يا دنيا هاي اجروحي
مهضومه ظلت روحي

اخر انفاسي خيم محترگه بيه
ركضة التل من يجن ليلي عليه

منتظره يلفيني الگمر.....والدمعه تحچي ابعيني
والحسره عاشت بالگلب..عالفرگه تمشي اسنيني
شيبني دهري وحدبت.......نار الهجر تچويني
والعدهه راس عله الرمح......ليش الدهر
يسبيني

تانيته حامي اضعوني
محنيه حسره امتوني

كون هسه الكافل يعاين اليه
ركضة التل من يجن ليلي عليه

شتريد منطيتك گمر.......يادهري ارحم بيه
والعايشه اسهام وخيم.....تگضي العمر مسبيه
والغربه صارتلي وطن.......زينب تظل محنيه
وزعته عمري ابكربله..........لسه الچوي ابرجليه

اتمنه كون احلامي
اگعد واشوف الضامي

حسين هذا اگبالي ياروح الزجيه
ركضة التل من يجن ليلي عليه

يذبحني مرات الحچي....والونه تحني اظلوعي
مالحظه ناسيته السبي.....يشرح هضم موضوعي
والناگه چانت قصتي........اتبين عذاب ادموعي
والچانو وياها الاهل .......طفوها ليش اشموعي

اشچم مره تهوه الناگه
ابعبره وطحت خناگه

ليش لا عباس وانه اصفج بديه
ركضة التل من يجن ليلي عليه

نار المخيم ما طفت........صارت رماد اخيامي
لسه واعيش ابحسرتي....شفت المطهم دامي
والحافر الجايب صدر......ياويلي ذبح احلامي
وحسين نایم عله الگفه.....مرمي حبيبي الضامي

دمعي يسولف حاله
عشره الشفت خياله

تسحك بصدره يويلي الاعوجيه
ركضة التل من يجن ليلي عليه

شفت المثلث والچبد...... وگبالي مابطل يون
والحافر بصدره انكسر....يذبحني تاليته الحزن
لسه بأذاني چم ظلع.....بالكسره اسمعنه
يرن
وجروحي ماتنعد بعد.....ماغمض اعيونه الجفن

اصحه وافز بس خيمه
محترگه وسط والهيمه

حسين خويه اتعذب وانه برزيه
ركضة التل من يجن ليلي عليه

چم مره عانيت الهزل......والناگه تعثر بيه
اتلفت اشلونه الضعن......مثلي وهوت علويه
كل ديره مابيها رحم......تنظر عجيبه اعليه
مادنگت راسي وعلي........ربنه جعل قدسيه

ياليلي تحچي اجروحي
ميته اشكثر يا روحي

اه من طاري السبي شوغاته بيه
ركضة التل من يجن ليلي عليه

ذابحني يا ناس السبي..........ماتنسي سالفته
لاكافل اليمي حضر ....يبچي ويون يم اخته
خلصته عمري بالغرب......وشكد هضم شايفته
تاليته امشي اميسره... ..بالشام اصبح ميته

اليفگد شملهه اعزازه
مامش وراه جنّازه

وانه اريد الكافل بيوم المنيه
ركضة التل من يجن ليلي عليه

تمت بعون الله تعالى
#خادمكم........ يوسف الفتلاوي

[[ شوط كربلائي__ للسيده زينب ع]]
________________________

اتنطر  خبر  ياريت__ 
............. بلگت لو يجي العباس
اخر نظره  بعيوني __
...............يمي  ايهدئ   الأنفاس

يمي يگعد العباس
..............وانه احچيله بدموعي
يالعندك علم بالصار
..............تدري الغربه موضوعي
يالمشكر  ينور العين
....... .......مثلك طفوا  اشموعي

اناطر  لوتجي الاحباب
اعاين بس  تدك  الباب
لاچن   ايست   غياب

عشت بالحسره والآهات
..................وني ابدمعة  الاحساس

اعتب والعتب مجروح
...............لطف ابدي  مرسالي
لو بيدي  اشوف احسين
.................يمي وگاعد  اگبالي
راسه وي النحر موجود
................. ما ظن يشفه دلالي

يدري اشصاير ابحالي
غريبه ابحسرة الوالي
تعال واشاهد احوالي

زينب  والهجر  صحبان
.............غربه وشاهدتني الناس

عشره وي الجرح والآه
  ............حيلي  اتگوه واتهدم
من فزعت علينه الگوم
.............تدري ابحرك  المخيم
وانه ناشدت عباس
..............اسرع جيب المطهم

الحك خويه لصيوان
شاهد حالة  الرضعان
چنهه ارتفعت النيران

ركضت عالجمر اطفال
............حسره ابروحي ما تنقاس

كلها   ابالي   ما تبره
..............اطفي الخيمه ابيديه
من هجمت اشوف الخيل
...............سحگت بينه  علويه
لسه ابريتي الدخان
................اكتب عمري لطميه

