‏و إن ضحكتي صار لـ التاريخ معنى
‏و أقمرت ليله معك عن ألف ليله

‏المدى واسع و لكن ما وسعنا
‏ضاقت فجوج المواعيد البخيله

‏لا يمر العطر في طاري وجعنا
‏الجروح إن هبت الذكرى عليله

‏من بقى في ساعة التوديع معنا؟
‏لـ الليالي ثار .. و أحلامي قتيله

‏ألتقينا في ورق شاعر و ضعنا
‏مثل ما ضاعت علومي بـ الجديله .

‏إن خانك الغيم يا ديرة وساع الطعون
‏يكفيك فخراً دميّ الشوخ و عيالها

‏الخيل و النوق و الهقوه و طيب الظنون
‏في عاصمة نجد ربعي تحييّ آمالها .

‏"معرّض صدري لـ رش المطر و ذعذاع الهبوب
‏ ودي إن المطر يغسل قلبي من شيءٍ يحسّه"

‏ليلةٍ من طولها كن ثوانيها ليال
‏ما تمر .. لو ساعتي غيَّرت توقيتها

‏من يعيش شعورها يحسب إنه فـ الخيال
‏خل عاد اللي لا سولفت له طريتها

‏أعتق شعوري و أذِّن و أرِحنا يا بلال
‏الفجر كنِّي من العام ما صليتها .

#قصيدة_الليلة

‏وين بـ ألقى طريق! و كيف أحصل طريقه
‏لـ السعه لـ التعافي لـ السعد لـ الشغف

‏كل ما لاح لي برق و شعفني بريقه
‏بيني و بينه الحظ المغثرب وقف

‏ليت لَوّ الخيال يصير مَرّة حقيقه
‏كان الآمال ما علقتها فـ الصدف

‏راحت أحلام عمري كلها في حريقه
‏أعترف ما بقى لي شيء منها أعترف

‏غير غصّه و تنهيده و حرقه و ضيقه
‏كل ما جيت بـ أسلى عنّها جات صف

‏أتحرا صباح يفك بـ الخير ريقه
‏علّ لي فيه عن شمس التنهات ضَف

‏ضقت من وادي أهيمه و من ضلع أويقه
‏عَلى كثر إتعبي فيهم ما ذقت الخلف

‏رب يا رب جودني عُراك الوثيقه
‏أنا ما عاد لي في عيشة الناس شَف

‏كل ما كنت أحبه صرت ما عاد أطيقه
‏كن أنا ٫ ماني أنا كنني مختلف

‏اللي بـ الأمس رُبان البحور الغريقه
‏نفسه اليوم هذا هو حبيس الغُرف

‏كانت أحلامه طوال و عراض و عميقه
‏و راح سامح ما يبغى منّها حمل كف

‏وده فـ بيت متواضع و حوش و حديقه
‏و كرسيٍ من خشب و أوانيٍ من خزف

‏و وجهٍ يحبه و يغنيه عَن الخليقه
‏في رحابه رضى نفس و نعيم و ترف

‏ معه يمضي الحياة بخير لـ آخر دقيقه
‏لين يسكن من أكناف المقابر كنف .

‏أكبر من أنّ نعترف و نتعرّف
‏أيامنا اللي الوقت منا سرقها

‏لو الكلام اللي نقوله محرّف
‏ما كان غسلنا الوجيه بـ عرقها

‏لـ الحين لك باب الضلوع المطرّف
‏و مشاعرٍ جمر الجفا ما حرقها

‏لا تتركين أسمى الرسايل على الرّف
‏بـ يموت كاتبها و يذبل ورقها .

#قصيدة_الليلة

كشف برق الحيا و الليل داله و القمر منجوم
كريمٍ يا بعد من لاح . . و أخطتني مخاييله

لعلّ الشعر عذرٍ يشفع لـ عينٍ جفاها النوم
تهجى صادق أحساس الظما و تعيد ترتيله

يلومون الصبور إن ملّ من صبره و أنا ما ألوم
من اشقاه الثبات و هدّت ظروف الزمن حيله

يا رب إن كان باقي من سلوم ابن اليمان سلوم
لا تحرمنا الصدور اللي تحفظ العلم و تشيله

سواءًا منتصر في معركة الأيام أو مهزوم
لا زال بـ حاجة الإنسان لـ أي إنسان يشكي له

و لكن لا لقيت الناس حمّالة حطب و هموم
لا يقرب سرك من البير و ارشاه و محاحيله

متاهة صدرك أولى و الليالي غيبها معلوم
مع اللي بـ أمره يساق السحاب و يندرج سيله

عن أسرار العباد تضج الألسن و العزيز يشوم
و أنا أكثر ما ابغضه فـ الحكي تحريفه و تأويله

من أوغل فـ الحقايق و أنصدم فـ الواقع المشؤوم
ما عاد يفكر يسولف لـ أحد بـ أصغر تفاصيله

ما عرّضنا مغاليق الضماير . . بيعة أول سوم
لها الله لا أستضاقت من غثا الوقت و غرابيله

لو إن أحيان تصعب وقفة الخاطر على الحلقوم
عسى ما فات من عمرٍ مضى فدوة مقابيله

و عسانا لا عطينا السر أحد ٫ ينساه ثاني يوم
ما هو ينساه لا من حبنا و إن عاف يطري له .

‏الثقه بنت السدود اللي ماهيب قريّب
‏و شرهة الغلطه على الغلطان و المتمادي
‏
‏من طلع من فوق ظنك فيه ٫ قله طيّب
‏و من قصر من دون ظنك فيه ٫ قله عادي

‏والله إنه ما يحنّ إلا الرفيق الطيب
‏لا غلط له غلطةٍ ما له عليها حادي

مساء الخير .. أما بعد :

يُرهقك هذا العُمر الفارغ تعيشُ مُحاصرًا
إما زحام التشابُه أو الوحدة .

#قصيدة_الليلة

أنا يا ما وقفت أرقب مجيّ الراحل العسّاس
متى تزهر ديار مواصله و يلوح بارقها

جفا عمري ربيعه و السنين من الوله يبّاس
أخط بـ كل صبح رسالتي و الليل أشققها

بعد ثالث سنه و هموم صدري ما لها مقياس
من الأربع جهات أحزانها قامت تطوقها

يا قلبٍ ذاق ما لا يستسيغ و قلت له لا بأس
ترا الأحلام ينفعها الأمل لو ما يحققها

على الله كل ما تغفى عيون أحلامك النعّاس
يلحفها الكرى و توادع اللي كان يأرقها

نفوسٍ قد تمثناها الشقا و أستسلمت لليأس
تغربها الليال السود و الوحشه تشرّقها

تغانم نسمة الصبح الجميل و بارد النسناس
و فك القيود روحك لـ السماء في حفظ خالقها

بعد ليلٍ سدوله من حنين و غربته هوجاس
ما ينبش من جروحك في الغياب إلا معتّقها

حبيبي و الشعور اللي ملى دربك غلا و إحساس
تكذّبها خطاك مع المساري قبل أصدّقها

أشوفك فـ الوجيه اللي بقت لي من وجيه الناس
و أنا لولا حياي إن جيت أصافحها ٫ أعانقها

لكن البحر و حدود السماء و الأرض و الجلاس
ليا مني نويت أفارقك كأني مفارقها

لا تستغرب ليا خان القصيد الحبر و القرطاس
يا كم كلمه تبين بـ وجهنا من قبل ننطقها .