#фойдали

Эчкичининг болаларига мўжазгина инча ясадик! Баҳо берасизлар, керак бўлса шахсийга ўтасизлар!
Бунақа инни Сиз хохлаган уй хайвонига мўлжаллаб ясаса ҳам бўлади!

@Furkat_Khalmatov буюртма учун!
https://t.me/echki_savdo_auksion

Эчки сутининг инсон саломатлигига таъсири

Самарқанд давлат университети биология факультети  талабаси Ҳушноза Мамадиёрова “Эчки сутидаги оқсилларни биокимёвий аниқлаш усуллари” мавзусида илмий тадқиқот олиб боради. Унинг эчки сути таркибини ўрганиш ва ундан янги турдаги препаратлар олиш борасидаги тадқиқотлари илмий жамоатчиликнинг эътибор марказида бўлиб келмоқда. Илмий раҳбари СамДУ доценти Марҳамат Исмоилова.

– Жаҳон бўйича ишлаб чиқариладиган сутнинг атиги 2,6 фоизи эчки сутига тўғри келади, - дейди Ҳушноза Мамадиёрова. – Бу борада истеъмол кўрсаткичлари энг юқори сут тури бу сигир сутидир. Бироқ, эчки сути сигир сутига нисбатан бирмунча фойдали. Маҳсулотнинг биокимёвий хусусиятларини ўрганганиш орқали эчки сути таркибида фойдали ва ноёб минераллар кўплиги, бу эса инсон саломатлиги учун ниҳоятда фойдали эканлигини илмий таҳлил қилишга ҳаракат қилдим. Япония, Шветсария, Греция каби мамлакатларида эчки сути кўп истеъмол қилинади. Бу давлатлардаги умумий сут маҳсулотларининг 60-70 фоизи эчки сутига тўғри келади. Бизда аҳоли истеъмолида сигир сути кенг фойдаланилади. Аммо эчки сутининг сигир сутига нисбатан шифобахшлик хусусияти юқори.

Эчки сутининг фойдали хусусиятлари қадимги даврлардаёқ инсонларга таниш бўлган. Ибн Сино уни янги туғилган чақалоқлар, ҳомиладор ва эмизикли аёлларга ҳам тавсия қилган. Алломанинг фикрича, эчки сути ични юмшатувчи, томоқдаги яраларни даволайди, йўтал, бош оғриғи, меъда хасталикларида фойдали ҳисобланади.

Жаҳон олимларининг фикрича, эчки сути кимёвий таркибига кўра она сутига яқин туради. Таркиби кальций, магний, темир, марганец, калий каби қимматли моддаларга бой. Рахит, жигар касалликлари, ўпка сили, аллергия касалликларини даволашда эчки сутидан фойдаланилса, яхши самара беради. Эчки сутида ишқорлилик хусусияти юқори бўлганлиги учун ошқозони ортиқча кислота ажратадиган беморларга яхши даводир. Ушбу маҳсулот таркибида бактерияларни йўқ қиладиган, ичак ва ошқозон шиллиқ қаватининг яллиғланишини кетказадиган, шунингдек, майда яраларни самарали даволайдиган лизозим ферменти мавжуд.

Экзема, қичима, астма ва турли аллергик касалликларда эчки сути ичиш фойдали. Қандли диабетга чалинган беморларга кўпинча эчки сути ичиш буюрилади. Сабаби, унинг таркибида глюкоза йўқ, калория миқдори паст. Эчки сутидан халқ табобатида бўғинлар оғриғини қолдиришда, ўт халтасидаги тошларни туширишда, уйқуни мустаҳкамлаш, стресс, депрессия ва неврознинг олдини олишда қўлланилади. Асаб тизими билан боғлиқ касалликларга чалинган беморларга кўпроқ эчки сути ичиш тавсия қилинади.

Эчки сутини фақат пишириб истеъмол қилиш зарур. Ундан хуштаъм қатиқ, сузма, қурут тайёрлаш мумкин. Шунингдек, сузма зардоби гепатит касаллигининг олдини олишда фойдали.  Шакар  билан ичилса, юз терисини тиниқлаштиради. Сут таркибида Д витамини ва кальций кўп учрайди, шунинг учун уни мунтазам истеъмол қилиш орқали суяк синиши хавфини сезиларли даражада камайтириш, рахит ва унинг жиддий оқибатларининг олдини олиш мумкин.

Эчки сути спортчилар учун ҳам жуда фойдалидир.  У узоқ давом этган жисмоний машқлар натижасида шикастланган мушак тўқималари тикланишига ёрдам беради. Агар эчки сути шолғом шарбати ва ёнғоқ билан биргаликда ичилса кашандалик сабабли келиб чиққан кучли йўталда самарали фойда беради.

Таъкидлаш жоизки, эчки сути табиатнинг инсонга тақдим этган ноёб инъомидир. Унда инсон организмидаги жамики касалликларнинг олдини олиш ва даволашда фойдаланиш мумкин. Шундай экан, кунлик озиқ-овқат рационингизга эчки сутини қўшиши орқали ўз соғлом ҳаётингиз мезонларини яна бир маҳсулот билан бойитишингиз мумкин.