حرت ياخويه بالأيتام
جرحي  يشرح  الأيام
انظر   هجمة الظلام

مرعوبه بصهيل الخيل
.................ليلي الطم عله الراس

عشتهه  ايامي  بالغربه
..............وحشه   ابلايه  خواني
مثل امي حنيت اظلوع
............بنيت  ابروحي  احزاني
يموت  الفاگد  الأعزاز
.............گضوا عالغبره ولياني

مصايب شافت اعيوني
ردتهم  بس  يشوفوني
هضم والنايبه امتوني

اخر لحظه من عمري
............يجيني ابرايته النوماس

آخر   حسرتي  بالشام
...............عذاب ومستمر نوحي
ردت منهم يجي جناز
..............يشيع  وني واجروحي
غريبه انه واظل ياحيف
..............فگدهم ياكل  ابروحي

عجيبه راحت الأعزاز
ولا منهم وصل  جناز
ويلي ابدفنتي  احتاز

ردتهم بس يشيعوني
.................انه ادري الگلب حساس

تمت بعون الله تعالى الشاعر___يوسف_الفتلاوي

رسم فجر السعاده اليوم اوداجه
يا محلى الفرح والليله نحتاجه
نزل جبريل بلغ بيها منهاجه

يالهادي بفاطم هنينه

نشم ريحة الجنه بفاطمه العنوان
من بابج خديجه مبين البرهان
مولود الزجيه شع على الاكوان

يزهره بحبج نادينه

يا باب الخليقه ولسمه البيبان
من عندج اخذنه الحكمه والايمان
الما واله زجيه ناقص وخسران

يتندم تالي بدنياته

يا محلى الفرح ويانه يتعاله
مولود الزجيه اطهر اسلاله
هنياله الحضر هاليله هنياله

والمحفل لزهره اليله

شملنه اليله ملتم فرحة الزهره
فرحانه الملايك كلها والعتره
ويانه الخلك بالزهره مبتشره

والهادي استبشر بنواره

تمت بعون الله
خادمكم .......يوسف الفتلاوي

مريم وساره 
جابن ابشاره

ليلة مولودك محمد تبتهج ارض وسمه

اجتمعنه بهالولاده   ونرفع   البسمه
هاي محلاها الولاده بالعرش نجمه
ياألهي  بحق  خديجه    تمم  نعمه
راضيه ومرضيه صارت ننشمل رحمه

ندعي بارينه
تعاود اعلينه

هالولاده الطاهره ندعي يربي بفاطمه

هاجر بيوم الولاده تگول مسروره
هبت الرحمه  علينه  ايه منشوره
الورد يرسم جمالج شعت ازهوره
نصيح يزهره بحنانج والله مشكوره

سورة الكوثر
نشتم  العنبر

والحواري تغازلن بالجنه عشك العالمه

فرحت ويانه الملائك جابن ابشاره
اسيا  ومريم  تهني   الهادي بنواره
بس  علي كفؤاً  لفاطم تقره بفكاره
ناده  أبراهيم   فاطم  تنطفي  ناره

ياضوه الگمره
مولد الزهره

ننثر الياس بحضرتج انتي تاج الغانمه

ربك انطاها المحمد  هاي مرضيه
بالجنان هناك چانت والله حوريه
انهُ  اعطاك  كوثر  صارت  انسيه
كلشي بالزهره  تحقق ايه قدسيه

والفرح   بادي 
استبشر الهادي

هاي صديقه وكريمه وهيه اكبر مكرمه

ياشمسنه اليوم غيبي منوره دنيانه
بضعة الهادي نبارك الشيعه فرحانه
اليوم  مهدينه  تهاني يفرح  ويانه
بالحفل  كلنه  انجمعنه  ربي ترعانه

شيعتج تفخر
ساعة المحشر

باجر نشوف الشفاعه بيج صك الخاتمه

تمت بعون الله
خادمكم...يوسف الفتلاوي

بأهاتي كسر الخاطر
يذبحني ليل العاشر
...........وبروحي ظلت حيره
يا گلبي  ليش أتكابر

ما حسبت تالي العمر ....وجروحي تاكل بيه
شيبني دهري من وكت....وخلاني اون ليليه
الفاگد  اعزاز  الكلب.........اشتم هوه بلا ريه
خلصته عمري بالبچي.......وبين سماره عليه

يا  ليلي   تشهد   نوحي
وبهمي عشت اجروحي
.............فرگاهم اشظل بيه
انتظره يرجع باچر

متعويده اگبالي الگمر.....اصحه واشوفه اگبالي
تالي الوكت بيه اشعمل.....خلاني وحدي بحالي
والحسره ميته بلا شمل....والبيت اصبح خالي
ياوكتي  ماترجع بعد............بس  ألتقي بالغالي

اشكد حلوه لو حضروني
اشبعهه  شووف اعيوني
..............يابو علي مشتاگه
مشبوحه ظل الناظر

مكسورة الخاطر اظل...بالحسره يحچي احساسي
شمس الله انت ودنيتي....محبوبي تاج  ابراسي
ياموطن احزان السمه......مخنوگه ليش انفاسي
عندي النذر اربع ولد.......هامه ويه چف عباسي

