من يوم تركنا وأنا كل ما اتأخّر بالسهرية عند رفيقي بيقلّي: إنت ماعندَك أهل يسألوا عنّك؟

وأنا جاوبُه: لا بالله.. انقطعت من شجرة

...
ماقلتليلي.. مبسوطة انشالله بعد ماصرنا مَقطَعَه!

سيمياء

خلقت النار بآدار..

قبل بحصّة من مايجهجِه الضَوّ..

الخلق شافت منها لهب أزرق وقالت "ايْ وبلكي هَي مَيْ"؟

ومن يومها بهالأوان بيدفى الجو..

وبيفتّح من الزهر ازرار.

أمّا اللي من يومها بقي محتار..

أنا..

اللي من يومها بقيت محتار..

كنت شفت المَي بعيون..

من غمق اللون عم تقدح شَرَار.

بترمش؛ ويا هوى ودّي غمار..

ودّي مرحبتين وشيطنة ولاد صغار..

ودّي أوّل زهر اللوز وحنّة لون السمار.

خلقت النار بآدار..

ومن يومها كلّ عين بتبلّ الريق تسرَح منها المَيْ..

شوي.. وشوي

اللي كَفَر فيها كَفَر..

واللي عبَد قال: الله حَيْ..

الله.. جوات هالعينتين حَيْ.

...

ليلة سعيدة من سيمياء

استفقادة، تحسسك بالسكر عم يدوب بدمّك، تقوم بعدها توزّع عالكوكب قهوة حلوة على حساب الضحكة اللي زرعتلك إيّاها..

على هيك شي تتصبّح بكرة

…

سيمياء

عن فيروز مرّة أخرى:

...
* فيروز وقت ليّلِت "ياليلي" سبّقت الليل على النهار.. حتى بشهادة "الله أكبر" اللي قالها واحد من الجمهور باللحظة 3د 5ثا.. من عمر التلّييلِه إياها.

...
* زكي ناصيف وقت كتب "سحرتنا البسمات من فيه" كان عم يحكي عن ضحكة فيروز.

...
* الفجر بيطلع على لحن "يابا لالا" واللي بيقلّكُن غير هيك مابيعرف إنو هالأوان هوّ صوت الشمس.. موّ مجرّد فاصل بين عتم وضَوْ.

...
* السّما السابعة اللي بيحكوا عنها هيّي طبقة الصوت اللي وصلتلها فيروز وقت قالت "ولا قدرانة ابقى" .. حتى بشهادة : جربوا غنّوها!

...
* "صرّخ عليهُن بالشتي ياديب بلكي بيسمعوا" جملة بتسمّع الموتى بكل ما للإعجاز من معنى.

...
* فيروز غنّت "واصل علينا السفر" حرج عالغربة تحزّ بقلب حجر قدّ ماعملِت.

...
* فيروز فصل خامس للسنة بشهادة إنو "القصة مش طقس"

...
* "فتبت إلى ربي الذي قال واعداً على المؤمنين كلّ عسير يسيرُ" صدّقها. فيروز مابتكذب.

...
* أحمد شوقي كان عم يسمع "عتاب" وقت كتب "على قدرِ الهوى يأتي العتاب ومَنْ عاتبتُ يفديِه الصحابُ"

...
* "ورجال فوق الوادي برماحُن الوادي ضوي أصوات أهلي بلادي سمعتها بصوتُن هالقويْ" هي اختصار لكلّ شي ممكن تعبّر عنّه لكلّ قدّيس خلّا الدار لحد اليوم.. محميّة.

...
* متل أي مبدأ بالفيزيا أو الرياضيات مثبت علمياً: فيروز قنديلها ضاوي بلا زيت.

...
* نحنا اللي قضينا العمر صدّ وحنين ونوى ولما التقينا لقينا العمر ولّى وعَبَر.. يامركَب الريح! العمر إلو حقّه على كلّ خلق الله وهوّ بذاتُه متنازل عن حقّه لفيروز.

...
وقِسْ على ذلك...

الأندلسيات اللي أطربت فيها فيروز أكتر أهمية من كلّ فتوحات العرب بشبه الجزيرة الايبيريّة (مو هيك كان اسمها؟) " جادَك الغيث " لحالها عن كلّ دعوات الاستستقاء اللي اتْصلّت بتاريخنا. ويمكن، لو سمّعنا السما "صار المطر عالشبابيك واللي ناطرينُه رح يدقّ الباب".. تشتّي لحالها.

" ياربي ترزق ولفي ومن الغنم قطعان ومن الأصايل شي عشرة يبا ومن النسا بس آني"
تركت بنت ماغنّت خاطرها بكل بساطة هالجملة؟

"شو الدني يَبني وشو طعم الدني نّْ ما هبّشت وجّي بيدَيك الحرير"
تركت إمّ ماحكيت اللي بقلبها؟

مو أهل المَتَل اللي ماتركوا شي ماقالوه.. هي فيروز.. هي فيروز..

