
… .
شايل واريد الكربله
يامن كفلت العايله
مشيها خويه القافله
يالرابي بين اعيوني
……
شيل المحامل والخيم
ركب اطفالي والحرم
حملها ياراعي الشيم
هاك اخذ هاي امتوني
…… ..
خلي هوادجنه سوه
شيل انته بيمينك لوه
يالعندي اعز من الهوه
صبي عيني بين جفوني
……
رافگ اخيتك بالدرب
زينب ولاشافت غرب
خافنها باچر تنضرب
وانه العده يولوني
…… .
صعدها عالناگه عدل
حاميها من بعدك عدل
باچر على النوگ الهزل
والوحدي ايخلوني
… ..
ظعن الفواطم صعده
لايمشي كون الوحده
كلهم سبايا للعده
واعله الرمح يلگوني
… .
ياچف اخوك وشاربه
ياقوة الله الضاربه
ياگاضي كلمن مطلبه
بالدرب ردتك عوني
…..
مشي الضعون الطاهره
ام عون اخيتك ناطره
محتسبه كلشي وصابره
من العده ايذبحوني
… ..
علي الحاج الصبيحاوي

السلام عليكم ورحمة الله وبركاته جميعا.
اخوتي واخواتي الكرام خدام الامام الحسين عليه السلام.
من اليوم ان شاءالله ساقوم بنشر القصائد الجديده التي تخص شهر محرم والتي رزقني في كتابتها الله لكي يتسنى لليحب يقره مراجعتهن وتثبيت الحانهم .
والذي يبحث عن القديمات موجودات داخل القناة ونسال الله القبول للجميع أن شاء الله