مايسوه عمري ابدونك
كلهم صبح يفدونك
................اتلاگه ويه الزهره
ونسولف اعله الناصر

اخر محطه ابدنيتي......وين اليغمض اعيوني
لا كافل الحره وصل......يمي ويشوف شلوني
والوحشه صليت القهر.....بالدمعه تهوه اجفوني
بداري المنيه استوطنت.....منتظره بس يلفوني

منتظره جيت الغالي
اگعد واشوفه اگبالي
............والحلم بس نتلاگه
چنه الحلم بي حافر

ياحيره شمعاتي انطفن......راحت عذاب اسنيني
محنيه وتلفت  صرت......بلگت اشوفه ابعيني
گدامه  اذبحله  نهر........بس كون يروه احسيني
انتظره لو مات النبض......يمسح بيدينه اجبيني

يامحله طيب انفاسه
دنك عليه عباسه
.............ربيته محلى الغيره
باب ضمه اشگد صابر

تذبحني كلمة  ما اجو.......راح العزيز ابدنيتي
چان انتظاره شكد صعب...مخنوگه وانه ابغربتي
چم حافر بصدرك گعد......ياويلي يذبح مهجتي
يحسين چم مره طحت......بالونه تشهد حسرتي

ناري وعذاب افراگه
ايست ماكو  املاگه
..........لا طارش ولا رجعه
خلوني جفني امساهر

تمت بعون الله
خادمكم........ يوسف الفتلاوي

عزبت.......بربع  زلم
ورضعتهم بس عزم

والمراجل للگمر عنوانها
●●●●●●●●●●●●●●●●●●●●●●
ابوفاضل رفع راسي بالمجد عزه اعتله
والنهر  ناده  دخيله   بيده  يگلب كربله
انه ابني بزوده يكشخ زينب اخته مدلله
بعزمي ربيت البواسل بت حزام  امعدله

عفيه زودي ابربعه
وقعوا  عالمشرعه

والمفاخر تشهد ابميدانها
●●●●●●●●●●●●●●●●●●●●●●
الله بيض وجهي بيهم وانه منطيته عهد
اربعه  لحسين فدوه  انتو يم ظهره سند
وانه وياكم  اخدمه  حسين يا يمه المدد
والحنين حسين يدري بكلبي ماغيره بعد

انه وصيت الگمر
بيده  يهديله نهر

والعراضه لو يطك بركانهه
●●●●●●●●●●●●●●●●●●●●●●
فخري بيهم راح اكتبه دونت اروع صور
والمسافه النهر يگصر بجوده ينحط النهر
خوة العباس خوه   تحچي  ذرعانه  دهر
دورت  بالدنيا كلها   ماشفت مثله   گمر

صارت الخوه سمه
تبوس چفه فاطمه

والفضائل كربله  بيبانها
●●●●●●●●●●●●●●●●●●●●●●
ذوله ولدي  بالمعاره حزام  للكلفه  رهن
وابوفاضل من خصاله هذا للخوه وطن
والفواطم بيده رايه هوه حماي الضعن
گدها معروف وگلتهه انت خيال الرسن

شمخ زوده معتلي
بهيبته يشبه علي

يا كتيبه تنهزم فرسانهه
●●●●●●●●●●●●●●●●●●●●●●
بالمحبه اشكد احثهم شفت زود ومرجله
بخزرة العباس  حادث  والنهر  مايه ابتله
زعل والعباس غاضب چنه يقره الزلزله
والعجاج اتشوف خيبر ثاني خيبر كربله

امربع الحك رجعه
يا   اصالة   منبعه

والعساكر  خورست بلسانها

تمت بعون الله تعالى الشاعر_يوسف_الفتلاوي

أبيات نعي للسيده ام البنين ع
____________________________

چني وسط  المگبره والدنيا غيمه
آه يحسين ومصابه اشگد هضيمه
حسره بعيوني الليالي كلها   هيمه
هاي زينب حايره محترگه خيمه

خاف هاشم  باليسر ناسينهه
●●●●●●●●●●●●●●●●●●●●●●
ظلمه  صارت يمه بعيوني الليالي
ماريد  البيت  عگب حسين  خالي
گاعده ومساهره ابدمعي الجرالي
حتى لو بالطيف بس يلفيني غالي

اجروح صارت دمعتي بتوطينهه
●●●●●●●●●●●●●●●●●●●●●●
يعينهه الله الوالده الفگدت شباب
حيره ابدموع الهجر  دلالي   ذاب
وانه اناطر طارش الجايب جواب
وانه خوفي حسين نايم عالتراب

وين هاشم   ما لفلتك وينهه

گلبي ينطر الكافل...........بناياي
بنيت من الهجر حزني......بناياي
راحو اربعه بالطف..........بناياي

لبو سجاد هاي اجمل هديه
●●●●●●●●●●●●●●●●●●●●●●
يوسف الفتلاوي