Tezroq, balandroq, kuchliroq – birgalikda!

Parij Olimpiadasi bizga unutilmas va hayajonli onlarni tuhfa etdi. Goh salgina omadi chopmagan sportchimizga qarab, ichimiz achidi. Unga dalda boʻlgimiz, “sen qoʻlingdan kelganicha harakat qilding, intilding, aslo xafa boʻlma, hali gʻalabali onlaring oldinda” deb taskin bergimiz keldi. Chunki Olimpiada oʻyinlariga yetib borishning oʻzi oson ish emas. Bu qanchadan-qancha sportchining orzusi, armoni. Balki bu gal gʻoliblik nasib etmagandir. Ammo medal olmagan vakillarimiz ham Vatan shaʼni uchun borlarini berib harakat qilishdi. Ularga ham rahmat.

Gohida muvaffaqiyatidan koʻziga yosh kelgan atletimizga qarab, bizning ham koʻzlarimizga yosh qalqdi. Bu quvonch yoshlaridir. Axir millionlar nigohi qadalgan maydonlarda Vataning bayrogʻi baland koʻtarilishi, madhiyang yangrashi, bu, haqiqatan ham, taʼriflash qiyin boʻlgan hayajonli damlardir. Toʻmaris misoli jasorat koʻrsatib, tarixga oʻz nomini yozdirib qoʻygan Diyoradan boshlangan zafarli yurish Alpomishday raqiblarini birma-bir yer tishlatgan Bahodirning ajoyib gʻalabasi bilan yakun topdi.

8 ta oltin, 2 ta kumush va 3 ta bronza medal. 206 davlat orasida 13-oʻrin, Markaziy Osiyo, MDH, Islom birdamligi, Iqtisodiy hamkorlik va Turkiy davlatlar tashkilotlari mamlakatlari orasida birinchi oʻrin. Osiyoda Xitoy, Janubiy Koreya va Yaponiyadan keyin 4-oʻrin. Boks musobaqalarida 5 ta oltin medal bilan eng yaxshi jamoa  – bu tarix sahifalariga oltin harflar bilan yoziladigan ulkan natija! Bu – Yangi Oʻzbekistonning yutugʻi. Prezidentimiz olib borayotgan islohotlarning yorqin mevasi.

Shubha yoʻqki, mana shu yutuqlar taʼsirida qanchadan-qancha ota-onalar Diyoraga, Hasanboy yoki Abdumalikka havas qilib, farzandini sport toʻgaraklariga yetaklab boradi. Yangi tugʻilgan chaqalogʻiga Asadxoʻja, Lazizbek, Svetlana, Ulugʻbek yoki Bahodir deb ism qoʻyadiganlar qancha. Bu muvaffaqiyat qanchadan-qancha shoirlarga ilhom bagʻishlaydi, yangi asarlar, qoʻshiqlar, filmlarga mavzu boʻladi. Sportning kuchi mana shunda.

“Citius, altius, fortius – communis!”, yaʼni “Tezroq, balandroq, kuchliroq – birgalikda!”. Olimpiada shioriga qoʻshilgan mana shu “birgalikda” soʻzini Markaziy Osiyo vakillari oʻz hamjihatligi bilan yaqqol koʻrsatib qoʻydi. Yelkama-yelka turib, bahslarda bir-birini qoʻllab-quvvatladi. Qardoshlar oʻrtasidagi mana shunday mehr-oqibatga, doʻstlikka hech qachon koʻz tegmasin. Bu barchamizning gʻalabamiz.

Fursatdan foydalanib, Madaniyat vazirligi jamoasi va shaxsan oʻz nomimdan sportchilarimizni, murabbiylarimizni, butun xalqimizni ushbu tarixiy gʻalaba bilan chin dildan tabriklayman. Zafarli odimlarimiz bardavom boʻlsin!

Olgʻa, Oʻzbekiston!

? Telegram / ? Instagram

#Xisobot_konsert

✅Joriy yilning 23-may kuni Xorazm viloyati Bog'ot tumani 14-son bolalar musiqa va san'at maktabining 2023-2024 o'quv yili yakuniy deb xisobot konsert dasturi bo'lib o'tdi. Tadbirga ota onalar ham taklif etildi va ular tomonidan konsert ishtirokchilari ijro qilgan chiqishlari olqishlar bilan qo'llab quvvatlab turildi.

?????

?Bog'ot tuman 14-son bolalar musiqa va san'at maktabi Axborot xizmat.
Telegrаm https://t.me/doutam
Youtube kanal https://youtube.com/@14-sonbmsmbogot‌‌