لسّى بعدّ؟

الحياة كذبة كبيرة لولا الحبّ والطفولة وصوت فيروز.. مانقبت راسكُن بهالجملة لسى؟

فيروز!
السمرا إم عيون وساع

اللي كذبها مش خطيّة.. بنت الشلبية..

اللي سكنت روح الرحابنة وغنِّت بروحُن..
وراحتِ ساكنة بـروحنا كلّ العمر..

هيّ أنقى صرخة سلام بعدا عايشة عالأرض

أوّل رسولة.. وآخر معجزة ❤️

...
من وأنا وصغير انطرح قدامي سؤال "ليش مابتضحك فيروز"؟ وكان الجواب إيّامها، على ذمة الراوي، إنها قالت ما بتضحك قدام وسائل الإعلام حتى تتحرر القدس..

وضليت ناطر...

ناطر حتى شفتلها مقطع صغير عم تضحك فيه انتشر على مواقع الميديا، بتوقع كتار شافوه..

أنا بحياتي ماكنت ناطر القدس تتحرر.. وبعد ماشفت هديك الضحكة، صراحة ماعاد يهمني.

...
21 نوفمبر 1935 .. 21 نوفمبر لآخر عمر التقويم..

العمر كلّه ياستّ الكلّ ❤️

سيمياء

سعيدة ياناطرة العيد بفرحة طفل ماعمَّ يكبر..

سعيدة ياكِبِر حلم مْشفّى وجع ببلاد ماعمَّ تِعمَر..

سعيدة ياعمار نفس اتكسَّرت.. اتكسَّرت، لا عالي يعلاها ولا شانها يصغَر..

سعيدة ياصغر همّ حدّ همّ..

ريتِك من حصّتي وخطيّتك بعنقود رقبتي..

لا حسنة تنكتَبلي.. ولا ذنب ينغفَر.

...

سعيدة للغاية التي لاتبررها وسيلة.. كل ليلة، من سيمياء❤️

لاتحسبوا البُعدَ يغيّر العهد إذ طالما غيّر "النعي" المُحبّين.

...
خفف سلبية قدّ مابتقدر وإذا مابتقدر جرّب لاتشاركها قدّ مافيك وإذا صار وشاركتها لاتعتب عاللي بيبعُد عنّك.

نهار طيّب من سيمياء

كم خيبة بتحتاج حتى تحيد بقى عن قيامك بشيء كنت راغب بفعلُه أو عم تفعلُه؟

عنّي؛ أنا بحاجة نيّة خيبة، سوء فهم بسيط أو حتى عفوية غير مدروسة.. كافية وزيادة

ماني بحاجة أوصل لدرجة إفرض حالي فيها على الآخر بالمكان اللي أنا عندي وقت كافِ قادر استشف فيه إننا من دوائر مختلفة تماماً.. ولو كان التشابه مخيف ببعض أوقات.

البديهيات يابطل..

لمّن تكون بديهيّاتك بحاجة مُعاملة خاصة من الآخر حتى تنفهم أو تنحَسّ أو يتّاخد فيها على إنها بديهيات.. فإنت مو بمكانك..

في أبسط من هيك؟

يمسّيك بالخير.. وإذا مسّاك بشي تاني فاعرُف إنُّه خير وإنت مو عرفان.

…

سيمياء

في عُرف العشّاق:

في بعض الأحيان والمواقف؛ أن لا تصل أبداً خيرٌ من وصولك متأخراً.. وفي الحالتين: الله لايبارك فيك ❤️

...
سيمياء

انتِ؟

بنت لحظتك، بس ما بتموتي مع الوقت..

بنت السما وكل سما مانِك نجمتها.. أرض

بنت الكَرمة وكل شَفِّة مِنّك بتدوُّخ.. أو كل شِفّة

بنت الشمس وعندك شمس صغيرة بكل عين

بنت هالزمن من وقت ما اخترعوا هالزمن لآخر الزمن

بنت العَم انتِ.. والهَوى قَمري

بنت ستّين [قلب] وقت نرفز وربّة قلبي وقت تساعيني ساعة شوق/ ضيق/ مزاج/ طيش/ مناغشة/ ملل/ فشل/ زعل أو ليل طويل استعجل ضوُّه كرهان سهري

فَتَعالي..

إذا بد ّك، إنت عندي بيطلعلك

أو تَعالي.. يا ابنة الحقل نزور كرمَة العشاق

عَلَّنا..

عَلَّنا..

عَلَّنا..

عَلَّنا نطفي بذيّاك العصير حُرقَة الأشواق

…

ليلة سعيدة من سيمياء?

في زاوية بجهنّم.. بالدرَك الأسفل أسفَل شي.. مخصصة للأشخاص اللي بيعلّقوا على طول فوق تعليقات رفقاتهم بلا دعوة ولا ترحيب!

...
السماجة، الحماقة وعادة استبدال حرف القاف بهمزة أينما وُجِد في الكتابة.. أعيت من يداويها.

سيمياء بعيد من هون