معرض الشارقة الدولي للكتاب
دار الأجنحة للنشر والطباعة والتوزيع
قاعة 1 جناح U13

عاجبك قعادك فوق كدا
وطول النوى ..
كان مالو لو هسي الخطاوي
الماشة جاية بلا هدف
كانت سوا ..
ما كنت ناجيت البلح
واتسلى برمي النوا ..
وعثمان حسين
يقعد يقول
مالي والهوى ..
مالي والهوى ..
كان قلبي يشرب وما روى ..
يومين تلاتة وتشردي
ولمن تجي
بتجيبي لروحي الهوا ..
وتلقيني ياني انا الزمان
زول جاري بالايام هوا ..

https://vm.tiktok.com/ZMrjtTXJo/

يا السكنتي مع المشاعر
وفي حشا الاشواق بحسك ..

في عيوني تعالي خشي
من عيوني عشان ادسك ..

طالما في داخلي انتي
وطالما في صوتي حسك ..

روحي ممكن اسيبا تطلع
وانتي مافي عذاب يمسك

يا بلادي
حتى لو قعدت قصادي
الدنيا
والأيام
وليل المنفى في الخاطر
وفي البال الأعادي
حتى لو واصلتي عادتك في الملاوزة
لو كشحتي اللوحة
في اللون الرمادي
حتى لو خنتيني ذاتو
وأصلو طبعك خاينة
ما عندك مبادئ
مايلة ديمة على العساكر
والبودوك
البحبوك
تجدعيهم غادي غادي
حتى لو كان شلتي روحي
وروحي أصلا
شن فضل لي فيها بعدك؟
وشن فضل لي في إبتعادي
ياخ حتى لو كان أي حاجة
الا إنك يا بلادي
عندك الحتة الكبيرة
في حياتي وفي فؤادي
عندك آذاني البتصغي
لو هتف صوت المنادي
عندك الشعر الكتبتو
وعندك العمر الوهبتو
عندك الدم السكبتو
وعندك الحب ما اعتيادي
وعندي عندك كل حاجة
بالتبادي
راحة البال لما أرجع
ضحكة النيل
ذكريات لو حتى توجع
والنخيل
والصباحات والروادي
الشوارع
شمسك الحارة وغبارك
عمر ضائع
فيكِ خاض كمين معارك
البنيات
الخديدات النوادي
شيشة في طرف النوادي
المسارح
رغم آلاف المشارح
المُغنين والحقيبة
ضجة المدن البعيدة
وراحة البال في البوادي
المحطات الحنينة
الزقاقات
قعدة رايقة
وكرسي هادي
حربتي وسيفي وجوادي
ضحكتي المرقت تهادي
غضبتي وإعلان جهادي
وعندي منك أي حاجة
دمك الحار
طبعك الفتان وعادي
عندي وسمك بين كتوفي
وعندي رسمك يمحو خوفي
وعندي إسمك
ويكفي إسمك
يا بلادي

في وحدتك
من شدة الكتمة الجواك
يتعرق الليل
وانتَ بتباري النجوم
وتفكك اللحن الحزين الفي الغنا
وتتبع مسار القمرة
في درب الغيوم
تقرى الخيوط الحالكة في ورق الضلام
وانت بتخوض الحرب
في مُدن الهموم
وتقول براك
الليل دا يا حب ما اتخلقلك شان تنوم
وتعيد براك
الليل دا يا حب ما اتخلقلك شان تنوم
الليل بجيك مغري وخفيف
وقالع الهدوم
الليل شريط الذكريات
وإلتقاطات المُصور
في صراعو مع الزمن
لمن يشيل النسمة من وسط السموم
الليل يسلمني المغارب
ويصطفي الليلتو ويقوم
يحتوي الشك والعقارب
يحتوو البال والسموم
والمغارب تحتويني
وتفتح الباب الموارب
تقرأ من صفحة سنيني
قصة من وحي التجارب
عن معاناتي وحنيني
وبيني بين الأرض قارب
يا مغارب
جيبي صاري
وأغربي
سلميني إلى العصاري
وسلمي الذكرى الوحيدة الباقية من كُتب النبي
خلي أعلن انتصاري
مرة واحدة على فتات العمر وآمال الصبي
وضيق المحطات والطرق
والموت وقانون الطواريء
وما يلي :
التيه وأفكار النهاية
الصدق والشوف الجلي
وزيف النهارات
لما تقلع للشموس
قبل المحالك تنجلي
ويا أمنيات إتفضلي
راجياك اغاني حزينة في اوضة الجلوس
ما تخجلي
كنك عروس
الغابة في الحوش الوراك نزحت
قبل ما يجيها سوس
وما تسلميني رهينة لفك الصباح
والنار
عشان انا ما مجوس
انا كنت بستأذن مكان القعدة قبال الجلوس
وبغير الخطوات حسب سير الرياح
انا يا حزن
ما عجنة اختمرت عشان تقعد تعوس
لا فار تجارب قادر يتحمل جراح
انا طفل ضاع منو العمر وهو قاعد إكوس
في عمر راح
من غير هدُى .. ومن غير دليل
يا نفس اوعى تشابي للجوة النفوس
لا تدي للحياة إقتراح
اليوم بدا .. وما فيهو نيل
ما فيهو حاجة مهمة على وجه الخصوص
ما تسلم الصوت للصياح
والياهو دا .. وصورة الرحيل
ما تنكفي وتدي الاحاسيس للنصوص
لا الطير حيهديلك جناح
لا الراح سُدى .. ولا القال وقيل
والصبح ما إتنفس قبل يأذنلو ليل
ورجعنا لليل والنكوص
اللجة قدامك وقدامك ضلام
اها يلا غوص
يمكن تلاقي الضفة جاياك في المنام
وهي شايلة فانوس
يمكن البحر ينتبه إنك كسيح
يضحك ، وتعبر في سلام
يمكن تلاقي البحر نام